Përmbledhje e kushteve kryesore:

• Evidencat e ndërprerjeve aksidentale dhe informacionet statistikore në lidhje me përdorimin e secilit prej aplikacioneve beta nga ana juaj do t'u sigurohen automatikisht Apple-it dhe ofruesit të aplikacionit si pjesë e TestFlight-it.

• Mund t’i paraqitni sugjerime dhe ide ofruesit të aplikacionit për aplikacionin beta.

• Aplikacionet beta mund të ndërpriten automatikisht dhe të çojnë në humbjen e të dhënave në ato aplikacione beta.

• Nëse keni tashmë versionin e plotë të një aplikacioni, instalimi i një aplikacioni beta mund të çojë në humbjen e të dhënave.

• Mund të ndërpritni pjesëmarrjen në një test beta për një aplikacion beta duke fshirë aplikacionin beta nga pajisja juaj.

-----

Përdorimi nga ana juaj i shërbimit të TestFlight-it ("TestFlight"), duke përfshirë testimet beta të aplikacioneve versione testuese të Mac, iPhone, iPad, Apple Watch dhe Apple TV ose çdo pajisje tjetër të markës Apple të shkarkuara përmes TestFlight-it ("Aplikacionet beta"), drejtohet nga kushtet e përgjithshme në vijim ("Kushtet e shërbimit të TestFlight-it"). Me përjashtim të amendimeve të posaçme më poshtë, zbatohen Kushtet e përgjithshme të plota të shërbimeve të medieve të Apple-it për rajonin tuaj dhe përfshihen këtu për referencë, dhe kushtet e përkufizuara do të kenë kuptimet e përcaktuara në Kushtet e përgjithshme të shërbimeve të medieve të Apple-it, përveç atyre që janë treguar këtu. Për qëllimet e këtyre Kushteve të shërbimit të TestFlight-it, termi "Aplikacion i licencuar" do të përfshijë aplikacionet beta. Shihni Kushtet e përgjithshme të shërbimeve të medieve të Apple-it: https://www.apple.com/legal/internet-services/itunes/

Kushte specifike për testuesit e versionit beta

Fëmijëve nën moshën 13 vjeç, ose në moshën e barasvlershme minimale në juridiksionin përkatës, nuk u lejohet të përdorin TestFlight-in. Nëse jeni 13 vjeç ose në moshën e barasvlershme minimale në juridiksionin përkatës ose më të mëdhenj, por nën moshën 18 vjeç, duhet ta shqyrtoni këtë Marrëveshje me prindin ose kujdestarin tuaj për t'u siguruar që ju dhe prindi ose kujdestari i kuptojnë dhe pajtohen me kushtet në vijim.

TestFlight-i është projektuar për të ndihmuar zhvilluesit e palëve të treta ("Ofruesit e aplikacionit") që të kryejnë testet e versionit beta dhe të përmirësojnë performancën e aplikacioneve versione testuese të tyre të Mac, iPhone, iPad, Apple Watch dhe Apple TV ose çdo pajisje tjetër të markës Apple dhe t’u sigurojnë aplikacionet beta testuesve të versionit beta. Nëse një ofrues aplikacioni ju autorizon si testues të versionit beta dhe zgjidhni të shkarkoni aplikacionin beta përkatës nga ofruesi i aplikacionit përmes TestFlight-it, atëherë me kusht që të pajtoheni me këto Kushte të shërbimit të TestFlight-it, ofruesi i aplikacionit ju jep një licencë të kufizuar, jo-ekskluzive, të patransferueshme, të pa-nënlicencueshme për t’u qasur, shkarkuar dhe përdorur aplikacionin beta për të cilin jeni përzgjedhur si testues i versionit beta dhe çdo dokumentacion përkatës në dispozicion në linjë, vetëm për qëllime të testimit të versionit beta për një kohë të kufizuar dhe që i nënshtrohet këtyre kushteve të shërbimit të TestFlight-it.

Mes jush dhe ofruesit të aplikacionit, dhe përveç licencës së kufizuar të përcaktuar më sipër, ofruesi i aplikacionit zotëron të gjitha të drejtat, titullin dhe interesin në aplikacionin beta, duke përfshirë, por pa u kufizuar në të drejtat e pronësisë intelektuale. Deri në masën maksimale të lejuar nga ligji, nuk mund të: (a) modifikoni, deshifroni, dekompiloni ose çmontoni aplikacionin beta; (b) merrni me qira, jepni me qira, huazoni, shitni, nën-licenconi, shpërndani, transmetoni ose transferoni në ndonjë mënyrë aplikacionin beta; (c) bëni ndonjë kopje ose të riprodhoni në ndonjë mënyrë aplikacionin beta; ose (d) ia shfaqni ndonjë aplikacion beta palëve e treta të paautorizuara pa autorizimin e ofruesit të aplikacionit.

Pranoni të bëni përpjekje të arsyeshme për të testuar versionin beta të aplikacionit beta.

Pranoni se e kuptoni që aplikacionet beta janë softuerë versione testuese alfa ose beta dhe mund të jenë të paplota ose mund të kenë gabime ose pasaktësi. Nuk duhet të përdorni aplikacionet beta në një mjedis operimi tregtar ose me të dhëna të rëndësishme. Duhet të bëni kopje rezervë të të dhënave përpara se të përdorni aplikacionin beta në pajisjen tuaj të markës Apple. As Apple dhe as ofruesi i aplikacionit nuk do të mbajnë përgjegjësi për kostot, shpenzimet ose detyrimet e tjera që mund të lindin si pasojë e përdorimit të aplikacioneve beta, duke përfshirë por pa u kufizuar në ndonjë dëm, humbje ose korruptim të ndonjë softueri, informacioni ose të dhëne. Për më tepër, aplikacionet beta mund të mos jenë të pajtueshme me aplikacionet e prodhimit. Nëse keni tashmë një version prodhimi të një aplikacioni beta të instaluar në pajisjen tuaj të markës Apple, duhet të bëni kopje rezervë të të dhënave që lidhen me një aplikacion të tillë përpara se të instaloni një version beta pasi të dhënat mund të korruptohen ose të humbasin midis versioneve të ndryshme të të njëjtit aplikacion. Pranoni dhe pajtoheni shprehimisht se përdorimi i aplikacioneve beta bëhet plotësisht duke marrë vetë përsipër rrezikun.

Përveç kësaj, nëse keni të instaluar versionin e plotë të një aplikacioni në pajisjen tuaj dhe instaloni të njëjtin aplikacion beta, të dhënat e aplikacionit tuaj mund të korruptohen ose të humbasin dhe mund të mos jenë të rikuperueshme. Përpara se të instaloni një aplikacion beta, duhet të bëni kopje rezervë të informacioneve tuaja. Vetëm për qëllimet e testimit të një aplikacioni beta dhe vetëm për kohëzgjatjen e një testi të tillë, blerjet përmes aplikacionit të bëra brenda aplikacionit beta do t'ju vihen në dispozicion pa asnjë kosto dhe këto blerje nuk do t’i faturohen llogarisë suaj. Nëse blini ose shkarkoni aplikacionin nga App Store, të dhënat tuaja mund të mos mbeten në dispozicion nga brenda versionit të plotë. Ju rekomandojmë që t’u bëni kopje rezervë të dhënave tuaja përpara se të fshini aplikacionin beta ose të blini versionin e plotë nga App Store.

Aplikacionet beta të ofruara nga Apple dhe/ose zhvilluesit e palëve të treta mund të mos jenë në dispozicion në të gjitha gjuhët ose në të gjitha vendet, dhe Apple nuk garanton që aplikacionet beta janë të përshtatshme ose në dispozicion për përdorim në çdo vend të caktuar. Deri në masën që zgjidhni të qaseni dhe përdorni aplikacionet beta përmes TestFlight-it, e bëni këtë me nismën tuaj dhe jeni përgjegjës për pajtueshmërinë me çdo ligj të zbatueshëm. Aplikacionet beta janë të kufizuara në kohë dhe TestFlight-i mund të ndryshojë, kufizojë ose ndërpresë ofrimin e qasjes në aplikacionet beta në çdo kohë pa njoftim ose detyrime ndaj jush. Për më tepër, kuptoni dhe pajtoheni që informacione të caktuara në lidhje me një aplikacion beta të shkarkuar përmes TestFlight-it mund të mos jenë në dispozicion për ju përpara shkarkimit, duke përfshirë pa u kufizuar në klasifikimin e moshës së aplikacionit beta, kërkesat minimale të harduerit dhe disponueshmërinë e artikujve në dispozicion për blerje brenda aplikacionit beta (p.sh. blerjet përmes aplikacionit). Duke shkarkuar një aplikacion beta, pranoni të përdorni aplikacionin beta pa informacione dhe zbulime të tilla.

Pranoni dhe pajtoheni që nuk do të kompensoheni për vlerësimin e aplikacionit beta ose për ndonjë ide për versionin beta, dhe do të përballoni të gjitha shpenzimet tuaja nga përdorimi i TestFlight-it dhe aplikacioneve beta (p.sh., kostot e operatorit celular dhe internetit). Për më tepër, me këtë pranoni dhe pajtoheni që përmbajtja e përfshirë dhe përdorimi nga ana juaj i aplikacionit beta që nuk është tashmë në dispozicion për publikun do të konsiderohet konfidencial nëse ofruesi i aplikacionit nuk autorizon shprehimisht bërjen publike. Pranoni që ta mbani aplikacionin beta në mirëbesim dhe ta trajtoni si konfidencial, p.sh., mos e ndani me të tjerët që nuk e kanë të instaluar aplikacionin beta.

Nëse keni një ankesë në lidhje me një aplikacion beta, duhet t'ia dërgoni drejtpërdrejt ofruesit të aplikacionit. Pranoni dhe pajtoheni që ofruesi i aplikacionit, jo Apple, është plotësisht përgjegjës për çdo aplikacion beta, përveçse nëse Apple është licencuesi i një aplikacioni të tillë beta.

Të dhënat e testimit të versionit beta dhe komentet për versionin beta

Kur përdorni një aplikacion beta përmes TestFlight-it, Apple dhe ofruesi i aplikacionit do të mbledhin automatikisht evidencat e ndërprerjeve aksidentale dhe të dhënat e përdorimit ("Të dhënat e testimit të versionit beta") dhe nuk mund të hiqni dorë nga grumbullimi i të dhënave të testimit të versionit beta.

TestFlight-i do t'ju ofrojë gjithashtu mundësinë për të paraqitur komente me shkrim ose vizive (p.sh., pamje çasti të ekranit dhe komente) në lidhje me aplikacionet beta tek Apple dhe/ose ofruesit e aplikacioneve ("Komente për versionin beta"). Nëse paraqitni komentet për versionin beta, pranoni dhe pajtoheni që e bëni këtë me nismën tuaj dhe se ofruesi i aplikacionit (duke përfshirë Apple-n, nëse është aplikacion beta i Apple-it) do të ketë të drejtë të përdorë komentet tuaja për versionin beta siç përcaktohet më poshtë. Ju i deklaroni ofruesit të aplikacionit që keni të gjitha të drejtat e nevojshme për të dhënë komentet për versionin beta dhe për t'i dhënë të drejta ofruesit të aplikacionit.

Ofruesi i aplikacionit mund të përdorë të dhënat e testimit të versionit beta dhe komentet për versionin beta për të përmirësuar aplikacionin dhe produktet e lidhura me të, dhe mund t'ju kontaktojë në lidhje me përdorimin e aplikacionit beta nga ana juaj. Përdorimi i të dhënave të testimit të versionit beta dhe komentet për versionin beta nga ana e ofruesit të aplikacionit u nënshtrohen kufizimeve dhe kërkesave të përcaktuara nga Apple në Marrëveshjen e licencës së programit të zhvilluesit të Apple-it dhe Politikën e privatësisë së ofruesit të aplikacionit. Apple mund të përdorë të dhënat e testimit të versionit beta për të përmirësuar produktet dhe shërbimet e saj.

Të dhënat e testimit të versionit beta dhe komentet për versionin beta mund të përfshijnë informacione identifikuese personale, duke përfshirë në pamjet e çastit të ekranit që jepni, të tilla si kur një pamje çasti e ekranit përfshin fotot ose imazhin dhe ngjashmërinë tuaj, dhe informacione në lidhje me pajisjen tuaj, duke përfshirë por pa u kufizuar në identifikues të ndryshëm unikë të pajisjes, harduerë dhe specifikime të sistemit operativ, statistika të performancës dhe të dhëna në lidhje me mënyrën se si e përdorni pajisjen tuaj, softuerin e sistemit dhe aplikacionit, informacionet e rrjetit dhe pajisjet periferike. Kur përdorni TestFlight-in dhe aplikacionin beta, do të jepen detaje në lidhje me ato të dhëna që i dërgohen Apple-it dhe ofruesit të aplikacioneve dhe si mund të përdoren informacionet. Mund të mësoni më shumë duke vizituar https://testflight.apple.com/#privacy-data . Në çdo kohë, Apple do t’i trajtojë informacionet tuaja në përputhje me Politikën tonë të privatësisë, e cila mund të shihet në https://www.apple.com/legal/privacy/.

Apple është e përkushtuar ndaj diversitetit dhe sigurimit të një përvoje të sigurt, pa ngacmime për të gjithë. Komentet për versionin beta duhet të jenë respektuese dhe nuk duhet të përfshijnë shkrime, imazhe ose pamje çasti të ekranit fyese, të dëmshme ose nënçmuese.

PA GARANCI

PRANONI DHE PAJTOHENI SHPREHIMISHT SE PËR PËRDORIMIN E TESTFLIGHT-IT DHE ÇDO APLIKACIONI BETA TË SIGURUAR PËRMES TESTFLIGHT-IT, KENI MARRË VETË PËRSIPËR RREZIKUN DHE SE I GJITHË RREZIKU PËR CILËSINË, PERFORMANCËN, SAKTËSINË DHE PËRPJEKJEN E KËNAQSHME ËSHTË I JUAJI. APLIKACIONET BETA MUND TË KENË GABIME TË SOFTUERIT, SHËRBIMIT DHE TË TJERA DHE PËRDORIMI NGA ANA JUAJ I TESTFLIGHT-IT DHE/OSE APLIKACIONIT BETA TË SHKARKUAR PËRMES TESTFLIGHT-IT MUND TË MOS JETË VAZHDIMISHT NË DISPOZICION, PA GABIME, PA VIRUSE OSE KODE TË TJERA DASHAKEQE DHE MUND TË MOS I RUAJË TË DHËNAT ME SAKTËSI OSE FARE. TIPARET DHE FUNKSIONALITETI I APLIKACIONEVE TË TESTFLIGHT-IT DHE BETA TË SHKARKUARA PËRMES TESTFLIGHT-IT U NËNSHTROHEN NDRYSHIMEVE DHE MUND TË NDËRPRESIN TË QENËT NË DISPOZICION PËR JU NË ÇDO KOHË, ME OSE PA PARALAJMËRIM. DERI NË MASËN MAKSIMALE TË LEJUAR NGA LIGJI NË FUQI, TESTFLIGHT-I, APLIKACIONET BETA TË PËRFITUARA NËPËRMJET TESTFLIGHT-IT DHE ÇDO SHËRBIM I KRYER OSE I OFRUAR NGA TESTFLIGHT-I DHE/OSE APLIKACIONE TË TILLA BETA OFROHEN "ASHTU SIÇ JANË" DHE "SIÇ JANË NË DISPOZICION", ME TË GJITHA DEFEKTET DHE PA ASNJË LLOJ GARANCIE, DHE APPLE DHE OFRUESI I APLIKACIONIT HEQIN DORË NGA TË GJITHA GARANCITË DHE KUSHTET NË LIDHJE ME TESTFLIGHT-IN, APLIKACIONET BETA DHE ÇDO SHËRBIM, QOFTË TË SHPREHUR, TË NËNKUPTUAR, OSE LIGJOR, DUKE PËRFSHIRË, POR PA U KUFIZUAR NË, GARANCITË DHE/OSE KUSHTET E TREGTUESHMËRISË, CILËSINË E KËNAQSHME, PËRSHTATSHMËRINË PËR NJË QËLLIM TË CAKTUAR, SAKTËSINË, SHIJIMIN E QETË DHE MOS-CENIMIN E TË DREJTAVE TË PALËVE TË TRETA. APPLE DHE OFRUESI I APLIKACIONIT NUK GARANTOJNË NDAJ NDËRHYRJES NË SHIJIMIN NGA ANA JUAJ TË TESTFLIGHT-IT DHE/OSE APLIKACIONIT BETA, QË FUNKSIONET E PËRFSHIRA OSE SHËRBIMET E KRYERA OSE TË SIGURUARA NGA TESTFLIGHT-I DHE/OSE APLIKACIONI BETA TË PLOTËSOJNË KËRKESAT TUAJA, QË FUNKSIONIMI I APLIKACIONI BETA OSE TESTFLIGHT-IT DO TË JETË I PANDËRPRERË OSE PA GABIME, OSE QË DEFEKTET NË APLIKACIONIN BETA OSE TË TESTFLIGHT-IT DO TË KORRIGJOHEN. ASNJË INFORMACION OSE KËSHILLË ME GOJË OSE ME SHKRIM E DHËNË NGA OFRUESI I APLIKACIONIT OSE PËRFAQËSUESI I TIJ I AUTORIZUAR NUK DO TË KRIJOJË NJË GARANCI. NËSE APLIKACIONI BETA OSE I TESTFLIGHT-IT REZULTON ME DEFEKT, JU MERRNI PËRSIPËR KOSTON E PLOTË TË TË GJITHË SHËRBIMIT, RIPARIMIT OSE KORRIGJIMIT TË NEVOJSHËM. DISA JURIDIKSIONE NUK LEJOJNË PËRJASHTIMIN E GARANCIVE TË NËNKUPTUARA OSE KUFIZIMEVE NË TË DREJTAT E ZBATUESHME LIGJORE TË NJË KONSUMATORI, PRANDAJ PËRJASHTIMI DHE KUFIZIMET E MËSIPËRME MUND TË MOS ZBATOHEN PËR JU.

Përfundimi

Për të përfunduar pjesëmarrjen në testimin e versionit beta të një aplikacioni të veçantë beta, fshini aplikacionin beta nga pajisja juaj. Fshirja e aplikacionit beta nga pajisja juaj do të fshijë gjithashtu çdo të dhënë që keni krijuar brenda atij aplikacioni beta dhe mund të fshijë çdo të dhënë të krijuar në një version të plotë të aplikacionit të instaluar më parë. Fshirja e aplikacionit beta nuk do të fshijë të dhënat e testimit të versionit beta ose idetë për versionin beta që ju, TestFlight-i ose aplikacioni beta i keni dhënë tashmë ofruesit të aplikacionit dhe Apple-it. Për të kërkuar fshirjen e informacioneve tuaja personale, kontaktoni drejtpërdrejt me ofruesin e aplikacionit ose Apple-n. Apple dhe/ose ofruesi i aplikacionit ruajnë të drejtën që të përfundojnë pjesëmarrjen tuaj në testimin e versionit beta të çdo aplikacioni beta në çdo kohë, vetëm me gjykimin e tyre. Për shembull, përfundimi mund të ndodhë nëse siguroni komente për versionin beta që përmbajnë imazhe fyese dhe të papërshtatshme për ofruesin e aplikacionit.

21/06/2023