• ನೀವು ವಯಸ್ಕರೋ, ಮಗುವೋ ಅಥವಾ ಹದಿಹರೆಯದವರೋ ಎಂಬುದನ್ನು ಪರಿಶೀಲಿಸಲು, ನಿಮ್ಮ Apple ಖಾತೆಯೊಂದಿಗೆ ಸಂಯೋಜಿಸಿದ ನಿಮ್ಮ ವಯಸ್ಸು ಮತ್ತು ದೇಶ ಅಥವಾ ಪ್ರದೇಶದ ಮಾಹಿತಿಯನ್ನು ಬಳಸಲಾಗುತ್ತದೆ.
• ನೀವು ಕುಟುಂಬ ಗುಂಪು ಆರಂಭಿಸುವುದು ಅಥವಾ ಸೇರಿಕೊಂಡಾಗ, ನೀವು ಮತ್ತು ನಿಮ್ಮ ಕುಟುಂಬ ಸದಸ್ಯರು ಸಬ್‌ಸ್ಕ್ರಿಪ್ಶ‌ನ್‌ಗಳು, ಖರೀದಿಗಳು ಮತ್ತು ಸ್ಥಳವನ್ನು ಹಂಚಿಕೊಳ್ಳಲು ಸಾಧ್ಯವಾಗುವಂತೆ ನಿಮ್ಮ Apple ಖಾತೆ ಮತ್ತು ಕುಟುಂಬ ಸದಸ್ಯರ ಕುರಿತು ಮಾಹಿತಿಯನ್ನು ಬಳಸಬಹುದು.
• ನೀವು ಪೋಷಕರು ಅಥವಾ ಪಾಲಕರಾಗಿದ್ದಲ್ಲಿ, ನಿಮ್ಮ ಕುಟುಂಬದ ಗುಂಪಿನಲ್ಲಿರುವ ಮಕ್ಕಳು ಮತ್ತು ಹದಿಹರೆಯದವರಿಗಾಗಿ ಪೋಷಕರು ಹೇರುವ ನಿಯಂತ್ರಣಗಳನ್ನು ಸೆಟಪ್ ಮಾಡುವುದಕ್ಕೆ ನಿಮಗೆ ಅನುವುಮಾಡಿಕೊಡಲು, ನಿಮ್ಮ ಮತ್ತು ನಿಮ್ಮ ಕುಟುಂಬದ ಸದಸ್ಯರ Apple ಖಾತೆಗಳನ್ನು ಬಳಸಬಹುದು.
• ಕುಟುಂಬ ಹಂಚಿಕೆ ಮೂಲಕ ಲಭ್ಯವಿರುವ ಉತ್ಪನ್ನಗಳು, ಸೇವೆಗಳು ಮತ್ತು ಆಫರ್‌ಗಳು ಹಾಗೂ ಇತರ ಲಾಭಗಳ ಕುರಿತಾದ ಪ್ರಸ್ತುತವೆನಿಸುವ ಸಂವಹನಗಳನ್ನು ನಿಮಗೆ ಮತ್ತು ನಿಮ್ಮ ಕುಟುಂಬದ ಸದಸ್ಯರಿಗೆ ಕಳುಹಿಸಲು ನಿಮ್ಮ ಕುಟುಂಬ ಗುಂಪಿನ ವಿವರಗಳನ್ನು ಬಳಸಬಹುದು.

ನಿಮ್ಮ ಮಾಹಿತಿಯ ಗೌಪ್ಯತೆ ಮತ್ತು ಭದ್ರತೆಯನ್ನು ರಕ್ಷಿಸುವುದು Appleನಲ್ಲಿರುವ ಪ್ರತಿಯೊಬ್ಬರ ಆದ್ಯತೆಯಾಗಿದೆ. ನಿಮ್ಮ ಅನುಭವವನ್ನು ಸುಧಾರಿಸಲು ಅಗತ್ಯವಾದ ಡೇಟವನ್ನು ಸಂಗ್ರಹಿಸಲು ನಾವು ನಮ್ಮ ಕೈಲಾದಷ್ಟು ಪ್ರಯತ್ನಿಸುತ್ತೇವೆ. ನಾವು ಡೇಟವನ್ನು ಸಂಗ್ರಹಿಸಿದಾಗ, ನಾವು ಏನನ್ನು ಸಂಗ್ರಹಿಸುತ್ತೇವೆ ಮತ್ತು ನಮಗೆ ಅದು ಏಕೆ ಬೇಕು ಎಂಬುದನ್ನು ನೀವು ಅರ್ಥಮಾಡಿಕೊಳ್ಳುವುದು ಮುಖ್ಯ ಎಂದು ನಾವು ಭಾವಿಸುತ್ತೇವೆ, ಇದರಿಂದ ನೀವು ತಿಳುವಳಿಕೆಯುಳ್ಳ ಆಯ್ಕೆಗಳನ್ನು ಮಾಡಬಹುದು. ಪ್ರತಿಯೊಂದು Apple ಉತ್ಪನ್ನ ಮತ್ತು ಸೇವೆಯಂತೆ, ಈ ತತ್ವಗಳನ್ನು ಗಮನದಲ್ಲಿಟ್ಟುಕೊಂಡು ಕುಟುಂಬ ಹಂಚಿಕೆ ಫೀಚರ್ ಅನ್ನು ವಿನ್ಯಾಸಗೊಳಿಸಲಾಗಿದೆ.

ಕುಟುಂಬ ಹಂಚಿಕೆಯನ್ನು ಸೆಟಪ್ ಮಾಡುವುದು

ಬಳಕೆದಾರರು ಕುಟುಂಬ ಸೆಟಪ್ ಅನ್ನು ಪ್ರಾರಂಭಿಸಿದಾಗ, ಅವರು ವಯಸ್ಕರಾಗಿದ್ದಾರೆ ಮತ್ತು ಅವರ ಕುಟುಂಬ ಗುಂಪನ್ನು ರಚಿಸಲು ಅರ್ಹರಾಗಿದ್ದಾರೆ ಎಂದು ಪರಿಶೀಲಿಸಲು Apple ಅವರ Apple ಖಾತೆಗೆ ಸಂಬಂಧಿಸಿದ ವಯಸ್ಸು ಮತ್ತು ದೇಶ ಅಥವಾ ಪ್ರದೇಶವನ್ನು ಬಳಸುತ್ತದೆ. ಕೆಳಗೆ ವಿವರಿಸಿದ ನಿರ್ದಿಷ್ಟ ವಯಸ್ಸಿನ ಮಿತಿಗಳು ಬಳಕೆದಾರರಿಗೆ ಅವರ Apple ಖಾತೆಗೆ ಸಂಬಂಧಿಸಿದ ದೇಶ ಅಥವಾ ಪ್ರದೇಶವನ್ನು ಆಧರಿಸಿ ಭಿನ್ನವಾಗಿರಬಹುದು. ವಯಸ್ಸಿನ ಮಿತಿಗಳ ಕುರಿತು ಹೆಚ್ಚಿನ ಮಾಹಿತಿಗಾಗಿ, support.apple.com/en-in/102617 ಎಂಬಲ್ಲಿಗೆ ಭೇಟಿ ನೀಡಿ.

ವಯಸ್ಕರ ಸ್ಥಿತಿಯನ್ನು ದೃಢೀಕರಿಸಿದ ನಂತರ, ಪ್ರಾರಂಭಿಸುವ ಬಳಕೆದಾರರು ಕುಟುಂಬ ವ್ಯವಸ್ಥಾಪಕರಾಗುತ್ತಾರೆ ಮತ್ತು AirDrop, ಸಂದೇಶ ಅಥವಾ Mail ಆ್ಯಪ್‌ಗಳನ್ನು ಬಳಸುವ ಮೂಲಕ ಅಥವಾ ಕುಟುಂಬದ ಸೆಟ್ಟಿಂಗ್ಸ್‌ನಲ್ಲಿ ‘ವೈಯಕ್ತಿಕವಾಗಿ ಆಹ್ವಾನಿಸಿ’ ಎಂಬುದನ್ನು ಟ್ಯಾಪ್ ಮಾಡುವ ಮೂಲಕ ಕುಟುಂಬ ಗುಂಪಿಗೆ ಸೇರಲು ಅನನ್ಯ Apple ಖಾತೆಗಳನ್ನು ಹೊಂದಿರುವ ಗರಿಷ್ಠ ಇತರ ಐದು ಬಳಕೆದಾರರನ್ನು ಆಹ್ವಾನಿಸಬಹುದು. ಆಮಂತ್ರಣವನ್ನು ಹೇಗೆ ಕಳುಹಿಸಲಾಗಿದೆ ಎಂಬುದನ್ನು ಆಧರಿಸಿ, ಆಯೋಜಕರ ಹೆಸರು, Apple ಖಾತೆ, ಆಹ್ವಾನಿತರಿಗೆ ಆ್ಯಕ್ಸೆಸ್ ದೊರೆಯುವ ಸಬ್‌ಸ್ಕ್ರಿಪ್ಶನ್‌ಗಳು ಮತ್ತು/ಅಥವಾ ಆಯೋಜಕರ ಸಂಪರ್ಕದ ಮಾಹಿತಿಯನ್ನು Apple ಆಹ್ವಾನದಲ್ಲಿ ಪ್ರದರ್ಶಿಸುತ್ತದೆ. ಅಸ್ತಿತ್ವದಲ್ಲಿರುವ ಕುಟುಂಬದ ಸದಸ್ಯರ ಹೆಸರುಗಳಂತಹ, ಆಯೋಜಕರು ಅಥವಾ ಕುಟುಂಬದ ಗುಂಪಿನ ಬಗೆಗಿನ ಯಾವುದೇ ಇತರೆ ಮಾಹಿತಿಯನ್ನು Apple ಡಿಸ್‌ಪ್ಲೇ ಮಾಡುವುದಿಲ್ಲ. ಆಯೋಜಕರು ವೈಯಕ್ತಿಕವಾಗಿ ಆಹ್ವಾನವನ್ನು ಟ್ಯಾಪ್ ಮಾಡಿದಾಗ, ಆಹ್ವಾನಿತರನ್ನು ದೃಢೀಕರಿಸಲು ಮತ್ತು ಆಹ್ವಾನಿತರು 13 ಅಥವಾ ಅದಕ್ಕಿಂತ ಹೆಚ್ಚಿನ ವಯಸ್ಸಿನವರಾಗಿದ್ದರೆ ಅವರ ಸ್ವೀಕಾರವನ್ನು ಖಚಿತಪಡಿಸಲು, ಆಯೋಜಕರ ಸಾಧನದಲ್ಲಿ ನಮೂದಿಸಲಾದ ಆಹ್ವಾನಿತರ Apple ಖಾತೆ ಮತ್ತು ಪಾಸ್‌ವರ್ಡ್ ಅನ್ನು Apple ಬಳಸುತ್ತದೆ. Apple ಈ ಮಾಹಿತಿಯನ್ನು ಆಯೋಜಕರ ಸಾಧನದಲ್ಲಿ ಸಂಗ್ರಹಿಸುವುದಿಲ್ಲ. ಆಹ್ವಾನಿತರು 13 ವರ್ಷಕ್ಕಿಂತ ಚಿಕ್ಕವರಾಗಿದ್ದರೆ, ಕೆಳಗಿನ ಕುಟುಂಬ ಹಂಚಿಕೊಳ್ಳುವಿಕೆ ಗುಂಪನ್ನು ತೊರೆಯುವುದು ಮತ್ತು ಮಕ್ಕಳ ವರ್ಗಾವಣೆಗಳು ವಿಭಾಗಗಳಲ್ಲಿ ವಿವರಿಸಲಾಗಿರುವ ಮಕ್ಕಳ ವರ್ಗಾವಣೆಯ ಫ್ಲೋವನ್ನು Apple ಪ್ರಾರಂಭಿಸುತ್ತದೆ.

ಆಮಂತ್ರಣಗಳನ್ನು ನಿರ್ವಹಿಸಲು ಮತ್ತು ರಿಮೈಂಡರ್‌ಗಳನ್ನು ಕಳುಹಿಸಲು ಆಯೋಜಕರು ಮತ್ತು ಆಹ್ವಾನಿತರಿಗೆ ಸಹಾಯ ಮಾಡಲು, Apple ಸಾಧನದ ಸೆಟ್ಟಿಂಗ್ಸ್‌ನಲ್ಲಿ ಲಭ್ಯವಿರುವ ರೀತಿಯಲ್ಲಿ ಅವರ ಹೆಸರು, ಪ್ರೊಫೈಲ್ ಫೋಟೋ ಮತ್ತು ಆಹ್ವಾನ ಸ್ಥಿತಿಯನ್ನು ಪ್ರದರ್ಶಿಸುತ್ತದೆ. ಆಹ್ವಾನಿತರು ಪ್ರತಿಕ್ರಿಯಿಸುವವರೆಗೆ ಅಥವಾ 15 ದಿನಗಳ ನಂತರ ಆಮಂತ್ರಣದ ಅವಧಿ ಮುಕ್ತಾಯವಾಗುವವರೆಗೆ ಆಹ್ವಾನಗಳ ದಾಖಲೆಯನ್ನು Apple ನಿರ್ವಹಿಸುತ್ತದೆ. ಆಹ್ವಾನಿತರು ಸ್ವೀಕರಿಸಿದಲ್ಲಿ, Apple ಆಹ್ವಾನಿತರ Apple ಖಾತೆಯನ್ನು ಕುಟುಂಬ ಗುಂಪಿನೊಂದಿಗೆ ಸಂಯೋಜಿಸುತ್ತದೆ. ಅವಧಿ ಮುಗಿದ ಆಮಂತ್ರಣಗಳ ರೆಕಾರ್ಡ್ ಅನ್ನು Apple ನಿರ್ವಹಿಸುವುದಿಲ್ಲ. ಸಂದೇಶ ಆ್ಯಪ್ ಮೂಲಕ ಕಳುಹಿಸಲಾದ ಆಮಂತ್ರಣಗಳನ್ನು ನಿರಾಕರಿಸಿದಲ್ಲಿ, ನಿರಾಕರಿಸಿದ ಸ್ಟೇಟಸ್ ಅನ್ನು ಸಂದೇಶದಲ್ಲಿ ಆಯೋಜಕರು ಮತ್ತು ಆಹ್ವಾನಿತರಿಗೆ ತೋರಿಸಲು ಅದರ ರೆಕಾರ್ಡ್ ಅನ್ನು 30 ದಿನಗಳವರೆಗೆ Apple ಇರಿಸಿಕೊಳ್ಳುತ್ತದೆ.

ಕುಟುಂಬವನ್ನು ಸೇರುವುದು ಮತ್ತು ಕುಟುಂಬದ ಪಾತ್ರಗಳು

ಬಳಕೆದಾರರು ಕುಟುಂಬ ಗುಂಪನ್ನು ಸೇರಿದಾಗ, ನಿರ್ದಿಷ್ಟ ಫೀಚರ್‌ಗಳು, ಮಾಹಿತಿ, ಮತ್ತು ನಿಯಂತ್ರಣಗಳು ಲಭ್ಯವಿರುವಂತೆ Apple ಖಾತರಿಪಡಿಸುತ್ತದೆ, ನಂತರ ಅದನ್ನು ಸಬ್‌ಸಕ್ರಿಪ್ಶನ್‌ಗಳು, ಖರೀದಿಗಳು, ಪಾವತಿ ಮಾಹಿತಿ ಮತ್ತು ಸ್ಥಳಗಳನ್ನು ಹಂಚಿಕೊಳ್ಳುವುದನ್ನು ನಿರ್ವಹಿಸಲು ಬಳಸಿಕೊಳ್ಳಬಹುದು. ಉದಾಹರಣೆಗೆ, Apple ಪ್ರತಿ ಸದಸ್ಯರ ಹೆಸರು, Apple ಖಾತೆ, ಪಾತ್ರ ಹಾಗೂ ಕುಟುಂಬದ ಎಲ್ಲಾ ಮಕ್ಕಳು ಅಥವಾ ಹದಿಹರೆಯದವರ ವಯಸ್ಸನ್ನು ಕುಟುಂಬ ಗುಂಪಿನ ಎಲ್ಲಾ ಸದಸ್ಯರಿಗೆ ಕುಟುಂಬ ಸೆಟ್ಟಿಂಗ್ಸ್‌ನಲ್ಲಿ ತೋರಿಸುತ್ತದೆ. iOS ಅಥವಾ iPadOS ಸಾಧನ ಬಳಸುತ್ತಿರುವ ಮಕ್ಕಳು ಮತ್ತು ಹದಿಹರೆಯದವರಿಗೆ ಸಂಬಂಧಿಸಿದಂತೆ, ಅವರ ಗೌಪ್ಯತೆ ಹಕ್ಕುಗಳು ಮತ್ತು ಪೋಷಕರು ಹೇರುವ ನಿಯಂತ್ರಣಗಳ ಕುರಿತ ಮಾಹಿತಿಯನ್ನು ವಯಸ್ಸಿಗೆ ತಕ್ಕಂತೆ ಒದಗಿಸಲು Apple ಅವರ ವಯಸ್ಸನ್ನು ಬಳಸಿಕೊಳ್ಳುತ್ತದೆ. ಶಿಫಾರಸುಗಳ ಕಸ್ಟಮೈಸ್ ಮಾಡಿದ ಪಟ್ಟಿಯನ್ನು ಒದಗಿಸುವ ಉದ್ದೇಶದಿಂದ ಕುಟುಂಬ ಸದಸ್ಯರ ಕುರಿತ ಪಾತ್ರ, ಸಬ್‌ಸ್ಕ್ರಿಪ್ಶನ್‌ಗಳು ಹಾಗೂ ಫೀಚರ್‌ಗಳು ಮತ್ತು ಸೇವೆಗಳ ಬಳಕೆ ಮೊದಲಾಗಿ ವಿವರಗಳನ್ನು Apple ಪ್ರಕ್ರಿಯೆಗೊಳಪಡಿಸುತ್ತದೆ. ಉದಾಹರಣೆಗೆ, ಪೋಷಕರು ಹೇರುವ ನಿಯಂತ್ರಣಗಳನ್ನು ಮರುಪರಿಶೀಲಿಸುವುದು, ಕುಟುಂಬದ ಸದಸ್ಯರೊಂದಿಗೆ iCloud+ ಹಂಚಿಕೊಳ್ಳುವುದು ಅಥವಾ ಕುಟುಂಬದ ಮತ್ತೊಬ್ಬ ಸದಸ್ಯರನ್ನು ತಮ್ಮ ತುರ್ತು ಸಂಪರ್ಕಗಳಲ್ಲಿ ಒಂದಾಗಿ ಮಾಡುವಂತೆ ಕುಟುಂಬದ ಸದಸ್ಯರೊಬ್ಬರು ಶಿಫಾರಸುಗಳಲ್ಲಿ ಸಲಹೆ ನೀಡಬಹುದು.

ಆಯೋಜಕರು ವಯಸ್ಕ ಸದಸ್ಯರನ್ನು ಕುಟುಂಬ ಗುಂಪಿಗೆ ಸೇರಿಸಿದಾಗ, ಅವರನ್ನು ಪೋಷಕರು/ಪಾಲಕರಾಗಿ ನಿಯೋಜಿಸಬಹುದು. ಈ ಕೆಳಗೆ ವಿವರಿಸಿದಂತೆ, ಪೋಷಕರು/ ಪಾಲಕರು ಮತ್ತು ಪೋಷಕರು/ಪಾಲಕರಾಗಿ ವರ್ತಿಸುವ ವ್ಯವಸ್ಥಾಪಕರು ಸಹ ಮಕ್ಕಳು ಮತ್ತು ಹದಿಹರೆಯದವರಿಗಾಗಿ Apple ಖಾತೆಯನ್ನು ರಚಿಸಬಹುದು. ಕುಟುಂಬದ ಗುಂಪಿನಲ್ಲಿರುವ ಮಕ್ಕಳು ಮತ್ತು ಹದಿಹರೆಯದವರಿಗಾಗಿ ಖರೀದಿಸಲು ಕೇಳಿ ಮತ್ತು ಸ್ಕ್ರೀನ್ ಟೈಮ್ ರೀತಿಯ ಪೋಷಕರು ಹೇರುವ ನಿಯಂತ್ರಣಗಳನ್ನು ಸಹ ಅವರು ಸೆಟಪ್ ಮಾಡಬಹುದು. ಕುಟುಂಬದ ಗುಂಪೊಂದನ್ನು ಸೆಟಪ್ ಮಾಡಿ ಬಳಕೆದಾರರನ್ನು ಭಾಗವಹಿಸುವಂತೆ ಆಹ್ವಾನ ನೀಡುವುದಕ್ಕೆ ಹೆಚ್ಚುವರಿಯಾಗಿ, ಆಯೋಜಕರು ಕುಟುಂಬದ ಸದಸ್ಯರನ್ನು ತೆಗೆದು ಹಾಕಬಹುದು ಮತ್ತು ಈ ಕೆಳಗೆ ವಿವರಿಸಿದಂತೆ ಗುಂಪನ್ನು ವಿಸರ್ಜಿಸಬಹುದು. ಕುಟುಂಬ ಗುಂಪಿನ ಭಾಗವಾಗಿರುವ ಬಳಕೆದಾರರೊಬ್ಬರು Apple TVಯಂತಹ Apple ಸಾಧನಕ್ಕೆ ಸೈನ್ ಇನ್ ಮಾಡಿದಾಗ, ಸಾಧನವು ಅವರ ಕುಟುಂಬದ ಇತರೆ ಸದಸ್ಯರ Apple ಖಾತೆ, ಹೆಸರು ಮತ್ತು ಪ್ರೊಫೈಲ್ ಫೋಟೋವನ್ನು ತೋರಿಸುವ ಮೂಲಕ ಅವರನ್ನು ಸೇರಿಸುವ ಸಲಹೆ ನೀಡಬಹುದು.

ಮಗು ಅಥವಾ ಹದಿಹರೆಯದವರಿಗಾಗಿ Apple ಖಾತೆಯನ್ನು ರಚಿಸುವುದು

ವ್ಯವಸ್ಥಾಪಕರು ಮತ್ತು ಪೋಷಕರು/ಪಾಲಕರು ಮಕ್ಕಳು ಮತ್ತು ಹದಿಹರೆಯದವರ Apple ಖಾತೆಯನ್ನು ರಚಿಸುವ ಮೂಲಕ ಅವರನ್ನು ತಮ್ಮ ಕುಟುಂಬ ಗುಂಪಿಗೆ ಸೇರಿಸಬಹುದು. ಕೆಲವು ದೇಶಗಳು ಅಥವಾ ಪ್ರದೇಶಗಳಲ್ಲಿ, Apple ಕಾನೂನಿಗೆ ಅನುಸಾರವಾಗಿ ಮಗು ಅಥವಾ ಹದಿಹರೆಯದವರ Apple ಖಾತೆಯನ್ನು ಸೆಟಪ್ ಮಾಡುವ ಮೊದಲು ವ್ಯವಸ್ಥಾಪಕರು ಅಥವಾ ಪೋಷಕರು/ಪಾಲಕರು ವಯಸ್ಕರೇ ಎಂಬುದನ್ನು ಖಚಿತಪಡಿಸಲು ಹೆಚ್ಚುವರಿ ಕ್ರಮಗಳನ್ನು ತೆಗೆದುಕೊಳ್ಳಬೇಕಾಗುತ್ತದೆ. ಆ ದೇಶಗಳು ಅಥವಾ ಪ್ರದೇಶಗಳಲ್ಲಿ, ಕ್ರೆಡಿಟ್ ಕಾರ್ಡ್ ಅಥವಾ ಸರ್ಕಾರವು ಒದಗಿಸುವ ಗುರುತಿನ ಚೀಟಿಯಂತಹ ಬೆಂಬಲಿತ ದಾಖಲೆಗಳನ್ನು ಒದಗಿಸುವಂತೆ ಅವರನ್ನು ಕೇಳಬಹುದು. ಮಗು ಅಥವಾ ಹದಿಹರೆಯದವರಿಗಾಗಿ Apple ಖಾತೆಯನ್ನು ರಚಿಸಲು, ವ್ಯವಸ್ಥಾಪಕರು ಅಥವಾ ಪೋಷಕರು/ಪಾಲಕರು ಮಗುವಿನ ಅಥವಾ ಹದಿಹರೆಯದವರ ಹೆಸರು, ಜನ್ಮದಿನಾಂಕ, ಈಮೇಲ್ ವಿಳಾಸ ಮತ್ತು ಫೋನ್ ಸಂಖ್ಯೆಯನ್ನು ಒದಗಿಸಬೇಕಾಗುತ್ತದೆ, ನಂತರ Apple ಆ ವಿವರಗಳನ್ನು ಮಗುವಿಗಾಗಿ ಅಥವಾ ಹದಿಹರೆಯದವರಿಗಾಗಿ Apple ಖಾತೆಯನ್ನು ರಚಿಸಲು ಬಳಸಿಕೊಳ್ಳುತ್ತದೆ. ಸಾಧನದ ಸೆಟಪ್ ಸಂದರ್ಭದಲ್ಲಿ ಖಾತೆಯನ್ನು ರಚಿಸಿದ್ದಲ್ಲಿ, ವ್ಯವಸ್ಥಾಪಕರು ಅಥವಾ ಪೋಷಕರು/ಪಾಲಕರು ಆ ಮಗುವಿನ ಅಥವಾ ಹದಿಹರೆಯದವರ ದೇಶ ಅಥವಾ ಪ್ರದೇಶದ ವಿವರವನ್ನು ಸಹ ಒದಗಿಸಬೇಕಾಗುತ್ತದೆ. ಅರ್ಹ ಸೇವೆಗಳನ್ನು ನಿರ್ಧರಿಸಲು ಹಾಗೂ ಖರೀದಿಸಲು ಕೇಳಿ ಮತ್ತು ಸ್ಕ್ರೀನ್ ಟೈಮ್‌ನಂತಹ ಪೋಷಕರು ಹೇರುವ ನಿಯಂತ್ರಣಗಳನ್ನು ಸೂಚಿಸಲು, Apple ಮಗುವಿನ ಅಥವಾ ಹದಿಹರೆಯದವರ ಜನ್ಮದಿನಾಂಕವನ್ನು ಬಳಸುತ್ತದೆ. ಕೆಲವು ದೇಶಗಳು ಅಥವಾ ಪ್ರದೇಶಗಳಲ್ಲಿ, Apple ಕಾನೂನಿಗೆ ಅನುಸಾರವಾಗಿ ಮಗು ಮತ್ತು ಹದಿಹರೆಯದವರ ಖಾತೆಗಳಿಗೆ ಕೆಲವು ಪೋಷಕರು ಹೇರುವ ನಿಯಂತ್ರಣಗಳನ್ನು ಸಕ್ರಿಯಗೊಳಿಸಬೇಕಾಗುತ್ತದೆ ಮತ್ತು ಅವುಗಳನ್ನು ನಿಷ್ಕ್ರಿಯಗೊಳಿಸದಂತೆ ಪೋಷಕರು/ಪಾಲಕರು ನಿರ್ಬಂಧಿಸಬಹುದು. ಮಕ್ಕಳಿಗೆ ಸಂಬಂಧಿಸಿದಂತೆ, ಅವರ ಡೇಟವನ್ನು ಪ್ರಕ್ರಿಯೆಗೊಳಪಡಿಸಲು ವ್ಯವಸ್ಥಾಪಕರು ಅಥವಾ ಪೋಷಕರು/ಪಾಲಕರ ಸಮ್ಮತಿಯನ್ನು ಪಡೆಯುವ ಮೊದಲು, ವ್ಯವಸ್ಥಾಪಕರು ಅಥವಾ ಪೋಷಕರು/ಪಾಲಕರ ಪಾವತಿ ವಿವರಗಳು, ವಾಲೆಟ್‌ನಲ್ಲಿರುವ ಗುರುತಿನ ಚೀಟಿ ಅಥವಾ Apple ಖಾತೆ ಅಥವಾ ಅದಕ್ಕೆ ಸಮನಾದುದನ್ನು ಬಳಸಿ ಅವರ ವಯಸ್ಕ ಸ್ಟೇಟಸ್ ಅನ್ನು Apple ಪರಿಶೀಲಿಸುತ್ತದೆ. ಮಗುವಿನ ಖಾತೆಗಳನ್ನು ರಚಿಸುವ ಬಗೆಗಿನ ಹೆಚ್ಚಿನ ಮಾಹಿತಿಗಾಗಿ, support.apple.com/en-in/102617 ಎಂಬಲ್ಲಿಗೆ ಭೇಟಿ ನೀಡಿ.

ಖರೀದಿಯ ಹಂಚಿಕೆ

ಆಯೋಜಕರೊಬ್ಬರು ಖರೀದಿ ಹಂಚಿಕೊಳ್ಳುವಿಕೆಯನ್ನು ಸಕ್ರಿಯಗೊಳಿಸಿದಾಗ, App Store, iTunes Store, Apple Books, ಅಥವಾ Apple TV ಆ್ಯಪ್‌ನಲ್ಲಿ ಕುಟುಂಬ ಸದಸ್ಯರು ಮಾಡಿದ ಅರ್ಹ ಖರೀದಿಗಳಿಗೆ ಫೈಲ್‌ನಲ್ಲಿರುವ ಆಯೋಜಕರ ಪಾವತಿ ವಿಧಾನಕ್ಕೆ ಶುಲ್ಕ ವಿಧಿಸಲಾಗುತ್ತದೆ. ಕುಟುಂಬದ ಸದಸ್ಯರು Apple Payನಂತಹ ಬಳಸಿದ ಪಾವತಿ ವಿಧಾನದ ವಿವರಣೆಗಳನ್ನು ನೋಡಲು ಸಾಧ್ಯವಾಗುತ್ತದೆ, ಆದರೆ ಪೂರ್ಣವಾಗಿ ಪಾವತಿಸಿದ ಖಾತೆ ಸಂಖ್ಯೆಯಂತಹ ಪಾವತಿ ವಿವರಗಳನ್ನು ನೋಡಲು ಸಾಧ್ಯವಾಗುವುದಿಲ್ಲ. ಕುಟುಂಬದ ಸದಸ್ಯರು ಸ್ವಯಂಚಾಲಿತವಾಗಿ ಆಯೋಜಕರ ಖರೀದಿಗಳಿಗೆ ಆ್ಯಕ್ಸೆಸ್ ಪಡೆದುಕೊಳ್ಳುತ್ತಾರೆ ಮತ್ತು ತಮ್ಮ ಖರೀದಿಗಳನ್ನು ಕುಟುಂಬದ ಇತರೆ ಸದಸ್ಯರ ಜೊತೆಗೆ ಹಂಚಿಕೊಳ್ಳಲು ಆಯ್ಕೆ ಮಾಡಬಹುದು. ಮರುಪಾವತಿ ಬೇಡಿಕೆಗಳು ಮತ್ತು ಪರಿಣಾಮಗಳು ಹಾಗೂ ವ್ಯಾಜ್ಯಗಳ ವಿವರಗಳೂ ಸೇರಿದಂತೆ ಕುಟುಂಬದ ಸದಸ್ಯರೆಲ್ಲರ ಆನ್‌ಲೈನ್ ಮತ್ತು App Storeನೊಳಗಿನ ವಹಿವಾಟುಗಳ ವಿವರ, ಬೆಲೆ ಹಾಗೂ ದಿನಾಂಕವನ್ನು ಆಯೋಜಕರು ನೋಡಲು ಸಾಧ್ಯವಾಗುತ್ತದೆ. ಒಂದು ಆನ್‌ ಲೈನ್ ಅಥವಾ App Storeನೊಳಗಿನ ಖರೀದಿಯಲ್ಲಿ ಕುಟುಂಬದ ಸದಸ್ಯರೊಬ್ಬರು ಸಮಸ್ಯೆಯನ್ನು ವರದಿಮಾಡಿದಲ್ಲಿ, ಸೂಕ್ತ ಪ್ರತಿಸ್ಪಂದನೆಯನ್ನು ನೀಡಲು, ಖರೀದಿಸಿದ ಕುಟುಂಬ ಸದಸ್ಯರು, ಆಯೋಜಕರು ಹಾಗೂ ಖರೀದಿಯ ಬಗ್ಗೆ ಮಾಹಿತಿಯನ್ನು Apple ಬಳಸಿಕೊಳ್ಳುತ್ತದೆ.

ಕುಟುಂಬ ಸದಸ್ಯರು ವ್ಯಕ್ತಿಗತವಾದ iTunes, Apple Books, ಹಾಗೂ App Store ಖರೀದಿಗಳನ್ನು ಮರೆಮಾಡಬಹುದು, ಅಥವಾ ತಮ್ಮ ಕುಟುಂಬ ಸೆಟ್ಟಿಂಗ್ಸ್‌ನೊಳಗೆ ‘ನನ್ನ ಖರೀದಿ ಹಂಚಿಕೊಳ್ಳುವಿಕೆ’ ಎಂಬುದನ್ನು ನಿಷ್ಕ್ರಿಯಗೊಳಿಸಬಹುದು,ಆದರೆ ಕುಟುಂಬ ಸದಸ್ಯರು ಖರೀದಿಗಳನ್ನು ಅಡಗಿಸಿದ ಹೊರತಾಗಿಯೂ, App Store, Apple Books, ಹಾಗೂ Apple Music ಮೂಲಕ ಮಾಡಿದ ಅವರ ಖರೀದಿಗಳ ಬಗ್ಗೆ ಕುಟುಂಬ ಆಯೋಜಕರು ರಶೀದಿಗಳನ್ನು ಸ್ವೀಕರಿಸುವುದು ಮುಂದುವರಿಯಲಿದೆ. ಖರೀದಿ ಹಂಚಿಕೊಳ್ಳುವಿಕೆ ಬಗೆಗಿನ ಹೆಚ್ಚಿನ ಮಾಹಿತಿಗಾಗಿ, support.apple.com/en-in/102599 ಎಂಬಲ್ಲಿಗೆ ಭೇಟಿ ನೀಡಿ. App Storeನಿಂದ ಖರೀದಿಗಳನ್ನು ಮರೆಮಾಡುವ ಬಗೆಗಿನ ಹೆಚ್ಚಿನ ಮಾಹಿತಿಗಾಗಿ, support.apple.com/en-in/108091 ಎಂಬಲ್ಲಿಗೆ ಭೇಟಿ ನೀಡಿ.

ಸಬ್‌ಸ್ಕ್ರಿಪ್ಶನ್‌ಗಳು

ಕುಟುಂಬದ ಜೊತೆಗೆ ಹಂಚಿಕೊಳ್ಳಿ ಎಂಬುದನ್ನು ಸಕ್ರಿಯಗೊಳಿಸಿದರೆ, Apple Music ಕುಟುಂಬದ ಪ್ಲ್ಯಾನ್, Apple TV, Apple Arcade ಅಥವಾ Apple News+ನಂತಹ ಸೇವೆಗಳ ಸಬ್‌ಸ್ಕ್ರಿಪ್ಶನ್‌ಗಳನ್ನು ಕುಟುಂಬದ ಸದಸ್ಯರ ನಡುವೆ ಹಂಚಿಕೊಳ್ಳಲಾಗುತ್ತದೆ. ಕುಟುಂಬ ಸದಸ್ಯರು ತಮ್ಮದೇ Apple ಖಾತೆಗಳನ್ನು ಬಳಸಿಕೊಂಡು ಪ್ರತಿ ಸೇವೆಗೆ ಸೈನ್ ಇನ್ ಮಾಡಿರುವುದು ಮುಂದುವರಿಯಲಿದೆ. ಇದರಿಂದ ಹಂಚಿಕೊಂಡ ಕುಟುಂಬದ ಯೋಜನೆಯ ಲಾಭವನ್ನು ಪಡೆದುಕೊಂಡು, ಅವರ ವ್ಯಕ್ತಿಗತ ಕಂಟೆಂಟ್‌ಗಳು ಮತ್ತು ಮೀಡಿಯಾ ಲೈಬ್ರರಿಗಳು ಹಾಗೂ ಶಿಫಾರಸುಗಳನ್ನು ಖಾಸಗಿಯಾಗಿ ಮತ್ತು ಪ್ರತ್ಯೇಕವಾಗಿ ಇರಿಸಿಕೊಳ್ಳಬಹುದು. ಅದೇರೀತಿ, iCloud+ ಅನ್ನು ಕುಟುಂಬದ ಜೊತೆಗೆ ಹಂಚಿಕೊಳ್ಳುವುದರಿಂದ, ವ್ಯಕ್ತಿಗತವಾದ ಖಾತೆಗಳು ಮತ್ತು ಫೈಲ್‌ಗಳನ್ನು ಪ್ರತ್ಯೇಕವಾಗಿ ಇರಿಸಿಕೊಂಡೇ, ಹಂಚಿಕೊಂಡ ಯೋಜನೆಯಲ್ಲಿರುವ ಸಂಗ್ರಹ ಮತ್ತು ಫೀಚರ್‌ಗಳಿಗೆ ಕುಟುಂಬದ ಪ್ರತಿ ಸದಸ್ಯರಿಗೆ ಆ್ಯಕ್ಸೆಸ್ ಸಿಗುತ್ತದೆ. ಕುಟುಂಬ ಸದಸ್ಯರ ಜೊತೆಗೆ ಸಬ್‌ಸ್ಕ್ರಿಪ್ಶನ್‌ಗಳನ್ನು ಹಂಚಿಕೊಳ್ಳುವ ಬಗೆಗಿನ ಹೆಚ್ಚಿನ ಮಾಹಿತಿಗಾಗಿ, support.apple.com/en-in/108107 ಎಂಬಲ್ಲಿಗೆ ಭೇಟಿ ನೀಡಿ.

ಸ್ಥಳ ಹಂಚಿಕೆ

ಬಳಕೆದಾರರೊಬ್ಬರು ಕುಟುಂಬ ಗುಂಪನ್ನು ಸೇರಿದಾಗ, ಹುಡುಕಿ ಆ್ಯಪ್‌ನಲ್ಲಿ ಅವರ ಸಾಧನದ ಹೆಸರುಗಳು ಕುಟುಂಬದ ಇತರೆ ಸದಸ್ಯರಿಗೆ ಗೋಚರವಾಗುತ್ತದೆ. ಅವರ Apple ಖಾತೆ ಕುಟುಂಬದ ಇತರೆ ಸದಸ್ಯರಿಗೆ ಹುಡುಕಿ ಆ್ಯಪ್‌ನಲ್ಲಿ ಮಾತ್ರ ಗೋಚರವಾಗಲಿದೆ, ಮತ್ತು ಅವರು ಕುಟುಂಬ ಸೆಟ್ಟಿಂಗ್ ಮೂಲಕ ಅಥವಾ ಹುಡುಕಿ ಆ್ಯಪ್ ಮೂಲಕ ಅವರ ಸ್ಥಳ ಡೇಟವನ್ನು ಹಂಚಿಕೊಂಡಲ್ಲಿ ಮತ್ತು ಅವರು ಸ್ಥಳ ಹಂಚಿಕೊಳ್ಳುವುದನ್ನು ಸಕ್ರಿಯಗೊಳಿಸಿದ್ದಲ್ಲಿ ಹುಡುಕಿ ಆ್ಯಪ್‌ನಲ್ಲಿ ಮಾತ್ರವೇ ಪ್ರಕ್ರಿಯೆಗೊಳಪಡಿಸಬಹುದು. ಕುಟುಂಬ ಸೆಟ್ಟಿಂಗ್ಸ್‌ಗೆ ನಂತರ ಸೇರಿಸಿದ ಯಾವುದೇ ಹೊಸ ಸದಸ್ಯರು ಗುಂಪಿನಲ್ಲಿ ಉಳಿಯುವವರೆಗೆ ಸೇರಿದಂತೆ ಕುಟುಂಬದ ಸದಸ್ಯರೊಬ್ಬರು ತಮ್ಮದೇ ಸ್ಥಳವನ್ನು ಕುಟುಂಬದ ಇತರೆ ಸದಸ್ಯರೆಲ್ಲರ ಜೊತೆಗೆ ಸ್ವಯಂಚಾಲಿತವಾಗಿ ಹಂಚಿಕೊಳ್ಳುವುದನ್ನು ಸಹ ಆರಿಸಿಕೊಳ್ಳಬಹುದು. ವ್ಯವಸ್ಥಾಪಕರು ಅಥವಾ ಪೋಷಕರು/ಪಾಲಕರು, ಮಗುವಿನ ಅಥವಾ ಹದಿಹರೆಯದವರ ಖಾತೆಯನ್ನು ರಚಿಸುವುದು ಸೇರಿದಂತೆ, ಕೆಲವು ನಿರ್ದಿಷ್ಟ ಸಂದರ್ಭಗಳಲ್ಲಿ ತಮ್ಮ ಮಗುವಿನ ಅಥವಾ ಹದಿಹರೆಯದವರ ಸ್ಥಳವನ್ನು ಕುಟುಂಬದ ಇತರೆ ಎಲ್ಲಾ ಸದಸ್ಯರ ಜೊತೆಗೆ ಸ್ವಯಂಚಾಲಿತವಾಗಿ ಹಂಚಿಕೊಳ್ಳಲು ಆಯ್ಕೆಮಾಡಬಹುದು. ಸೆಟ್ಟಿಂಗ್ಸ್ > [ನಿಮ್ಮ ಹೆಸರು] > ಕುಟುಂಬ ಹಂಚಿಕೆ > ಸ್ಥಳ ಹಂಚಿಕೊಳ್ಳುವಿಕೆ ಎಂಬಲ್ಲಿಗೆ ಹೋಗಿ ಕುಟುಂಬ ಸದಸ್ಯರು ಸ್ವಯಂಚಾಲಿತವಾಗಿ ಸ್ಥಳ ಹಂಚಿಕೊಳ್ಳುವ ಫೀಚರ್ ಅನ್ನು ನಿಷ್ಕ್ರಿಯಗೊಳಿಸಬಹುದು. ಕುಟುಂಬ ಸೆಟ್ಟಿಂಗ್ಸ್ ಮತ್ತು ಹುಡುಕಿ ಆ್ಯಪ್ ಮೂಲಕ ಅವರು ಕುಟುಂಬದ ಪ್ರತಿಯೊಬ್ಬ ಸದಸ್ಯರ ಜೊತೆಗೆ ತಮ್ಮ ಸ್ಥಳವನ್ನು ಹಂಚಿಕೊಳ್ಳಲು ಸಹ ಆರಿಸಿಕೊಳ್ಳಬಹುದು. ಕುಟುಂಬ ಸದಸ್ಯರ ಜೊತೆಗೆ ಸ್ಥಳವನ್ನು ಹಂಚಿಕೊಳ್ಳುವ ಬಗೆಗಿನ ಹೆಚ್ಚಿನ ಮಾಹಿತಿಗಾಗಿ, support.apple.com/en-in/105107 ಎಂಬಲ್ಲಿಗೆ ಭೇಟಿ ನೀಡಿ.

ಪೋಷಕರು ಹೇರುವ ನಿಯಂತ್ರಣಗಳು

ವ್ಯವಸ್ಥಾಪಕರು ಮತ್ತು ಪೋಷಕರು/ಪಾಲಕರಿಗೆ ಮಕ್ಕಳು ಮತ್ತು ಹದಿಹರೆಯದವರಿಗಾಗಿ ತಮ್ಮ ಕುಟುಂಬ ಗುಂಪಿನಲ್ಲಿ ಪೋಷಕರು ಹೇರುವ ನಿಯಂತ್ರಣಗಳನ್ನು ಸೆಟಪ್ ಮಾಡುವುದಕ್ಕೆ ಅವಕಾಶ ನೀಡಲು Apple, ಕುಟುಂಬ ಸದಸ್ಯರ Apple ಖಾತೆಗಳನ್ನು ಮತ್ತು ಪಾತ್ರಗಳನ್ನು ಬಳಸುತ್ತದೆ. ಉದಾಹರಣೆಗೆ, ಆ್ಯಪ್ ಒಳಗಿನ ಖರೀದಿಗಳು ಮತ್ತು ಉಚಿತ ಡೌನ್‌ಲೋಡ್‌ಗಳು ಸೇರಿದಂತೆ, App Store, iTunes Store ಅಥವಾ Apple Booksನಿಂದ ಮಾಡುವ ಯಾವುದಾದರೂ ಡೌನ್‌ಲೋಡ್‌ಗಳು ಅಥವಾ ಖರೀದಿಗಳನ್ನು ಮಾಡುವ ಮೊದಲು ಮಕ್ಕಳು ಮತ್ತು ಹದಿಹರೆಯದವರು, ಆಯೋಜಕರ, ಪೋಷಕರ/ಪಾಲಕರ ಒಪ್ಪಿಗೆ ಪಡೆಯುವ ಸಲುವಾಗಿ, ಆಯೋಜಕರು ಮತ್ತು ಪೋಷಕರು/ಪಾಲಕರು “ಖರೀದಿಸಲು ಕೇಳಿ” ಎಂಬುದನ್ನು ಆನ್ ಮಾಡಬಹುದು. ಕೆಲವು ದೇಶಗಳು ಅಥವಾ ಪ್ರದೇಶಗಳಲ್ಲಿ, ಮಕ್ಕಳು ಮತ್ತು ಹದಿಹರೆಯದವರಿಗಾಗಿ “ಖರೀದಿಸಲು ಕೇಳಿ” ಎಂಬುದನ್ನು Apple ಆನ್ ಮಾಡಬೇಕಾಗುತ್ತದೆ ಮತ್ತು ಈ ಕಂಟ್ರೋಲ್ ಅನ್ನು ನಿಷ್ಕ್ರಿಯಗೊಳಿಸದಂತೆ ಪೋಷಕರು/ಪಾಲಕರು ನಿರ್ಬಂಧಿಸಬಹುದು. ಡೌನ್‌ಟೈಮ್, ಆ್ಯಪ್ ಮತ್ತು ವೆಬ್‌ಸೈಟ್ ಬಳಕೆ, ಸಂಪರ್ಕಗಳು ಹಾಗೂ ತಮ್ಮ ಮಕ್ಕಳಿಗೆ ಹಾಗೂ ಹದಿಹರೆಯದವರಿಗೆ ಕಂಟೆಂಟ್ ರೇಟಿಂಗ್‌ಗಳನ್ನು ನೀಡುವಂತಹ ಫೀಚರ್‌ಗಳಿಗೆ ಸೆಟ್ಟಿಂಗ್ಸ್ ಅನ್ನು ನಿರ್ವಹಣೆ ಮಾಡಲು ಸಾಧ್ಯವಾಗುವಂತೆ ಸ್ಕ್ರೀನ್ ಟೈಮ್ ಅನ್ನು ಸಹ ಸೆಟ್ ಮಾಡಲು ಆಯೋಜಕರಿಗೆ ಮತ್ತು ಪೋಷಕರು/ಪಾಲಕರಿಗೆ ಸಾಧ್ಯವಾಗುತ್ತದೆ. App Store, iTunes Store, ಹಾಗೂ Apple Booksನಲ್ಲಿ ಮಕ್ಕಳು ಮತ್ತು ಹದಿಹರೆಯದವರ ವಹಿವಾಟುಗಳ ಮಾಹಿತಿಯನ್ನು ವೀಕ್ಷಿಸಲು, ಸ್ಕ್ರೀನ್ ಟೈಮ್ ಮೂಲಕ ಅವರ ಆನ್‌ಲೈನ್ ಚಟುವಟಿಕೆಯನ್ನು ನೋಡಲು ಮತ್ತು ನಿರ್ವಹಣೆ ಮಾಡಲು, ಹಾಗೂ ಪೋಷಕರು ಹೇರುವ ನಿಯಂತ್ರಣಗಳನ್ನು ಸಕ್ರಿಯಗೊಳಿಸಲು, ಆಯೋಜಕರು ಮತ್ತು ಪೋಷಕರು/ಪಾಲಕರಿಗೆ ಮಾತ್ರ ಸಾಧ್ಯವಿದೆ. ಖರೀದಿಸಲು ಕೇಳಿ ಬಗ್ಗೆ ಹೆಚ್ಚಿನ ಮಾಹಿತಿಗಾಗಿ, support.apple.com/en-in/105055 ಎಂಬಲ್ಲಿಗೆ ಭೇಟಿ ನೀಡಿ. ಪೋಷಕರು ಹೇರುವ ನಿಯಂತ್ರಣಗಳನ್ನು ಬಳಸುವ ಬಗ್ಗೆ ಹೆಚ್ಚಿನ ಮಾಹಿತಿಗಾಗಿ, support.apple.com/en-in/105121 ಎಂಬಲ್ಲಿಗೆ ಭೇಟಿ ನೀಡಿ.

ಕುಟುಂಬ ಹಂಚಿಕೆ ಗುಂಪನ್ನು ತೊರೆಯುವುದು ಮತ್ತು ಮಕ್ಕಳ ವರ್ಗಾವಣೆಗಳು

ವಯಸ್ಕ ಕುಟುಂಬ ಸದಸ್ಯರು ಯಾವುದೇ ಸಮಯದಲ್ಲಿ ಬೇಕಾದರೂ ಕುಟುಂಬ ಗುಂಪನ್ನು ತೊರೆಯಬಹುದು ಅಥವಾ ಆಯೋಜಕರು ಅವರನ್ನು ತೆಗೆದುಹಾಕಬಹುದು. ಹದಿಹರೆಯದವರು ಕುಟುಂಬ ಗುಂಪನ್ನು ತೊರೆಯಬಹುದು ಅಥವಾ ಅವರನ್ನು ವ್ಯವಸ್ಥಾಪಕರು ಅಥವಾ ಪೋಷಕರು/ಪಾಲಕರು ಸ್ಕ್ರೀನ್ ಟೈಮ್ ಮೂಲಕ ನಿರ್ವಹಿಸದ ಹೊರತು ವ್ಯವಸ್ಥಾಪಕರು ಅವರನ್ನು ತೆಗೆದುಹಾಕಬಹುದು. ಅದಲ್ಲದೆ ಕುಟುಂಬ ಹಂಚಿಕೆಯನ್ನು ಆಫ್ ಮಾಡುವ ಮೂಲಕ ಕುಟುಂಬದ ಆಯೋಜಕರು ಕುಟುಂಬ ಗುಂಪನ್ನು ವಿಸರ್ಜಿಸಬಹುದು. ಕುಟುಂಬ ಸದಸ್ಯರೊಬ್ಬರು ಗುಂಪನ್ನು ತೊರೆದಾಗ ಅಥವಾ ಅವರನ್ನು ತೆಗೆದುಹಾಕಿದಾಗ, ಅವರು ಹಂಚಿಕೊಂಡ ಸಬ್‌ಸ್ಕ್ರಿಪ್ಶನ್‌ಗಳು ಮತ್ತು ಇತರೆ ಸದಸ್ಯರು ಖರೀದಿಸಿದ ಕಂಟೆಂಟ್‌ಗಳಿಗೆ ತಕ್ಷಣವೇ ಆ್ಯಕ್ಸೆಸ್ ಕಳೆದುಕೊಳ್ಳುತ್ತಾರೆ, ಮಾತ್ರವಲ್ಲದೆ, ಅವರ ಕಂಟೆಂಟ್‌ಗಳು ಇನ್ನು ಮುಂದೆ ಇತರೆ ಸದಸ್ಯರಿಗೆ ಲಭ್ಯವಿರುವುದಿಲ್ಲ.

ಮಕ್ಕಳು ಮತ್ತು — ಕೆಲವು ದೇಶಗಳು ಅಥವಾ ಪ್ರದೇಶಗಳಲ್ಲಿ — ಹದಿಹರೆಯದವರು ಕಡ್ಡಾಯವಾಗಿ ಕುಟುಂಬ ಗುಂಪಿನ ಭಾಗವಾಗಿರಬೇಕು. ಮಗುವನ್ನು ಕುಟುಂಬ ಗುಂಪಿನಿಂದ ತೆಗೆದುಹಾಕಲು, ಬೇರೊಂದು ಕುಟುಂಬ ಗುಂಪಿನಲ್ಲಿರುವ ಆಯೋಜಕರು ಕುಟುಂಬ ಸೆಟ್ಟಿಂಗ್ಸ್ ಆ್ಯಪ್‌ನಲ್ಲಿ ವೈಯಕ್ತಿಕವಾಗಿ ಆಹ್ವಾನಿಸಿ ಎನ್ನುವ ಆಯ್ಕೆಗೆ ಹೋಗಿ ತಮ್ಮ ಕುಟುಂಬವನ್ನು ಸೇರುವಂತೆ ಮಗುವಿಗೆ ಆಹ್ವಾನವನ್ನು ಕಳುಹಿಸಬಹುದು. ಕೆಲವು ಸಂದರ್ಭಗಳಲ್ಲಿ, ಮಗುವನ್ನು ತಮ್ಮ ಕುಟುಂಬದ ಗುಂಪಿಗೆ ಸೇರಿಸಿಕೊಳ್ಳಲು ಆಹ್ವಾನಿಸುವ ವ್ಯವಸ್ಥಾಪಕರು, ಮಗುವನ್ನು ವರ್ಗಾಯಿಸುವ ಮೊದಲು ಹೆಚ್ಚುವರಿ ವಯಸ್ಸಿನ ದೃಢೀಕರಣ ಮಾಹಿತಿಯನ್ನು ಬಳಸಿಕೊಂಡು ಅವರನ್ನು ವಯಸ್ಕರೆಂದು ಖಚಿತಪಡಿಸಬೇಕು ಮತ್ತು ಮಗುವಿನ ಪರವಾಗಿ ಕಾರ್ಯನಿರ್ವಹಿಸಲು ಅವರಿಗೆ ಅಧಿಕಾರವಿದೆ ಎಂಬುದನ್ನು ಖಚಿತಪಡಿಸಬೇಕು. ಮಗುವಿನ ಪ್ರಸ್ತುತ ಕುಟುಂಬದ ಆಯೋಜಕರು ವರ್ಗಾವಣೆ ಆಹ್ವಾನವನ್ನು ಅಂಗೀಕರಿಸಬೇಕಾಗುತ್ತದೆ. ವರ್ಗಾವಣೆ ಪೂರ್ಣಗೊಂಡ ನಂತರದಲ್ಲಿ, ವರ್ಗಾವಣೆಗೊಂಡಿರುವ ಮಗು ಹಿಂದೆ ವಿಭಿನ್ನ ಕುಟುಂಬ ಗುಂಪಿನ ಸದಸ್ಯರಾಗಿದ್ದರು ಎನ್ನುವ ಸತ್ಯಾಂಶದ ರೆಕಾರ್ಡ್ ಅನ್ನು Apple ನಿರ್ವಹಣೆ ಮಾಡುವುದಿಲ್ಲ. ಪರ್ಯಾಯವಾಗಿ, ಕುಟುಂಬದ ಆಯೋಜಕರು ಮಗುವಿನ Apple ಖಾತೆಯನ್ನು ಡಿಲೀಟ್ ಮಾಡಬಹುದು. ಮಗುವನ್ನು ಮತ್ತೊಂದು ಕುಟುಂಬ ಗುಂಪಿಗೆ ಸರಿಸಲು ಮತ್ತು ಮಗುವಿನ ಖಾತೆಯೊಂದನ್ನು ಡಿಲೀಟ್ ಮಾಡಲು, support.apple.com/en-in/102634 ಎಂಬಲ್ಲಿಗೆ ಭೇಟಿ ನೀಡಿ.

ನಿಮ್ಮೊಂದಿಗೆ ಸಂವಹನ ನಡೆಸುವುದು

ಕುಟುಂಬ ಹಂಚಿಕೆ ಮೂಲಕ ಲಭ್ಯವಿರುವ ಉತ್ಪನ್ನಗಳು, ಸೇವೆಗಳು,ಆಫರ್‌ಗಳು ಹಾಗೂ ಇತರ ಲಾಭಗಳ ಕುರಿತು ಬಳಕೆದಾರ ಮತ್ತು ಅವರ ಕುಟುಂಬ ಸದಸ್ಯರಿಗೆ ಪ್ರಸ್ತುತವೆನಿಸುವ ಸಂವಹನಗಳನ್ನು ಕಳುಹಿಸಲು, ಕುಟುಂಬ ಸದಸ್ಯರ ಸಂಖ್ಯೆ ಮತ್ತು ಯಾರಾದರೂ ಗುಂಪಿನ ಸದಸ್ಯರಾಗಲು ನೀಡಿದ ಆಹ್ವಾನವನ್ನು ಬಾಕಿ ಉಳಿಸಿಕೊಂಡಿರುವುದು ಸೇರಿದಂತೆ ಬಳಕೆದಾರರ ಕುಟುಂಬ ಗುಂಪಿನ ವಿವರಗಳನ್ನು Apple ಬಳಸಿಕೊಳ್ಳಬಹುದು.

ಈಮೇಲ್ ಮಾರ್ಕೆಟಿಂಗ್ ಸ್ವೀಕರಿಸಲು ಕುಟುಂಬ ಸದಸ್ಯರು ಸಮ್ಮತಿಸಿದರೆ, ಅವರು ಈಮೇಲ್ ಮೂಲಕ ಈ ಸಂವಹನಗಳನ್ನು ಸ್ವೀಕರಿಸಬಹುದು. ಅವರ ಈಮೇಲ್ ಆದ್ಯತೆಗಳನ್ನು ಅವರು ಬದಲಾಯಿಸಬಹುದು ಮತ್ತು account.apple.com/in ಎಂಬಲ್ಲಿಗೆ ಹೋಗುವ ಮೂಲಕ ಅಥವಾ iOS ಅಥವಾ iPadOS ಸಾಧನಗಳಲ್ಲಿ ಸೆಟ್ಟಿಂಗ್ಸ್ > [ನಿಮ್ಮ ಹೆಸರು] > ವೈಯಕ್ತಿಕ ಮಾಹಿತಿ > ಸಂವಹನ ಆದ್ಯತೆಗಳಿಗೆ ಹೋಗುವ ಮೂಲಕ ಈ ಈಮೇಲ್‌ಗಳನ್ನು ಸ್ವೀಕರಿಸುವುದರಿಂದ ಹೊರಗುಳಿಯಬಹುದು. ಕುಟುಂಬ ಸದಸ್ಯರು ಪ್ರಸ್ತುತವೆನಿಸುವ Apple ಉತ್ಪನ್ನ ಮತ್ತು ಸೇವೆಗಳಿಂದ push ನೋಟಿಫಿಕೇಷನ್ ಮೂಲಕವೂ ಈ ಸಂವಹನಗಳನ್ನು ಸ್ವೀಕರಿಸಬಹುದು. ನೋಟಿಫಿಕೇಷನ್ ಆದ್ಯತೆಗಳನ್ನು ಅಪ್‌ಡೇಟ್ ಮಾಡಲು ಅಥವಾ ನಿಮ್ಮ iOS ಅಥವಾ iPadOS ಸಾಧನದಲ್ಲಿ ನೋಟಿಫಿಕೇಷನ್‌ಗಳಿಂದ ಹೊರಗುಳಿಯಲು, ಸೆಟ್ಟಿಂಗ್ಸ್ > ನೋಟಿಫಿಕೇಷನ್‌ಗಳು ಎಂಬಲ್ಲಿಗೆ ಹೋಗಿ.

ಕುಟುಂಬ ಸದಸ್ಯತ್ವದಲ್ಲಿನ ಬದಲಾವಣೆ ಮತ್ತು ಪಾತ್ರ, ಹಂಚಿಕೊಳ್ಳಲಾದ ಖರೀದಿಗಳು ಮತ್ತು ಸಬ್‌ಸ್ಕ್ರಿಪ್ಶನ್‌ಗಳನ್ನು ಆ್ಯಕ್ಸೆಸ್ ಮಾಡಬಹುದಾದ ಸಾಮರ್ಥ್ಯ, ಹಾಗೂ ಪೋಷಕರು ಹೇರುವ ನಿಯಂತ್ರಣಗಳ ಕುರಿತು ಈಮೇಲ್ ಅಥವಾ push ನೋಟಿಫಿಕೇಷನ್ ಮೂಲಕ ಸಂವಹನಗಳನ್ನು ಕಳುಹಿಸಲು, ಬಳಕೆದಾರರು ಮತ್ತು ಅವರ ಕುಟುಂಬ ಗುಂಪಿನ ಕುರಿತು ಅವರ ಹೆಸರು, ವಯಸ್ಸು, ಪಾತ್ರ, ಖರೀದಿಗಳು ಮತ್ತು ಸಬ್‌ಸ್ಕ್ರಿಪ್ಶನ್‌ಗಳು ಸೇರಿದಂತೆ ವಿವರಗಳನ್ನು Apple ಸಹ ಬಳಸಿಕೊಳ್ಳಬಹುದು. ಉದಾಹರಣೆಗೆ, ಬಳಕೆದಾರರೊಬ್ಬರು ಕುಟುಂಬ ಗುಂಪನ್ನು ಸೇರಿಕೊಂಡಾಗ, ಹೊಸ ಸದಸ್ಯರು ಹಂಚಿಕೊಂಡ ಖರೀದಿಗಳು ಮತ್ತು ಸಬ್‌ಸ್ಕ್ರಿಪ್ಶನ್‌ಗಳಿಗೆ ಆ್ಯಕ್ಸೆಸ್‌ ಮಾಡಬಹುದಾದ ಸಾಮರ್ಥ್ಯದ ಕುರಿತು ಅಸ್ತಿತ್ವದಲ್ಲಿರುವ ಎಲ್ಲಾ ಕುಟುಂಬ ಸದಸ್ಯರಿಗೆ ಸೂಚನೆ ನೀಡಲಾಗುತ್ತದೆ. ವ್ಯವಸ್ಥಾಪಕರು ಕುಟುಂಬದ ವಯಸ್ಕ ಸದಸ್ಯರನ್ನು ಪೋಷಕರು/ಪಾಲಕರೆಂದು ನಿಯೋಜಿಸಿದಾಗ, ಪೋಷಕರು ಹೇರುವ ನಿಯಂತ್ರಣಗಳನ್ನು ಆ ವಯಸ್ಕ ಬಳಕೆದಾರರು ನಿರ್ವಹಣೆ ಮಾಡುತ್ತಾರೆ ಎಂದು ಕುಟುಂಬ ಗುಂಪಿನಲ್ಲಿರುವ ಮಕ್ಕಳಿಗೆ ಮತ್ತು ಹದಿಹರೆಯದವರಿಗೆ ಸೂಚನೆ ನೀಡಲಾಗುತ್ತದೆ.

ವೈಯಕ್ತಿಕ ಡೇಟವನ್ನು ಪ್ರಕ್ರಿಯೆಗೊಳಿಸುವುದಕ್ಕಾಗಿ ಅನ್ವಯವಾಗುವ ಕಾನೂನುಬದ್ಧ ಆಧಾರ

ನಾವು ಸಾಮಾನ್ಯವಾಗಿ ಮೇಲೆ ವಿವರಿಸಿದಂತೆ Apple ಜೊತೆಗಿನ ಕುಟುಂಬ ಸದಸ್ಯರ ಒಪ್ಪಂದದ ನಿರ್ವಹಣೆಗಾಗಿ, ಸೇವೆಯನ್ನು ಒದಗಿಸಲು ಮತ್ತು ನಮ್ಮ ಕಾನೂನು ಬಾಧ್ಯತೆಗಳನ್ನು ಅನುಸರಿಸಲು ಅಗತ್ಯವಿರುವಂತೆ ಕುಟುಂಬ ಹಂಚಿಕೆಗಾಗಿ ನಿಮ್ಮ ವೈಯಕ್ತಿಕ ಡೇಟವನ್ನು ಪ್ರಕ್ರಿಯೆಗೊಳಿಸುತ್ತೇವೆ. ಸಮ್ಮತಿಯು ಸೂಕ್ತವಾದ ಕಾನೂನುಬದ್ಧ ಆಧಾರವಾಗಿದ್ದಲ್ಲಿ, ನಾವು ಅದನ್ನು ಅನ್ವಯವಾಗುವ ಸ್ಥಳೀಯ ಕಾನೂನುಗಳ ಪ್ರಕಾರ ಪಡೆಯುತ್ತೇವೆ.

ಅನ್ವಯವಾಗುವ ಸ್ಥಳೀಯ ಕಾನೂನು ಅನುಮತಿಸುವಲ್ಲಿ, ನಮ್ಮ ಅಥವಾ ಥರ್ಡ್ ಪಾರ್ಟಿಯೊಬ್ಬರ ಕಾನೂನುಬದ್ಧ ಹಿತಾಸಕ್ತಿಗಳನ್ನು ಪೂರೈಸುವ ಉದ್ದೇಶಗಳಿಗಾಗಿ, ನಾವು ವೈಯಕ್ತಿಕ ಡೇಟದ ಈ ಕೆಳಗಿನ ವರ್ಗಗಳನ್ನು ಅಗತ್ಯಕ್ಕೆ ತಕ್ಕಂತೆ ಪ್ರಕ್ರಿಯೆಗೊಳಿಸುತ್ತೆವೆ, ಇದರಲ್ಲಿ ಈ ಕೆಳಗಿನವುಗಳ ಕುರಿತಾದ ಮಾಹಿತಿಯೂ ಸೇರಿದೆ:

• Apple ಸೇವೆಗಳಾದ್ಯಂತ ಬಳಸುವ ಬಳಕೆದಾರರ ಹೆಸರು, ಸೈನ್ ಇನ್ ಮಾಡುವ ಅವರ ಮಾಹಿತಿ, ಹಾಗೆಯೇ ಎಲ್ಲಾ ಸಂಪರ್ಕ, ಪಾವತಿ ಹಾಗೂ ವಿಶ್ವಾಸಾರ್ಹ ಫೋನ್ ಸಂಖ್ಯೆಗಳು ಅಥವಾ ಭದ್ರತಾ ಪ್ರಶ್ನೆಗಳಂತಹ ಭದ್ರತೆಯ ವಿವರಗಳನ್ನು ಒಳಗೊಂಡಿರುವ ಅವರ Apple ಖಾತೆಯ ಮಾಹಿತಿ
• ಕುಟುಂಬ ಸದಸ್ಯರ ಮಾಲೀಕತ್ವದಲ್ಲಿರುವApple ಉತ್ಪನ್ನಗಳು, Apple ಸೇವೆಗಳಿಗೆ ಕುಟುಂಬ ಸದಸ್ಯರ ಸಬ್‌ಸ್ಕ್ರಿಪ್ಶನ್‌ಗಳು, ಹಾಗೂ ಅವರ ಖರೀದಿಗಳು ಮತ್ತು ಡೌನ್‌ಲೋಡ್‌ಗಳು
• ಬಳಕೆದಾರರ ಕುಟುಂಬದಲ್ಲಿರುವ ಸದಸ್ಯರ ಸಂಖ್ಯೆ ಸೇರಿದಂತೆ ಅವರ ಕುಟುಂಬ ಗುಂಪು
• ಬಳಕೆದಾರರ ಸಾಧನದ ಹೆಸರು, ಕ್ರಮ ಸಂಖ್ಯೆ ಮತ್ತು ಇತರ ಹಾರ್ಡ್‌ವೇರ್ ಐಡೆಂಟಿಫೈಯರ್‌ಗಳನ್ನು ಒಳಗೊಂಡಂತೆ ಅವರ ಸಾಧನಗಳು
• ಖಾತೆ ಸಂಖ್ಯೆಗಳು ಮತ್ತು ಅವಧಿ ಮುಗಿಯುವ ದಿನಾಂಕಗಳು, ಬಿಲ್ಲಿಂಗ್ ಮತ್ತು ಷಿಪ್ಪಿಂಗ್ ವಿಳಾಸಗಳು ಹಾಗೂ ಉಡುಗೊರೆ ಕಾರ್ಡ್ ರಿಡೆಂಪ್ಶನ್ ಮಾಹಿತಿ ಸೇರಿದಂತೆ ಪಾವತಿ ವಿವರಗಳು

ಈ ಕಾನೂನುಬದ್ಧವಾದ ಆಸಕ್ತಿಗಳು ಇವುಗಳನ್ನು ಒಳಗೊಂಡಿರುತ್ತವೆ:

• ಕುಟುಂಬ ಸದಸ್ಯರಿಗೆ ಉತ್ತಮ ಸೇವೆ ಮತ್ತು ಬೆಂಬಲವನ್ನು ಒದಗಿಸುವುದು
• ಕುಟುಂಬ ಹಂಚಿಕೆ ಮತ್ತು ಇತರೆ ಸಂಬಂಧಿತ Apple ಉತ್ಪನ್ನಗಳು, ಸೇವೆಗಳು ಹಾಗೂ ನಿಮಗೆ ಆಸಕ್ತಿಯಿರಬಹುದಾದ ಆಫರ್‌ಗಳ ಕುರಿತು ಪ್ರಸ್ತುತವೆನಿಸುವ ಸಂವಹನಗಳನ್ನು ಕಳುಹಿಸುವುದು
• ಮೋಸ ಹಾಗೂ ಇತರ ದುರುದ್ದೇಶಪೂರಿತ ಚಟುವಟಿಕೆಗಳನ್ನು ತಡೆಯುವುದು

ಎಲ್ಲಾ ಸಮಯದಲ್ಲೂ, Apple ಸಂಗ್ರಹಿಸಿದ ಮಾಹಿತಿಯನ್ನು Appleನ ಗೌಪ್ಯತೆ ನೀತಿಗೆ ಅನುಗುಣವಾಗಿ ಪರಿಗಣಿಸಲಾಗುತ್ತದೆ, ನೀವು ಅದನ್ನು www.apple.com/in/privacy ಎಂಬಲ್ಲಿ ನೋಡಬಹುದು.

2026-05-11