ÞESSI LAGALEGI SAMNINGUR Á MILLI ÞÍN OG APPLE STJÓRNAR NOTKUN ÞINNI Á iCLOUD VÖRUNNI, HUGBÚNAÐINUM, ÞJÓNUSTUNNI OG VEFSVÆÐUNUM (SEM KALLAST EINU NAFNI „ÞJÓNUSTAN“). MIKILVÆGT ER AÐ ÞÚ LESIR YFIR OG KYNNIR ÞÉR GAUMGÆFILEGA EFTIRFARANDI SKILMÁLA. ÞEGAR ÞÚ SMELLIR Á „SAMÞYKKJA“ SAMÞYKKIR ÞÚ AÐ ÞESSIR SKILMÁLAR GILDA EF ÞÚ KÝST AÐ OPNA EÐA NOTA ÞJÓNUSTUNA.

Apple veitir þjónustuna, sem gerir þér kleift að nota tiltekna internetþjónustu, þ.m.t. að geyma persónulegt efni (eins og tengiliði, dagbækur, ljósmyndir, athugasemdir, áminningar, skrár, forritagögn og iCloud-tölvupóst) og gera slíkt efni aðgengilegt á samhæfum tækjum og tölvum og tiltekinni staðsetningarbundinni þjónustu eingöngu samkvæmt skilmálunum sem koma fram í samningi þessum. iCloud verður sjálfkrafa virkt þegar tæki eru keyrð á iOS 9 eða nýrri útgáfu stýrikerfisins og þegar þú skráir þig inn með Apple-reikningnum við uppsetningu tækisins, að því undanskildu að tækið sé uppfært og ekki var áður valið að virkja iCloud. Hægt er að gera iCloud óvirkt í Stillingum. Þegar iCloud er virkt verður efnið þitt sjálfkrafa geymt af Apple á þjónum Apple eða þriðju aðila þannig að hægt sé að opna efnið eða fá efnið sent þráðlaust til annarra tækja eða tölva þar sem iCloud er virkt.

I. KRÖFUR VARÐANDI NOTKUN Á ÞJÓNUSTUNNI

          A. Aldur. Þjónustan er eingöngu í boði fyrir einstaklinga sem eru 13 ára eða eldri (eða samsvarandi lágmarksaldri í viðeigandi lögsagnarumdæmi), að því undanskildu að þú sért yngri en 13 ára og fékkst Apple-reikninginn samkvæmt beiðni viðurkenndrar menntastofnunar, eða slíku var komið í kring af foreldri eða forráðamanni sem hluta af eiginleikanum til að deila innan fjölskyldu. Við söfnum ekki vísvitandi, notum eða látum uppi persónulegar upplýsingar um börn undir 13 ára aldri eða samsvarandi lágmarksaldri viðkomandi lögsagnarumdæmis, án sannprófanlegs samþykkis foreldris.  Foreldrar og forráðamenn ættu einnig að minna ólögráða einstaklinga á að spjall við ókunnuga á internetinu getur verið hættulegt og grípa til viðeigandi varúðarráðstafana til að vernda börn, þar með talið að hafa eftirlit með notkun þeirra á þjónustunni.

Þú getur aðeins notað þjónustuna ef þú ert ekki einstaklingur sem bannað er að nota þjónustuna samkvæmt bandarískum lögum eða öðrum viðeigandi lögsagnarumdæmum, þ.m.t. í landinu sem þú dvelur eða í því landi þar sem þú notar þjónustuna. Þú ábyrgist og samþykkir áðurnefnd atriði um leið og þú samþykkir samning þennan.

          B. Tæki og reikningar. Notkun á þjónustunni krefst hugsanlega notkunar á samhæfum tækjum, nettengingar og tiltekinnar gerðar af hugbúnaði (gjöld kunna að vera innheimt) og afköst slíkra þátta geta haft áhrif á slíka notkun. Apple áskilur sér rétt til að takmarka fjölda iCloud-reikninga („reikningar“) sem stofnaðir eru í einu tæki og fjölda tækja sem tengjast einum reikningi. Hugsanlega verður að setja upp nýjustu útgáfuna af áskildum hugbúnaði til að nota tilteknar færslur eða tiltekna eiginleika. Þú samþykkir að það er á þína ábyrgð að uppfylla slíkar kröfur.

          C. Takmarkanir á notkun.  Þú samþykkir að nota þjónustuna eingöngu í þeim tilgangi sem heimilaður er samkvæmt samningi þessum og eingöngu að því marki sem gildandi lög leyfa, eða almennri og viðurkenndri venju innan viðeigandi lögsagnarumdæmis. Reikningnum þínum er úthlutað 5GB af geymslurými eins og kemur fram á eiginleikasíðum iCloud. Hægt er að kaupa aukageymslurými eins og lýst er hér að neðan. Bannað er að fara yfir viðeigandi eða hæfileg takmörk á bandvídd eða geymslurými (t.d. rými fyrir öryggisafrit eða tölvupóstsreikning) og slíkt kemur hugsanlega í veg fyrir að þú getir tekið öryggisafrit af iCloud, bætt við skrám eða tekið við nýjum tölvupósti sem berst í iCloud-netfangið þitt. Notkun þín á þjónustunni eða önnur hegðun sem vísvitandi eða óviljandi ógnar getu Apple til að veita þjónustuna eða ógnar öðrum kerfum, veitir Apple rétt til að grípa til allra viðeigandi aðgerða til að vernda þjónustuna og kerfi Apple, sem hugsanlega fela í sér að loka fyrir aðgang þinn að þjónustunni. Endurtekin brot á takmörkunum geta leitt til þess að reikningnum þínum verður lokað.

Ef þú starfar hjá heilbrigðisstofnun, ert samstarfsaðili eða fulltrúi heilbrigðisstofnunar eða samstarfsaðili heilbrigðisstofnunar (skv. skilgreiningu skilmálanna í bandarískri reglugerð 45 C.F.R § 160.103) samþykkir þú að nota engan eiginleika, enga aðgerð eða engan annan hluta iCloud til að búa til, taka við, halda við né senda „verndaðar heilsufarsupplýsingar“ (skv. skilgreiningu á hugtakinu í bandarískri reglugerð 45 C.F.R § 160.103) eða nota iCloud á nokkurn hátt sem myndi gera Apple (eða hvaða dótturfélag Apple sem er) að samstarfsaðila þínum eða þriðja aðila af hvaða toga sem er.

          D. Framboð á þjónustunni. Þjónustan eða hvaða eiginleiki eða hluti hennar sem er, er hugsanlega ekki í boði á öllum tungumálum eða í öllum löndum og Apple leggur ekki fram neinar upplýsingar um að þjónustan, né nokkurn eiginleiki eða hluti hennar sé viðeigandi eða tiltækur til notkunar á nokkurri tiltekinni staðsetningu. Þú opnar og notar þjónustuna að eigin frumkvæði og berð því ábyrgð á að fara eftir gildandi lögum.

          E. Breytingar á þjónustunni.  Apple áskilur sér rétt til að breyta þessum samningi hvenær sem er og bæta við nýjum skilmálum eða viðbótarskilmálum varðandi notkun þína á þjónustunni, að því gefnu að Apple sendi þér tilkynningu með 30 daga fyrirvara um neikvæðar efnislegar breytingar á þjónustunni eða gildandi þjónustuskilmálum, að því undanskildu að ekki væri raunhæft að gera slíkt vegna kringumstæðna er verða vegna lagalegra aðgerða, eftirlitsaðgerða eða stjórnvaldsaðgerða, til að bæta úr öryggi notanda, persónuvernd notanda eða leysa úr vandamálum varðandi tæknilegan heilleika, til að koma í veg fyrir að truflanir verði á þjónustu annarra notenda, eða vegna náttúruhamfara, stórslysa, stríðsátaka eða annarra óviðráðanlegra tilvika sem eru ekki á valdi Apple. Hvað varðar iCloud-þjónustu sem gjald er tekið er fyrir, t.d. iCloud+ eins og skilgreint er hér fyrir neðan, mun Apple ekki gera neinar neikvæðar efnislegar breytingar áður en núverandi greiðslutímabili þínu lýkur, að því undanskildu að slíkar breytingar séu hæfilega nauðsynlegar samkvæmt lagalegri aðgerð, eftirlitsaðgerð eða stjórnvaldsaðgerð, til að leysa úr öryggi notanda, persónuvernd notanda eða vandamálum varðandi tæknilegan heilleika, til að koma í veg fyrir að truflanir verði á þjónustu annarra notenda, eða til að koma í veg fyrir vandamál í kjölfar náttúruhamfara, stórslysa, stríðsátaka eða svipaðra óviðráðanlegra tilvika sem eru ekki á valdi Apple. Í tilvikum þar sem Apple gerir neikvæðar efnislegar breytingar á þjónustunni eða notkunarskilmálunum hefur þú rétt á að segja upp samningi þessum og reikningnum þínum, en í þeim tilvikum veitir Apple hlutfallslega endurgreiðslu á greiddum gjöldum eða fyrirframgreiðslum á yfirstandandi greiðslutímabili. Apple ber enga bótaskyldu gagnvart þér vegna breytinga sem kunna að verða gerðar eru á þjónustunni eða þjónustuskilmálunum samkvæmt þessum hluta I.E.

II. FORRIT OG ÞJÓNUSTA

          A. Ljósmyndir

            1.  iCloud-ljósmyndir. Þegar þú virkjar iCloud-ljósmyndir, verður öllum myndum, öllum myndskeiðum, öllum lýsigögnum og öllum breytingum sem þú gerir í forritinu Myndir á iOS-tækinu þínu, macOS-tölvunni þinni eða Windows-tölvunni þinni hlaðið upp og slíkt efni geymt á iCloud og síðan sent til allra tækja og tölva þar sem þú hefur virkjað iCloud-ljósmyndir. Upplausn ljósmynda og myndskeiða getur verið breytileg miðað við stillingar tækisins og hversu mikið geymslurými er tiltækt.  Þú átt kost á því að hlaða niður ljósmyndum og myndskeiðum í fullri upplausn hvenær sem er.

            2. Samnýtt albúm.  Þegar þú notar samnýtt albúm geymir Apple allar ljósmyndir og myndskeið sem þú samnýtir þar til þú eyðir þeim. Þú getur opnað samnýttar ljósmyndir þínar og samnýtt myndskeið á tækjum sem hafa aðgang að samnýttum albúmum. Fólk sem þú býður í samnýtt albúm getur skoðað, vistað, afritað og deilt slíkum ljósmyndum og myndskeiðum auk þess að setja sjálft inn ljósmyndir, myndskeið og athugasemdir.  Þegar þú kýst að nota samnýtt albúm til að deila ljósmyndum með veftengli, verða slíkar ljósmyndir aðgengilegar öllum þeim sem hafa fengið veftengilinn eða hafa aðgang að veftenglinum. Þú getur hvenær sem er eytt einstaka ljósmyndum, myndskeiðum, athugasemdum eða heilu samnýttu albúmi ef þú villt hætta að deila slíku efni.  Hins vegar verður efni sem áður var afritað úr samnýttu albúmi yfir á annað tæki eða aðra tölvu ekki eytt.

            3. Samnýtt myndasafn.  Ef kveikt er á iCloud-ljósmyndum geturðu búið til eða tengst einu samnýttu myndasafni með allt að fimm öðrum.  Þegar þú setur myndir eða myndbönd í samnýtt myndasafn flytjast þau úr sérsniðna safninu þínu og í samnýtta safnið. Allir þátttakendur hafa sömu heimildir til að bæta við, breyta og eyða efni í samnýtta safninu. Þátttakendur í samnýtta safninu hafa allir aðgang að efni samnýtta safnsins en efnið í samnýtta safninu telst aðeins með í iCloud-geymslukvóta þess sem bjó samnýtta safnið til.  Ef eigandi safnsins klárar iCloud-geymsluplássið sitt er ekki lengur hægt að bæta efni við samnýtta safnið og breytingar á borð við myndbreytingar, eftirlætismerkingar og lagfæringar á lýsigögnum verða ekki lengur samstilltar.  Notendur sem eru yngri en 13 ára (eða undir jafngildum lágmarksaldri í viðeigandi lögsagnarumdæmi) og eru með Apple-reikning sem foreldri eða forráðamaður stofnaði geta einungis tekið þátt í samnýttu myndasafni með öðrum fjölskyldumeðlimum.

          B. Möppu- og skráadeiling. Þegar þú notar möppu- og skráadeilingu á iCloud geymir Apple allar skrár sem þú deilir þar til þú eyðir þeim.  Þú getur opnað samnýttar skrár í öllum Apple-tækjunum þínum þegar iCloud Drive er virkt. Þú getur veitt fólki aðgang til að skoða, vista, afrita eða breyta slíkum skrám.  Þú getur veitt fólki heimild til að breyta skránum eða aðeins skoða skrárnar.  Þegar þú notar möppu- og skráadeilingu iCloud til að deila skrám með veftengli verða slíkar skrár aðgengilegar öllum þeim sem fá veftengilinn.  Þú getur hætt að samnýta skrár hvenær sem er.  Skrárnar verða fjarlægðar af iCloud Drive á tækjum allra viðkomandi aðila ef þú hættir að samnýta skrárnar. Hins vegar verður skrám sem áður voru fluttar yfir á annað tæki eða aðra tölvu ekki eytt.

          C. Mail Drop. Þegar þú ert skráð(ur) inn í iCloud og notar macOs-póstforritið eða iCloud-póstforritið á netinu til að senda tölvupóst með stórum viðhengjum áttu kost á að nota Mail Drop.  Mail Drop geymir stóru viðhengin þín tímabundið á þjónum iCloud til að auðvelda sendingu á þeim. Apple sendir annað hvort tengil eða forskoðun á viðhenginu til viðtakenda, miðað við hvaða tölvupóstforrit viðtakandinn notar. Tímabundin geymsla á stórum viðhengjum tölvupósta fellur ekki undir iCloud-stærðarheimild þína. Frekari upplýsingar um Mail Drop er að finna á https://support.apple.com/HT203093.

          D. Forrit frá þriðja aðila. Þegar þú notar iCloud-innskráningarupplýsingarnar þínar til að skrá þig inn á tiltekin forrit þriðju aðila, veitir þú slíku forriti heimild til að geyma gögn á iCloud-reikningnum þínum og veitir Apple heimild til að safna saman, geyma og vinna úr slíkum gögnum fyrir hönd þróunaraðila forrits þriðja aðilans í sambandi við notkun þína á þjónustunni og slíkum forritum. Gögnin sem forritið geymir á iCloud-reikningnum þínum falla undir stærðarheimild þína.  Slíkum gögnum er hugsanlega deilt með öðru forriti sem þú hlóðst niður frá sama þróunaraðila forrita.

          E. Deiling innan fjölskyldu. Þú getur notað stillinguna deiling innan fjölskyldu til að deila tilteknu keyptu efni eins og efni keyptu í Apple Store og Apple-áskriftum með fjölskyldumeðlimum þínum. Þú getur einnig deilt tilteknu efni eins og ljósmyndum, dagatölum, staðsetningu og upplýsingum um skjátíma, miðað við hvað fjölskyldan þín ákveður að deila.  Þú getur einnig deilt tilteknum áskriftum og kaupum í forritum frá þriðju aðilum.  Frekari upplýsingar um hvernig þú deilir keyptu efni með öðrum er að finna í skilmálum Apple Media á https://www.apple.com/legal/internet-services/itunes/ww/.  Frekari upplýsingar um hvernig á að deila efni, notkun tækisins og staðsetningarupplýsingum með fjölskyldumeðlimum er að finna á https://www.apple.com/family-sharing/.

          F. iCloud-reikningur aðeins á netinu.  Þegar þú stofnar reikning fyrir þjónustuna sem er aðeins á netinu á tæki eða tölvu sem er ekki frá Apple, færðu einungis takmarkaðan aðgang að virkni þjónustunnar. Þú færð 1 GB af ókeypis geymslurými og þú getur ekki aukið geymslurýmið ef þú notar reikning sem er aðeins á netinu. Skilyrði fyrir aðgangi þínum að þjónustunni með reikningi aðeins á netinu er að þú samþykkir alla viðeigandi skilmála í samningi þessum, þar með talið og án takmarkana, allar kröfur varðandi notkun á þjónustunni, takmarkanir á notkun, framboði, opinbera beta-útgáfu, fyrirvara vegna ábyrgða, reglur varðandi efni þitt og hegðun þína og lokun á reikningnum. Skilmálar í samningi þessum varðandi eiginleika sem ekki eru aðgengilegir notendum sem eru eingöngu á netinu munu ekki eiga við um þig. Slíkir skilmálar fjalla t.d. um notkun staðsetningartengdrar þjónustu og greiðslu á gjöldum fyrir uppfærslu á iCloud-geymslurými. Þú samþykkir enn fremur að þegar þú opnar reikning sem er aðeins á netinu í tæki eða tölvu frá Apple, hvort sem slíkt tæki eða slík tölva er í þinni eigu eður ei, hefur Apple heimild til að uppfæra sjálfkrafa reikninginn þinn sem er aðeins á netinu í heildstæðan iCloud-reikning og veita þér aðgang að allri virkni þjónustunnar, þ.m.t. að auka geymslurýmið endurgjaldslaust. Þegar þú velur að opna reikning sem er aðeins á netinu í tæki eða tölvu frá Apple og þú færð í kjölfarið uppfærslu í alla virkni þjónustunnar, samþykkir þú að allir skilmálar sem hér koma fram eigi við um notkun þína á þjónustunni. Ef þú vilt ekki vera með heildstæðan iCloud-reikning skaltu ekki skrá þig inn á reikning sem er aðeins á netinu í tæki eða tölvu frá Apple.

          G. iCloud+.  „iCloud+“ er úrvalsáskrift að iCloud sem inniheldur aðgang að viðbótargeymsluplássi og tilteknum úrvalseiginleikum.  Áskriftarleiðirnar fyrir iCloud+ eru iCloud+ áskriftir.  Þú getur fengið suma eða alla eftirfarandi eiginleika iCloud+, allt eftir kröfum á þínum stað, ef þú ert með iCloud+ áskrift eða einhver í hópnum þínum fyrir deilingu innan fjölskyldu er með iCloud+ áskrift og deilir henni með þér:

            1. Einkaendurvarpi.  Með einkaendurvarpa geturðu tengst og vafrað um internetið á lokaðri og öruggari hátt með því að dulkóða internetumferðina þína og senda hana í gegnum a.m.k. tvo internetendurvarpa.  Þegar þú notar einkaendurvarpa haga sum vefsvæði sér hugsanlega ekki sem skyldi, t.d. með því að birta efni fyrir rangt svæði eða krefjast viðbótarskrefa fyrir innskráningu.  Þú getur kveikt eða slökkt á einkaendurvarpa í stillingum iCloud hvenær sem er. Að auki getur einkaendurvarpi haft áhrif á getu internetfyrirtækisins til að undanskilja gagnanotkun þína frá gagnamörkum og getur haft í för með sér viðbótarkostnað hjá internetfyrirtækinu þínu.  Einkaendurvarpi getur verið fáanlegur sem tilraunaeiginleiki fyrst um sinn og ef svo er fellur hann undir ákvæði C-liðar VI. kafla um tilraunaeiginleika (Opinber beta-útgáfa).

             2. Fela netfangið mitt.  Fela netfangið mitt gerir þér kleift að mynda einstök, handahófskennd netföng sem framsenda á netfang að þínu vali.  Apple áskilur sér rétt til að takmarka fjölda netfanga sem eru í boði með þessum eiginleika, eða til að loka fyrir notkun á samnefni ef notkunin brýtur gegn skilmálunum sem hér koma fram.

             3. Örugg HomeKit-myndskeið.  Örugg HomeKit-myndskeið í iCloud+ gera þér kleift að geyma myndskeið úr samhæfum heimilisöryggismyndavélum í iCloud og skoða myndefni úr þeim um fjartengingu.  Örugg HomeKit-myndskeið krefjast studdrar áskriftar að iCloud+, samhæfrar öryggismyndavélar með HomeKit og HomePod, Apple TV eða iPad sem virkar sem heimilismiðstöð.  Tilteknar áskriftir að iCloud+ kunna að takmarka fjölda myndavéla eða myndstrauma sem eru í boði fyrir þig. 

             4. Sérsniðin tölvupóstslén.  Þú getur sérsniðið iCloud+ netfangið þitt með sérsniðnu lénsheiti (þegar það er í boði) og boðið fjölskyldumeðlimum að nota sama lén með iCloud-tölvupóstreikningunum sínum.  Hver og einn getur verið með allt að þrjú netföng á hverju léni.  Póstur sem er geymdur á iCloud telst með í iCloud-stærðarheimildinni þinni. Ef þú klárar iCloud-geymsluplássið geturðu ekki tekið við nýjum skeytum í sérsniðnu netföngin þín fyrr en þú útvegar meira geymslupláss.  Apple áskilur sér rétt til að neita að sérsníða iCloud-netfangið þitt með sérsniðnu lénsheiti sem er ólöglegt, inniheldur áreitni, eða er ógnandi, skaðlegt, flokkast sem skaðabótaskylt lögbrot, ærumeiðandi, niðrandi, móðgandi, ofsafengið, klámfengið, dónalegt, brýtur gegn persónuvernd annarra, illviljað, felur í sér kynþátta- eða þjóðernisfordóma eða er með öðrum hætti óþægilegt. 

             5. Apple Invites. Apple Invites gerir þér kleift að búa til, senda og hafa umsjón með viðburðarboðum. Þú verður að hafa náð 13 ára aldri (eða sambærilegum lágmarksaldri viðeigandi lögsagnarumdæmis) til að halda viðburð með Apple Invites. Þú getur búið til sameiginlega möppu (Shared Album) eða sameiginlegan spilunarlista (Shared Playlist) fyrir viðburðin sem gestir, sem taka þátt í viðburðinum, geta opnað og bætt efni í, svo lengi sem gestirnir eru með Apple aðgang (Apple Account) og, í tilviki sameiginlegra spilunarlista, áskrift að Apple Music.

Sumir eiginleikar iCloud+ eru ekki tiltækir í öllum löndum eða á öllum svæðum. 

          H. Tveggja þátta sannvottun og sjálfvirkar hringingar/sjálfvirk textaskilaboð. Ef þú velur að virkja tveggja þátta sannvottun fyrir Apple-reikninginn þinn, samþykkir þú að (a) láta Apple í té a.m.k. eitt símanúmer og (b) taka á móti sjálfvirkum eða áteknum hringingum og textaskilaboðum frá Apple í öll símanúmerin sem þú lætur í té. Við hringjum hugsanlega slík símtöl eða sendum slík textaskilaboð í því skyni að (i) tryggja öryggi reikningsins þíns við innskráningu (ii) aðstoða þig við að opna reikninginn þinn þegar þú hefur gleymt aðgangsorðinu þínu eða til að fylgja samningi þessum, stefnum okkar, gildandi lögum eða öðrum samningi sem við höfum gert við þig eftir.

          I. Hjálp með endurheimt reiknings.  Þú getur bætt við einum eða fleiri einstaklingum sem endurheimtartengiliðum sem geta notað tækið sitt til að mynda kóða sem hjálpar þér að fá aftur aðgang að reikningnum og gögnunum þínum.  Endurheimtartengiliðurinn verður að vera 13 ára eða eldri (eða hafa náð samsvarandi lágmarksaldri í viðkomandi lögsagnarumdæmi), vera með Apple-reikning, tveggja þátta sannvottun og Apple-tæki með aðgangskóða fyrir tæki virkan.  Viðkomandi fær ekki beinan aðgang að reikningnum þínum.  Það er á þína ábyrgð að halda endurheimtartengiliðunum þínum uppfærðum.

          J. Ítarleg gagnavernd. Með ítarlegri gagnavernd getur þú virkjað notkun á samfelldri dulkóðun til að fá aukna vernd fyrir fleiri gagnaflokka í iCloud, þar á meðal iCloud-öryggisafrit, myndir, glósur og skrár sem geymt er í iCloud Drive. Til að virkja ítarlega gagnavernd þarftu að hafa virkjað tvíþætta staðfestingu fyrir Apple-reikninginn og traust tæki (tæki þar sem þú hefur skráð þig inn á reikninginn þinn með tvíþættri staðfestingu) fyrir þann reikning með virkjuðum aðgangskóða eða aðgangsorði. Að auki þarftu að búa til endurheimtarlykil eða tilgreina að minnsta kosti einn endurheimtartengilið fyrir reikninginn til að aðstoða þig við að fá aftur aðgang að reikningnum þínum og gögnum, ef þú skyldir gleyma aðgangsorðinu að reikningnum, ert ekki með aðgang að neinum traustum tækjum og ef þú hefur gleymt aðgangskóðum eða aðgangsorðum tækisins. Þú getur breytt endurheimtartengiliðunum þínum hvenær sem er, en þeir þurfa að vera eldri en 13 ára (eða sambærilegur lágmarksaldur þar sem tengiliðurinn býr), vera með Apple-reikning með virkjaðri tvíþættri staðfestingu og eiga Apple-tæki þar sem búið er að stilla aðgangskóða eða aðgangsorð. Apple getur ekki aðstoðað þig við að endurheimta gögn sem varin eru með ítarlegri gagnavernd þegar hún hefur verið virkjuð, svo það er á þína ábyrgð að gæta öryggis endurheimtarlykilsins og/eða tryggja að upplýsingar um endurheimtartengiliði séu uppfærðar. Apple ber ekki ábyrgð á því ef þú getur ekki fengið aðgang að reikningnum þínum eða gögnum vegna þess að þú hefur glatað endurheimtarlyklinum eða vegna þess að endurheimtartengiliðurinn er ófær eða óviljugur til að aðstoða þig við að fá aðgang að reikningnum þínum og gögnum. Ekki er hægt að nota ítarlega gagnavernd fyrir Apple-reikninga í umsjón annarra og barnareikninga. Þú getur slökkt á ítarlegri gagnavernd hvenær sem er.

          K. Öryggislyklar. Öryggislyklar gera þér kleift að óska eftir því að áþreifanlegur öryggislykill sé notaður til að skrá þig inn með Apple-reikningnum. Öryggislyklar krefjast þess að tvíþætt staðfesting sé virk fyrir Apple-reikninginn og að annar af þessum tveimur þáttum sé FIDO-vottaður öryggislykill frá þriðja aðila. Öryggislykill gerir þér kleift að nota traust tæki til að bæta við nýjum lykli eða slökkva alfarið á öryggislyklum til að halda aðgangi að reikningnum þínum. Ef þú hefur hins vegar glatað öllum öryggislyklunum þínum og trausta tækinu muntu missa aðgang að reikningnum þínum varanlega og Apple getur ekki aðstoðað þig við að endurheimta aðgang að reikningnum þínum eða gögnum. Apple ber ekki ábyrgð á því ef þú getur ekki fengið aðgang að reikningnum þínum eða gögnum vegna þess að þú hefur glatað öryggislyklunum þínum eða ef öryggislyklarnir bila. Ekki er hægt að nota öryggislykla fyrir Apple-reikninga í umsjón annarra og barnareikninga.

          L. Stafræn arfleifð.  Með stafrænni arfleifð geturðu valið að bæta við einum eða fleiri tengiliðum sem geta fengið aðgang að og sótt tiltekin gögn á reikningnum þínum eftir andlát þitt.  Ef tilgreindir tengiliðir þínir færa sönnur á andlát þitt hjá Apple og eru með nauðsynlegan lykil fá þeir sjálfkrafa aðgang að þessum tilteknu reikningsgögnum og virkjunarlás verður tekinn af öllum tækjunum þínum.  Það er því á þína ábyrgð að halda tengiliðunum þínum fyrir stafræna arfleifð uppfærðum.  Nánari upplýsingar um stafræna arfleifð eru á http://support.apple.com/HT212360 og  http://support.apple.com/HT212361.   

          M. Notkun á staðsetningartengdri þjónustu

Apple og samstarfsaðilar þess kunna að bjóða upp á tiltekna eiginleika eða þjónustu sem byggist á staðsetningartengdum upplýsingum með GPS-tækni (eða svipaðri tækni, þegar hún er tiltæk) og hópunum Wi-Fi-aðgangsstöðum og farsímamöstrum. Í því skyni að veita slíka eiginleika og þjónustu, þegar slíkt er tiltækt, verða bæði Apple og samstarfsaðilar þess að safna, nota, senda, vinna úr og halda við staðsetningargögnum þínum, meðal annars um landfræðilega staðsetningu tækisins þíns og upplýsingar er varða reikninginn þinn og öll önnur tæki sem skráð eru á reikninginn, meðal annars Apple-reikninginn þinn, auðkenni og heiti tækisins og gerð tækisins.

Þú getur hvenær sem er afturkallað samþykki þitt fyrir því að Apple, samstarfsaðilar þess eða leyfishafar noti, sendi, vinni úr og haldi við staðsetningar- og reikningsupplýsingunum þínum með því að nota ekki staðsetningartengda eiginleika og slökkva á stillingunni „Find My“ (þ.m.t. eldri útgáfur forritsins „Find My iPhone“ og „Find My Friends“ sem eru kölluð einu nafni „Find My“) eða staðsetningarþjónustu (eins og við á) í tækinu þínu. Þegar notuð er þjónusta þriðja aðila sem notar eða veitir staðsetningargögn sem hluta af þjónustunni, verður þú að hlíta skilmálum og persónuverndarstefnu þriðja aðilans sem um ræðir og þú ættir að kynna þér notkun slíkrar þjónustu þriðja aðila á staðsetningargögnum. Ekki skal reiða sig á nein staðsetningargögn sem þjónustan veitir við aðstæður þar sem krafist er nákvæmra upplýsinga um staðsetningu eða þegar röng, ónákvæm, tímatafin eða ófullkomin staðsetningargögn geta valdið dauða, líkamstjóni, eignatjóni eða umhverfistjóni. Apple skal veita þjónustuna með hæfilegri gætni og færni, en hvorki Apple né þjónustuveitur og/eða efnisveitur þess ábyrgjast framboð, nákvæmni, heilleika, áreiðanleika eða rétta tímasetningu staðsetningargagna né annarra gagna sem þjónustan birtir. STAÐSETNINGARTENGD ÞJÓNUSTA ER HVORKI ÆTLUÐ NÉ HENTUG TIL NOTKUNAR SEM NEYÐARSTAÐSETNINGARKERFI.

          N. Find My

Þegar þú virkjar iCloud og staðsetningarþjónustuna á tæki sem keyrir á iOS 13, iPad OS eða macOS Catalina eða nýrri útgáfum, virkjast stillingin Find My (Find My iPhone á tækjum sem keyra á iOS 8 til iOS 12) sjálfkrafa á tækinu sem um ræðir og öllum aukabúnaði frá Apple sem tengdur er við tækið.  Þegar stillingin er virk verður tækið þitt sjálfkrafa tengt við Apple-reikninginn þinn og slá verður inn Apple-reiknings-aðgangsorðið áður en nokkur (þ.m.t. þú) getur slökkt á stillingunni Find My, skráð út úr iCloud, eytt af eða kveikt á tækinu.  Apple og heimiluðum fulltrúum þess er bannað að veita stoðþjónustu fyrir vél- eða hugbúnað, þ.m.t. þjónustu sem fellur undir takmarkaða ábyrgð Apple, nema að þú slökkvir á Find My stillingunni áður en þjónustan er veitt.  Apple ber enga ábyrgð á því ef þú hirðir ekki um að verja iOS-tækið þitt með aðgangskóða, kveikir ekki á stillingunni „Tapað“ og/eða tekur ekki á móti eða bregst ekki við tilkynningum og samskiptum.  Apple ber auk þess enga ábyrgð á því að koma iOS-tækinu til þín né ber nokkra ábyrgð á gagnatapi á iOS-tækinu þínu.

Find My Network er hópvinnslueiginleiki sem getur aðstoðað þig og aðra við að finna tæki sem hafa týnst, þegar slík tæki eru utankerfis. Þegar Find My Network er virkt í tæki getur tækið greint nærveru nálægra tækja sem eru utankerfis um Bluetooth (eða með svipaðri tækni). Þegar tæki greinir týnt tæki utankerfis, notar það Wi-Fi- eða farsímatengingar til að tilkynna um staðsetningu tækisins á öruggan hátt til Apple-reikningsins sem tengdur er við tækið þannig að eigandinn geti séð staðsetningu tækisins í Find My-forritinu. Tilkynningar um staðsetningu eru sendar með tvíhliða dulritun og Apple getur hvorki séð staðsetningu tækisins sem sendir slíka tilkynningu né önnur tæki utankerfis. Hægt er að slökkva á Find My Network í stillingunum.

          O. Öryggisafrit

iCloud tekur reglulega öryggisafrit á sjálfvirkan hátt í iOS-tækjum þegar skjálás tækisins er virkur, þegar tækið er tengt við aflgjafa og tengt við netið um Wi-Fi-tengingu. Þegar iCloud hefur ekki tekið öryggisafrit á eitt hundrað og áttatíu daga tímabili (180) áskilur Apple sér rétt til að eyða öllum öryggisafritum sem tengjast tækinu sem um ræðir. Öryggisafrit geta falið í sér stillingar tækisins, einkenni tækisins, ljósmyndir og myndskeið, skrár, skilaboðin þín, hringitóna, gögn frá heilsuforriti og önnur forritagögn. Nánari upplýsingar er að finna á https://support.apple.com/HT207428.  Eftirfarandi efni er ekki innifalið í öryggisafritun iCloud: efni sem keypt er í iTunes Store, App Store eða Apple Books, efni sem er samstillt úr tölvunni þinni og myndasafnið þitt ef þú hefur kveikt á „iCloud Photo Library“. Apple skal veita þjónustuna með hæfilegri gætni og færni, en SAMKVÆMT ÞVÍ UMFANGI SEM GILDANDI LÖG FREKAST VEITA MUN APPLE HVORKI ÁBYRGJAST NÉ TRYGGJA AÐ NOKKURT EFNI SEM ÞÚ HUGSANLEGA GEYMIR EÐA OPNAR Í GEGNUM ÞJÓNUSTUNA VERÐI EKKI FYRIR ÓTILÆTLUÐUM SKEMMDUM, SPILLINGU, TAPI EÐA EYÐINGU SAMKVÆMT SKILMÁLUM SAMNINGS ÞESSA OG APPLE BER ENGA ÁBYRGÐ EF SLÍKAR SKEMMDIR, SPILLING, TAP EÐA EYÐING EIGA SÉR STAÐ. Þú berð ábyrgð á því að gera viðeigandi aukaöryggisafrit af upplýsingunum og gögnunum þínum.

III. UPPFÆRSLUR Á ÁSKRIFT

iCloud+ áskriftirnar eru í boði gegn gjaldi í áskrift.

          A. Greiðsla

Þegar þú uppfærir í iCloud+ áskriftarþjónustuna til að fá meira geymslurými og viðbótareiginleika tekur Apple sjálfkrafa gjald með reglulegu millibili fyrir áskriftina sem þú valdir, þ.m.t. viðeigandi skatta, samkvæmt greiðslumátanum sem tengist Apple-reikningnum þínum (t.d. greiðslumátanum sem þú notar við að versla í iTunes Store, App Store eða Apple Books, þegar slík þjónusta er tiltæk) eða greiðslumátann sem tengist fjölskyldureikningnum þínum. Frekari upplýsingar um áskriftir og verð er að finna á https://support.apple.com/HT201238.  Þú samþykkir að Apple notar valinn greiðslumáta til að skuldfæra með reglulegu millibili fyrir uppfærslur fjölskyldumeðlima á áskriftinni sinni, ef þú hefur hlutverkið „Family organizer“. Apple biður hugsanlega um fyrirfram samþykki fyrir upphæð sem nemur upphæð færslunnar og hefur reglulega samband við þig um tölvupóst í netfangið sem tengist Apple-reikningnum þínum varðandi greiðsluáminningar og önnur samskipti er áskriftarreikninginn varða.

Þú getur breytt áskriftinni þinni með því að uppfæra eða niðurfæra áskriftina þína í hlutanum um iCloud í stillingum tækisins þíns, eða fyrir neðan iCloud-gluggann í kjörstillingum kerfisins í Mac-tölvunni þinni eða iCloud fyrir Windows í PC-tölvunni þinni.

Viðeigandi gjald fyrir uppfærða áskrift tekur umsvifalaust gildi; niðurfærslur á áskriftinni þinni öðlast gildi við næstu árlegu eða mánaðarlegu greiðsludagsetningu. ÞÚ BERÐ ÁBYRGÐ Á ÞVÍ AÐ GREIÐA ÖLL GJÖLD Á RÉTTUM TÍMA OG LÁTA APPLE Í TÉ GILT KREDITKORT EÐA UPPLÝSINGAR UM GILDAN GREIÐSLUREIKNING TIL GREIÐSLU Á ÖLLUM GJÖLDUM. Þegar Apple er ekki fært að skuldfæra gjöld sem eru til greiðslu á kreditkortið þitt eða greiðslureikninginn þinn áskilur Apple sér rétt til að afturkalla eða takmarka aðgang þinn að efninu sem þú geymir, eyða efninu sem þú geymir eða loka reikningnum þínum. Ef þú vilt nota annað kreditkort eða annan greiðslureikning eða ef breytingar verða á stöðu kreditkortsins eða greiðslureikningsins þíns, verður þú að breyta upplýsingum þínum á netinu í hlutanum um reikningsupplýsingar á iCloud, en slíkt mun hugsanlega valda truflun á aðgangi þínum að þjónustunni á meðan Apple staðfestir nýju greiðsluupplýsingarnar þínar. Við höfum hugsanlega samband við þig með tölvupósti varðandi reikninginn þinn vegna ýmissa ástæðna, þ.m.t. án takmarkana þegar þú nærð eða ferð yfir mörk geymslurýmis valinnar áskriftar.

Þrátt fyrir allt framangreint, gildir eftirfarandi ef þú ert í Brasilíu:

Hvað gjöld varðar sem Apple rukkar þig um, fær Apple hugsanlega samstarfsfyrirtæki til að innheimta og greiða allar hugsanlegar upphæðir sem þú skuldar í sambandi við iCloud-reikninginn þinn.  Þar að auki innifelur heildarverðið þitt verðið á uppfærslunni auk allra viðeigandi kreditkortagjalda. Þú berð ábyrgð á að greiða alla viðeigandi skatta fyrir utan alla viðeigandi staðgreiðsluskatta sem samstarfsfyrirtæki Apple innheimtir. Þú verður að láta Apple allar nauðsynlegar reikningsupplýsingar í té til að framkvæma slíkar færslur. Þú viðurkennir og samþykkir að ef þú lætur ekki allar áskildar reikningsupplýsingar í té, hefur Apple rétt til að loka reikningnum þínum.

          B. Uppsagnarréttur

Þegar þú kýst að segja upp áskriftinni þinni eftir upphaflegu kaupin, eða ef þú ert með árlega áskrift í kjölfar endurnýjunar áskriftar, geturðu gert slíkt með því að láta Apple vita með skýrri yfirlýsingu og hafa samband við þjónustuver (frekari upplýsingar um viðeigandi netföng er að finna í hlutanum „Almennt“ hér fyrir neðan) innan 14 daga frá því þú fékkst staðfestinguna í tölvupósti. Þú þarft ekki að tilgreina neina ástæðu fyrir uppsögninni.

Þú verður að senda inn uppsögnina áður en 14 daga fresturinn er liðinn til að fylgja uppsagnarfrestinum.

Viðskiptavinir innan ESB og í Noregi hafa einnig rétt á að senda okkur tilkynningu með því að nota staðlaða uppsagnareyðublaðið hér fyrir neðan:

Til:  Apple Distribution International Ltd., Hollyhill Industrial Estate, Hollyhill, Cork, Írlandi:

Ég segi hér með upp samningi mínum um eftirfarandi:

[ÁSKRIFT OG TÍMABIL, t.d. UPPFÆRSLA Á iCLOUD+ ÁSKRIFT Í 200 GB Á MÁNUÐI]

Pantað þann [FÆRIÐ INN DAGSETNINGU]

Nafn notanda

Heimilisfang notanda

Dagsetning

Afleiðingar uppsagnar

Við minnkum geymslurýmið þitt aftur niður í 5 GB og endurgreiðum þér ekki síðar en 14 dögum frá þeim degi sem við tökum á móti uppsagnarbeiðninni þinni. Ef þú hefur notað meira en 5 GB á því tímabili getur þú hugsanlega ekki tekið fleiri öryggisafrit á iCloud eða notað tiltekna eiginleika þar til þú hefur dregið úr geymslurýminu þínu. Við notum sama greiðslumáta og þú notaðir fyrir færsluna og þú greiðir ekki frekari gjöld fyrir slíka endurgreiðslu.

IV. Notkun þín á þjónustunni

          A. Reikningurinn þinn

Þú verður að stofna reikning sem skráður notandi þjónustunnar. Ekki láta öðrum í té reikningsupplýsingar þínar. Þú berð fulla ábyrgð á að viðhalda trúnaði og gæta öryggis innskráningarupplýsinga fyrir reikninginn þinn og öllum aðgerðum sem geta orðið á eða vegna reikningsins þíns, og þú samþykkir að láta Apple umsvifalaust vita ef grunur leikur á öryggisbroti varðandi reikninginn þinn. Þú viðurkennir og samþykkir ennfremur að þjónustan er hönnuð og ætluð til persónulegra nota á einstaklingsgrundvelli og þú ættir ekki að deila reikningsupplýsingunum þínum og/eða aðgangsorðinu þínu með öðrum einstaklingi. Að því gefnu að Apple hafi veitt þjónustuna með hæfilegri gætni og færni, skal Apple ekki bera ábyrgð á neinu tjóni sem verður vegna óheimillar notkunar á reikningnum þínum sem kemur til vegna þess að þú fylgdir ekki þessum reglum.

Þú verður að slá inn Apple-reikninginn þinn og aðgangsorðið til að sannvotta reikninginn til að þú getir notað þjónustuna. Þú samþykkir að láta í té nákvæmar og tæmandi upplýsingar þegar þú skráir þig hjá okkur og um leið og þú notar þjónustuna („skráningarupplýsingar fyrir þjónustuna“) og þú samþykkir einnig að uppfæra skráningarupplýsingar þjónustunnar til að halda þeim nákvæmum og tæmandi. Verði misbrestur á því að láta í té nákvæmar, núverandi og tæmandi skráningarupplýsingar fyrir þjónustuna getur slíkt valdið því að reikningurinn þinn verði stöðvaður eða honum verði lokað. Þú samþykkir að Apple sé heimilt að geyma og nota skráningarupplýsingarnar fyrir þjónustuna sem þú lætur í té til að halda við og skuldfæra gjöld fyrir reikninginn þinn.

          B. Notkun á öðrum vörum eða annarri þjónustu frá Apple

Tilteknir hlutar eða eiginleikar þjónustunnar sem Apple og/eða leyfishafar þess veita, þ.m.t. en takmarkast ekki við, að geta hlaðið niður efni sem keypt var áður og iTunes Match og/eða tónlistarsafni iCloud (gjöld eru innheimt), krefjast notkunar á sérstakri gerð af hugbúnaði eða öðrum leyfissamningum eða notkunarskilmálum. Þú verður að lesa, viðurkenna og samþykkja að vera bundin(n) af slíkum aðskildum samningi af hvaða toga sem er, sem skilyrði fyrir notkun á tilteknum hlutum eða eiginleikum þjónustunnar.

          C. Enginn flutningur

Ekkert í þessum samningi skal líta á sem flutning til þín á hlutdeild, titli eða leyfi í Apple-reikning, netfangi, lénsheiti, iChat ID eða svipuðum tilföngum sem þú notar í sambandi við þjónustuna.

          D. Enginn varðveisluréttur

Utan þess sem leyft er samkvæmt stafrænni arfleifð og nema annað sé áskilið samkvæmt gildandi lögum samþykkir þú að reikningurinn þinn sé óyfirfæranlegur og öll réttindi þín til Apple-reikningsins eða efnisins á reikningnum þínum falli niður við andlát þitt. Við móttöku á dánarvottorði verður hægt að loka reikningnum þínum og eyða öllu efninu af reikningnum þínum. Hafið samband við þjónustuver iCloud á https://support.apple.com/icloud til að fá frekari aðstoð.

          E. Engin endursala á þjónustu

Þú samþykkir að þú munir ekki endurgera, afrita, fjölfalda, selja, endurselja, leigja eða stunda viðskipti með þjónustuna (né nokkurn hluta hennar) í nokkrum tilgangi.

V. Efni og hegðun þín

          A. Efni

„Efni“ á við um upplýsingar af öllum toga sem búa má til eða finna til við notkun á þjónustunni, eins og gagnaskrár, eiginleika tækja, skrifaðan texta, hugbúnað, tónlist, grafík, ljósmyndir, myndefni, hljóð, myndskeið, skilaboð og annað efni í þeim dúr. Þú gerir þér grein fyrir að allt efni, hvort sem það er birt opinberlega eða sent í einkaskilaboðum með þjónustunni er algjörlega á ábyrgð þess einstaklings sem bjó til efnið sem um ræðir. Slíkt hefur í för með sér að þú, en ekki Apple, berð alla ábyrgð á öllu efni sem þú hleður upp, hleður niður, birtir, sendir með tölvupósti, sendir út, geymir eða gerir á annan hátt tiltækt við notkun þína á þjónustunni. Þú gerir þér grein fyrir að við notkun á þjónustunni kannt þú að sjá efni sem þér finnst móðgandi, ósæmilegt eða óþægilegt og þú getur útsett aðra fyrir efni sem þeim finnst óþægilegt. Apple stjórnar hvorki efninu sem er birt við notkun á þjónustunni, né ábyrgist nákvæmni, heilleika eða gæði á slíku efni. Þú gerir þér grein fyrir og samþykkir að notkun þín á þjónustunni og öllu efni hennar er alfarið á eigin ábyrgð.

          B. Hegðun þín

Þú samþykkir að þú munir EKKI nota þjónustuna til að:

1. hlaða upp, hlaða niður, birta, senda með tölvupósti, senda út, geyma, deila, flytja inn eða gera efni á annan hátt aðgengilegt sem er ólöglegt, inniheldur áreitni, eða er ógnandi, skaðlegt, flokkast sem skaðabótaskylt lögbrot, ærumeiðandi, niðrandi, móðgandi, ofsafengið, klámfengið, dónalegt, brýtur gegn persónuvernd annarra, illviljað, felur í sér kynþátta- eða þjóðernisfordóma eða er með öðrum hætti óþægilegt;

2. sitja um aðra, áreita aðra, ógna öðrum eða skaða aðra;

3. taka þátt í hvers kyns athöfnum sem misnotar, skaðar eða ógnar börnum á nokkurn hátt, þar með talið án takmarkana að framleiða, deila, hlaða upp eða geyma efni með kynferðisofbeldi gegn börnum, efni til að misnota börn eða annað efni sem er skaðlegt börnum;

4. ef þú ert fullorðinn, að biðja ólögráða einstakling sem þú þekkir ekki um persónulegar upplýsingar eða aðrar upplýsingar (eða hvern þann einstakling sem er yngri en 18 ára eða ólögráða einstakling samkvæmt gildandi lögum), þ.m.t. en takmarkast ekki við eitthvað af eftirfarandi atriðum: fullt nafn eða eftirnafn, heimilisfang, póstnúmer, símanúmer, ljósmynd eða heiti skóla ólögráða einstaklings, kirkju, íþróttafélags eða nöfn vina,

5. þykjast vera einhver annar einstaklingur eða lögaðili sem þú ert ekki — þér er bannað að villa á þér heimildir eða ljúga að öðrum að þú sért annar einstaklingur en þú ert (þ.m.t. frægt fólk), annar lögaðili, annar notandi iCloud, starfsmaður Apple eða yfirmaður fyrirtækis eða forystumaður í ríkisstjórn, eða að öðru leyti ljúga til um tengsl þín við einstaklinga eða lögaðila (Apple áskilur sér rétt til að hafna eða loka fyrir alla Apple-reikninga eða netföng sem gætu flokkast sem eftirlíkingar eða teljast vera óréttmæt notkun á nafni eða auðkenni annarra einstaklinga),

6. eiga hlut í höfundarréttabrotum eða öðrum brotum á hugverkaréttindum (þ.m.t. að hlaða upp efni sem þú hefur ekki rétt á að hlaða upp) eða ljóstra upp um viðskiptaleyndarmál eða trúnaðarupplýsingar sem eru brot á trúnaði, trúnaðarstörfum eða trúnaðarsamningi,

7. birta, senda, senda út eða að öðru leyti gera aðgengilegt á óumbeðinn eða óleyfilegan hátt tölvupóstskeyti, auglýsingar, kynningarefni, ruslpóst eða keðjubréf, þ.m.t. án takmarkana, auglýsingar í stórum stíl og upplýsingatilkynningar,

8. falsa TCP-IP-pakkahausa eða einhvern hluta af upplýsingunum er koma fram í haus tölvupósts eða fréttahópsfærslu, eða á annan hátt koma upplýsingum fyrir í haus sem ætlað er að blekkja viðtakendur um uppruna efnisins sem sent er í gegnum þjónustuna („senda í nafni annars“).

9. hlaða upp, birta, senda tölvupóst, senda út, geyma eða gera efni aðgengilegt á annan hátt sem inniheldur vírusa eða tölvukóða, skrár eða forrit sem skaða, trufla eða takmarka venjulega notkun á þjónustunni (eða nokkrum hluta hennar) eða nokkurn annan tölvuhugbúnað eða -vélbúnað.

10. trufla eða raska þjónustunni (þ.m.t. að opna þjónustuna á hvaða sjálfvirka hátt sem er, eins og með forskriftum eða vefskriðlum) eða nokkrum öðrum þjónum eða netkerfum er tengjast þjónustunni eða nokkrum stefnum, kröfum eða lögum er gilda um netkerfi sem tengjast þjónustunni (þ.m.t. óheimill aðgangur af hvaða toga sem er til að nota eða fylgjast með gögnum eða umferð sem þar er að finna),

11. skipuleggja eða leggja stund á ólöglega starfsemi af nokkrum toga, og/eða

12. safna saman og geyma persónulegar upplýsingar um nokkra aðra notendur þjónustunnar til notkunar við óheimilu aðgerðirnar sem lýst er hér á undan.

          C. Efni fjarlægt

Apple notar kerfi og ferla sem eru í samræmi við reglur, eins og lýst er hér að neðan í E-hluta, til að fjarlægja snarlega aðgang að ólöglegu efni þegar Apple er gert viðvart eða verður vart við ólöglegt efni í þjónustunni. Þó að Apple hafi þróað þessar öryggisráðstafanir, þá samþykkir þú, nema slíkt sé tekið sérstaklega fram í þessum samning eða nauðsynlegt samkvæmt viðeigandi lögum, að Apple beri enga ábyrgð né er bótaskylt á nokkurn hátt gagnvart þér vegna efnis sem aðrir leggja til og ber engin skylda til að fylgjast með slíku efni. Hins vegar áskilur Apple sér rétt til að ákvarða hvort efni sé löglegt, viðeigandi og sé samkvæmt samningi þessum og hefur heimild til að skoða, færa, hafna, breyta og/eða fjarlægja efni hvenær sem er, án fyrirvara og að eigin vild ef slíkt efni reynist brjóta gegn viðeigandi lögum, samningi þessum eða er að öðru leyti óviðeigandi.

          D. Taktu öryggisafrit af efninu þínu

Þú berð ábyrgð á því að taka öryggisafrit í tölvunni þinni eða í öðru tæki af mikilvægum skrám, myndefni eða öðru efni sem þú geymir eða opnar í gegnum þjónustuna. Apple skal veita þjónustuna með hæfilegri gætni og færni, en Apple ábyrgist hvorki né tryggir að efni sem þú geymir eða opnar í gegnum þjónustuna verði ekki fyrir ótilætluðum skemmdum, spillingu eða tapi.

          E. Aðgangur að reikningi og efni

Apple áskilur sér rétt til þess að beita öllum þeim aðferðum sem Apple metur nauðsynlegar eða viðeigandi til að framfylgja samningnum og/eða sannprófa að honum sé fylgt í hvívetna. Þú viðurkennir og samþykkir að Apple er heimilt, án bótaábyrgðar gagnvart þér, að opna, nota, geyma og/eða birta reikningsupplýsingarnar þínar og hvers kyns efni löggæsluyfirvöldum, opinberum starfsmönnum og/eða þriðja aðila eins og Apple telur vera hæfilega nauðsyn til eða vera viðeigandi, ef slíks er krafist samkvæmt lögum eða ef Apple telur í góðri trú að slíkur aðgangur, slík notkun, birting eða varðveisla sé hæfilega nauðsynleg til að: (a) bregðast við málarekstri eða beiðni, (b) framfylgja samningi þessum, þ.m.t. rannsókn á hugsanlegu samningsbroti, (c) greina, koma í veg fyrir eða á annan hátt bregðast við vandamálum varðandi öryggi, svik eða tæknileg vandamál, eða (d) verja réttindi, eignir eða öryggi Apple, notenda þess, þriðja aðila eins og lög mæla fyrir um eða leyfa. Apple hefur þróað kerfi og ferli sem vernda notendur gegn ólöglegu efni sem Apple kann að beita í þjónustunni. Slík ferli kunna að innihalda lokun fyrir virkni og stýringar á deilingu efnis á milli notenda og eru hönnuð til að lágmarka þann tíma sem alvarlegt, ólöglegt efni, þar á meðal efni sem felur í sér kynferðislega misnotkun og ofbeldi í garð barna, kann að vera til staðar í þjónustunni. Þú samþykkir að Apple ber enga ábyrgð né er bótaskylt á nokkurn hátt vegna efnis sem aðrir leggja til og ber engin skylda til að fylgjast með slíku efni, nema slíkt sé tekið sérstaklega fram í viðeigandi lögum. Hins vegar áskilur Apple sér, í samræmi við persónuverndarstefnu Apple, rétt til að ákvarða hvort efni sé löglegt, viðeigandi og sé samkvæmt samningi þessum og hefur heimild til að forskoða, færa, hafna, breyta og/eða fjarlægja efni hvenær sem er, án fyrirvara og að eigin vild, ef slíkt efni reynist brjóta gegn lögum eða samningi þessum, er skaðlegt börnum eða er að öðru leyti óviðeigandi.

          F. Yfirlýsing um höfundarrétt - DMCA

Hafðu samband við höfundarréttarfulltrúa Apple ef þú telur að efni notanda þjónustunnar brjóti á höfundarrétti þínum, eins og kemur fram í höfundarréttarstefnu okkar á https://www.apple.com/legal/trademark/claimsofcopyright.html. Apple hefur að eigin vild heimild til að stöðva og/eða eyða reikningum þeirra notenda sem ítrekað verða uppvísir að brotum.

          G. Brot gegn samningi þessum

Þegar þú finnur efni við notkun á þjónustunni sem þú telur vera óviðeigandi, telur efnið vera ólöglegt eða skaðlegt börnum eða telur efni brjóta gegn samningi þessum áttu kost á að senda okkur tilkynningu um slíkt í tölvupósti á abuse@iCloud.com.

          H. Efni sem þú sendir inn eða gerir tiltækt í þjónustunni

1. Leyfi frá þér. Apple krefst ekki eignarhalds á því innihaldi og/eða efni sem þú sendir inn eða gerir tiltækt í þjónustunni, að undanskildu því efni sem við veitum þér leyfi fyrir. Þegar þú hins vegar sendir inn eða birtir slíkt efni á þeim svæðum þjónustunnar sem eru aðgengileg almenningi eða öðrum notendum sem þú samþykkir að deila slíku efni með, veitir þú Apple um leið alþjóðlegt, gjaldfrjálst, almennt leyfi til að nota, dreifa, endurgera, breyta, aðlaga, birta, þýða, spila opinberlega og birta opinberlega slíkt efni í þjónustunni aðeins í þeim tilgangi sem slíkt efni var upphaflega sent inn eða gert aðgengilegt, án nokkurrar greiðslu til þín eða skuldbindingar við þig. Þú samþykkir að allt efni sem þú sendir inn eða birtir sé algjörlega á þína ábyrgð, það brjóti hvorki gegn né gangi á rétt annarra lögaðila eða brjóti gegn lögum af hvaða toga sem er, leiði ekki til né hvetji til lögbrota eða að öðru leyti ólöglegrar hegðunar, eða sé að öðru leyti móðgandi, óviðeigandi eða ósmekklegt. Þegar þú sendir inn eða birtir efni á svæðum þjónustunnar sem eru aðgengileg almenningi eða öðrum notendum, lýsir þú um leið yfir að þú sért eigandi efnisins sem um ræðir og/eða hafir öll nauðsynleg réttindi, leyfi og samþykki til að dreifa slíku efni.

2. Breytingar á efni. Þú gerir þér grein fyrir að til að veita þjónustuna og til að gera efnið þitt þar aðgengilegt, sendir Apple hugsanlega efnið þitt um almenningsnet af ýmsum toga, á mismunandi geymslumiðlum og lagar eða breytir efnið þitt til að uppfylla tæknilegar kröfur tengdra neta eða tækja eða tölva. Þú samþykkir að leyfið sem hér er veitt heimili Apple að grípa til slíkra aðgerða af hvaða toga sem er.

3. Upplýsingar um vörumerki. Apple, Apple-merkið, iCloud, iCloud-merkið og önnur vörumerki Apple, þjónustumerki, grafík og lógó sem eru notuð í tengslum við þjónustuna eru vörumerki eða skráð vörumerki Apple Inc. í Bandaríkjunum og/eða í öðrum löndum. Hægt er að nálgast lista yfir öll vörumerki Apple hér - https://www.apple.com/legal/trademark/appletmlist.html. Önnur vörumerki, þjónustumerki, grafík og lógó sem notuð eru í tengslum við þjónustuna eru hugsanlega vörumerki viðkomandi eigenda. Þér er hvorki veittur réttur né leyfi af neinum toga til að nota áðurnefnd vörumerki og samþykkir ennfremur að þú munir ekki fjarlægja, dylja né breyta tilkynningum um eignarhald (þ.m.t. tilkynningum um vörumerkjarétt og höfundarrétt) sem fylgja með eða felast í þjónustunni.

VI. Hugbúnaður

          A. Eignarréttur Apple. Þú viðurkennir og samþykkir að Apple og/eða leyfishafar þess hafa allan lagalegan rétt, allt tilkall til og allan hag af þjónustunni, þ.m.t. en takmarkast ekki við grafík, notandaviðmót, forskriftir og hugbúnað sem notaður er til að innleiða þjónustuna og allan hugbúnað sem þér er látinn í té sem hluta af og/eða í sambandi við þjónustuna („hugbúnaðinn“), þar á meðal öll hugverkaréttindi af öllum toga sem þar er að finna, hvort sem þau eru skrásett eður ei og hvar svo sem í heiminum þau kunna að finnast. Þú samþykkir ennfremur að þjónustan (þ.m.t. hugbúnaðurinn eða hvaða annar hluti hennar sem er) innihaldi einkaleyfis- og trúnaðarupplýsingar sem njóta verndar viðeigandi laga um hugverkarétt og annarra laga, þ.m.t. en takmarkast ekki við höfundarrétt. Þú samþykkir að þú munir ekki nota slíkar einkaleyfisupplýsingar eða -efni í nokkrum öðrum tilgangi en til notkunar í þjónustunni samkvæmt samningi þessum. Bannað er að endurgera nokkurn hluta þjónustunnar á hvers kyns sniði eða í hvers kyns tilgangi, nema að því leyti sem er sérstaklega heimilt samkvæmt skilmálum þessum.

          B. Leyfi frá Apple. ÖLL NOTKUN Á HUGBÚNAÐINUM EÐA EINHVERJUM HLUTA ÞJÓNUSTUNNAR SEM ER FRÁBRUGÐIN HEIMILLI NOTKUN Á ÞJÓNUSTUNNI SAMKVÆMT SAMNINGI ÞESSUM ER STRANGLEGA BÖNNUÐ OG BRÝTUR GEGN HUGVERKARÉTTINDUM ANNARRA OG GETUR LEITT TIL REFSINGA FYRIR ÞIG SAMKVÆMT EINKARÉTTI OG REFSIRÉTTI, ÞAR MEÐ TALIÐ HUGSANLEGRA SKAÐABÓTA VEGNA BROTA Á HÖFUNDARÉTTI.

          C. Opinber beta-útgáfa. Apple býður endrum og sinnum upp á nýja og/eða uppfærða eiginleika þjónustunnar („tilraunaeiginleika“) sem hluta af áætlun um opinberar beta-útgáfur („áætlunin“) til að Apple geti fengið endurgjöf varðandi gæði og nytsemi tilraunaeiginleikanna. Þú gerir þér grein fyrir og samþykkir að þú tekur þátt í áætluninni af fúsum og frjálsum vilja og slík þátttaka býr ekki til lagalegt samband, lagalegt umboð né ráðningarsamband á milli þín og Apple og Apple ber enga skyldu til að sjá þér fyrir tilraunaeiginleikum af nokkrum toga. Apple kann að gera slíka tilraunaeiginleika aðgengilega þátttakendum í áætluninni í gegnum netbókun eða skráningu í þjónustunni. Þú gerir þér grein fyrir og samþykkir að Apple kann að safna saman og nota upplýsingar af reikningnum þínum, tækjum og jaðarbúnaði til að skrá þig í áætlun og/eða ákvarða hvort þú uppfyllir skilyrði fyrir þátttöku. Þú gerir þér grein fyrir að um leið og þú skráir þig í áætlun er hugsanlega ekki hægt að snúa aftur í eldri útgáfu af tilteknum tilraunaeiginleika. Þegar hægt er að snúa aftur í eldri útgáfu, er hugsanlega ekki hægt að flytja gögn sem búin voru til með tilraunaeiginleikanum yfir í eldri útgáfuna. Notkun þín á tilraunaeiginleikunum og þátttaka þín í áætluninni fellur undir samning þennan og alla aðra leyfisskilmála sem hugsanlega fylgja tilraunaeiginleikunum á aðskilinn hátt. Tilraunaeiginleikarnir eru látnir í té „EINS OG ÞEIR KOMA FYRIR“ og „Í SAMRÆMI VIÐ FRAMBOГ og innihalda hugsanlega villur og skekkjur sem gætu valdið bilunum, skemmdum eða tapi á gögnum og/eða upplýsingum í tækinu þínu og jaðarbúnaði (þ.m.t. án takmarkana, netþjónum og tölvum) sem þeim tengjast. Apple mælir eindregið með að þú takir öryggisafrit af öllum gögnum og upplýsingum á tækinu þínu og öllum jaðarbúnaði áður en þú tekur þátt í einhverri áætlun. Þú viðurkennir sérstaklega og samþykkir að öll notkun á tilraunaeiginleikunum sé á þína ábyrgð. ÞÚ BERÐ ALLA ÁBYRGÐ OG STENDUR STRAUM AF ÖLLUM KOSTNAÐI VARÐANDI ÞÁTTTÖKU ÞÍNA Í ÁÆTLUNUM AF HVAÐA TOGA SEM ER, ÁN TAKMARKANA, ÖLLUM GJÖLDUM VEGNA INTERNETAÐGANGS, KOSTNAÐI VIÐ NOTKUN Á TÆKINU ÞÍNU OG JAÐARBÚNAÐI OG ÖLLUM SKEMMDUM SEM VERÐA Á BÚNAÐI, HUGBÚNAÐI, UPPLÝSINGUM EÐA GÖGNUM AF HVAÐA TOGA SEM ER. Apple veitir þér hugsanlega tæknilega aðstoð og/eða aðra aðstoð við notkun á tilraunaeiginleikunum. Öll hugsanleg aðstoð verður til viðbótar við hefðbundna aðstoð fyrir þjónustuna og verður einungis í boði í sambandi við áætlunina. Þú verður að samþykkja að fara að öllum reglum eða stefnum sem gilda um þjónustuna sem Apple veitir þér til að njóta góðs af slíkri aðstoð. Apple áskilur sér rétt til að breyta skilmálum, skilyrðum eða stefnum áætlunarinnar (þ.m.t. að hætta við áætlunina) hvenær sem er með eða án fyrirvara og getur hvenær sem er afturkallað þátttöku þína í áætluninni. Þú samþykkir að Apple ber enga skyldu til að útvega almenna útgáfu af tilraunaeiginleikunum og skyldi slík almenn útgáfa koma út, gæti hún haft aðra eiginleika eða virkni er komu fram í tilraunaeiginleikunum. Apple mun sem hluta af áætluninni veita þér tækifæri til að senda inn athugasemdir, tillögur eða aðra endurgjöf varðandi notkun þína á tilraunaeiginleikunum. Þú samþykkir að Apple sé frjálst að nota alla endurgjöf frá þér í hvaða tilgangi sem er, að því undanskildu að aðskilinn skriflegur samningur liggi fyrir um annað.

          D. Útflutningstakmarkanir. Notkun á þjónustunni og hugbúnaðinum, þ.m.t. flutningur, birting eða upphleðsla á gögnum, hugbúnaði eða öðru efni um þjónustuna fellur hugsanlega undir inn- og útflutningslög í Bandaríkjunum og öðrum löndum. Þú samþykkir að fara eftir öllum gildandi lögum og reglugerðum um inn- og útflutning. Einkum, en án takmarkana, má ekki flytja hugbúnaðinn út eða endurútflytja: (a) til landa sem Bandaríkin hafa lagt viðskiptabann á, eða (b) til nokkurs lands sem er á þjóðernisbannlista bandaríska fjármálaráðuneytisins (U.S. Treasury Department’s list of Specially Designated Nationals) eða á lista bandaríska viðskiptaráðuneytisins yfir einstaklinga í banni (U.S. Department of Commerce’s Denied Person’s List) eða á aðilalista (Entity List). Um leið og þú notar hugbúnaðinn eða þjónustuna ábyrgist þú og tryggir að þú ert ekki staðsettur í slíku landi eða sért á slíkum lista. Þú samþykkir einnig að þú munt ekki nota hugbúnaðinn eða þjónustuna í neinum tilgangi sem bandarísk lög banna, þ.m.t. án takmarkana, þróun, hönnun, smíði og framleiðsla á flugskeytum og kjarnorkuvopnum, efnavopnum eða sýklavopnum. Þú samþykkir ennfremur að hlaða hvorki inn á reikninginn þinn gögnum né hugbúnaði sem: (a) heyra undir alþjóðleg lög um viðskipti með vopn, eða (b) er bannað að flytja út án fenginnar skriflegrar heimildar frá stjórnvöldum, þ.m.t. en takmarkast ekki við, dulritunarhugbúnað og upprunakóða, án þess að afla slíkrar heimildar fyrst. Þetta loforð og þessi skuldbinding skal halda gildi sínu við uppsögn þessa samnings.

          E. Uppfærslur. Apple uppfærir hugsanlega hugbúnað þjónustunnar af og til. Slíkum uppfærslum er hugsanlega hlaðið niður sjálfkrafa og þær settar upp sjálfkrafa á tækinu þínu eða tölvunni þinni til að þú getir haldið áfram að nota þjónustuna. Slíkar uppfærslur geta innihaldið villuleiðréttingar, umbætur á eiginleikum eða endurbætur eða algjörlegar nýjar útgáfur af hugbúnaðinum.

VII. Riftun

          A. Þú riftir samningnum af eigin vilja

Þú getur eytt Apple-reikningnum þínum og/eða hætt að nota þjónustuna hvenær sem er. Þegar þú vilt hætta notkun á iCloud á tækinu þínu getur þú gert iCloud óvirkt í tækinu með því að opna Stillingarnar í tækinu, pikka á iCloud og pikka á „Útskráningu“. Hafðu samband við þjónustuver Apple ef þú vilt láta loka reikningnum þínum og eyða Apple-reikningnum þínum á https://support.apple.com/contact. Þegar þú lokar reikningnum og eyðir Apple-reikningnum þínum færðu ekki lengur aðgang að öðrum vörum og þjónustu á vegum Apple og þriðja aðila sem þú settir upp með umræddum Apple-reikning. Hugsanlega verður ekki hægt að afturkalla slíka aðgerð. Engin gjöld sem þú hefur reitt af hendi verða endurgreidd (nema annað sé skýrt heimilað samkvæmt samningi þessum), þ.m.t. fyrirframgreidd gjöld á yfirstandandi reikningsári þegar þú lokar reikningnum þínum. Lokun á reikningnum þínum afléttir ekki skyldu þinni að greiða uppsafnaðar þóknanir eða uppsöfnuð gjöld.

          B. Riftun af hálfu Apple

Apple getur hvenær sem er, við tilteknar kringumstæður og án frekari fyrirvara, umsvifalaust lokað eða stöðvað allan eða hluta af reikningnum þínum og/eða aðgang þinn að þjónustunni. Ástæður fyrir slíkri riftun skulu m.a. vera eftirfarandi: (a) brot á samningi þessum eða öðrum stefnum eða leiðbeiningum sem hér er vísað til og/eða birtast í þjónustunni, (b) beiðni frá þér um að hætta við eða loka reikningnum þínum, (c) beiðni og/eða skipun frá löggæsluyfirvöldum, dómsyfirvöldum eða öðrum opinberum stofnunum, (d) þegar tiltekinn skilmáli þjónustunnar er eða verður ólöglegur, (e) ófyrirséð vandkvæði eða vandamál varðandi tækni og öryggi, (f) þátttaka þín í sviksamlegum eða ólöglegum verknuðum, eða (g) þú greiðir ekki gjöld sem þú skuldar í tengslum við þjónustuna, að því gefnu að ekki sé um efnislegt brot sé að ræða og Apple hafi aðeins heimild til lokunar eftir að hafa veitt þér a.m.k. 30 daga fyrirvara og aðeins ef þú hefur ekki komist fyrir brotið á slíkum 30 daga fresti. Apple hefur heimild til að framkvæma slíkar lokanir eða stöðvanir að eigin vild og Apple ber enga bótaábyrgð gagnvart þér né nokkrum þriðja aðila vegna tjóns sem gæti orðið eða verður vegna slíkrar lokunar eða stöðvunar á reikningnum þínum og/eða aðgangi þínum að þjónustunni. Apple er þar að auki heimilt að loka reikningnum þínum eftir að hafa veitt þér a.m.k. 30 daga fyrirvara með tölvupósti í netfangið sem tengist reikningnum þínum ef (a) reikningurinn hefur verið óvirkur í eitt (1) ár, eða (b) verið er að loka þjónustunni almennt eða einhverjum hluta hennar. Tilkynning um almenna lokun á þjónustunni verður send eins og tilgreint er í þessum samningi, að því undanskildu að ekki væri raunhæft að framkvæma slíkt vegna kringumstæðna er verða vegna lagalegra aðgerða, eftirlitsaðgerða eða stjórnvaldsaðgerða, til að bæta úr öryggi notanda, persónuvernd notanda eða leysa úr vandamálum varðandi tæknilegan heilleika, til að koma í veg fyrir að truflanir verði á þjónustu annarra notenda, eða vegna náttúruhamfara, stórslysa, stríðsátaka eða annarra óviðráðanlegra tilvika sem eru ekki á valdi Apple. Apple veitir þér hlutfallslega endurgreiðslu á greiddum gjöldum eða fyrirframgreiðslum á yfirstandandi greiðslutímabili ef slík lokun á sér stað. Apple ber enga bótaskyldu gagnvart þér fyrir hvers konar breytingar sem gerðar eru á þjónustunni eða þjónustuskilmálunum samkvæmt þessum hluta VIIB.

          C. Áhrif riftunar

Þegar reikningnum þínum er lokað, missir þú hugsanlega aðgang þinn að þjónustunni og öllum hlutum hennar, þ.m.t. en takmarkast ekki við, reikningnum þínum, Apple-reikningnum, tölvupóstsreikningnum og efninu þínu. Apple mun þar að auki eyða vistuðum upplýsingum og gögnum af reikningnum/reikningunum þínum eftir tiltekinn tíma. Einnig verður þeim hlutum þjónustunnar eytt sem þú notaðir og féllu undir aðra hugbúnaðarleyfissamninga, í samræmi við skilmála slíkra hugbúnaðarleyfissamninga.

VIII. Tenglar og annað efni frá þriðja aðila

Tiltekið efni, tilteknir hlutar eða tilteknir eiginleikar þjónustunnar innihalda hugsanlega efni frá þriðju aðilum og/eða tengla á önnur vefsvæði, önnur tilföng eða annað efni. Vegna þess að Apple hefur hugsanlega enga stjórn á slíkum vefsvæðum og/eða slíku efni þriðju aðila, viðurkennir þú og samþykkir að Apple ber enga ábyrgð á framboði slíkra svæða eða tilfanga og skrifar hvorki upp á né ábyrgist nákvæmni slíkra svæða eða tilfanga og skal ekki á neinn hátt bera bótaskyldu né ábyrgð á efni, auglýsingum, vörum eða efni er birtast eða eru í boði á slíkum svæðum eða tilföngum. Þú viðurkennir og samþykkir ennfremur að Apple ber hvorki ábyrgð né bótaskyldu af neinum toga vegna tjóns sem þú verður fyrir eða segist hafa orðið fyrir, annað hvort á beinan eða óbeinan hátt, vegna notkunar og/eða vegna þess að þú treystir slíku efni, auglýsingum, vörum eða efni sem birtast eða eru í boði á slíkum svæðum eða tilföngum.

IX. FREKARI FYRIRVARAR VEGNA ÁBYRGÐA OG TAKMÖRKUN BÓTAÁBYRGÐAR

TILTEKIN LÖGSAGNARUMDÆMI LEYFA EKKI ÚTILOKUN Á TILTEKNUM ÁBYRGÐUM SEM SLÍKUM AÐ ÞVÍ LEYTI SEM SLÍKAR ÚTILOKANIR ERU SÉRSTAKLEGA BANNAÐAR SAMKVÆMT GILDANDI LÖGUM OG ÞVÍ GETUR VERIÐ AÐ SUMAR AF NEÐANGREINDUM ÚTILOKUNUM EIGI EKKI VIÐ UM ÞIG. TIL DÆMIS, FYRIR NEYTENDUR Í ÁSTRALÍU ER EKKERT Í ÞESSU LEYFI SEM HEFUR ÁHRIF, NÉ ER ÆTLAÐ AÐ HAFA ÁHRIF Á LÖGLEG RÉTTINDI ÞÍN SAMKVÆMT ÁSTRÖLSKUM NEYTENDULÖGUM (ÞAR Á MEÐAL NEYTENDAÁBYRGÐIR).

APPLE SKAL VEITA ÞJÓNUSTUNA MEÐ HÆFILEGRI GÆTNI OG FÆRNI. EFTIRFARANDI FYRIRVARAR EIGA VIÐ UM ÞESSA SKILGREINDU ÁBYRGÐ.

APPLE HVORKI ÁBYRGIST NÉ FULLYRÐIR AÐ NOTKUN ÞÍN Á ÞJÓNUSTUNNI VERÐI TRUFLANA- EÐA VILLULAUS OG ÞÚ SAMÞYKKIR AÐ APPLE KANN ÖÐRU HVERJU AÐ FJARLÆGJA ÞJÓNUSTUNA Í ÓTAKMARKAÐAN TÍMA, EÐA HÆTTA VIÐ ÞJÓNUSTUNA SAMKVÆMT SKILMÁLUM ÞESSA SAMNINGS.

ÞÚ SKILUR OG SAMÞYKKIR FYLLILEGA AÐ ÞJÓNUSTAN ER VEITT „EINS OG HÚN KEMUR FYRIR“ og „Í SAMRÆMI VIÐ FRAMBOГ. APPLE OG HLUTDEILDARFÉLÖG, DÓTTURFYRIRTÆKI, YFIRMENN, STJÓRNENDUR, STARFSFÓLK, UMBOÐSMENN, SAMSTARFSAÐILAR OG LEYFISHAFAR ÞESS FRÍA SIG ALLRI ÁBYRGÐ, BEINNI EÐA ÓBEINNI, Þ.M.T. EN TAKMARKAST EKKI VIÐ, ÓBEINA ÁBYRGÐ OG SKILYRÐI ER VARÐA SÖLUHÆFI, NOTAGILDI Í ÁKVEÐNUM TILGANGI OG HELGI EINKARÉTTAR. SÉR Í LAGI VEITIR HVORKI APPLE NÉ HLUTDEILDARFÉLÖG, DÓTTURFYRIRTÆKI, YFIRMENN, STJÓRNENDUR, STARFSFÓLK, UMBOÐSMENN, SAMSTARFSAÐILAR OG LEYFISHAFAR ÞESS ÁBYRGÐ Á (I) ÞVÍ AÐ ÞJÓNUSTAN UPPFYLLI KRÖFUR ÞÍNAR, (II) AÐ NOTKUN ÞÍN Á ÞJÓNUSTUNNI VERÐI TÍMANLEG, TRUFLANALAUS, ÖRUGG OG VILLULAUS, (III) AÐ HVERSKONAR UPPLÝSINGAR SEM ÞÚ AFLAR MEÐ ÞJÓNUSTUNNI SÉU NÁKVÆMAR EÐA ÁREIÐANLEGAR; OG (IV) AÐ LAGFÆRINGAR EIGI SÉR STAÐ Á HVERSKONAR GÖLLUM EÐA VILLUM Í HUGBÚNAÐINUM SEM ÞÉR ER LÁTINN Í TÉ SEM HLUTI AF ÞJÓNUSTUNNI.

APPLE HVORKI FULLYRÐIR NÉ ÁBYRGIST AÐ ÞJÓNUSTAN VERÐI LAUS VIÐ TAP, SKEMMDIR, ÁRÁSIR, VÍRUSA, TRUFLANIR, TÖLVUÁRÁSIR EÐA AÐRAR ÖRYGGISINNRÁSIR OG APPLE AFSALAR SÉR ALLRI ÁBYRGÐ HVAÐ SLÍKT VARÐAR.

ÖLLU EFNI SEM ER HLAÐIÐ NIÐUR EÐA ER FENGIÐ MEÐ ÖÐRUM HÆTTI MEÐ NOTKUN Á ÞJÓNUSTUNNI ER Á ÞÍNA EIGIN ÁBYRGÐ OG ÁHÆTTU OG ÞÚ BERÐ ALLA ÁBYRGÐ Á ÖLLU TJÓNI Á TÆKINU ÞÍNU EÐA GAGNATAPI SEM FYLGIR NIÐURHALI Á ÖLLU SLÍKU EFNI. ÞÚ SAMÞYKKIR ENNFREMUR AÐ ÞJÓNUSTAN ER HVORKI ÆTLUÐ TIL NÉ HENTAR TIL NOTKUNAR VIÐ AÐSTÆÐUR EÐA Í UMHVERFI ÞAR SEM BILANIR EÐA TÍMATAFIR, EÐA VILLUR EÐA ÓNÁKVÆMNI Í EFNINU, GÖGNUNUM EÐA UPPLÝSINGUNUM SEM ÞJÓNUSTAN VEITIR, GÆTU LEITT TIL DAUÐA, LÍKAMSTJÓNS EÐA VALDIÐ ALVARLEGU EIGNA- EÐA UMHVERFISTJÓNI.

          TAKMÖRKUN BÓTAÁBYRGÐAR

TILTEKIN LÖGSAGNARUMDÆMI HEIMILA EKKI ÚTILOKUN EÐA TAKMÖRKUN ÁBYRGÐAR ÞJÓNUSTUVEITNA. AÐ ÞVÍ LEYTI SEM SLÍKAR ÚTILOKANIR EÐA TAKMARKANIR ERU SÉRSTAKLEGA BANNAÐAR SAMKVÆMT GILDANDI LÖGUM, EIGA HUGSANLEGA EINHVERJAR AF ÞEIM TAKMÖRKUNUM EÐA ÚTILOKUNUM SEM KOMA FRAM HÉR Á EFTIR EKKI UM ÞIG.

APPLE SKAL VEITA ÞJÓNUSTUNA MEÐ HÆFILEGRI GÆTNI OG FÆRNI. EFTIRFARANDI TAKMARKANIR GILDA EKKI UM TJÓN VEGNA (A) MISTAKA APPLE VIÐ AÐ BEITA HÆFILEGRI GÆTNI OG FÆRNI, (B) ALVARLEGRAR VANRÆKSLU, VÍSVITANDI MISFERLIS EÐA SVIKA AÐ HÁLFU APPLE, EÐA (C) DAUÐA EÐA LÍKAMSTJÓNS.

ÞÚ SKILUR OG SAMÞYKKIR FYLLILEGA AÐ APPLE OG HLUTDEILDARFÉLÖG, DÓTTURFYRIRTÆKI, YFIRMENN, STJÓRNENDUR, STARFSFÓLK, UMBOÐSMENN, SAMSTARFSAÐILAR OG LEYFISHAFAR ÞESS BERA ENGA ÁBYRGÐ GAGNVART ÞÉR VARÐANDI BEINT, ÓBEINT, TILFALLANDI, SÉRSTAKT, AFLEITT EÐA REFSIVERT TJÓN, ÞAR MEÐ TALIÐ EN TAKMARKAST EKKI VIÐ, TJÓN VEGNA HAGNAÐARTAPS, TAPS Á VIÐSKIPTAVILD, GÖGNUM, KOSTNAÐI VIÐ ÚTVEGUN VÖRU EÐA ÞJÓNUSTU TIL VARA, EÐA ANNAÐ ÓEFNISLEGT TJÓN (JAFNVEL ÞEGAR APPLE HEFUR VERIÐ UPPLÝST UM MÖGULEIKANN Á SLÍKU TJÓNI) SEM VERÐUR TIL VEGNA: (I) NOTKUNAR EÐA VANHÆFIS TIL NOTKUNAR Á ÞJÓNUSTUNNI (II) BREYTINGA SEM GERÐAR ERU Á ÞJÓNUSTUNNI EÐA TÍMABUNDINNI EÐA VIÐVARANDI STÖÐVUN Á ÞJÓNUSTUNNI EÐA EINHVERJUM HLUTA HENNAR, (III) ÓHEIMILUM AÐGANGI AÐ EÐA ÓHEIMILUM BREYTINGUM Á SENDINGUM EÐA GÖGNUM ÞÍNUM, (IV) EYÐINGAR, SPILLINGAR EÐA VANGETU TIL AÐ GEYMA OG/EÐA SENDA EÐA TAKA Á MÓTI SENDINGUM EÐA GÖGNUM ÞÍNUM Í EÐA UM ÞJÓNUSTUNA, (V) YFIRLÝSINGAR EÐA HEGÐUNAR HVAÐA ÞRIÐJA AÐILA SEM ER Á ÞJÓNUSTUNNI, OG (VI) ÖLL ÖNNUR MÁL ER ÞJÓNUSTUNA VARÐA.

EIGI JAPÖNSK LÖG UM NEYTENDASAMNINGA VIÐ, ÞRÁTT FYRIR ÖNNUR ÁKVÆÐI Í ÞESSUM SAMNINGI, GILDA ÁKVÆÐI SEM TAKMARKA ÁBYRGÐ APPLE VEGNA TJÓNS SEM HLÝST AF SAMNINGSBROTI EÐA SKAÐABÓTASKYLDU APPLE EKKI EF SLÍKT TJÓN STAFAR AF VÍSVITANDI MISFERLI EÐA GRÓFU GÁLEYSI APPLE.

          SKAÐABÆTUR

Þú samþykkir að verja, tryggja og halda Apple og hlutdeildarfélögum, dótturfyrirtækjum, yfirmönnum, stjórnendum, starfsfólki, umboðsmönnum, samstarfsaðilum og leyfishöfum þess frá öllum bótakröfum eða kröfum þriðja aðila, að meðtöldum sanngjörnum lögfræðikostnaði, sem lagðar eru fram í tengslum við eða vegna eftirfarandi: (a) allt efni sem þú sendir inn, birtir, sendir út eða gerir aðgengilegt á annan hátt um þjónustuna, (b) notkun þína á þjónustunni, (c) brota af öllu tagi gegn þessum samningi, (d) öllum aðgerðum sem Apple grípur til vegna rannsóknar sinnar á grunuðu broti á þessum samningi eða vegna niðurstöðu eða ákvörðunar um að brot á samningi þessum hafi átt sér stað, eða (e) brot þín gegn réttindum annarra. Slíkt merkir að þú getur ekki lögsótt Apple, hlutdeildarfélög, dótturfyrirtæki, yfirmenn, stjórnendur, starfsfólk, umboðsmenn, samstarfsaðila og leyfishafa þess vegna ákvörðunar um að fjarlægja eða hafna því að vinna úr upplýsingum eða efni af hvaða toga sem er, vara þig við, loka fyrir eða rifta aðgangi þínum að þjónustunni, þaðan af síður getur þú gripið til annarra aðgerða á meðan rannsókn á grunuðu broti stendur yfir eða vegna niðurstöðu Apple að brot hafi átt sér stað á þessum samningi. Þetta afsal réttinda og skilmáli um skaðleysi á við um öll brot sem lýst er eða gert er ráð fyrir í þessum samningi. Slík skuldbinding skal halda gildi sínu eftir að þessi samningi er rift eða eftir að hann rennur út og/eða þegar þú hættir að nota þjónustuna. Þú viðurkennir að þú berð ábyrgð á allri notkun á þjónustunni með reikningnum þínum og að þessi samningur eigi við alla notkun þína af öllum toga á reikningnum þínum. Þú samþykkir að hlíta þessum samningi og verja, tryggja og halda Apple frá öllum bótakröfum eða kröfum sem lagðar eru fram vegna notkunar þinnar á reikningnum þínum, hvort sem þú hefur veitt yfirlýst samþykki þitt fyrir slíkri notkun eður ei.

X. ALMENNT

          A. Tilkynningar

Apple kann að senda þér tilkynningar varðandi þjónustuna, þ.m.t. í sambandi við breytingar á þessum samningi, með tölvupósti á iCloud-netfangið þitt (og/eða önnur netföng sem tengjast reikningnum þínum, ef þau eru lögð í té), iMessage, eða með textaskilaboðum, með venjulegum pósti eða birta þær á vefsvæði okkar og/eða í þjónustunni.

Ef þú ert á Indlandi skaltu, skv. „reglum um upplýsingatækni frá 2021“ (reglur fyrir milliliði), bera kvörtun þína upp við eftirfarandi fulltrúa kvörtunardeildar:

Vegna mála sem falla undir „reglur fyrir milliliði“ (Intermediary Guidelines):

Fulltrúi kvörtunardeildar:  Nikhil Pai

Vefeyðublað:  Apple.co/IndiaGrievanceIntermediaries

Mikilvæg ábending:

Takið eftir að eingöngu kvörtunum sem falla undir reglur um upplýsingatækni frá 2021 (Intermediary Guidelines), sem lúta að iCloud, verður beint til tenglanna í vefeyðublað fulltrúa kvörtunardeildar.

          B. Gildandi lög

Nema annað sé skýrt tekið fram í eftirfarandi efnisgrein skal þessi samningur og samband þitt og Apple falla undir lög Kaliforníuríkis, án tillits til lagaskilareglna þess. Bæði þú og Apple samþykkið að gangast undir lögsögu dómstóla Santa Clara-héraðs í Kaliforníu til að leysa úr öllum ágreiningi eða kröfum vegna þessa samnings. Í tilvikum þar sem (a) þú ert ekki bandarískur ríkisborgari, (b) býrð ekki í Bandaríkjunum, (c) þú opnar ekki þjónustuna í Bandaríkjunum og (d) ert ríkisborgari í einum af löndunum sem koma fram hér að neðan, samþykkir þú hér með að hvers konar ágreiningur eða krafa vegna þessa samnings fellur undir gildandi lög sem tilgreind eru hér fyrir neðan, án tillits til lagaskilareglna þeirra, og þú gengst hér með skilyrðislaust undir almenna lögsögu dómstóla þess lands, héraðs eða sýslu sem kemur fram hér á eftir og lúta eftirfarandi lögum:

Ef þú ert borgari Evrópusambandsins eða breskur, svissneskur, norskur eða íslenskur ríkisborgari, skulu gildandi lög og dómstóll falla undir lögin og dómstólana þar sem þú hefur heimilisfesti.

Ef þú ert japanskur ríkisborgari, skulu gildandi lög vera japönsk lög og dómstólinn skal vera í Tókýó, Japan.

Sérlega undanskilin frá þessum samningi er sáttmáli Sameinuðu þjóðanna um sölu á vöru á milli ríkja.

          C. Heildstætt samkomulag

Þessi samningur felur í sér heildstætt samkomulag á milli þín og Apple, stjórnar allri notkun þinni á þjónustunni og kemur að öllu leyti í stað fyrri samninga sem voru gerðir á milli þín og Apple hvað þjónustuna varðar. Hugsanlega gengst þú undir frekari skilmálar þegar þú notar þjónustu samstarfsaðila, efni frá þriðja aðila eða hugbúnað frá þriðja aðila. Þegar einhver hluti þessa samnings telst vera ógildur eða óframkvæmanlegur, skal endurskoða þann hluta samkvæmt gildandi lögum, til að sá hluti sem um ræðir endurspegli eins og frekast er unnt upprunalegar fyrirætlanir viðkomandi aðila og aðrir hlutar samningsins skulu halda gildi sínu. Misbrestir af hálfu Apple við að nýta sér réttindi eða að framfylgja ákvæðum þessa samnings teljast ekki afsölun á slíkum rétti eða ráðstöfunum. Þú samþykkir, nema annað sé skýrt tekið fram í þessum samningi, að þessi samningur skuli ekki vera neinum þriðja aðila til hagsbóta.

          D. „Apple“ eins og það er hér notað merkir:

• Apple Inc., með aðsetur að One Apple Park Way, Cupertino, Kaliforníu, 95014, fyrir notendur í Bandaríkjunum, þ.m.t. Púertó Ríkó;

• Apple Canada Inc., með aðsetur að 120 Bremner Blvd., Suite 1600, Toronto ON M5J 0A8, Kanada, fyrir notendur í Kanada;

• Apple Services LATAM LLC, með aðsetur að 1 2811 Ponce de Leon Boulevard, Floor 12, Coral Gables, Florida 33134, fyrir notendur í Mexíkó, Mið- eða Suður-Ameríku eða í einhverju landi eða yfirráðasvæði í Karíbahafinu (að Púertó Ríkó undanskildu);

• Apple Services Pte. Ltd., með aðsetur að 7 Ang Mo Kio Street 64, Singapore 569086, fyrir notendur í Bútan, Brúnei, Kambódíu, Fídjieyjum, Laos, Makaó, Maldíveyjum, Míkrónesíu, Mongólíu, Mjanmar, Nárú, Nepal, Palau, Papúa Nýja-Gíneu, Suður-Kóreu, Salómonseyjum, Srí Lanka, Tonga og Vanúatú;

• iTunes K.K., Roppongi Hills, 6-10-1 Roppongi, Minato-ku, Tokyo 106-6140, Tókýó, fyrir notendur í Japan;

• Apple Pty Limited, með aðsetur að Level 3, 20 Martin Place, Sydney NSW 2000, Ástralíu, fyrir notendur í Ástralíu og á Nýja-Sjálandi, þ.m.t. á öllum tilheyrandi yfirráðasvæðum eða lögsagnarumdæmum; og

• Apple Distribution International Ltd., með aðsetur að Hollyhill Industrial Estate, Hollyhill, Cork, Írlandi, fyrir alla aðra notendur.

RAFRÆN SAMNINGSGERÐ

Notkun þín á þjónustunni felur í sér möguleikann að gera samninga rafrænt og/eða nota rafrænar færslur. ÞÚ SAMÞYKKIR AÐ RAFRÆNAR FÆRSLUR ÞÍNAR TELJAST BÆÐI VERA SAMNINGUR ÞINN OG FYRIRÆTLUN ÞÍN UM AÐ BINDA ÞIG VIÐ OG GREIÐA FYRIR SLÍKA SAMNINGA OG SLÍKAR FÆRSLUR. SAMNINGUR ÞINN OG FYRIRÆTLUN ÞÍN UM AÐ BINDA ÞIG VIÐ RAFRÆNAR FÆRSLUR Á VIÐ UM ALLAR SKRÁR UM ALLAR FÆRSLUR SEM ÞÚ GERIR VARÐANDI ÞESSA ÞJÓNUSTU, ÞAR MEÐ TALIÐ TILKYNNINGAR UM UPPSÖGN, STEFNUR, SAMNINGA OG UMSÓKNIR. Hugsanlega verður þú að eiga tiltekinn vél- og hugbúnað til að opna og halda við rafrænum skrám þínum og slíkt er alfarið á þína ábyrgð.

          E. Persónuvernd

Notkun þín á þjónustunni fellur undir persónuverndarstefnu Apple, sem er að finna á http://www.apple.com/legal/privacy/.

Síðast endurskoðað: 15. september 2025