Legal

Apple Media Xidmətləri Qayda və Şərtləri

Bu qayda və şərtlər siz və Apple arasında müqaviləni (bundan sonra – “Müqavilə”) təsis edir. Müqaviləni diqqətlə oxuyun. Müqaviləni anladığınızı və qəbul etdiyinizi təsdiqləmək üçün “Razıyam” düyməsini basın.

A. XİDMƏTLƏRİMİZƏ GİRİŞ

Bu Müqavilə sizin media tətbiqlərini (bundan sonra – “Tətbiqlər”) və digər xidmətləri (bundan sonra - “Məzmun” ) satın almağa, əldə etməyə, lisenziyalaşdırmağa, icarəyə götürməyə və ya abunə olmağa imkan verən Apple xidmətlərindən (bundan sonra – “Xidmətlər”) istifadənizi tənzimləyir. Xidmətlərimiz: iTunes Store (iTunes Mağazası), App Store (App Mağazası), iBooks Store (iBooks Mağazası), Apple Music (Apple Musiqi) və Apple News (Apple Xəbərlər). Xidmətlərimiz yaşadığınız ölkədə (bundan sonra – "Ölkəniz") istifadəniz üçün açıqdır. Xidmətlərimizdən istifadə etmək üçün siz uyğun avadanlıq, proqram təminatına (son versiyası tövsiyə və bəzən tələb olunur) və internetə çıxışa (ödənişlər tətbiq edilə bilər) malik olmalısınız. Bu amillər Xidmətlərimizin fəaliyyətinə təsir edə bilər.

B. XİDMƏTLƏRİMİZDƏN İSTİFADƏ

ÖDƏNİŞLƏR, VERGİLƏR VƏ GERİ ÖDƏMƏLƏR

Siz Xidmətlərimizlə əlaqədar Məzmunu pulsuz və ya pul ödəyərək əldə edə bilərsiniz; bu halların ikisinə də "Sövdələşmə" deyə istinad edilir. Hər bir Sövdələşmə siz və Apple arasında və/və ya Xidmətlərimizlə əlaqədar Məzmunu təmin edən qurum arasında elektron müqavilə hesab edilir.Lakin, əgər siz iTunes S.à.r.l.-ın müştərisisinizsə və hər hansı bir Tətbiq və ya kitab əldə edirsinizsə, o zaman iTunes S.à.r.l. Məzmunun satıcısı hesab edilir və bu o deməkdir ki, siz Məzmunu iTunes S.à.r.l.-dan əldə etmisiniz və məhsul Tətbiqin Təminatçısı (aşağıda müəyyən edildiyi kimi) və ya kitabın nəşriyyatçısı tərəfindən lisenziyalaşdırılmışdır. Siz ilk Sövdələşməni həyata keçirən zaman biz gələcək Sövdələşmələr üçün parolunuzun neçə müddətdən bir tələb edilməsi haqqında seçim etməyinizi xahiş edəcəyik. Əgər siz Sövdələşmələr üçün Touch ID-ni aktivləşdirsəniz, biz sizdən bütün Sövdələşmələri barmaq izinizlə təsdiqləməyi xahiş edəcəyik. Parol parametrlərinizi istənilən vaxt bu təlimatlara uyğun idarə edin: https://support.apple.com/en-us/HT204030. Apple müvafiq vergilər də daxil olmaqla hər hansı ödənişli Sövdələşməni sizin ödəniş vasitəniz (məsələn, kredit kartınız, debit kartınız, hədiyyə kartınız/kodunuz və ya Ölkənizdə mövcud olan digər vasitələr) əsasında həyata keçirəcəkdir. Əgər hər hansı bir Məzmunu öncədən sifariş etsəniz, (Məzmun satışa çıxarılmazdan əvvəl sifarişi ləğv etmədiyiniz halda) ödəniləcək məbləğ Məzmun təmin edildikdən sonra hesabınızdan çıxarılacaqdır. Sövdələşmələrin fakturalarının hazırlanması haqqında ətraflı məlumatı buradan əldə edə bilərsiniz: http://support.apple.com/kb/HT5582.Sövdələşmələr yekun məbləği göstərir. Məzmunun qiymətləri istənilən vaxt dəyişə bilər. Əgər texniki problemlər Məzmunun təminatının qarşısını alır və ya bunu əsassız şəkildə gecikdirirsə, sizin Apple tərəfindən müəyyən edilmiş xüsusi və yeganə çıxış yolunuz Məzmunun əvəz edilməsi və ya ödənilən məbləğin geri qaytarılmasıdır. Bəzən, əgər Apple ona müvafiq tədbirlər görmək hüququ verən dələduzluq, geri ödəmədən sui-istifadə və ya digər manipulyasiya halları ilə qarşılaşdıqda ödənişin geri qaytarılması tələbindən imtina edə bilər. Hədiyyə kartları/kodları ilə bağlı şərtləri buradan əldə edə bilərsiniz:http://www.apple.com/legal/internet-services/itunes/giftcards/.

APPLE ID

Xidmətlərimizdən istifadə etmək və sizə aid Məzmuna daxil olmaq üçün Apple ID hesabı tələb olunur. Apple ID hesabı Apple eko-sistemində istifadə olunan hesabdır. Sizin Apple ID hesabınız çox dəyərlidir və siz onun məxfiliyini və təhlükəsizliyini təmin etməyə cavabdehsiniz. Apple sizin Apple ID hesabından icazəsiz istifadə nəticəsində yaranacaq zərərə görə cavabdehlik daşımır. Apple ID hesabınıza icazəsiz daxil olunduğundan şübhələnirsinizsə, Apple ilə əlaqə saxlamağınızı xahiş edirik.

Apple ID hesabı açmaq və Xidmətlərimizdən istifadə etmək üçün sizin ən azı 13 yaşınız (və ya qeydiyyat prosesində irəli sürülən Ölkənizdəki ekvivalent minimum yaş həddi) olmalıdır. 13 yaşa çatmamış şəxslər üçün Apple ID hesabı onun valideyni və ya qəyyumu tərəfindən Ailə Paylaşmasından istifadə edərək və ya təsdiq edilmiş təhsil müəssisəsi tərəfindən açıla bilər.

MƏXFİLİK

Sizin bizim Xidmətlərimizdən istifadəniz Apple-ın Məxfilik Siyasətinə tabedir. Ətraflı məlumatı buradan əldə edə bilərsiniz:http://www.apple.com/legal/privacy/.

XİDMƏTLƏR VƏ MƏZMUNDAN İSTİFADƏ QAYDALARI

Siz Xidmətlər və Məzmundan istifadə edərkən “İstifadə Qaydaları” bölməsində qeyd olunan qaydalara riayət etməlisiniz. Xidmətlər və Məzmundan bu qaydalardan kənar istifadə bu Müqavilənin şərtlərinin pozulması hesab edilir. Apple sizin müvafiq İstifadə Qaydalarına riayət edib-etmədiynizi yoxlamaq üçün Xidmətlər və Məzmundan istifadənizə nəzarət edə bilər.

Bütün Xidmətlər:

- Siz Xidmətlər və Məzmunu yalnız şəxsi, qeyri-kommersiya məqsədləri üçün istifadə edə bilərsiniz (aşağıdakı App Store Məzmun bölməsində müəyyən olunan hallar istisna olmaqla).

- Apple-ın sizi Məzmun ilə təmin etməsi sizə ondan reklam məqsədləri üçün istifadə hüququ vermir və bu müəllif hüququ sahiblərinin hər hansı bir hüququnun ötürülməsi və ya imtinası hesab edilmir.

- Siz Məzmundan hər bir cihazda beş müxtəlif Apple ID hesabını keçməmək şərtilə istifadə edə bilərsiniz.

- Siz Məzmunu yüklədikdən sonra onun itirilməsi, məhv olması və ya zədələnməsinə görə cavabdehlik daşıyırsınız. Biz sizə .Məzmununuzun müntəzəm olaraq ehtiyat nüsxəsinin çıxarılmasını tövsiyə edirik.

- Siz Xidmətlər daxilindəki hər hansı təhlükəsizlik texnologiyasına müdaxilə etməməli və ya onu pozmamalısınız.

- Siz bizim Xidmətlərə yalnız Apple proqramlarından istifadə edərək daxil ola bilərsiniz və həmin proqramı dəyişdirə və ya onun modifikasiya edilmiş versiyasından istifadə edə bilməzsiniz.

- Video Məzmun üçün HDCP bağlantısı tələb olunur.

iTunes Store Məzmunu:

- Siz icazə verilən sayda özünüzə aid və ya nəzarətinizdə olan uyğun cihazda Rəqəmsal Hüquqların İdarəetməsi (Digital Rights Management-DRM) pulsuz Məzmunundan istifadə edə bilərsiniz. DRM ilə qorunan Məzmun beş kompüter və bu kompüterlərlə sinxronizasiya etdiyiniz bütün cihazlarda istifadə edilə bilər.

- İcarəyə götürülən Məzmun sadəcə bir cihazda istifadə oluna bilər və Ölkənizin Xidmətlərindəki Məzmundan asılı olaraq 30 gün müddətinə, istifadəyə başladığı andan 24-48 saat ərzində başa çatdırılmalıdır (Məhsulun izlənməsinin dayandırılması, ona fasilə verilməsi və ya onun yenidən yüklənməsi bu müddətin uzadılmasına təsir etmir).

- Siz audio pleylisti dinləmək məqsədilə yeddi dəfə CD-yə yaza bilərsiniz (bu məhdudiyyət DRM-dən azad Məzmuna tətbiq edilmir).

App Store Məzmunu:

- “Tətbiq” termininə bütün tətbiqlər, iMessage və Apple Watch (Saat) tətbiqləri, tətbiq daxili satınalmalar, əlavələr (məsələn, klaviatura), stikerlər və tətbiq daxili abunələr daxildir.

- Siz Tətbiqlərdən özünüzə aid və ya nəzarətinizdə olan hər hansı bir cihazda istifadə edə bilərsiniz.

- Kommersiya müəssisəsi, dövlət qurumu və ya təhsil müəssisəsinin (bundan sonra – “Müəssisə”) adından fəaliyyət göstərən şəxslər ya (i) bir şəxs üçün Müəssisəyə aid və ya onun nəzarətində olan bir və daha çox cihaza, və yaxud (ii) birdən çox şəxs üçün Müəssisəyə aid və ya onun nəzarətində olan ümumi tək bir cihaza Tətbiqləri yükləyə və sinxronizasiya edə bilər. Aydınlıq məqsədi üçün çoxsaylı istifadəçilər tərəfindən növbə ilə və ya kollektiv şəkildə istifadə olunan hər bir cihaz üçün ayrıca lisenziya tələb edilir.

iBooks Store Məzmunu:

- Siz DRM-dən azad Məzmundan özünüzə aid və ya nəzarətinizdə olan hər hansı bir uyğun cihazda istifadə edə bilərsiniz. DRM ilə qorunan Məzmun beş kompüter və bu kompüterlərlə sinxronizasiya etdiyiniz bütün cihazlarda istifadə edilə bilər.

- Siz iBooks Store Məzmununu diskə yaza bilməzsiniz.

Apple Music:

- Siz Fərdi Apple Music üzvlüyünüzü 10 cihazda (bunlardan yalnız beşi kompüter ola bilər) istifadə edə bilərsiniz.

- Fərdi Apple Music üzvlüyü sizə eyni vaxtda bir cihazda, Ailə üzvlüyü isə siz və ya ailə üzvlərinizə eyni vaxtda altı cihazda Məzmun oxutdurmağa imkan verir.

YENİDƏN YÜKLƏMƏLƏR

Siz eyni Apple ID hesabı ilə daxil olub əldə etdiyiniz Məzmunu cihazlarınıza (bundan sonra – "Əlaqəli Cihazlar") yenidən yükləyə (bundan sonra – "Yenidən yükləmə") bilərsiniz. Siz Ölkənizdə yenidən yükləyə biləcəyiniz Məzmun növlərinə burada baxa bilərsiniz: https://support.apple.com/en-us/HT204632. Xidmətlərimizdə artıq təklif olunmayan Məzmunu yenidən yükləmək mümkün olmaya bilər.

Əlaqəli Cihazlar üzrə Qaydalar: Siz bir Apple ID hesabı ilə eyni vaxtda 10 cihazda (5 kompüteri keçməmək şərti ilə) sistemə daxil ola bilərsiniz. Hər bir kompüterdə eyni Apple ID hesabından istifadəyə icazə verilməlidir (kompüterlərdə bu icazənin əldə edilməsi haqqında daha ətraflı məlumata burada baxa bilərsiniz: https://support.apple.com/en-us/HT201251). Cihazlar fərqli Apple ID hesabları ilə hər 90 gündə bir dəfə əlaqələndirilə bilər. 

ABUNƏLƏR

Xidmətlər və müəyyən Tətbiqlər Məzmuna və ya xidmətlərə girişi abunə əsasında (bundan sonra – "Ödənişli Abunə") satın almağa imkan verə bilər. Ödənişli Abunələr funksiyası sizin hesab parametrlərinizin Abunələrin İdarə Edilməsi bölməsində ləğv edilənə qədər avtomatik yenilənir. Ödənişli Abunənin qiymətinin artdığı hallarda biz sizi xəbərdar edəcəyik və davam etmək üçün razılığınızı əldə etməyə çalışacağıq. Müvafiq abunə haqqı sizdən ən son Ödənişli Abunə dövrünün başlanmasına maksimum 24 saat vaxt qalmış tutulacaqdır. Müəyyən Ödənişli Abunələrdə Hesabınızdan müvafiq məbləğ tutulmazdan əvvəl pulsuz sınaq müddəti təklif edilə bilər. Əgər ödəniş məbləğini sizin hesabınızdan tutmazdan əvvəl Ödənişli Abunədən imtina etmək istəyirsinizsə, pulsuz sınaq müddəti başa çatmamış abunəni ləğv edin.

MƏHSUL VƏ XİDMƏTİN MÖVCUDLUĞU

Bu Müqavilədə Xidmətlər, Məzmun növləri, funksiyalar və ya funksionallıq ilə əlaqədar şərtlər Ölkənizdə mövcud olana qədər sizə şamil olunmur. Ölkənizdə sizə şamil olunan mövcud Məzmun növlərinə baxmaq üçün Xidmətlərə və ya https://support.apple.com/en-us/HT204411 veb-səhifəsinə daxil olun..

QEYRİ-APPLE CİHAZLAR

Əgər qeyri-Apple markalı cihazlarda Xidmətlərimizdən istifadə edirsinizsə, bütün funksiyalar və ya Məzmun növlərinə çıxışınız olmaya bilər. Bu müqavilədə çıxış əldə etmədiyiniz funksiyalar və ya Məzmun növləri ilə bağlı şərtlər sizə şamil olunmur. Daha sonra Xidmətlərimizə Apple markalı cihazla daxil olmaq istədiyiniz təqdirdə siz bu Müqavilənin bütün şərtlərinin belə bir cihazda istifadəyə şamil olunacağını qəbul edirsiniz.

C. XİDMƏTLƏRİMİZƏ TƏQDİM ETDİYİNİZ MATERİALLAR

Xidmətlərimiz şərh, şəkil, video və podkast (əlaqəli metadata və incəsənət əsərləri də daxil olmaqla) kimi materialları təqdim etmənizə imkan verə bilər. Belə funksiyalardan istifadəniz aşağıda qeyd olunan, müntəzəm olaraq yenilənən Təqdimat Qaydalarına uyğun olmalıdır. Əgər materialların Təqdimat Qaydalarına uyğun gəlmədiyini görürsünüzsə, Problemi Bildirmə funksiyasından istifadə etməyinizi xahiş edirik. Bununla, siz Apple-a təqdim etdiyiniz materiallardan Xidmətlər və müvafiq marketinq çərçivəsində beynəlxalq səviyyədə, havayı, müddətsiz, müstəsnasız istifadə hüququ verirsiniz. Apple təqdim edilmiş materialları yoxlaya və onları ləğv və ya redaktə etmək qərarını qəbul edə bilər.

Təqdimat Qaydaları: Siz Xidmətlərdən aşağıdakı məqsədlər üçün istifadə edə bilməzsiniz:

- istifadə etmək üçün icazəniz, hüququnuz və ya lisenziyanız olmayan hər hansı bir materialı yerləşdirmək;

- xoşagəlməz , təhqiramiz, qeyri-qanuni, aldadıcı və ya zərərli məzmunu yerləşdirmək;

- başqalarına məxsus şəxsi, özəl və ya məxfi məlumatları yerləşdirmək;

- azyaşlı uşaqlardan şəxsi məlumatları öyrənmək;

- özünüzü başqa şəxs kimi qələmə vermək və ya digər şəxs və ya qurum ilə olan əlaqənizi gizlətmək;

- spam, o cümlədən razılaşdırılmamış və ya icazəsiz reklam, təbliğat materialları və ya informasiya elanları göndərmək və ya ötürmək;

- hər hansı qeyri-qanuni, saxta və ya manipulyasiya xarakterli fəaliyyət ilə məşğul olmaq və ya planlaşdırmaq.

D. AİLƏ PAYLAŞMASI

Ailə Paylaşması (Family Sharing) bir Ailənin altı nəfərə qədər üzvü ilə uyğun Məzmunu paylaşmanıza imkan verir. Ailənin təşkilatçısı (bundan sonra - "Təşkilatçı") bu xidmətdə iştirak etmək üçün digər üzvləri dəvət edir və Ailə üzvləri tərəfindən icra olunan bütün Sövdələşmələri ödəməyə razılıq verir. Təşkilatçı 18 və ya yuxarı yaşda, valideyn və ya 13 yaşdan ya da Ölkənizdə ekvivalent minimum yaşdan kiçik (qeydiyyat prosesində tələb olunduğu kimi) Ailə üzvünün hüquqi qəyyumu olmalıdır. Ailə Paylaşmasının bütün funksiyalarından istifadə edə bilmək üçün Apple cihazları tələb olunur.

Ailə üzvü tərəfindən icra olunan hər hansı Sövdələşməni ödəmək üçün Təşkilatçının ödəniş vasitəsindən istifadə edilir (Ailə üzvü hesabının mağaza kreditinə malik olduğu hallar istisna olmaqla, bu kredit həmişə ilk istifadə olunur. Təşkilatçının ödəniş vasitəsi Ailə üzvləri tərəfindən istifadə edildikdə onlar Təşkilatçının agentləri hesab edilirlər. Bununla, Təşkilatçı (1) belə Sövdələşmələrə görə ödəniş etməyi və (2) Ailə üzvləri tərəfindən həyata keçirilən Sövdələşmələrə icazə verildiyini qəbul edir. Təşkilatçılar Ailə üzvlərinin ödəniş vasitələri üzrə müqavilələrinə riayət etməyə görə cavabdehlik daşıyırlar və Ailə üzvlərinə ödəniş vasitəsinə çıxışa icazə verilməsi ilə bağlı yaranacaq bütün riskləri öz öhdəsinə götürür. Ailə üzvü tərəfindən həyata keçirilən Sövdələşmənin qəbz və ya hesab-fakturası ailə üzvü və Təşkilatçıya göndərilir.

Almaq üçün İcazə: Almaq üçün İcazə Təşkilatçıya 18 yaşdan (və ya Ölkənizdəki yetkinlik yaşının ekvivalentindən) kiçik ailə üzvlərinin Sövdələşmələrini təsdiq etməyə imkan verən rahat funksiyadır. Təşkilatçı Almaq üçün İcazə funksiyasının aktiv edildiyi hər hansı Ailə üzvünün valideyn və ya hüquqi qəyyumu olmalıdır. Almaq üçün İcazə funksiyası Ailə üzvlərindən yüklənən və ya geri ödəniş kodları vasitəsilə əldə edilən məhsullara şamil edilmir.

Ailə üzvlərinin dəyişikliyi: Bir Ailə üzvü Ailəni tərk etdikdə və ya Ailədən uzaqlaşdırıldıqda digər Ailə üzvləri, Təşkilatçının ödəniş vasitəsi ilə əldə edilmiş Məzmun da daxil olmaqla, artıq keçmiş Ailə üzvünün Məzmununa daxil ola bilmirlər.

Ailə Paylaşma Qaydaları: Eyni vaxtda ancaq bir Ailənin üzvü ola və ildə maksimum iki dəfə hər hansı Ailəyə qoşula bilərsiniz. Siz Ailə ilə əlaqələndirildiyiniz Apple ID hesabını 90 gün ərzində bir dəfədən artıq dəyişə bilməzsiniz. Bütün Ailə üzvləri eyni Ölkədə yaşayan şəxslər olmalıdır. Tətbiq Daxili Alışlar, abunə və əvvəllər əldə edilmiş bəzi Tətbiqlər də daxil olmaqla, bütün Məzmun Ailə Paylaşması üçün uyğun deyildir.

E. TÖVSİYƏ FUNKSİYALARI

Xidmətlər sizin yükləmələr, satın alma və digər fəaliyyətiniz əsasında sizə Məzmun tövsiyə edəcəkdir. Siz hesab parametrlərinizdə belə tövsiyələr almaqdan imtina edə bilərsiniz.

Bəzi tövsiyə funksiyalarının aktivləşdirilməsi üçün sizin icazəniz tələb edilə bilər. Siz bu funksiyaları aktivləşdirsəniz, Apple cihazınızın fəaliyyəti, yeri və istifadəsi də daxil olmaqla, müəyyən məlumatları toplamaq və saxlamaq üçün sizdən icazə istəyəcəkdir. Bu funksiyaları aktivləşdirərkən təqdim olunan məlumatları diqqətlə oxumağınızı xahiş edirik.

F. ƏLAVƏ ITUNES STORE ŞƏRTLƏRİ

MÖVSÜMLÜK PASS VƏ MULTİ-PASS

Pass sizə televiziya Məzmununu mövcud olan kimi satın almaq və qəbul etmək imkanı verir. Mövsümlük Pass bir mövsüm ərzində məhdud sayda seriyaları olan televiziya Məzmununa aiddir; Multi-Pass isə mütəmadi olaraq davam edən televiziya Məzmununa aiddir. Mövsümlük Pass və ya Multi-Pass-ın ümumi məbləği Sövdələşmə icra olunan zaman hesabınızdan tutulur. Mövsümlük Pass və ya Multi-Pass Məzmunu son seriya təqdim edildikdən etibarən 90 gün müddətinə yükləməyə açıq olur. Multi-Pass əldə edilən zaman avtomatik yenilənmə seçilərsə, hər bir növbəti Multi-Pass dövrünün əvvəlində ümumi məbləğ hesabınızdan tutulacaqdır. Siz hesab parametrlərinizdə növbəti Multi-Pass dövrü başlamazdan əvvəl onun avtomatik yenilənməsini dayandıra bilərsiniz. Əgər Məzmun təminatçısı Apple-a Mövsümlük Pass satın alınan zaman planlaşdırılandan daha az TV seriyası təqdim edirsə, bu zaman biz Apple-a təqdim edilməyən müvafiq sayda seriyaların pərakəndə dəyərini sizin Apple ID hesabınıza qaytarırıq.

G. ƏLAVƏ APP STORE ŞƏRTLƏRİ

APP STORE MƏHSULLARINA DAİR LİSENZİYA

Tətbiq lisenziyaları sizə Apple və ya tətbiq hazırlayan üçüncü tərəf (bundan sonra - "Tətbiq Təminatçısı") tərəfindən təmin edilir. Əgər siz iTunes S.à.rl-ın müştərisisinizsə, yazı materialının satıcısı iTunes S.à.rl-dır, bu da o deməkdir ki, siz Tətbiq lisenziyasını iTunes S.à.rl-dan əldə edirsiniz, lakin Tətbiq, Tətbiq Təminatçısı tərəfindən lisenziyalaşdırılır. Apple tərəfindən lisenziyalaşdırılan Tətbiq “Apple Tətbiqi”, Tətbiq Təminatçısı tərəfindən lisenziyalaşdırılan Tətbiq isə “Üçüncü Tərəf Tətbiqi”-dir. Apple App Store-u məhsul satışı üçün istifadəyə verməklə Tətbiq Təminatçıları üçün agent kimi çıxış edir və siz və Tətbiq Təminatçısı arasında hər hansı satış və ya istifadəçi müqaviləsinin tərəfi olmur. Sizin əldə etdiyiniz hər hansı Tətbiq Apple və ya Tətbiq Təminatçısı tərəfindən hər hansı daha üstün xüsusi lisenziya müqaviləsi (Bundan sonra - "Xüsusi EULA") nəzərdə tutulmayıbsa, aşağıda verilən Lisenziyalı Tətbiq üzrə Son İstifadəçinin Lisenziya Müqaviləsi (bundan sonra - "Standart EULA") əsasında tənzimlənir. Üçüncü Tərəf Tətbiqi ilə bağlı məzmun, zəmanət və iddialara görə yalnız Üçüncü Tərəf Tətbiqinin Tətbiq Təminatçısı cavabdehlik daşıyır. Bununla, siz Apple-ın hər bir Üçüncü Tərəf Tətbiqinə aid Standart EULA və ya Xüsusi EULA üzrə üçüncü tərəf benefisiarı olduğunu və onun belə bir müqavilə bağlaya biləcəyini qəbul edir və razılaşırsınız. Stiker və iMessage kimi müəyyən Tətbiqlər cihazın sprinqbordunda (springboard) görünməyə bilər, lakin İsmarıc tətbiq siyirtməsində əldə edilə və istifadə edilə bilər.

TƏTBİQ DAXİLİ ALIŞLAR

Tətbiqlər öz daxilində istifadə etmək üçün məzmun, xidmətlər və ya funksional vasitələr təklif edə bilər (bundan sonra - "Tətbiq Daxili Alışlar"). Tətbiqin istifadəsi zamanı istehlak olunan Tətbiq Daxili Alışlar (məsələn, virtual gem-lər) başqa cihazlara ötürülə bilməz və yalnız bir dəfə yüklənə bilər. Məzmun əldə etmək üçün tətbiq olunan hər hansı təsdiqdən ayrıca olaraq, siz Tətbiq Daxili Alışlar üçün parolunuzla sistemə daxil olaraq və ya Touch ID-dən istifadə edərək hesabınızı təsdiq etməlisiniz. Hər bir satınalma üçün parol tələb olunmasını bildirmədiyiniz və ya Touch ID-ni aktivləşdirmədiyiniz təqdirdə, siz on beş dəqiqə ərzində hər dəfə təsdiq tələb olunmadan əlavə satınalmaları həyata keçirə bilərsiniz. Tətbiq Daxili Alışları dayandırmaq üçün bu təlimatlara riayət edin: https://support.apple.com/en-us/HT201304.

TƏTBİQ ÜZRƏ TEXNİKİ XİDMƏT VƏ DƏSTƏK

Apple yalnız Apple Tətbiqləri üzrə və ya müvafiq qanunvericiliyin tələb etdiyi hallarda texniki xidmət və dəstək təmin etməyə görə cavabdehlik daşıyır. Tətbiq Təminatçıları Üçüncü Tərəf Tətbiqlərin texniki xidmət və dəstəyini təmin etməyə görə cavabdehlik daşıyırlar.

LİSENZİYALI TƏTBIQ ÜZRƏ SON İSTİFADƏÇİNİN LİSENZİYA MÜQAVİLƏSİ

App Store vasitəsilə təmin olunan Tətbiqlər sizə satılmır, lisenziyalaşdırılır. Sizin hər bir Tətbiq üzrə lisenziyanız öncədən razılığınıza əsasən ya Standart Lisenziyalı Tətbiq üzrə Son İstifadəçinin Lisenziya Müqaviləsi (bundan sonra - "Standart EULA"), ya da siz və Tətbiq Təminatçısı arasındakı Xüsusi Lisenziyalı Tətbiq üzrə Son İstifadəçinin Lisenziya Müqaviləsi (bundan sonra - "Xüsusi EULA") əsasında təmin edilir. Bu Standart EULA və ya Xüsusi EULA çərçivəsində hər hansı bir Apple Tətbiqi üzrə lisenziyanız Apple tərəfindən, bu Standart EULA və ya Xüsusi EULA çərçivəsində Üçüncü Tərəf Tətbiqi üzrə lisenziyanız isə həmin Üçüncü Tərəf Tətbiqinin Tətbiq Təminatçısı tərəfindən verilir. Standart EULA çərçivəsində lisenziya predmeti olan hər hansı Tətbiq bundan sonra “Lisenziyalı Tətbiq” adlandırılacaq. Tətbiq Təminatçısı və ya Apple-ın (bundan sonra - "Lisenziya Sahibi") hazırkı Standart EULA çərçivəsində sizə açıq şəkildə verilməyən Lisenziyalı Tətbiqinə dair bütün hüquqları müvafiq olaraq qorunur.

a. Lisenziyanın Tətbiq Dairəsi: Lisenziya sahibi sizə Lisenziyalı Tətbiqi, İstifadə Qaydaları çərçivəsində sizə məxsus və ya nəzarətinizdə olan hər hansı Apple markalı məhsulda istifadə lisenziyasını başqa şəxsə ötürməmək şərtilə verir. Lisenziyalı Tətbiqdə mövcud olan və onun çərçivəsində satın alınan hər hansı məzmun, materiallar və ya xidmətlər, o cümlədən orijinal Lisenziyalı Tətbiqi əvəz edən və ya ona əlavə edilən Lisenziya Sahibi tərəfindən təmin edilən yeniləmələr, Xüsusi EULA çərçivəsində təmin edilmədiyi təqdirdə, Standart EULA şərtləri əsasında tənzimlənir. İstifadə Qaydalarında nəzərdə tutulmuş hallar istisna olmaqla, siz Lisenziyalı Tətbiqi eyni zamanda birdən çox cihaz tərəfindən istifadə edilə bilən şəbəkə üzərində yaymaq və ya açıq istifadəyə qoymaq hüququna malik deyilsiniz. Siz Lisenziyalı Tətbiqi başqasına ötürə, başqaları ilə paylaşa və ya sub-lisenziyalaşdıra bilməzsiniz və Apple cihazınızı üçüncü tərəfə satsanız, bunu etməzdən əvvəl Lisenziyalı Tətbiqi Apple Cihazından silməlisiniz. Siz Lisenziyalı Tətbiqin hər hansı yeniləmələrinin və ya hissələrinin surətini çıxara (bu lisenziya və İstifadə Qaydalarının yol verdiyi hallar istisna olmaqla), yenidən layihələşdirə, hissələrə bölə, mənbə kodunu aşkarlamaq üçün səy göstərə, modifikasiya edə və ya onlardan törəmə işlər yarada bilməzsiniz. (Lisenziyalı Tətbiqə daxil edilmiş hər hansı açıq mənbəli komponentləri tənzimləyən lisenziya şərtlərinin yol verdiyi hədd və ya yuxarıdakı hər hansı məhdudiyyətin müvafiq qanunla qadağan edildiyi hallar istisna olmaqla).

b. Məlumatlardan İstifadəyə Razılıq: Bununla siz razı olursunuz ki, Lisenziya Sahibi proqram təminatı yeniliklərinin təmin olunması, məhsul dəstəyi və Lisenziyalı Tətbiqə dair mümkün digər xidmətləri tənzimləmək üçün dövri olaraq toplanan texniki məlumatları və əlaqədar informasiyanı, cihazınız, sistem və tətbiqin proqram təminatı və periferiya qurğuları ilə bağlı texniki məlumatlar da daxil olmaqla, bu məlumatları toplaya və onlardan istifadə edə bilər. Lisenziya Sahibi bu məlumatlardan öz məhsullarını təkmilləşdirmək və ya sizi xidmət və texnologiyalarla təmin etmək məqsədilə şəxsiyyətinizi müəyyən etməyəcək şəkildə istifadə edə bilər.

c. Xitam. Bu Standart EULA siz və ya Lisenziya Sahibi tərəfindən xitam verilənə qədər etibarlıdır. Bu lisenziyanın şərtlərinə əməl etmədiyiniz halda bu Standart EULA çərçivəsindəki hüquqlarınıza avtomatik şəkildə xitam veriləcəkdir.

d. Xarici Xidmətlər. Lisenziya Proqramı, Lisenziya Sahibi və/və ya üçüncü tərəfin xidmət və vebsaytlarına çıxışa imkan verə bilər (birlikdə və fərdi olaraq “Xarici Xidmətlər”). Siz Xarici Xidmətlərdən istifadə risklərinin sizə aid olduğunu qəbul edirsiniz. Lisenziya Sahibi hər hansı bir üçüncü tərəfə aid Xarici Xidmətlərin məzmun və ya düzgünlüyünün yoxlanılmasına və yaxud qiymətləndirilməsinə görə, eləcə də hər hansı bir üçüncü tərəfə aid Xarici Xidmətlərə görə məsuliyyət daşımır. Maliyyə, tibbi və məkan haqqında məlumatlar da daxil olmaqla, hər hansı bir Lisenziyalı Tətbiq və ya Xarici Xidmət tərəfindən təqdim edilən məlumatlar yalnız ümumi informasiya xarakteri daşıyır və onun dəqiqliyinə Lisenziya Sahibi və ya agentləri tərəfindən zəmanət verilmir. Siz Xarici Xidmətlərdən bu Standart EULA şərtlərinə zidd və ya Lisenziya Sahibi ya da hər hansı üçüncü tərəfin intellektual mülkiyyət hüquqlarını pozacaq şəkildə istifadə etməməlisiniz. Siz Xarici Xidmətlərdən hər hansı bir şəxs və ya qurumu narahat etmək, təhqir etmək, təqib etmək, hədələmək və ya hörmətdən salmaq üçün istifadə etməyəcəyinizə razılıq verirsiniz və Lisenziya Sahibi bu cür istifadəyə görə məsuliyyət daşımır. Xarici Xidmətlər bütün dillərdə ya da Ölkənizdə mövcud olmaya və hər hansı bir xüsusi yerdə istifadəyə uyğun ya da açıq olmaya bilər. Siz Xarici Xidmətlərdən istifadə həddinin hər hansı bir müvafiq qanunvericiliyə uyğunluğuna görə cavabdehlik daşıyırsınız. Lisenziya Sahibi sizə bildiriş vermədən və ya sizə qarşı öhdəlik götürmədən istənilən zaman Xarici Xidmətləri dəyişdirmək, dayandırmaq, çıxarmaq, deaktiv etmək və ya girişinə qadağa və yaxud məhdudiyyət qoymaq hüququna malikdir.

e. ZƏMANƏTİN OLMAMASI: SİZ LİSENZİYALI TƏTBİQDƏN İSTİFADƏ RİSKLƏRİNİN YALNIZ SİZƏ AİD OLDUĞUNU AÇIQ ŞƏKİLDƏ TƏSDİQ VƏ QƏBUL EDİRSİNİZ. MÜVAFİQ QANUNUN YOL VERDİYİ MAKSİMUM HƏDDƏ LİSENZİYALI TƏTBİQ VƏ ONUN TƏRƏFİNDƏN İCRA VƏ YA TƏMİN EDİLƏN HƏR HANSI XİDMƏTLƏR “OLDUĞU KİMİ” VƏ “MÖVCUD OLAN KİMİ” BÜTÜN ÇATIŞMAZLIQLAR VƏ HƏR HANSI ZƏMANƏT OLMADAN TƏMİN EDİLİR VƏ LİSENZİYA SAHİBİ, BUNUNLA SATILA BİLMƏ QABİLİYYƏTİ, QƏNAƏTBƏXŞ KEYFİYYƏT, MÜƏYYƏN MƏQSƏD ÜÇÜN YARARLILIQ, DƏQİQLİK, RAHAT İSTİFADƏ, HABELƏ ÜÇÜNCÜ TƏRƏF HÜQUQLARINI POZMAMA NƏZƏRDƏ TUTULAN ZƏMANƏT VƏ/VƏ YA ŞƏRTLƏRİ DƏ DAXİL OLMAQLA, LAKİN BUNLARLA MƏHDUDLAŞMADAN, LİSENZİYALI TƏTBİQ VƏ İSTƏNİLƏN XİDMƏTƏ GÖRƏ AŞKAR, NƏZƏRDƏ TUTULAN VƏ YA QANUNLA TƏLƏB OLUNAN BÜTÜN ZƏMANƏTLƏRDƏN İMTİNA EDİR. LİSENZİYA SAHİBİ VƏ YA ONUN SƏLAHİYYƏTLİ NÜMAYƏNDƏSİ TƏRƏFİNDƏN VERİLƏN ŞİFAHİ VƏ YA YAZILI MƏLUMATLAR VƏ YAXUD TÖVSİYƏLƏR ZƏMANƏT TƏŞKİL ETMİR. LİSENZİYALI TƏTBİQ VƏ YA XİDMƏTLƏRİN NÖQSANLI OLDUĞU AŞKAR EDİLƏRSƏ, SİZ BÜTÜN ZƏRURİ XİDMƏT, TƏMİR VƏ YA DÜZƏLİŞLƏRİN BÜTÜN XƏRCİNİ ÖZ ÜZƏRİNİZƏ GÖTÜRÜRSÜNÜZ. BƏZİ YURİSDİKSİYALAR İSTEHLAKÇININ NƏZƏRDƏ TUTULAN ZƏMANƏT HÜQUQUNUN İSTİSNA EDİLMƏSİNƏ VƏ QANUNLA MÜƏYYƏN EDİLMİŞ MÜVAFİQ HÜQUQLARINA MƏHDUDİYYƏTLƏRİN QOYULMASINA İCAZƏ VERMİRLƏR, BUNA GÖRƏ DƏ YUXARIDAKI İSTİSNA VƏ MƏHDUDİYYƏTLƏR SİZƏ ŞAMİL EDİLMƏYƏ BİLƏR.

f. Məsuliyyətin Məhdudlaşdırılması. LİSENZİYA SAHİBİ SİZİN LİSENZİYALI TƏTBİQDƏN İSTİFADƏ ETMƏNİZDƏN VƏ YA EDƏ BİLMƏMƏNİZDƏN YARANAN VƏ YA ONUNLA ƏLAQƏDAR GƏLİR İTKİSİ, MƏLUMAT İTKİSİ, BİZNESİN DAYANMASI VƏ YA DİGƏR HƏR HANSI KOMMERSİYA ZƏRƏRİ DƏ DAXİL OLMAQLA, LAKİN ONLARLA MƏHDUDLAŞMADAN HƏR HANSI TƏSADÜFİ, XÜSUSİ, DOLAYI VƏ YA ƏLAQƏDAR ZƏRƏR VƏ YA ŞƏXSİ XƏSARƏTƏ GÖRƏ, ONLARIN MÜMKÜNLÜYÜ BİLDİRİLSƏ BELƏ, MƏSULİYYƏT NƏZƏRİYYƏSİNDƏN ASILI OLMADAN (KONTRAKT, DELİKT, VƏ S.) QANUNLA QADAĞAN EDİLƏN HALLAR İSTİSNA OLMAQLA HEÇ BİR HALDA MƏSULİYYƏT DAŞIMIR. BƏZİ YURİSDİKSİYALAR ŞƏXSİ XƏSARƏT VƏ YA TƏSADÜFİ, YAXUD DOLAYI ZƏRƏRƏ GÖRƏ MƏSULİYYƏTİN MƏHDUDLAŞDIRILMASINA YOL VERMİR, ONA GÖRƏ DƏ BU MƏHDUDİYYƏT SİZƏ ŞAMİL EDİLMƏYƏ BİLƏR. Lisenziya Sahibinin bütün zərərə görə sizin qarşınızda ümumi öhdəliyi heç bir halda əlli ABŞ dolları ($50.00) məbləğini keçə bilməz (şəxsi xəsarət haqqında müvafiq qanunla tələb edilən hal istisna olmaqla). Yuxarıda qeyd olunan məhdudiyyətlər hətta adıçəkilən hüquq müdafiə vasitəsi əsas məqsədinə nail olmasa belə tətbiq ediləcəkdir.

g. Siz Lisenziyalı Tətbiqi ABŞ və Lisenziyalı Tətbiqin əldə olunduğu yurisdiksiyanın qanunları ilə yol verilən hallar istisna olmaqla, istifadə edə və ya onu ixrac, yaxud yenidən ixrac edə bilməzsiniz. Lisenziyalı Tətbiq xüsusilə də, heç bir məhdudiyyət qoyulmadan (a) ABŞ-ın embarqo qoyduğu ölkələrə və ya (b) ABŞ Xəzinədarlıq Departamentinin Xüsusi Müəyyən Edilmiş Şəxslərin siyahısı və ya ABŞ Ticarət Departamentinin Qadağa Qoyulmuş Şəxslər və ya Qurumlar siyahısındakı istənilən şəxsə ixrac və ya yenidən ixrac edilə bilməz. Lisenziyalı Tətbiqdən istifadə etməklə Siz belə bir ölkədə və ya siyahıda olmadığınızı bildirir və buna zəmanət verirsiniz. Siz həmçinin bu məhsullardan nüvə, raket, kimyəvi və ya bioloji silahların hazırlanması, dizaynı, istehsalı da daxil olmaqla, lakin bunlarla məhdudlaşdırılmadan ABŞ qanunvericiliyi ilə qadağan olunan hər hansı bir məqsəd üçün istifadə etməyəcəyinizi qəbul edirsiniz.

h. Lisenziyalı Tətbiq və əlaqədar sənədlər həmin terminin 48 C.F.R. (ABŞ Federal Normativ Aktlar Məcəlləsi) §2.101-də “Kommersiya Kompüter Proqram Təminatı” və “Kommersiya Kompüter Proqram Təminatı Sənədləri”ndə müəyyən edildiyi kimi “Kommersiya Məhsullarıdır”. Bu terminlər 48 C.F.R. §12.212 və ya 48 C.F.R. §227.7202-də müvafiq hallarda istifadə olunur. 48 C.F.R. §12.212 və ya 48 C.F.R. §227.7202-1-dən 227.7202-4-ə qədər müvafiq bəndlərə uyğun olaraq, Kommersiya Kompüter Proqram Təminatı və Kommersiya Kompüter Proqram Təminatı Sənədləri üzrə lisenziya ABŞ Hökumətinin son istifadəçilərinə (a) yalnız Kommersiya Məhsulları kimi və (b) burada göstərilən qayda və şərtlərə uyğun olaraq bütün digər son istifadəçilərə verilən həmin hüquqlar çərçivəsində verilir. Dərc olunmamış hüquqlar ABŞ-ın müəllif hüquqları qanunları çərçivəsində qorunur.

i. Aşağıdakı paraqrafda açıq şəkildə göstərilən hallar istisna olmaqla, bu Müqavilə və sizin Apple ilə aranızdakı əlaqə, hüquqi normalara uyğun olmayan hallar xaric olmaqla, Kaliforniya Ştatının qanunları ilə tənzimlənir. Siz və Apple bu Müqavilə ilə bağlı yaranacaq mübahisə və ya iddiaların həll edilməsi üçün məsələnin Kaliforniyanın Santa Klara bölgəsində yerləşən məhkəmələrin şəxsi və eksklüziv yurisdiksiyasına təqdim etməyə razılıq verirsiniz. Əgər siz (a) ABŞ vətəndaşı deyilsəniz; (b) ABŞ-da yaşamırsınızsa; (c) Xidmətə ABŞ-dan daxil olmursunuzsa; və (d) aşağıda müəyyən olunmuş ölkələrdən birinin vətəndaşısınızsa, bununla siz bu Müqavilə ilə bağlı yaranacaq mübahisə və ya iddiaların, hüquqi normalara uyğun olmayan hallar istisna olmaqla, aşağıda qeyd olunmuş müvafiq qanunla tənzimlənəcəyinə və bununla qəti şəkildə aşağıdakı dövlət, əyalət və ya ölkələrdə yerləşən məhkəmələrin qeyri-müstəsna yurisdiksiyasına riayət etməyə razılıq verirsiniz.

 

Əgər siz hər hansı bir Avropa İttifaqı ölkəsinin, İsveçrə, Norveç və ya İslandiyanın vətəndaşısınızsa, rəhbər qanunvericilik və yer sizin yaşadığınız yerin qanunları və məhkəmələri olmalıdır.

 

Xüsusilə bu Müqaviləyə tətbiqi istisna edilən qanun Malların Beynəlxalq Satışı üzrə Birləşmiş Millətlər Konvensiyası kimi tanınan qanundur.

H. ƏLAVƏ IBOOKS STORE ŞƏRTLƏRİ

Siz iBooks Store Məhsullarını Apple-dan deyil, belə bir Məzmunu təmin edən üçüncü tərəf təminatçısından (bundan sonra – "Nəşriyyatçı") əldə edirsiniz. Apple sizə iBooks Store Məhsulunu təmin edərkən Nəşriyyatçının agenti kimi çıxış edir və buna görə də Apple siz və Nəşriyyatçı arasında baş tutan Sövdələşmələrin tərəfi deyil. Əgər siz iTunes S.à.rl-ın müştərisisinizsə, yazının satıcısı iTunes S.à.rl-dır, bu da o deməkdir ki, Məhsuldan istifadə edə bilmək üçün siz lisenziyanı iTunes S.à.rl-dan əldə edirsiniz, lakin Məzmun Nəşriyyatçı tərəfindən lisenziyalaşdırılıb. iBooks Store Məzmununun Nəşriyyatçısı belə bir Məzmunla bağlı istifadə qaydalarını icra etmək hüququnu özündə saxlayır. iBooks Store Məzmununun Nəşriyyatçısı həmin Məzmuna, imtina edilməyən hər hansı təzminat və həmin Məzmuna aid ola bilən siz və ya digər hər hansı tərəfin malik ola biləcəyi hər hansı iddialara görə məsuliyyət daşıyır.

I. ƏLAVƏ APPLE MUSIC ŞƏRTLƏRİ

APPLE MUSIC ÜZVLÜYÜ

Apple Music musiqi xidməti üzrə abunədir. Siz hesab parametrlərində avtomatik yeniləmə funksiyasını dayandırana qədər Apple Music üzvlüyünüz avtomatik olaraq yenilənəcəkdir. Ətraflı məlumat üçün "Abunə" bölməsinə baxın. Sizin Apple Music üzvlüyünüz başa çatdıqda siz cihazınızda olan Apple Music musiqilərindən istifadə və iCloud Musiqi Kitabxanası da daxil olmaqla, lakin bununla məhdudlaşdırılmayan Apple Music üzvlüyü tələb olunan bütün funksiyalara daxil ola bilməyəcəksiniz. Apple, Apple Music üzvlüyünüzü yeniləmək üçün ödəniş vasitənizdən ödənişi həyata keçirə bilmədikdə üzvlüyünüzü ləğv etmək hüququnu özündə saxlayır.

Mümkün hallarda simsiz daşıyıcınız (bundan sonra – "Daşıyıcı Üzvlüyü") vasitəsilə sizə Apple Music üzvlüyü təklif oluna bilər. Daşıyıcı Üzvlüyünü satın aldığınız zaman daşıyıcınız Apple Music üzvlüyünüzün xərcini hesabınızdan tutacaqdır. Daşıyıcı ilə aranızdakı ödəniş münasibətləri bu Müqavilə ilə deyil, daşıyıcının qayda və şərtləri əsasında tənzimlənir və Daşıyıcı Üzvlüyü ilə bağlı hər hansı bir ödəniş mübahisəsi Apple ilə deyil, daşıyıcı ilə həll olunmalıdır. Apple Music-dən istifadə etməklə siz qəbul edirsiniz ki, daşıyıcınız daşıyıcı hesab məlumatlarınızın, telefon nömrənizin və abunə məlumatlarınızın Apple ilə mübadiləsini apara bilər və Apple da sizin Daşıyıcı Üzvlüyü statusunuzu müəyyənləşdirmək üçün bu məlumatlardan istifadə edə bilər.

ICLOUD MUSİQİ KİTABXANASI

iCloud Musiqi Kitabxanası Apple Music-in aktivləşdirildiyi cihazlarınızda Apple Music, iTunes Store və ya üçüncü tərəfdən əldə etdiyiniz uyğunlaşdırılmış və ya yüklənmiş mahnılara, pleylistlərə və musiqi videolarına (bundan sonra - "iCloud Musiqi Kitabxanası Məzmunu") daxil olmağa imkan verən Apple Music funksiyasıdır. Siz Apple Music üzvlüyünüzü qurduğunuz zaman iCloud Musiqi Kitabxanası avtomatik olaraq aktivləşir. iCloud Musiqi Kitabxanası iCloud Musiqi Kitabxanası Məzmununuz haqqında məlumat toplayır. Bu məlumat Apple ID hesabınızla əlaqələndirilir və Apple Music-də mövcud olan iCloud Musiqi Kitabxanası Məzmunu ilə müqayisə edilir. Uyğunlaşdırılmamiş iCloud Musiqi Kitabxanası Məzmunu Apple-ın iCloud Musiqi Kitabxanası serverlərinə yüklənir (Apple tərəfindən müəyyən olunmuş formatda). Siz sistemə 100,000-ə qədər mahnı yükləyə bilərsiniz. iTunes Store və ya Apple Music-dən əldə edilmiş mahnılar bu məhdudiyyətə aid edilmir. Müəyyən meyarlara (məsələn, iri həcmli fayllar) cavab verməyən və ya cihazınızda istifadəsinə icazə verilməyən mahnılar iCloud Musiqi Kitabxanasına uyğun gəlmir. Siz iCloud Musiqi Kitabxanasından istifadə edərkən, Apple oxutdurulan, dayandırılan və ya ötürülən treklər, istifadə etdiyiniz cihazlar və oxutdurulan yazının vaxtı və müddəti kimi məlumatları qeydiyyata alır. Siz iCloud Musiqi Kitabxanasını yalnız qanuni yollarla əldə edilmiş məzmun üçün istifadə edəcəyinizi qəbul edirsiniz. iCloud Musiqi Kitabxanası "OLDUĞU KİMİ" prinsipi əsasında təmin olunur və burada səhv və ya qeyri-dəqiqliklərə rast gəlmək olar. Siz iCloud Musiqi Kitabxananızı istifadə etməzdən əvvəl məlumat və informasiyalarınızın nüsxəsini çıxarmalısınız. Əgər Apple Music üzvü deyilsinizsə, bu bölmədə müəyyən şərtlərə tabe olan iTunes Match abunəliyini satın ala bilərsiniz.

J. BÜTÜN XİDMƏTLƏRƏ TƏTBİQ EDİLƏN DİGƏR ŞƏRTLƏR

APPLE-IN TƏRİFİ

Ölkənizdən asılı olaraq "Apple" aşağıdakılar deməkdir:

1 Infinit Loop, Cupertino, California ünvanında yerləşən Apple Inc. Şimali, Mərkəzi və Cənubi Amerikadakı (iTunes Store və Apple Music istifadəsi üçün Kanada da daxil olmaqla), eləcə də Amerika Birləşmiş Ştatlarının əraziləri və mülklərindəki və Şimali Amerika, Cənubi Amerika və Karib hövzəsindəki Fransız və Britaniya mülklərindəki istifadəçilər üçün nəzərdə tutulub;

120 Bremner Blvd., Suite 1600 Toronto ON M5J 0A8, Canada ünvanında yerləşən Apple Canada Inc. Kanada və ya onun ərazi və mülklərindəki App Store və iBooks Store istifadəçiləri üçün nəzərdə tutulub;

Roppongi Hills, 6-10-1 Roppongi, Minato-ku, Tokyo 106-6140, Tokyo ünvanında yerləşən iTunes K.K. Yaponiyadakı istifadəçilər üçün nəzərdə tutulub;

Level 3, 20 Martin Place, Sydney NSW 2000, Australia ünvanında yerləşən Apple Pty Limited Avstraliya, Yeni Zelandiya və onların ada mülkləri, əraziləri və tabeçiliyində olan yurisdiksiyalardakı istifadəçilər üçün nəzərdə tutulub; və

31-33 rue Sainte Zithe, L-2763 Luxembourg ünvanında yerləşən iTunes S.à.r.l. və 25 sentyabr 2016-cı il tarixindən etibarən Hollyhill Industrial Estate, Hollyhill, Cork, Republic of Ireland ünvanında yerləşən Apple Distribution International bütün istifadəçilər üçün nəzərdə tutulub.

MÜQAVİLƏDƏ DƏYİŞİKLİKLƏR

Apple hazırkı Müqaviləyə istənilən vaxt dəyişiklik etmək və sizin Xidmətlərdən istifadəyə dair yeni və ya əlavə şərtlər ya da qaydalar müəyyən etmək hüququnu özündə saxlayır. Belə dəyişikliklər və əlavə şərt və qaydalar dərhal qüvvəyə minəcək və hazırkı Müqaviləyə daxil ediləcək. Sizin Xidmətlərdən istifadəni davam etdirməyiniz bunları qəbul etdiyiniz kimi başa düşüləcəkdir.

ÜÇÜNCÜ TƏRƏFƏ AİD MATERİALLAR

Apple, Məzmun və ya Xidmətlərə daxil edilmiş və ya keçid verilmiş üçüncü tərəfə aid materiallara görə cavabdehlik və öhdəlik daşımır.

ƏQLİ MÜLKİYYƏT

Siz razılaşırsınız ki, Məzmun, qrafik təsvirlər, istifadəçi interfeysi, audio kliplər, video kliplər, mətbu nəşrlər və əlyazmalar və Xidmətləri icra etmək üçün istifadə edilən proqram təminatı da daxil olmaqla, lakin bunlarla məhdudlaşmayaraq, Xidmətlərin tərkibinə Apple və/və ya onun Lisenziya Sahiblərinə məxsus olan xüsusi məlumat və materiallar daxildir və onlar müəlliflik hüququ da daxil olmaqla, lakin onunla məhdudlaşmadan müvafiq əqli mülkiyyət və digər qanunlarla qorunur. Bu Müqaviləyə uyğun olaraq siz xüsusi məlumat və ya materiallardan Xidmətlərin şəxsi, qeyri-kommersiya istifadəsi xaric heç bir halda istifadə etməyəcəyinizə razı olursunuz. Hazırkı şərtlərdə aydın göstərilən hallar istisna olmaqla, Xidmətlərin heç bir hissəsi hər hansı forma və ya üsulla yenidən istehsal edilə bilməz. Siz Xidmətləri və ya Məzmunu hər hansı bir şəkildə dəyişdirməyəcəyinizi, icarəyə, kreditə verməyəcəyinizi, satmayacağınızı və ya paylaşmayacağınızı qəbul edirsiniz və açıq şəkildə icazə verilmədikcə Xidmətləri istismar etməməlisiniz.

Apple adı, Apple loqosu, iTunes, iTunes Store, App Store, iBooks Store, Apple Music və Xidmətlər ilə əlaqədar istifadə olunan digər Apple ticarət nişanları, xidmət nişanları, qrafik təsvirləri və loqolar ABŞ və/və ya digər ölkələrdə Apple-ın ticarət nişanları və ya qeydiyyatdan keçmiş ticarət nişanlarıdır. Sizə yuxarıda adı çəkilən ticarət nişanları ilə əlaqədar heç bir hüquq və ya lisenziya verilmir.

MÜƏLLİF HÜQUQLARI ÜZRƏ XƏBƏRDARLIQ

Xidmətlər vasitəsilə təmin edilən hər hansı bir Məzmun sizə aid müəllif hüququnu pozursa, aşağıdakı yerlərdən Apple ilə əlaqə saxlamağınızı xahiş edirik:

- iTunes Store: http://www.apple.com/legal/internet-services/itunes/itunesstorenotices/

- App Store: https://www.apple.com/legal/internet-services/itunes/appstorenotices/

- iBooks Store: iBooks.Store.Notices@apple.com

- Apple Music: http://www.apple.com/legal/trademark/claimsofcopyright.html

XİDMƏTLƏRİN XİTAMI VƏ DAYANDIRILMASI

Əgər siz bu Müqavilənin hər hansı müddəasını pozsanız və ya Apple tərəfindən Müqavilənin hər hansı müddəasının siz tərəfdən pozulması barədə şübhə yaranarsa, Apple sizi xəbərdar etmədən: (i) bu Müqaviləyə və/və ya sizin Apple ID Hesabınıza xitam verə bilər və siz xitam tarixinədək və xitam tarixi də daxil olmaqla, Apple ID Hesabınızda nəzərdə tutulan bütün müvafiq məbləğlərin ödənilməsi ilə əlaqədar məsuliyyət daşıyırsınız və/və ya (ii) proqram təminatı lisenziyasına xitam verə bilər və/və ya (iii) Xidmətlərə çıxışınızın qarşısını ala bilər.

Apple istənilən vaxt və sizə bildiriş verməklə və ya vermədən Xidmətlərə (və ya onların hər hansı hissəsinə) dəyişiklik etmək, onu müvəqqəti və ya daimi dayandırmaq hüququna malikdir və Apple bu hüququndan istifadə etdikdə sizin və ya hər hansı üçüncü tərəfin qarşısında heç bir məsuliyyət daşımır.

ZƏMANƏTLƏRDƏN İMTİNA; ÖHDƏLİYİN MƏHDUDLAŞDIRILMASI

APPLE SİZİN XİDMƏTLƏRDƏN İSTİFADƏNİZİ FASİLƏSİZ VƏ YA NÖQSANSIZ TƏMİN EDƏCƏYİNƏ ZƏMANƏT VERMİR VƏ SİZ BUNUNLA QƏBUL EDİRSİNİZ Kİ, APPLE BƏZƏN XİDMƏTLƏRİ QEYRİ MÜƏYYƏN MÜDDƏTƏ DAYANDIRA, XİDMƏTLƏRİ İSTƏNİLƏN VAXT LƏĞV EDƏ VƏ YA SİZƏ XƏBƏRDARLIQ ETMƏDƏN SİZİN XİDMƏTLƏRƏ GİRİŞİNİZİ MƏHDUDLAŞDIRA VƏ YA DAYANDIRA BİLƏR.

SİZ ÖZ XİDMƏTlLƏRİNİZDƏN İSTİFADƏ ETMƏYİNİZİN VƏ YA İSTİFADƏ EDƏ BİLMƏMƏYİNİZİN SİZƏ AİD BİR RİSK OLDUĞUNU AÇIQ ŞƏKİLDƏ QƏBUL EDİRSİNİZ. XİDMƏTLƏR VASİTƏSİLƏ SİZƏ TƏMİN EDİLƏN BÜTÜN XİDMƏTLƏR VƏ MƏZMUN (APPLE TƏRƏFİNDƏN AYDIN ŞƏKİLDƏ BİLDİRİLƏNLƏR İSTİSNA OLMAQLA) SİZİN İSTİFADƏNİZƏ “OLDUĞU KİMİ” VƏ “MÖVCUD OLAN KİMİ”, SATILA BİLMƏ QABİLİYYƏTİ, MÜƏYYƏN MƏQSƏD ÜÇÜN YARARLILIĞI, ADI, HÜQUQLARI POZMAMA ÜZRƏ NƏZƏRDƏ TUTULAN BÜTÜN ZƏMANƏTLƏR DƏ DAXİL OLMAQLA, İSTƏR EKSPRES, İSTƏRSƏ DƏ NƏZƏRDƏ TUTULAN HƏR HANSI BİR ZƏMANƏT OLMADAN TƏMİN EDİLİR. BƏZİ YURİSDİKSİYALAR NƏZƏRDƏ TUTULAN ZƏMANƏTİN İSTİSNA EDİLMƏSİNƏ İCAZƏ VERMƏDİKLƏRİ ÜÇÜN BU ZƏMANƏTİN YUXARIDAKI İSTİSNASI SİZƏ ŞAMİL EDİLMƏYƏ BİLƏR.

APPLE, ONUN DİREKTORLARI, VƏZİFƏLİ ŞƏXSLƏRİ, İŞÇİLƏRİ, DİSTRİBUTORLARI, AGENTLƏRİ, PODRATÇILARI VƏ LİSENZİYA SAHİBLƏRİ HEÇ BİR HALDA SİZİN XİDMƏTLƏRİN HƏR HANSI BİRİNİN İSTİFADƏSİNDƏN İRƏLİ GƏLƏN BİRBAŞA, DOLAYI, TƏSADÜFİ, CƏZA XARAKTERLİ, XÜSUSİ, VƏ YA QƏSDƏN VURULMUŞ ZƏRƏRƏ VƏ YA SİZİN XİDMƏTLƏRİN VƏ/VƏ YA HƏR HANSI BİR MƏZMUNDA SƏHV VƏ XƏTANIN MÖVCUDLUĞU, YAXUD XİDMƏTLƏRDƏ YERLƏŞDİRİLƏN, ONUN VASİTƏSİLƏ ÖTÜRÜLƏN VƏ YA DİGƏR FORMADA TƏQDİM EDİLƏN HƏR HANSI MƏHSULUN İSTİFADƏSİ NƏTİCƏSİNDƏ YARANAN İTKİ VƏ YA ZƏRƏR (ONLARIN MÜMKÜNLÜYÜ BARƏDƏ MƏLUMAT VERİLMƏSİNDƏN ASILI OLMAYARAQ) DƏ DAXİL OLMAQLA, HƏR HANSI MƏZMUNUN İSTİFADƏSİ İLƏ ƏLAQƏDAR OLAN HƏR HANSI İDDİAYA GÖRƏ MƏSULİYYƏT DAŞIMIR. BƏZİ ÖLKƏ, DÖVLƏT VƏ YA YURİSDİKSİYALAR QƏSDƏN VURULAN VƏ YA TƏSADÜFİ ZƏRƏRİN İSTİSNASI VƏ YA ONA GÖRƏ ÖHDƏLİYİN MƏHDUDLAŞDIRILMASINA İCAZƏ VERMƏDİYİNDƏN APPLE ÖHDƏLİYİ BELƏ ÖLKƏ, DÖVLƏT VƏ YURİSDİKSİYALARDA QANUNLA YOL VERİLƏN HƏDDƏ QƏDƏR MƏHDUDLAŞDIRIR.

APPLE SİZİN XİDMƏTLƏR İLƏ BAĞLI TƏQDİM ETDİYİNİZ MƏLUMATLARI QORUMAQ ÜÇÜN LAZIMİ SƏYLƏR GÖSTƏRƏCƏKDİR, BUNUNLA BELƏ SİZ RAZILAŞIRSINIZ Kİ, BU CÜR MƏLUMATLARI TƏQDİM ETMƏYİNİZİN RİSKİ SİZƏ AİDDİR VƏ BUNUNLA SİZ APPLE-I BU MƏLUMATLA BAĞLI HƏR HANSI İTKİYƏ VƏ YA ÖHDƏLİYƏ GÖRƏ İSTƏNİLƏN MƏSULİYYƏTDƏN AZAD EDİRSİNİZ.

APPLE XİDMƏTLƏRİN İTKİDƏN, ZƏRƏRDƏN, HÜCUMDAN, VİRUSLARDAN, MÜDAXİLƏDƏN, XAKER HÜCUMUNDAN VƏ YA TƏHLÜKƏSİZLİYƏ DİGƏR MÜDAXİLƏLƏRDƏN AZAD OLMASI BARƏDƏ QARANTİYA VƏ YA ZƏMANƏT VERMİR VƏ BUNUNLA SİZ APPLE-I BUNLARLA BAĞLI MƏSULİYYƏTDƏN AZAD EDİRSİNİZ. XİDMƏTLƏRDƏN ƏLDƏ EDİLƏN VƏ YA İCARƏYƏ GÖTÜRÜLƏN HƏR HANSI MƏZMUN DA DAXIL OLMAQLA, SİSTEMİNİZİN EHTİYAT NÜSXƏSİNİN ÇIXARILMASINA GÖRƏ SİZ MƏSULİYYƏT DAŞIYIRSINIZ.

APPLE İNTERNET ÜZƏRİNDƏN FAYLLARI YÜKLƏMƏK VƏ YA OXUTDURMAQDAN YARANACAQ XƏRCLƏRƏ GÖRƏ MƏSULİYYƏT DAŞIMIR.

İMTİNA VƏ TƏZMİNAT

XİDMƏTLƏRDƏN İSTİFADƏ ETMƏKLƏ SİZ RAZILAŞIRSINIZ Kİ, QANUNUN İCAZƏ VERDİYİ MAKSİMUM SƏVİYYƏDƏ APPLE-I, ONUN DİREKTORLARINI, VƏZİFƏLİ ŞƏXSLƏRİNİ, İŞÇİLƏRİNİ, DİSTRİBUTORLARINI, AGENTLƏRİNİ, PODRATÇILARINI VƏ LİSENZİYA SAHİBLƏRİNİ SİZİN BU MÜQAVİLƏNİ POZMANIZDAN, XİDMƏTLƏRDƏN İSTİFADƏ ETMƏYİNİZDƏN VƏ APPLE TƏRƏFİNDƏN BU MÜQAVİLƏNİN POZULMASI ŞÜBHƏSİ OLDUĞUNA GÖRƏ ARAŞDIRMA TƏDBİRLƏRİNİN APARILMASINDAN VƏ YA ONUN HAZIRKI MÜQAVİLƏNİN POZULMASINI TƏSDİQİ VƏ YA QƏRARINDAN İRƏLİ GƏLƏN İDDİALARDAN QORUMALI VƏ ONLARA DƏYƏN ZƏRƏRİN ƏVƏZİNİ ÖDƏMƏLİSİNİZ. BU O DEMƏKDİR Kİ, SİZ APPLE-I, ONUN DİREKTORLARINI, VƏZİFƏLİ ŞƏXSLƏRİNİ, İŞÇİLƏRİNİ, DİSTRİBUTORLARINI, AGENTLƏRİNİ, PODRATÇILARINI VƏ LİSENZİYA SAHİBLƏRİNİ HƏR HANSI MƏLUMATI VƏ YA MƏHSULU İŞLƏTMƏMƏK VƏ YA SİLMƏK, SİZƏ XƏBƏRDARLIQ ETMƏK, SİZİN XİDMƏTLƏRƏ ÇIXIŞINIZI DAYANDIRMAQ VƏ YA ONA XİTAM VERMƏK, VƏ YA ŞÜBHƏ EDİLƏN POZUNTUNUN ARAŞDIRILMASI İLƏ BAĞLI HƏR HANSI DİGƏR TƏDBİRLƏRİN GÖRÜLMƏSİ BARƏDƏ QƏRARINA VƏ YA APPLE-IN POZUNTUNUN BAŞ VERDİYİ BARƏDƏ QƏRAR ÇIXARMASINA GÖRƏ MƏHKƏMƏYƏ VERƏ VƏ YA ONLARDAN YUXARIDA GÖSTƏRİLƏNLƏR NƏTİCƏSİNDƏ DƏYƏN ZİYANIN TUTULMASINI TƏLƏB EDƏ BİLMƏZSİNİZ. BU İMTİNA VƏ TƏZMİNAT MÜDDƏASI HAZIRKI MÜQAVİLƏDƏ TƏSVİR OLUNAN VƏ YA NƏZƏRDƏ TUTULAN BÜTÜN POZUNTULARA ŞAMİL EDİLİR.

DÖVLƏT QURUMLARI ÜÇÜN QANUNLA MÜƏYYƏN OLUNMUŞ İSTİSNALAR

Əgər siz ixtisaslı ictimai təhsil müəssisəsi və ya dövlət qurumusunuzsa və bu Müqavilənin hər hansı bir hissəsi, məsələn, təzminat bölməsinin tam və ya bir hissəsi müvafiq yerli, ölkədaxili, dövlət və ya federal qanunlara görə sizin üçün etibarsızdırsa və ya sizə qarşı tətbiq edilə bilməzsə, bu zaman bu hissə etibarsız və ya sizə qarşı hüquqi qüvvəyə malik olmayan hissə hesab edilir və bu halda həmin hissə müvafiq qanunvericiliyə uyğun təfsir edilir.

QANUNVERİCİLİK

Aşağıdakı paraqrafda açıq şəkildə göstərilən hallar istisna olmaqla, bu Müqavilə və sizin Apple ilə aranızdakı əlaqə, hüquqi normalara uyğun olmayan hallar xaric, Kaliforniya Ştatının qanunları ilə tənzimlənir. Siz və Apple bu Müqavilə ilə bağlı yaranacaq mübahisə və ya iddiaların həll edilməsi üçün məsələnin Kaliforniyanın Santa Klara bölgəsində yerləşən məhkəmələrin şəxsi və eksklüziv yurisdiksiyasına təqdim etməyə razılıq verirsiniz. Əgər siz (a) ABŞ vətəndaşı deyilsəniz; (b) ABŞ-da yaşamırsınızsa; (c) Xidmətə ABŞ-dan daxil olmursunuzsa; və (d) aşağıda müəyyən olunmuş ölkələrdən birinin vətəndaşısınızsa, bununla siz bu Müqavilə ilə bağlı yaranacaq mübahisə və ya iddiaların, hüquqi normalara uyğun olmayan hallar istisna olmaqla, aşağıda qeyd olunmuş müvafiq qanunla tənzimlənəcəyinə və bununla qəti şəkildə aşağıdakı dövlət, əyalət və ya ölkələrdə yerləşən məhkəmələrin qeyri-müstəsna yurisdiksiyasına riayət etməyə razılıq verirsiniz.

 

Əgər siz hər hansı bir Avropa İttifaqı ölkəsinin, İsveçrə, Norveç və ya İslandiyanın vətəndaşısınızsa, rəhbər qanunvericilik və yer sizin yaşadığınız yerin qanunları və məhkəmələri olmalıdır.

 

Xüsusilə bu Müqaviləyə tətbiqi istisna edilən qanun Malların Beynəlxalq Satışı üzrə Birləşmiş Millətlər Konvensiyası kimi tanınan qanundur.

DİGƏR MÜDDƏALAR

Bu Müqavilə sizinlə Apple arasında olan bütün razılaşmaları əks etdirir və sizin Xidmətlərdən istifadənizi tənzimləyir, eyni zamanda siz və Apple arasında əvvəl mövcud olan bütün razılaşmalardan üstün tutulur. Sizə əlaqədar xidmətlərdən, üçüncü tərəf məzmunundan, üçüncü tərəfin proqram təminatından və ya Həcm Satınalma Proqramı (Volume Purchase Program) kimi əlavə xidmətlərdən istifadə etdiyiniz zaman əlavə şərt və qaydalar tətbiq oluna bilər. Bu Müqavilənin bir hissəsi etibarsız hesab edilərsə və ya qüvvəyə minməzsə, həmin hissə müvafiq qanunvericiliyə uyğun və tərəflərin əsl niyyətlərinə mümkün ən yaxın mənada təfsir edilir və qalan hissələr tam qüvvəyə və təsirə malik formada saxlanılır. Apple-ın bu Müqavilənin hüquq və ya müddəalarını təmin edə bilməməsi belə və ya hər hansı digər müddəadan imtina etməsi hesab edilmir. Apple öz nəzarətindən kənar səbəblər nəticəsində hər hansı öhdəliklərini yerinə yetirə bilməməsinə görə məsuliyyət daşımır.

Siz Xidmətlərdən istifadənizə görə tətbiq olunan bütün yerli, ştat, federal və ölkədaxili qanunlara, normativ aktlara, fərman və sərəncamlara riayət etməyi qəbul edirsiniz. Sizin Xidmətlərdən istifadəniz həmçinin digər qanunların predmeti ola bilər. Elektron formada icra olunan bütün Sövdələşmələr üzrə məlumatların itirilməsi riski elektron ötürmə zamanı məlumatı qəbul edən tərəfə keçir. Heç bir Apple işçisi və ya agenti bu Müqaviləni dəyişmək səlahiyyətinə malik deyil.

Apple Xidmətlərlə bağlı e-poçt ünvanınıza e-poçt və ya adi poçt ünvanınıza məktub göndərməklə, və ya Xidmətlərdə yerləşdirməklə bildirişlər göndərə bilər. Bildirişlər göndərildiyi andan qüvvəyə minir. Apple həmçinin sizinlə e-poçt vasitəsilə əlaqə qura bilər və ya bildiriş sistemi ilə sizə Xidmətlər haqqında əlavə məlumatlar göndərə bilər.

Bununla siz Apple-a Müqavilənin hər hansı bir hissəsinə riayət olunmasının icrasını təmin etmək və/və ya yoxlamaq üçün zəruri və məqsədəuyğun addımları atmaq hüququ verirsiniz. Siz razılaşırsınız ki, Apple sizə qarşı heç bir öhdəlik götürmədən bu Müqavilənin hər hansı müddəasını icra etmək və ya ona riayət olunmasını yoxlamaq məqsədi ilə (o cümlədən sizin Xidmətlərdən və/və ya Məzmundan istifadə etmənizlə bağlı və/və ya sizin Xidmətlərdən və/və Məzmundan istifadənizin qanuna zidd və ya üçüncü tərəfin hüquqlarının pozulması barədə iddialarla bağlı Apple-ın hüquqi proses çərçivəsində əməkdaşlıq etmək hüququ da daxil olmaqla, lakin bunlarla məhdudlaşmadan) Apple-ın zəruri və lazım bildiyi hallarda hər hansı bir məlumat və/və ya informasiyanı hüquq mühafizə orqanlarına, dövlət rəsmilərinə və/ və ya üçüncü tərəfə açıqlaya bilər.

Uşaq və onun valideyninin və ya qəyyumunun bu Müqaviləni anladıqlarından əmin olmaq məqsədilə yetkinlik yaşına çatmamış uşaqlar bu Müqaviləni valideyn və ya qəyyumu ilə birlikdə oxumalıdır.

Son yenilənmə: 13 sentyabr 2016-cı il