• Цифрлық жеке куәлігіңізді беруші орган, тіпті Apple компаниясы немесе үкімет те жеке куәлігіңізді қашан немесе кімге көрсеткеніңізді білмейді.
• Apple компаниясы жеке куәлігіңіздің кескіндерін сақтамайды. Apple компаниясы Wallet қолданбасында жеке куәлігіңізді көрсету кезінде алаяқтықтың алдын алу мақсатында жеке куәліктегі белгілі бір ақпаратты ғана пайдаланады.
• Куәлігіңізді Wallet қолданбасында көрсеткен кезде, құрылғыңыз нақты сұралған ақпаратты сіз растағаннан кейін ғана көрсетеді.
• Жеке куәлігіңізді Wallet арқылы қосқан кезде, цифрлық жеке куәлігіңізді беруші орган жеке басыңызды растау және алаяқтықтың алдын алу үшін жеке басты растау ақпараты мен Apple аккаунтыңыз туралы ақпаратты, сондай-ақ құрылғыны пайдалану үлгілері мен реттеулері туралы ақпаратты пайдаланады.
• Apple компаниясы осы функция шеңберінде алаяқтықтың алдын алу үшін жеке куәлікті қосқан кезде жіберілетін қосымша растау ақпаратын (мысалы, Live Photo және бет пен бас қозғалыстарының жазбалары) пайдаланады және цифрлық жеке куәлікті беруші орган Wallet қолданбасына қосқан жеке куәлігіңізді мақұлдағанға немесе қабылдамағанға дейін сақтайды.

Wallet қолданбасындағы жеке куәліктер — куәлік картасын көрсетудің ең оңай, жылдам әрі қауіпсіз жолы.

Куәлік картасын қосу

Wallet арқылы мемлекеттік куәлік картасын қосу
Куәлік картасын қосу үшін жүргізуші куәлігіңіздің немесе жеке куәлігіңіз сияқты мемлекеттік құжаттың алдыңғы және артқы жағын суретке түсіру қажет болады. Куәлік кескіндерінің мемлекеттік уәкілетті орган тарапынан қабылдануын қамтамасыз ету үшін, құрылғыңыз кескіндердің сапасы мен түрін тексереді. Куәлік картасының кескіндері құрылғыда шифрланып, мемлекеттік уәкілетті органға жіберіледі, ал ол өз кезегінде бұл кескіндерді жеке басыңызды анықтайтын үшінші тарап ұйымымен бөлісуі мүмкін. Apple компаниясы куәлік картаңыздың кескіндерін көрмейді және сақтамайды. Жеке басыңызды растау және алаяқтықтың алдын алу үшін құрылғыңыз куәлік картаңыздағы штрихкодты оқып, атыңызды, мекенжайыңызды және туған күніңізді Apple компаниясына жібереді. Apple компаниясы функция жұмысын қамтамасыз ету және негізгі Apple платформаларында алаяқтықтың алдын алу мақсатында жеке басты растау нәтижесі (мысалы, жеке бастың сәтті түрде расталғаны) туралы ақпаратты сақтауы мүмкін, бірақ негізгі жеке басты растау ақпаратын (мысалы, штрихкод арқылы алынған туған күн) сақтамайды.

Wallet қолданбасына куәлік картаңызды сіз қосып жатқаныңызға көз жеткізу үшін, қолданба өзіңіздің Live Photo фотосын түсіруді сұрайды. Сіз ұсынған Live Photo фотоңыздан алынған стоп-кадрдың мемлекеттік уәкілетті орган тарапынан қабылдануын қамтамасыз ету үшін, құрылғыңыз стоп-кадрдың сапасын тексереді. Live Photo фотоңыздан алынған осы стоп-кадр құрылғыда шифрланып, куәлігіңіздің мемлекеттік уәкілетті органда сақталған кескінімен салыстыру үшін аталған органға жіберіледі. Мемлекеттік уәкілетті орган бұл стоп-кадрды өзінің құпиялылық саясатына сәйкес өңдейді. Бұл саясат бетті тану технологиясын пайдалануға рұқсат беруі мүмкін. Алаяқтықтың алдын алу үшін, стоп-кадрыңыз мемлекеттік уәкілетті органға жіберілмес бұрын, құрылғыңыз және Apple компаниясы шын адамның Live Photo фотосы жіберіліп жатқанына және стоп-кадрды Wallet қолданбасына куәлік картасын қосайын деп жатқан адамның өзі жіберіп жатқанына көз жеткізу үшін Live Photo фотоңызды тексереді. Сізден құрылғыңызда және Apple тарапынан Live Photo фотоңызбен бірдей жолмен тексерілетін бет пен бас қозғалыстарын бірнеше рет орындау да сұралуы мүмкін. Live Photo фотоңыз немесе бар болса, қозғалыстарыңыз туралы ақпарат (Live Photo немесе қозғалыс жазбасының өзі емес) сізбен байланыстырылып, куәлігіңізді қосу процесі барысында сақталады.

Алаяқтықтың алдын алу үшін Apple компаниясына Apple аккаунтыңыз туралы ақпарат, құрылғыны пайдалану үлгілері мен реттеулері, мемлекеттік жеке куәлікті қосу кезіндегі құрылғының геолокациясы (геолокация сервистері қосулы болса) және Live Photo немесе бет пен бас қозғалыстары туралы ақпарат жіберіледі. Алаяқтықтың алдын алу үшін Apple компаниясы осы ақпарат негізінде анықталған алаяқтық белгілерін мемлекеттік уәкілетті органға жібереді. Куәлік картаңызды Wallet қолданбасына қосуға рұқсат беру туралы шешімді Apple емес, мемлекеттік уәкілетті орган қабылдайды. Кейбір жағдайда мемлекеттік уәкілетті орган қосымша ақпаратты сұрауы немесе сізді шақыруы мүмкін. Apple компаниясы мемлекеттік уәкілетті органның қосымша растау ақпаратын сұрағаны және растау түрі (мысалы, сізді шақыру арқылы) туралы ақпаратты алуы мүмкін. Apple компаниясы функцияны басқару және жақсарту мақсатында бұл ақпаратты, мемлекеттік уәкілетті орган куәлігіңізді Wallet қолданбасына қосу не қоспау керектігі туралы шешімді қабылдағанға дейін, сізбен байланыстырылған күйде сақтайды. Кейбір жағдайларда мемлекеттік уәкілетті орган қосымша ақпаратты зерттегеннен кейін растау кодын беруі мүмкін. Бұл код құрылғыда шифрланып, мемлекеттік уәкілетті органға жіберіледі. Apple компаниясы растау кодын көрмейді және сақтамайды. Apple компаниясы құрылғыңызға жаңартуларды жібере алуы және Wallet қолданбасында куәлік картаңызды басқаруға көмектесе алуы үшін, мемлекеттік уәкілетті орган Apple компаниясына рұқсат күйі (мысалы, «қаралуда» немесе «қабылданды») туралы ақпаратты қамтамасыз етуі мүмкін.

Wallet арқылы цифрлық жеке куәлікті қосу
Бұл функция тек АҚШ-та қолжетімді.

Цифрлық жеке куәлікті қосу үшін құрылғыңызға төлқұжатыңыздағы эл. төлқұжат чипіне қол жеткізуге мүмкіндік беру үшін iPhone арқылы төлқұжаттың фото бетіндегі құрылғы оқитын аймақ (MRZ) мәтінін сканерлеу сұралады. Содан кейін эл. төлқұжатты оқу үшін құрылғыңыз нұсқағандай iPhone құрылғыңызды төлқұжатыңызға қоюыңыз керек. Құрылғыңыз эл. төлқұжаттағы ақпараттың жарамдылығын тексеру үшін MRZ деректері мен эл. төлқұжат деректері Apple компаниясына жіберіледі. Apple компаниясы құрылғыңыздағы цифрлық жеке куәлігіңізді ұсыну және оны басқаруға көмектесу, сондай-ақ алаяқтықтың алдын алу үшін төлқұжатыңыз туралы ақпараттың бір бөлігін шифрлап, сақтайды. Wallet қолданбасына цифрлық жеке куәлігіңізді сіз қосып жатқаныңызға көз жеткізу үшін, мемлекеттік жеке куәліктер үшін жоғарыда сипатталғандай, қолданба өзіңіздің Live Photo фотосын түсіруді талап етеді. Цифрлық жеке куәлік үшін бұл ақпарат мемлекеттік немесе ұлттық үкіметке емес, цифрлық жеке куәлікті шығарушы орган ретінде Apple компаниясына ғана жіберіледі. Apple компаниясы цифрлық жеке куәлігіңізді шығару қажеттігін анықтау үшін және алаяқтықтың алдын алу мақсатында Live Photo фотоңыз, Apple аккаунтыңыз, құрылғыны пайдалану үлгілері мен реттеулері және цифрлық жеке куәлігіңізді қосу әрекетіңіздің уақытындағы құрылғы геолокациясы (геолокация сервистері қосылған болса) туралы ақпаратты жинайды және пайдаланады. Live Photo өзі емес, Live Photo туралы ақпарат сізбен байланыстырылып, куәлікті қосу процесі барысында сақталады. Apple компаниясына Live Photo фотоңызды қолмен тексеруге рұқсат берсеңіз, төмендегі «Куәлік карталарын жақсарту» бөлімінде сипатталғандай, Apple компаниясы Live Photo фотосын қысқа уақыт аралығында сақтауы мүмкін.

Мемлекеттік уәкілетті орган қолданбасы арқылы куәлік картасын қосу
Бұл функция тек Жапонияда қолжетімді.

Куәлік картасын мемлекеттік уәкілетті орган қолданбасы арқылы Wallet қолданбасына қосу үшін сізге уәкілетті органның шарттары мен талаптарына келісу қажет және мемлекеттік уәкілетті органға жеке басыңызды растау үшін қадамдарды аяқтау, сондай-ақ куәлік картаңыз үшін PIN код немесе құпиясөз орнату қажет болуы мүмкін. PIN кодты немесе құпиясөзді тек мемлекеттік уәкілетті органның қолданбасы арқылы жаңартуға болады. Apple компаниясы мемлекеттік уәкілетті орган қолданбасындағы әрекетіңіз туралы ешқандай ақпаратты алмайды. Куәлік картаңызды Wallet қолданбасына қосуға рұқсат беру туралы шешімді Apple емес, мемлекеттік уәкілетті орган қабылдайды.

Куәлік картаңызды құрылғыңызға қосу

Цифрлық жеке куәлігіңізді беруші орган жеке куәлігіңізді Wallet қолданбасына қосуға рұқсат берген соң, куәлікте берілген ақпарат шифрланған күйде сақталады және оның шифрын тек құрылғыдағы Secure Enclave жүйесінің көмегімен ашуға болады. Бұл ақпаратты кез келген уақытта қарауға болады. Ол үшін Wallet қолданбасына өтіп, жеке куәліктің артқы жағын қараңыз, ол жерде «Жүргізуші куәлігі туралы ақпарат», «Жеке куәлік туралы ақпарат», «Цифрлық жеке куәлік туралы ақпарат» немесе «Карта туралы ақпарат» опциясын түртіңіз де, мәліметтерді қарау үшін аутентификациядан өтіңіз. Apple компаниясы бұл ақпаратты көре алмайды. Secure Enclave жүйесі туралы толығырақ ақпарат алу үшін мына веб-сайтты қараңыз: support.apple.com/guide/security/secure-enclave-sec59b0b31ff/web.

Wallet қолданбасындағы жеке куәлігіңізді қорғау

Куәлік картаңызды заңсыз қол жеткізу немесе көрсетуден қорғау үшін оны Face ID арқылы тіркелген бет-әлпетпен немесе Touch ID үшін пайдаланылатын биометриялық идентификатормен байланыстыру ұсынылады. Куәлікті немесе куәліктегі ақпаратты көрсету үшін белгілі бір әдістің және баптау кезінде куәлігіңізбен байланыстырылған биометриялық идентификатордың көмегімен аутентификациядан өту қажет болады. Құрылғы реттеулеріне байланысты басқа да аутентификация әдістері қолжетімді болуы мүмкін. Аутентификация әдісі Apple компаниясында емес, құрылғыңызда сақталады. Егер аутентификацияны өзгерткіңіз келсе, куәлік картаңызды Wallet қолданбасынан жойып, оны жаңа аутентификация арқылы қайта қосу қажет.

Куәлік картасын көрсету

Жеке куәлігіңізді бетпе-бет көрсету үшін iPhone немесе Apple Watch құрылғыңызды оқу құралына жақындатыңыз. Куәлікті кім сұрағаны және жеке куәліктегі нақты қандай ақпараттың сұралғаны жайлы ақпарат берілген келісім парағын көресіз. Авторизациядан кейін құрылғыңыз оқу құралымен өтпелі шифрлаумен қорғалған тікелей байланыс арнасын орнатып, рұқсат етілген ақпаратты тасымалдайды.

Цифрлық жеке куәлігіңізді Көлік қауіпсіздігі басқармасының (TSA) бақылау-өткізу пункттерінде көрсеткен кезде, цифрлық жеке куәлігіңіз оның ШЫНАЙЫ куәліктің жарамды баламасы екендігін көрсететін индикаторды ұсынады. Цифрлық жеке куәлігіңіз ТҮПНҰСҚА куәлік құжаты болып табылмайды. Басқа үшінші тарап жеке деректерін оқу құралдары да осы көрсеткішті сұрап, ала алады. Сіз цифрлық жеке куәлігіңізді көрсеткен кезде, үшінші тарап жеке деректерді оқу құралы осы көрсеткіш мәліметтерін жинаса, ол келісім парағында және көрсету тарихында көрсетіледі. Цифрлық жеке куәлігіңіз төлқұжатыңыздан жасалатындықтан, сіз оны көрсеткен кезде, сұрау беруші тарап сіздің АҚШ азаматы екеніңіз туралы қорытынды шығаруы мүмкін.

Жапондық куәлік карталарын көрсету кезінде ғана куәлік картаңызды оқу құралына түртпей тұрып, оны Wallet қолданбасынан таңдау керек. Жапонияның негізгі мемлекеттік инфрақұрылымы арқылы жеке куәлігіңізді ұсынған кезде, Wallet сұралған нақты ақпарат туралы ақпаратты көрсетпейді.

Өз өнімдеріне немесе сервистеріне қол жеткізу үшін пайдаланушы жасын немесе жеке басын растауды талап ететін қолданбалар сізге сұратылатын нақты ақпаратты және сол ақпаратты сұрау жіберілетін қолданбада сақтау мерзімдерін қамтитын келісім парағын ұсынады. Авторизациядан кейін, жіберуге болатын ақпаратты қамтитын шифрланған пайдалы жүктеме құрылғыдан қолданбаға жіберіледі. Бұл шифрланған пайдалы жүктеме жеке куәлігіңіз үшін цифрлық жеке куәлігіңізді беруші орган берген бірегей цифрлық қолтаңбаны қамтиды. Бұл қолтаңба қолданбаға жеке куәлігіңіздің жарамдылығын тексеруге мүмкіндік береді.

Куәлік картаңызды бұрын көрсеткен кездерді, оның ішінде қашан, қайда және кімге көрсеткеніңізді, сондай-ақ қандай ақпаратты көрсеткеніңізді қарай аласыз. Ол үшін Wallet қолданбасында куәлік картаңызды түртіңіз. Бұл ақпарат құрылғыңыздан алынады. Жеке куәлігіңізді қашан, қайда және кімге көрсеткеніңізді Apple компаниясы да, цифрлық жеке куәлікті беруші орган да білмейді және қадағаламайды. Жапонияда үкімет сіз сұраған қызметтерді көрсету үшін қажетті өтінішіңіз туралы ақпаратты, мысалы, ауруханаларда куәлік картаңызды көрсету арқылы алуы мүмкін.

Куәлік картасын басқару

Куәлік картасын кез келген уақытта басқаруға болады. Ол үшін Wallet қолданбасында куәлік картаңызды түртіңіз. Құпиялылықты қорғау және куәлік картасындағы ақпараттың қауіпсіздігін қамтамасыз ету мақсатында куәлік мәліметтерін қарамас бұрын, аутентификациядан өту сұралады. Куәлік картасындағы ақпаратты жаңарту немесе өзгерту үшін мемлекеттік уәкілетті органға хабарласу қажет. Wallet қолданбасындағы куәлік картаңызды басқаруға көмектесу үшін мемлекеттік уәкілетті орган Apple компаниясына куәлік картаңыздың әлі жарамды екені туралы мерзімді түрде хабарлап отырады. Сондай-ақ Apple компаниясы мемлекеттік уәкілетті органнан куәлік картаңыздағы кез келген жаңартулар, мысалы, мекенжайыңыздың немесе куәлік карта күйінің өзгергені (мысалы, «белсенді» күйден «белсенді емес» күйге) туралы ақпаратты алып отырады. Apple компаниясы жаңарту туралы мәліметтерді (мысалы, нақты жаңартылған мекенжай) алмайды. Apple компаниясы куәлік картаңыздағы жаңартулар (мысалы, куәлік картасы күйінің өзгергені) туралы ақпаратты куәлік картасы Wallet қолданбасынан жойылмайынша сақтайды. Бұл ақпарат тек алаяқтықтың алдын алу және қауіпсіздік мақсаттарында пайдаланылады.

Төлқұжат қайта шығарылған кезде, цифрлық жеке куәліктер жаңартылмайды. Цифрлық жеке куәлікті жаңарту үшін жаңа төлқұжатыңыз арқылы цифрлық жеке куәлігіңізді жойып, жаңа цифрлық жеке куәлікті қосуыңыз қажет.

Жеке куәлікті Wallet қолданбасынан кез келген уақытта жоюға болады. Ол үшін Wallet қолданбасында жеке куәліктің артқы жағына өтіп, «Жүргізуші куәлігін жою», «Жеке куәлікті жою», «Цифрлық жеке куәлікті жою» немесе «Картаны жою» опциясын түртіңіз. Куәлік картасын жойған жағдайда құрылғыдан оны көрсету тарихы да жойылады.

Куәлік карталарын жақсарту

Apple компаниясына осы ақпаратты пайдалануға рұқсат берсеңіз, Apple жасыңыз, жынысыңыз, нәсілдік/этникалық шығу тегіңіз (қолжетімді болса) және теріңіздің түсі туралы мәліметтерді жүргізуші куәлігіңізден немесе жеке куәлігіңізден, сондай-ақ мемлекеттік уәкілетті органның сізге Wallet үшін куәлік картасын беру туралы шешімінен анонимді түрде жинайды. Apple компаниясы бұл ақпаратты жеке басты растау процесінде біржақтылықты бақылау үшін пайдаланады. Бұл ақпаратты iOS құрылғыңызда қарап шығуға немесе келісіміңізді өзгертуге болады. Ол үшін «Реттеулер» > «Құпиялылық және қауіпсіздік» > «Аналитика және жақсартулар» тармағына өтіңіз. Куәлік картасын беретін мемлекеттік уәкілетті органның қолданбасы арқылы қызмет көрсету кезінде, «Куәлік карталарын жақсарту» опциясын таңдауға болмайды.

Wallet қолданбасына цифрлық жеке куәлікті немесе мемлекеттік жеке куәлікті қосқанда, Apple компаниясы Wallet қолданбасындағы идентификаторларды жақсартуға көмектесу үшін Apple ішіндегі адам тексерушілерінің шағын тобына Live Photo функциясын көруге рұқсат беруіңізді сұрауы мүмкін. Apple компаниясына Live Photo фотоңызды тексеруге рұқсат берсеңіз, Apple компаниясы Live Photo фотоңызды 90 күн ішінде тексеріп шығады. Apple компаниясы видеоны тексеріп шыққаннан кейін немесе егер ол тексерілмеген болса, 90 күннен кейін оны жояды. Сондай-ақ www.apple.com/legal/privacy/contact сайтындағы деректерді қорғау қызметкеріне хабарласу арқылы Live Photo фотосын жоюды сұрауға болады.

Apple компаниясы Wallet қолданбасындағы жеке куәліктердің функцияларын жақсарту үшін куәлік картасының өзінде көрсетілген кез келген басқа ақпаратты (мысалы, атыңызды немесе туған күніңізді) пайдаланбайды. Функцияны және басқа да Apple өнімдері мен сервистерін жақсарту мақсатында куәлік картасындағы сізбен тікелей байланысты емес деректер сақталуы мүмкін. Мысалы, Wallet қолданбасының жұмысын жақсарту үшін Apple компаниясы қолданбаға куәлік картасын қосу процесінің қай кезеңінде пайдаланушылар қиындықтарға тап болатыны туралы анонимді және жалпыланған ақпаратты сақтауы мүмкін. Сондай-ақ Wallet қолданбасындағы куәлік карталарының функцияларын жақсарту үшін Apple компаниясы осы функцияға қатысты сізден жинаған немесе мемлекеттік уәкілетті органнан алған ақпаратты анонимді етуі мүмкін. Мысалы, Apple компаниясы Wallet қолданбасына куәлік картасын қосу кезінде жіберілген кескіндердің сапасы туралы және мемлекеттік уәкілетті органның бұл кескіндерді қабылдағаны не қабылдамағаны туралы ақпаратты алады. Apple компаниясы бұл ақпаратты, мысалы, құрылғының жіберілетін кескіндерді бағалау сапасын жақсарту немесе пайдаланушыларға мемлекеттік уәкілетті орган қандай кескіндерді қабылдайтыны туралы нақтырақ нұсқауларды ұсыну мақсатында анонимді етуі және пайдалануы мүмкін.

Басқа

Apple компаниясы ақпаратты өзінің сервис провайдерлерімен бөлісуге құқылы, ал олар өз кезегінде бұл ақпаратты осы құжатқа және Apple нұсқауларына сәйкес өңдеуге, алынған жеке деректерді қорғау мақсатында тиісті қауіпсіздік шараларын қабылдауға, сондай-ақ заңнама жеке ақпаратты сақтауды талап етпесе немесе сіз оны сақтауға келісім бермесеңіз, сервис провайдерлері қызметті көрсетіп болған соң бұл жеке деректерді жоюға міндетті.

Apple жеке деректерді жинау мақсаттарын орындау үшін қажет болғанша, соның ішінде осы хабарламада сипатталғандай және Apple құпиялылық саясатына сәйкес немесе заң талап еткендей ғана сақтайды. Сақтау мерзімдерін бағалау кезінде алдымен жиналған жеке деректерді сақтау қажет пе, жоқ па, соны мұқият тексереміз және сақтау қажет болса, жеке деректерді заңмен рұқсат етілген ең қысқа мерзім ішінде сақтау үшін жұмыс істейміз.

Apple жинаған ақпарат әрқашан Apple құпиялылық саясатына (www.apple.com/privacy) сәйкес өңделеді.

Жарияланған күні: 2025 жылғы 15қыркүйек