Apple жарнама платформасы ұсынған жарнамалар App Store, Apple Maps, Apple News, «Акциялар» және Apple TV қолданбасында пайда болуы мүмкін. Apple жарнама платформасы әрекеттеріңізді қадағаламайды. Қолданбаларымыз арқылы жиналған пайдаланушы немесе құрылғы деректері үшінші тараптардың таргеттелген жарнама көрсету немесе жарнамалық науқандарды бағалау үшін жинайтын пайдаланушы немесе құрылғы деректерімен байланысты емес, сондай-ақ пайдаланушы немесе құрылғы деректері деректер брокеріне берілмейді.

Контекстік ақпарат

Тиісті жарнамалар сеанс барысында контекстік ақпарат арқылы таңдалуы мүмкін, мысалы:

• Құрылғы туралы ақпарат: Пернетақтаңыз бен құрылғыңыздың тіл реттеулері, құрылғы түрі, ОЖ нұсқасы, тәулік уақыты және қосылым түрі.
• Құрылғының болжалды геолокациясы: Геолокация сервистері қосулы болса және App Store, Apple Maps, Apple News немесе Apple TV қолданбасына болжалды геолокацияңызға қол жеткізуге рұқсат берілсе, қолданба болжалды геолокацияңызды орналасқан жеріңізге релевантты жарнамалар көрсету үшін пайдалануы мүмкін. Қандай да бір қолданбаға нақты геолокацияңызды пайдалануға рұқсат берсеңіз де, Apple жарнама платформасы геолокацияңыздың негізінде профильдер құрмайды, нақты геолокацияңызды пайдаланбайды және сақтамайды. Бұл реттеулерге қол жеткізу үшін «Реттеулер» > «Құпиялылық және қауіпсіздік» > «Геолокация сервистері» тармағына өтіңіз.
• App Store: Іздеу сұрауларыңыз және сіз қарап отырған веб-бет туралы ақпарат.
• Apple News және «Акциялар»: Сіз оқып отырған мақаланың түрі.
• Apple Maps: Іздеу сұрауларыңыз және іздеу кезінде көрсетілетін карта аймағы.

Жарнамалардың тиімділігін арттыру үшін және қолжетімділікке қарай құрылғыңыз қай жарнаманы көрсету қажеттігін анықтау үшін қосымша контекстік ақпаратты (мысалы, қазіргі уақытта орнатылған қолданбалар және ағымдағы сеанс барысында ашқан немесе қараған жарнамалар) пайдалануы мүмкін. Бұл талдау тікелей құрылғыңызда орындалады және Apple Ads сервисіне жіберілмейді.

Жеке жарнамалар және сегменттер

App Store, Apple News және «Акциялар» қолданбаларында жеке жарнамалар үшін сегменттер жасаймыз. Apple Maps сервисінде жеке жарнамаларға қолдау көрсетілмейді, мұнда сіз жоғарыдағы ақпаратқа негізделген контекстік жарнамаларды ғана көресіз. Сегменттер — ұқсас сипаттағы адамдар тобы. Сіз туралы ақпарат қай сегментке жататыныңызды және қандай жарнамаларды алатыныңызды анықтау үшін пайдаланылуы мүмкін. Құпиялылықты қамтамасыз ету үшін жеке жарнамалар жарнама беруші арқылы таңдалған мақсатты критерийлерге сәйкес келетін адамдар саны 5000-нан асса ғана көрсетіледі.

Сегменттерге тағайындау үшін төмендегідей ақпаратты пайдалануымыз мүмкін:

• Аккаунт туралы ақпарат: Apple аккаунтыңызға тіркелген атыңыз, мекенжайыңыз, жасыңыз, жынысыңыз бен құрылғылар туралы деректер. Жынысыңызды анықтау үшін Apple аккаунтыңызды тіркеу бетіндегі атыңыз немесе Apple аккаунтыңызда көрсетілген сәлемдесу сияқты ақпарат пайдаланылуы мүмкін. Аккаунтыңыз туралы ақпаратты Apple аккаунтының веб-сайтында жаңартуға болады: account.apple.com.
• Жүктеп алулар, сатып алулар және жазылымдар: Сіз жүктеп алатын музыка, фильмдер, кітаптар, телешоулар мен қолданбалар, сондай-ақ қолданбалардағы кіріктірілген сатып алулар мен жазылымдар. Біз белгілі бір қолданбаның жүктеп алуларына немесе App Store дүкенінен белгілі бір қолданбадағы сатып алуларға (соның ішінде жазылымдар) негізінде таргеттелген жарнамаға (егер таргеттелген жарнаманы қолданба әзірлеушісі жасамаса) рұқсат бермейміз.
• «Apple News» және «Акциялар»: Сіз оқитын мақалалардың тақырыптары мен санаттары және сіз жазылған немесе хабарландырулар қосып қойған басылымдар.
• Жарнама: Apple жарнама платформасы ұсынатын жарнамалармен әрекеттестігіңіз.

Сізге жарамды бірнеше жарнаманың ішінен көрсетілетін жарнаманы таңдаған кезде, қай жарнама сізге көбірек сәйкес келетінін анықтау үшін жоғарыда аталған ақпаратты, сондай-ақ App Store іздеулеріңіз бен шолу әрекеттеріңізді пайдалануымыз мүмкін. App Store шолу әрекетіне App Store дүкенін шолу кезінде түртетін және көретін контент пен қолданбалар кіреді. Бұл ақпарат пайдаланушылардың арасында жалпыланған түрде жинақталатындықтан, оның негізінде жеке басыңызды анықтау мүмкін емес.

Жарнама саясаты және өнімділік

Apple компаниясының жарнамалық платформасы бір жарнаманы көруіңіздің жиілігін шектеу үшін саясаттарды қолданады. Сондай-ақ жас саясатының, жарнамалық контент жарамдылығының және қолжетімділік шектеулерінің сақталуын қамтамасыз ету, сондай-ақ жергілікті заңдарға сәйкес әрекет ету үшін құрылғыдағы алгоритмдерді пайдаланамыз.

Біз қандай жарнамаларды ашып қарайтыныңыз туралы ақпарат аламыз. Бұл ақпарат Apple аккаунтыңызбен емес, кездейсоқ идентификатормен байланысты. Apple Maps сервисінде бұл ақпарат сағатына бірнеше рет ауысып тұратын және Apple аккаунтыңызбен байланыстырылмайтын сеанс идентификаторымен байланысты. Ұзақ мерзімді идентификаторлар жиынтық қолданыс көрсеткіштерін қадағалау, сондай-ақ сервис тұтастығын сақтау үшін пайдаланылады. Бұл ұзақ мерзімді идентификаторлар Apple аккаунтыңызбен немесе жеке басыңызды анықтауы мүмкін басқа ақпаратпен байланысты болмайды.

Apple қандай да бір жеке деректерді үшінші тараптарға бермейді. Өнімдеріміз бен сервистерімізді әзірлеу үшін Apple компаниясымен бірге жұмыс істейтін, сондай-ақ маркетингтік қызметті жүргізуге және Apple атынан жарнамалық қызметтерді сатуға көмектесетін жарнама берушілеріміз бен стратегиялық серіктестерімізге жеке басыңызға қатысы жоқ деректерді береміз. Apple Pay транзакциялары немесе «Денсаулық» қолданбасының деректері Apple жарнама платформасында қолжетімді емес немесе жарнама мақсатында пайдаланылмайды. Apple компаниясы жарнама берушілерге сексуалды бағдарлығыңызға, діни сенімдеріңізге немесе саяси пікірлеріңізге қатысты ақпарат бермейді.

Жарнама көрсету параметрлері

Осы жарнама туралы ақпарат
Сізге белгілі бір жарнаманың App Store, Apple Maps, Apple News немесе «Акциялар» қолданбасында неліктен көрсетілгенін түсіну үшін жарнамада орналасқан «Жарнама» түймесін түртіңіз. Бұл қандай жарнама алғаныңызды анықтау үшін пайдаланылған сегменттерді және демографиялық ақпарат сияқты басқа деректерді көрсетеді.

Жарнама берушінің бүкіл арнаға немесе бетке демеушілік жасайтынын білдіретін «Жарнама» түймесінің орнына белгілі бір жарнамаларда тек «Ұсынған» немесе ұқсас тіл болуы мүмкін, бірақ бұл орналастыруларды мақсатты ету үшін ешқандай сегменттер пайдаланылмайды.

Жарнаманы таргеттеу туралы ақпарат
Apple жарнама платформасы арқылы таргеттелген жарнамаларды жеткізу үшін пайдаланылуы мүмкін сіз туралы ақпаратты, соның ішінде сіз орналасқан сегменттерді көру.

Осы ақпаратты iOS, iPadOS немесе visionOS құрылғыңызда көру үшін «Реттеулер» > «Құпиялылық және қауіпсіздік» > «Apple жарнамасы» тармағына өтіп, «Жарнаманы таргеттеу туралы ақпаратты көру» опциясын түртіңіз. Mac компьютерінде System Settings (Жүйе реттеулері) > Privacy & Security (Құпиялылық және қауіпсіздік) > Apple Advertising (Apple жарнамасы) тармағына өтіңіз, содан кейін View Ad Targeting Information (Жарнаманы таргеттеу туралы ақпаратты көру) опциясын басыңыз.

Сіз туралы ақпарат нақты емес деп ойласаңыз, Apple аккаунтыңыз туралы ақпаратты жаңартуға болады.

Геолокацияға негізделген жарнамалар
App Store, Apple Maps, Apple News немесе Apple TV қолданбасына геолокацияңызға қол жеткізуге рұқсат берсеңіз, Apple жарнама платформасы географиялық тұрғыдан таргеттелген жарнамалар ұсыну үшін құрылғыңыздың ағымдағы болжалды геолокациясын пайдалануы мүмкін.

Геолокацияға негізделген қолданба функцияларынан, соның ішінде жарнамадан бас тартуға болады. iOS, iPadOS немесе visionOS құрылғыңызда «Реттеулер» > «Құпиялылық және қауіпсіздік» > «Геолокация сервистері» тармағына өтіп, «Геолокация сервистері» опциясын өшіріңіз немесе App Store, Apple Maps, Apple News немесе Apple TV қолданбасының рұқсатын (қолданылатын болса) «Ешқашан» деп орнатыңыз. Mac компьютерінде System Settings (Жүйе реттеулері) > Privacy & Security (Құпиялылық және қауіпсіздік) > Location Services (Геолокация сервистері) тармағына өтіп, Location Services (Геолокация сервистері) функциясын өшіріңіз немесе News немесе TV үшін геолокация рұқсаттарын өшіріңіз. tvOS жүйесінде «Реттеулер» > «Жалпы» > «Құпиялылық» > «Геолокация сервистері» тармағына өтіп, «Геолокация сервистері» опциясын өшіріңіз немесе Apple TV қолданбасының рұқсатын «Ешқашан» деп орнатыңыз.

Құрылғыңызда «Геолокация сервистері» өшірулі болса, Apple жарнама платформасы құрылғының болжалды геолокациясы туралы ақпарат алмайды.

Жеке жарнамаларды басқару
Жеке жарнамаларды қоссаңыз, Apple жарнама платформасы сіз туралы ақпаратты сізге сәйкес келетін жарнамаларды App Store, Apple News және «Акциялар» қолданбаларында көрсету үшін пайдалануы мүмкін. «Жеке жарнамалар» параметрін өшірсеңіз, Apple қызметі бұл ақпаратты жеке жарнама үшін пайдалана алмайды. Бұл әрекет нәтижесінде көрсетілетін жарнамалар саны азаймайды, бірақ сәйкес келетін жарнамалар саны азырақ болуы мүмкін. Apple Maps сервисінде жеке жарнамаларға қолдау көрсетілмейді, сондықтан «Жеке жарнамалар» реттеуі сол жерде көрсетілетін контекстік жарнамаларға әсер етпейді.

«Жеке жарнамалар» функциясын өшіру үшін iOS, iPadOS немесе visionOS құрылғыңызда «Реттеулер» > «Құпиялылық және қауіпсіздік» > «Apple жарнамасы» тармағына өтіп, «Жеке жарнамалар» параметрін өшіріңіз. Mac компьютерінде System Settings (Жүйе реттеулері) > Privacy & Security (Құпиялылық және қауіпсіздік) тармағына өтіп, Apple Advertising (Apple жарнамасы) бөлімін таңдаңыз, содан кейін Personalized Ads (Жеке жарнамалар) опциясын таңдаудан алыңыз. Кәмелеттік жасқа толмаған болсаңыз, басқарылатын аккаунтты пайдалансаңыз немесе Apple компаниясы өз қолданбаларында жарнамаларын көрсетпейтін аймақта болсаңыз, жеке жарнамалар қолжетімсіз болуы мүмкін.

Алаяқтықтың және басқа зиянды әрекеттердің алдын алу

Жарнамадағы алаяқтықты, сондай-ақ басқа да зиянды әрекеттерді анықтау және олардың алдын алу үшін Apple жарнама платформасы App Store дүкеніндегі іздеулеріңіз, сіз көретін және басатын жарнамалар және жарнамалардан жүктеп және сатып алатын қолданбалар туралы ақпаратты пайдалануы мүмкін. Бұл ақпарат Apple аккаунтыңызға қатысы жоқ кездейсоқ идентификатормен жиналады.

Apple жинаған ақпарат әрқашан Apple құпиялылық саясатына (www.apple.com/privacy) сәйкес өңделеді.

2026-05-11