• Apple TV செயலி உங்களுக்குப் பிடித்த அனைத்து டிவி நிகழ்ச்சிகளையும் திரைப்படங்களையும் ஒரே இடத்தில் வழங்குகிறது மற்றும் உங்களுக்கு மகிழ்ச்சியளிக்கக்கூடிய பிறவற்றையும் பரிந்துரைக்கிறது.
• உங்கள் ஆதரிக்கப்படும் சாதனங்களில் உள்ள Apple TV செயலி மற்றும் இணைக்கப்பட்ட செயலிகளில் உங்கள் வாங்குதல்கள், பதிவிறக்கங்கள், Apple TV செயலியில் மேற்கொள்ளும் செயல்பாடு, நீங்கள் பார்க்கும் உள்ளடக்கம் மற்றும் அதை எங்கே பார்க்கிறீர்கள் என்பன போன்ற தகவல்களை Apple சேகரிக்கிறது. சேவை வழங்கவும் உங்களுக்காகவும் பிறருக்காகவும் Apple TV செயலியை மேம்படுத்தவும் இந்தத் தகவலை நாங்கள் பயன்படுத்துகிறோம்.
• உங்களுக்கு ஏற்ற அம்சங்கள் மற்றும் பிரத்தியேகப் பரிந்துரைகளை வழங்கவும் அறிவிப்புகள் அனுப்பவும் உங்கள் வாங்குதல்கள், பதிவிறக்கங்கள், Apple TV செயலியில் நீங்கள் மேற்கொள்ளும் செயல்பாடு, நீங்கள் பார்க்கும் உள்ளடக்கம் மற்றும் அதை எங்கே பார்க்கிறீர்கள் என்பன போன்ற தகவல்களையும் நாங்கள் சேகரிக்கிறோம். கீழே விவரிக்கப்பட்டுள்ளபடி இந்த நோக்கத்திற்காகத் தரவு பயன்படுத்தப்படுவதில் இருந்து நீங்கள் விலகிக் கொள்ளலாம்.
• விளம்பரங்களை வழங்க, App Store, Apple News மற்றும் பங்குகள் செயலிகளில் காட்டப்படும் விளம்பரங்கள் உங்களுக்குப் பொருத்தமானதாக இருப்பதை உறுதிப்படுத்த நீங்கள் வாங்கும் மற்றும் பதிவிறக்கும் திரைப்படங்கள், டிவி நிகழ்ச்சிகள் பற்றிய தகவல்களை நாங்கள் பயன்படுத்துகிறோம். இந்த விளம்பரப்படுத்தல் தொடர்பாக கீழே விவரிக்கப்பட்டுள்ளபடி தேர்வுகளைக் கொண்டுள்ளீர்கள்.
• மோசடியை அடையாளம் கண்டு தடுக்க உதவுவதற்காக, நீங்கள் வாங்க முயலும்போது உங்கள் சாதனத்தை நீங்கள் பயன்படுத்தும் விதத்தின் அடிப்படையில் சாதனத்தின் நம்பகத்தன்மை மதிப்பெண் கணக்கிடப்படும், பயன்படுத்தும் விதம் என்பதில் ஃபோன் அழைப்புகளின் தோராயமான எண்ணிக்கை அல்லது நீங்கள் அனுப்பும் மற்றும் பெறும் மின்னஞ்சல்களின் தோராயமான எண்ணிக்கை அடங்கும். உங்கள் சாதனத்தில் உள்ள உண்மை மதிப்புகளை Apple அறிந்துகொள்ளாத வகையில் இந்தக் கணக்கீடு வடிவமைக்கப்பட்டுள்ளது. இந்த மதிப்பெண்கள் குறிப்பிட்ட காலத்திற்கு எங்கள் சர்வரில் சேமிக்கப்பட்டிருக்கும்.

Apple TV செயலி உங்களுக்குப் பிடித்த அனைத்து டிவி நிகழ்ச்சிகளையும் திரைப்படங்களையும் ஒரே இடத்தில் பார்க்க உதவுகிறது. நீங்கள் Apple இடமிருந்து வாடகைக்குப் பெற்ற அல்லது வாங்கிய உள்ளடக்கத்தைப் பார்க்கலாம். கிடைக்கும்பட்சத்தில், Apple TV சந்தா, Apple TV சேனல்கள் மற்றும் இணைக்கப்பட்ட உங்கள் மூன்றாம் தரப்பு வீடியோ செயலிகளில் வழியாகவும் நீங்கள் உள்ளடக்கத்தை அணுகலாம். நீங்கள் இதே Apple கணக்கில் உள்நுழைந்திருக்கும் ஆதரிக்கப்படும் சாதனங்களில் உள்ள Apple TV செயலி வழியாகவும் இந்த அனைத்து உள்ளடக்கங்களையும் அணுகலாம்.

Apple TV செயலியில் சேவைகளை வழங்குதல்

Apple TV செயலியில் சேவைகள் மற்றும் அம்சங்களை வழங்க நாங்கள் உங்கள் தனிப்பட்ட தரவைப் பயன்படுத்துகிறோம். இந்தத் தகவல்களில் உங்கள் கணக்கு, பேமெண்ட் தகவல் போன்றவை அடங்கும், நீங்கள் அமைப்புகளில் இதை அணுகலாம், மாற்றலாம்.

இதே Apple கணக்கில் உள்நுழைந்திருக்கும் ஆதரிக்கப்படும் சாதனங்களில் உள்ள Apple TV செயலியில் நீங்கள் வாங்கியவை, பார்த்தவை பற்றிய தகவலை Apple சேகரிக்கிறது. இந்தத் தகவலை உங்கள் Apple கணக்குடன் இணைத்து Apple சேமிக்கும். இதன் மூலம் நீங்கள் தற்போது பார்த்துக்கொண்டிருப்பவற்றை உங்கள் ஆதரிக்கப்படும் சாதனங்கள் அனைத்திலும் எங்களால் காட்ட முடியும். மூன்றாம் தரப்புச் செயலியில் நீங்கள் உள்நுழையும்போது, அந்தச் சேவைகளுக்குச் சந்தா சேர்ந்துள்ளீர்களா என்ற தகவல் உங்களுக்குக் கிடைக்கும் உள்ளடக்கத்தைக் காட்டப் பயன்படுத்தப்படும். நீங்கள் Apple TV செயலியுடன் இணைக்க ஒரு மூன்றாம் தரப்புச் செயலிக்கு அனுமதி வழங்கினால், உங்கள் ஆதரிக்கப்படும் சாதனங்களில் உள்ள அந்தச் செயலியில் நீங்கள் தற்போது பார்த்துக்கொண்டிருப்பவை பற்றிய தகவலையும், உங்கள் சந்தா நிலையையும் Apple சேகரித்துச் சேமிக்கும். Apple TV செயலியைப் பயன்படுத்தத் தொடங்கும்போது Apple Music மற்றும் ரிமோட் போன்ற ஆதரிக்கப்படும் உள்ளடக்கத்தைக் கொண்ட Apple செயலிகள் தானாகவே இணைக்கப்படும்.

நீங்கள் பார்த்துக்கொண்டிருப்பவை பற்றிய தகவல் என்பதில் எந்த உள்ளடக்கத்தை பிளே செய்தீர்கள், எப்போது பிளே செய்தீர்கள், எந்தச் சாதனத்தில் இருந்து பிளே செய்தீர்கள், பார்க்கும்போது எந்த இடத்தில் இடைநிறுத்தினீர்கள் அல்லது நிறுத்தினீர்கள் போன்ற தகவல்கள் அடங்கும். Apple TV சேனல்கள் மற்றும் Apple TV சந்தாவில் இதுவரையான அனைத்து பிளேபேக் செயல்பாடுகளைப் பற்றிய விரிவான தகவல்களையும் நாங்கள் சேகரிப்போம்.

Apple TV செயலிக்கு உங்கள் இருப்பிட அணுகலை வழங்கினால், உங்கள் வட்டாரத்தில் உலாவுவதற்கோ பார்ப்பதற்கோ கிடைக்கும் உள்ளடக்கத்தைத் தீர்மானிக்க உங்கள் இருப்பிடம் பயன்படுத்தப்படும். இதில் நேரலை விளையாட்டுகள், நிகழ்ச்சிகள், செய்திகள் ஆகிய உள்ளூர் உள்ளடக்கங்களும் அடங்கும். சில உள்ளடக்கங்களில் புவியியல்ரீதியாகத் தொடர்புடைய விளம்பரங்களும் இருக்கலாம். நீங்கள் தேர்ந்தெடுத்த உள்ளடக்கத்தை பிளே செய்யத் தேவையான உரிமங்கள் எங்களிடம் இருப்பதை உறுதிசெய்வதற்கு, நீங்கள் எந்த நாடு அல்லது வட்டாரத்தில் இருந்து சேவையை அணுகுகிறீர்கள் என்பதைத் தீர்மானிக்க உங்கள் இணைய இணைப்பின் IP முகவரியை Apple தனித்தனியாகப் பயன்படுத்தக்கூடும். இந்தத் தீர்மானம் எடுக்கப்பட்டதும், IP முகவரி மற்றும் IP முகவரியிலிருந்து பெறப்பட்ட எந்தவொரு இருப்பிடத் தகவலையும் நாங்கள் அகற்றிவிடுவோம்.

Apple TV செயலியை மேம்படுத்துதல்

Apple TV செயலியை நீங்கள் பயன்படுத்தும் விதம் மற்றும் உங்கள் கணக்கு பற்றிய தகவல்களை Apple சேகரிக்கும், இதில் நீங்கள் பயன்படுத்தும் அம்சங்கள் (எடுத்துக்காட்டாக, பார்ப்பதைத் தொடர்க அல்லது லைப்ரரி), நீங்கள் தேடுபவை, அறிவிப்புகளை நீங்கள் கையாளும் விதம், நீங்கள் உலாவும் அல்லது பார்வையிடும் உள்ளடக்கப் பக்கங்கள், செயலியினுள் ஏற்படும் பிழைகள் அல்லது சிதைவுகள் பற்றிய தகவல், உங்கள் பில்லிங் அஞ்சல் குறியீடு போன்றவை அடங்கும். உங்களுக்காகவும் பிறருக்காகவும் சேவைகளை மேம்படுத்தி உகந்ததாக்க உதவுவதற்கு இந்தத் தகவல், உங்களை அடையாளப்படுத்தாத தோராயமான இருப்பிடத் தகவல், நீங்கள் பார்ப்பவை பற்றிய தகவல் ஆகியவற்றைப் பயன்படுத்துகிறோம். உங்கள் சாதனத்தின் வகை, சாதனம் பெறப்பட்ட வழிமுறை, ஆபரேட்டிங் சிஸ்டத்தின் பதிப்பு, சாதனத்தில் காலியாக உள்ள சேமிப்பிடம் போன்ற உங்கள் சாதனம் தொடர்பான தகவல்களையும் நாங்கள் சேகரிக்கிறோம். உதாரணமாக, கோரப்பட்ட உள்ளடக்கத்தைப் பதிவிறக்க முடியுமா என்பதை மதிப்பிடுவதற்காக, சாதனப் பயன்பாடு மற்றும் சேமிப்பகம் பயன்படுத்தப்படும் பொதுவான விதத்தைப் புரிந்துகொள்வதற்காக, உங்கள் சாதனம் Wi-Fi அல்லது மொபைல் டேட்டா மூலம் இணைக்கப்பட்டுள்ளதா என்பதை அறிவதற்காக நாங்கள் இந்தத் தகவலைப் பயன்படுத்தக்கூடும். எடுத்துக்காட்டாக, வாங்கும் நேரத்தில் பதிவிறக்க வேண்டிய தேவையின்றி உங்கள் iPhoneஇல் ஒரு திரைப்படத்தை வாங்குவதற்கான அம்சத்தை உருவாக்க உங்கள் சாதனத்தின் மீதமுள்ள சேமிப்பகத்தை அறிந்துகொள்வது உதவுகிறது. நீங்கள் பிற பயனர்களுடன் இணைந்து உள்ளடக்கத்தைப் பார்க்க SharePlayஐப் பயன்படுத்தினால், SharePlay அமர்வின்போது நீங்கள் பார்த்த உள்ளடக்கம், அமர்வில் பங்கேற்ற சாதனங்களின் எண்ணிக்கை ஆகியவற்றை Apple TV செயலி சேகரிக்கும், ஆனால் SharePlay அமர்வின் பங்கேற்பாளர்களை அடையாளப்படுத்தும் தகவல்களைச் சேகரிக்காது.

Apple TVஇல் பயன்படுத்தப்படும் மாடல்களை மேம்படுத்துவதற்காக Apple TV தேடல் தரவுகளை நாங்கள் பயன்படுத்துகிறோம். உதாரணத்திற்கு, தொகுக்கப்பட்ட Apple TV தேடல் வினவல்கள் Apple TV தேடல் மாடலை மேம்படுத்தப் பயன்படுத்தப்படும்.

Apple TV செயலியைப் பிரத்தியேகமாக்குதல்

மிகப் பொருத்தமான உள்ளடக்கத்தைக் கண்டறிய உங்களுக்கு உதவுவதற்காக Apple TV செயலியை நாங்கள் பிரத்தியேகமாக்குகிறோம். எடுத்துக்காட்டாக, இதற்கு முன்பு நீங்கள் பார்த்த திரைப்படங்களின் அடிப்படையில் உங்களுக்குப் பொருத்தமானதாகக் கருதும் திரைப்படங்களை நாங்கள் பரிந்துரைக்கிறோம், Apple TV செயலியில் நீங்கள் மேற்கொண்ட செயல்பாடுகளின் அடிப்படையில் பொருத்தமான தேடல் முடிவுகளை நாங்கள் வழங்குகிறோம். தனிப்பயனாக்கிய உள்ளடக்கத்தை வழங்குவதற்காக, நீங்கள் பார்ப்பவை, உங்கள் வாங்குதல்கள், சந்தாக்கள், பதிவிறக்கங்கள், தேடல்கள், உலாவல், Apple TV செயலியில் நீங்கள் செய்யும் பிற செயல்பாடுகள், கணக்கு தொடர்பான தகவல்கள் (எடுத்துக்காட்டாக உங்கள் வயது) ஆகியவற்றைப் பயன்படுத்துகிறோம்.

Apple TV செயலியை ஆதரிக்கும் அனைத்துச் சாதனங்களிலும் பிரத்தியேகமாக்கத்திற்காக இந்தச் சாதனத்தின் Apple TV செயலியில் நீங்கள் பார்ப்பவை பற்றிய தகவல்களை Apple பயன்படுத்த வேண்டாம் என நீங்கள் நினைத்தால், அமைப்புகளில் “இதுவரை பிளே செய்தவற்றைப் பயன்படுத்து” என்பதை ஆஃப் செய்யலாம். உங்கள் iOS, iPadOS, visionOS அல்லது tvOS சாதனங்களில், அமைப்புகள் > செயலிகள் > டிவி > இதுவரை பிளே செய்தவற்றைப் பயன்படுத்து என்பதற்குச் செல்லுங்கள். Macஇல் உள்ள Apple TV செயலியில், TV > அமைப்புகள் > பிளேபேக் என்பதற்குச் சென்று, “பார்த்த வரலாற்றைப் பயன்படுத்து” என்பதைத் தேர்வுநீக்கவும்.

உங்கள் Apple கணக்கில் பிரத்தியேகப் பரிந்துரைகள் அம்சத்தை ஆஃப் செய்வதன் மூலம் App Store, Apple Books, iTunes Store, Apple TV, Apple Podcasts மற்றும் Appleஇல் சந்தாக்களுக்கான பிரத்தியேகமாக்கல் அம்சங்களை ஆஃப் செய்யலாம். உங்கள் iOS, iPadOS அல்லது visionOS சாதனங்களில், அமைப்புகள் > [உங்கள் பெயர்] > மீடியா & வாங்குதல்கள் > கணக்கைக் காட்டு என்பதற்குச் சென்று பிரத்தியேகப் பரிந்துரைகளை ஆஃப் செய்ய அதைத் தட்டுங்கள்.

உங்களுடனான தகவல்தொடர்புகள்

Apple TV செயலி மற்றும் நீங்கள் விரும்பக்கூடிய பிற Apple தயாரிப்புகள், சேவைகள் மற்றும் சலுகைகள் (எடுத்துக்காட்டாக Apple One) பற்றிய தகவல்களை உங்களுக்கு அனுப்ப, உங்களுக்குச் சொந்தமான Apple தயாரிப்புகள், Apple சேவைகளுக்கான உங்கள் சந்தாக்கள், நீங்கள் பதிவிறக்கிய Apple செயலிகள், உங்கள் பில்லிங் அஞ்சல் குறியீடு போன்ற உங்கள் கணக்கு பற்றிய தகவல்களை Apple பயன்படுத்தக்கூடும். Apple சலுகைகளுக்கான தகுதிநிலையைச் சரிபார்க்க சாதன வரிசை எண், தொடர்புடைய உங்கள் App Store சந்தாக்கள் போன்ற உங்கள் சாதனம் பற்றிய விவரங்கள் பயன்படுத்தப்படலாம். நீங்கள் குடும்பப் பகிர்வுக் குழுவில் இருந்தால், குடும்பப் பகிர்வின் வழியாக உங்களுக்குக் கிடைக்கக்கூடிய தயாரிப்புகள், சேவைகள் மற்றும் சலுகைகள் பற்றிய தகவல்களை Apple அனுப்பக்கூடும். நீங்கள் Apple One சந்தா செலுத்தியிருந்தால், சந்தா செலுத்தியுள்ள சேவைகளின் ஒவ்வொரு அம்சங்களைப் பற்றிய மின்னஞ்சல்களையும் அறிவிப்புகளையும் நாங்கள் அனுப்பக்கூடும். Apple TV செயலியில் கிடைக்கும் புதிய அம்சங்கள், உள்ளடக்கம் மற்றும் சலுகைகள் பற்றிய மின்னஞ்சல்கள் மற்றும் அறிவிப்புகளை அனுப்ப Apple TV செயலியில் நீங்கள் மேற்கொள்ளும் செயல்பாடுகளைப் பற்றிய தகவல்களையும் Apple பயன்படுத்தக்கூடும். account.apple.com இணையதளத்திற்குச் சென்று உங்கள் மின்னஞ்சல் முன்னுரிமைகளை மாற்றலாம் மற்றும் இந்த மின்னஞ்சல்களைப் பெறுவதற்கான ஒப்புதலைத் திரும்பப் பெறலாம். உங்கள் அறிவிப்பு முன்னுரிமைகளை மாற்ற உங்கள் iOS, iPadOS அல்லது visionOS சாதனத்தில், அமைப்புகள் > அறிவிப்புகள் > டிவி என்பதற்குச் செல்லுங்கள்.

விளம்பரப்படுத்துதல்

Apple TV செயலி உங்கள் இருப்பிடத்தை அணுக நீங்கள் அனுமதித்தால், Apple TV செயலியில் புவியியல்ரீதியாகத் தொடர்புடைய விளம்பரங்களை வழங்க உங்கள் இருப்பிடம் பயன்படுத்தப்படலாம்.

App Store, Apple News, பங்குகள் போன்ற பிற செயலிகளில் பிரத்தியேகமாக்கப்பட்ட விளம்பரங்கள் அமைப்பு ஆன் செய்யப்பட்டிருந்தால், Appleஇன் விளம்பரப்படுத்தல் தளம் உங்களுக்கு மிகப் பொருத்தமான விளம்பரங்களை வழங்க உங்கள் தகவல்களைப் பயன்படுத்தக்கூடும், இதில் Apple இடமிருந்து நீங்கள் வாங்கிய திரைப்படங்கள் மற்றும் டிவி நிகழ்ச்சிகள் பற்றிய தகவல்களும் அடங்கும்.

நீங்கள் Appleஇன் விளம்பரப்படுத்தல் தளத்தில் இருந்து உங்கள் ஆர்வங்களை இலக்கிடும் விளம்பரங்களைப் பெற விரும்பவில்லையெனில், பிரத்தியேகமாக்கப்பட்ட விளம்பரங்களை ஆஃப் செய்யலாம். பிரத்தியேகமாக்கப்பட்ட விளம்பரங்களை ஆஃப் செய்வது விளம்பரங்களை இலக்கிடுவதற்காக உங்கள் தகவல்களைப் பயன்படுத்துவதில் இருந்து Appleஐத் தடுக்கும். இது நீங்கள் பெறும் விளம்பரங்களின் எண்ணிக்கையைக் குறைக்காது, ஆனால் விளம்பரங்கள் உங்களுக்குப் பொருத்தமானதாக இருப்பது குறையக்கூடும்.

அமைப்புகள் > தனியுரிமை & பாதுகாப்பு > Apple விளம்பரப்படுத்தல் என்பதற்குச் சென்று உங்கள் பிரத்தியேகமாக்கப்பட்ட விளம்பரங்கள் அமைப்புகளை மாற்றலாம்.

Apple விளம்பரப்படுத்தல் & தனியுரிமை பற்றி மேலும் அறிய www.apple.com/in/legal/privacy/data/en/apple-advertising இணையதளத்தைப் பார்வையிடுங்கள்.

App Store, Apple News மற்றும் பங்குகள் செயலிகளில் பிரத்தியேகமாக்கப்பட்ட விளம்பரங்களில் இருந்து விலகுவது எப்படி என்று அறிய support.apple.com/105131 இணையதளத்தைப் பார்வையிடுங்கள்.

கூட்டாளர்கள் வழங்கும் Apple TV சந்தாக்கள்

உங்கள் மொபைல் நெட்வொர்க் வழங்குநர் Apple TV சந்தாக்கள் மற்றும் கட்டணமில்லாப் பயன்பாடுகளை வழங்கினால், மொபைல் நெட்வொர்க் வழங்குநர் கூட்டாளர் மூலமாக அதற்கு நீங்கள் தகுதிபெறுகிறீர்களா என்பதைத் தீர்மானிக்க Apple உங்கள் ஃபோன் எண்ணைச் சரிபார்க்கலாம். உங்கள் மொபைல் நெட்வொர்க் வழங்குநர் அல்லது மற்றொரு Apple கூட்டாளர் மூலமாக Apple TV சந்தா அல்லது கட்டணமில்லாப் பயன்பாட்டிற்கு நீங்கள் பதிவுசெய்தால், உங்கள் கணக்கை அடையாளம் காண்பதற்கும் நீங்கள் சந்தாவைச் செயல்படுத்தியதை உங்கள் மொபைல் நெட்வொர்க் வழங்குநருக்கோ பிற கூட்டாளருக்கோ தெரிவிப்பதற்கும் உங்கள் ஃபோன் எண் அல்லது கூட்டாளரால் பகிரப்பட்ட தனித்துவமான கணக்கு அடையாளத் தகவலை Apple பயன்படுத்தும். உள்நுழைவின்போது உங்கள் கணக்கைச் சரிபார்ப்பதற்காகவும் கணக்குடன் உங்கள் Apple TV சந்தாவை இணைப்பதற்காகவும் உங்கள் சந்தாவுடன் தொடர்புடைய ஃபோன் எண்ணையோ தனித்துவமான அடையாளத்தகவலையோ நாங்கள் பயன்படுத்துவோம்.

கூட்டாளர் கணக்குகளை இணைத்தல்

Apple மற்றும் எங்கள் கூட்டாளர்களில் சிலர் உங்கள் கூட்டாளர் கணக்கையும் உங்கள் Apple கணக்கையும் இணைக்க உங்களை அனுமதிக்கலாம், இதன் மூலம் நீங்கள் Apple TV சந்தா உள்ளடக்கத்தை Apple TV செயலியிலும் கூட்டாளரின் தளத்திலும் பார்க்க முடியும். நீங்கள் கூட்டாளர் கணக்குடன் இணைக்கும்போது, உங்கள் கணக்கைப் பற்றி கூட்டாளர் சேமித்திருக்கும் சில தகவல்களை Apple பெறும், ஆனால் உங்கள் Apple TV சந்தா நிலையையும் கூட்டாளர் ஐடியையும் மட்டுமே Apple சேமிக்கும்.

Apple உங்கள் சந்தா நிலையையும், உங்கள் Apple கணக்குடன் கூட்டாளர் கணக்குகளை இணைக்கிறீர்களா என்பது குறித்த தகவல்களையும் பயன்படுத்தி உங்களுக்கும் பிறருக்கும் இந்த அம்சம் மற்றும் Apple TV செயலியை மேம்படுத்துகிறது.

மூன்றாம் தரப்பினருடன் பகிர்தல்

எங்கள் தயாரிப்புகளையும் சேவைகளையும் வழங்க Apple உடன் இணைந்து பணியாற்றும், வாடிக்கையாளருக்கான சந்தைப்படுத்தலில் Appleக்கு உதவும், App Store, Apple News மற்றும் பங்குகள் செயலிகளில் காட்டுவதற்கான விளம்பரங்களை Appleஇன் சார்பாக விற்பனை செய்யும் உத்திசார் கூட்டாளர்கள் மற்றும் எங்கள் விளம்பரதாரர்களுக்குத் தனிப்பட்டவை அல்லாத சில தரவுகளை நாங்கள் வழங்குகிறோம். எடுத்துக்காட்டாக, உங்கள் பரிவர்த்தனைகள், பார்த்தல் செயல்பாடுகள், வட்டாரம் மற்றும் வயதுக் குழு, பாலினம் போன்ற (Apple கணக்கின் பெயர், வணக்கம் தெரிவிக்கும் முறை போன்ற தகவல்களின் அடிப்படையில் புரிந்துகொள்ளப்படும்) பயனர்களின் தொகுக்கப்பட்ட மக்கள்தொகைத் தகவல்கள் ஆகியவற்றை Apple TV உத்திசார் கூட்டாளர்களுடன் (எ.கா. உள்ளடக்க உரிமையாளர்கள்) நாங்கள் பகிரக்கூடும். இதன்மூலம் தங்கள் படைப்பாக்கத்தின் செயல்திறனை அவர்கள் மதிப்பிடலாம், ராயல்டி மற்றும் கணக்கியல் தேவைகளைப் பூர்த்திசெய்யலாம், தொடர்புடைய அவர்களின் தயாரிப்புகளையும் சேவைகளையும் மேம்படுத்தலாம்.

Apple அல்லாத சாதனத்தில் உள்ள Apple TV செயலியில் நீங்கள் உள்நுழைந்தால், தளத்தில் Apple TV சந்தாக்களின் உள்ளடக்கங்களைக் காட்டுவதற்காக, தேடல் முடிவுகள் மற்றும் பிரத்தியேகப் பரிந்துரைகளை வழங்குதல் போன்ற தள அம்சங்களை ஆதரிப்பதற்காக, செயலி இயங்க உதவுவதற்காக தள வழங்குநருடன் Apple தகவல்களைப் பகிரக்கூடும். இதில் நீங்கள் Apple TV செயலியைத் திறந்தீர்களா என்ற தகவல், கிடைக்கும் பட்சத்தில் Apple TV மற்றும் Apple TV சேனல்களுக்குச் சந்தாச் செலுத்தியது குறித்த தகவல் போன்றவை அடங்கும். உங்கள் சந்தாத் தகவல்கள் பகிரப்படுவதை, Apple அல்லாத சாதனங்களில் உள்ள Apple TV செயலி அமைப்புகளில் நிறுத்தலாம். இருப்பினும் இதைச் செய்வதால் தளத்தில் Apple TV உள்ளடக்கம் காட்டப்படும் விதம் வரம்பிடப்படலாம்.

ஆதரிக்கப்படும் Apple அல்லாத சாதனங்களில் உள்ள Apple TV செயலியில் (Apple TV சந்தா, Apple TV சேனல்கள் உட்பட) நீங்கள் பார்ப்பவை, வாங்குபவை அல்லது வாடகைக்கு எடுப்பவை மற்றும் பிற உள்ளடக்கம் (பொருந்தும் இடங்களில்) பற்றிய தகவல்களை மூன்றாம் தரப்புத் தள வழங்குநருடன் பகிரலாமா வேண்டாமா என்பதை நீங்கள் தேர்வுசெய்யலாம். இதில் Apple அல்லாத சாதனத்தில் உங்கள் கணக்கு அல்லது சுயவிவரம் மூலம் உள்நுழைந்துள்ள Apple TV செயலியில் உள்ள உங்கள் தரவுடன் பொருந்தும் உங்கள் சுயவிவரப் பெயர் அல்லது பிற தகவல்கள் அடங்கும். நீங்கள் பார்த்துக் கொண்டிருக்கும் நிகழ்ச்சிகள், பிரத்தியேகப் பரிந்துரைகள் போன்ற தள அம்சங்களை வழங்குவதற்காக Apple TV செயலியில் உள்ள உங்கள் தகவல்களை தள வழங்குநர் பயன்படுத்தக்கூடும். உங்கள் Apple அல்லாத சாதனத்தில் உள்ள Apple TV செயலி அமைப்புகளுக்குச் சென்று இதை ஆஃப் செய்யலாம். சில சாதனங்களில், தளத்தின் அமைப்புகளுக்கு இது உங்களை அழைத்துச் செல்லலாம்.

நீங்கள் Apple அல்லாத சாதனத்தில் உள்ள Apple TV செயலியில் உள்நுழைந்தால், அந்தத் தளத்தின் வழங்குநர் என்னென்ன தரவுகளைச் சேகரிக்கிறார், பயன்படுத்துகிறார் மற்றும் பகிர்கிறார் என்பதைப் புரிந்துகொள்ள தளத்தின் விதிமுறைகள், தனியுரிமைக் கொள்கைகள், நடைமுறைகள் ஆகியவற்றை மதிப்பாய்வு செய்ய வேண்டும்.

தக்கவைத்தல்

Apple TV செயலியில் உங்கள் வாங்குதல்கள், பதிவிறக்கங்கள், பார்த்தல் செயல்பாடு ஆகியவை தொடர்பான தனிப்பட்ட தரவை வணிகத் தேவை, ஒப்பந்தக் கடமைகள், சட்டப்பூர்வத் தேவைகள் ஆகியவற்றைப் பொறுத்து வெவ்வேறு கால அளவிற்குத் தக்கவைக்கிறோம். வாங்குதல்கள் மற்றும் பதிவிறக்கங்களுக்குப் பெரும்பாலும் குறைந்தபட்சம் 10 வருடம் தக்கவைத்தல் காலம் தேவையாக இருக்கிறது, ஆனால் சீனா போன்ற சில வட்டாரங்களில் இந்தக் காலம் 30 வருடங்களாக இருக்கலாம். எங்கள் பொருந்தும் விதிமுறைகளுக்கு ஏற்ப நீங்கள் வாங்கும், பதிவிறக்கும் உள்ளடக்கத்தைப் பதிவிறக்க உங்களுக்கு உதவுவதற்காக உங்கள் கணக்கு இருக்கும் காலம் வரை அந்தப் பதிவை நாங்கள் தக்கவைக்கிறோம். உலாவல் செயல்பாடு, தேடல்கள் போன்ற பிற தகவல்களை இரண்டு ஆண்டுகள் வரை தக்கவைக்கிறோம். நீங்கள் உங்கள் கணக்கை மூடிய பின்னர் அல்லது Apple TV செயலியைப் பயன்படுத்துவதை நிறுத்திய பின்னரும் பரிவர்த்தனைகள் போன்ற சில தகவல்கள் (உங்கள் சேமிக்கப்பட்ட கார்டு விவரங்கள் இல்லை) வணிகப் பதிவுகளாகச் சேமிக்கப்பட்டிருக்கக்கூடும்.

நீங்கள் பேமெண்ட் கார்டைப் பயன்படுத்தும்போது எதிர்கால வாங்குதல்கள், தொடர் பரிவர்த்தனைகள் அல்லது நீங்கள் அங்கீகரிக்கும் பிற பயன்பாடுகளுக்காக Apple உங்கள் கார்டு எண்ணையும் பில்லிங் தகவல்களையும் தக்கவைத்து தானாகப் புதுப்பிக்கலாம். Apple இந்தத் தகவல்களை உங்கள் நிதி நிறுவனம் அல்லது பேமெண்ட் நெட்வொர்க்கிலிருந்து பெற்று மோசடித் தடுப்பு மற்றும் சரிபார்ப்புக்காகப் பயன்படுத்தலாம்.

இதுவரை பிளே செய்தவற்றை அழித்தல்

அமைப்புகளுக்குச் சென்று, Apple TV செயலியில் இதுவரை பிளே செய்தவற்றை அழிக்கலாம். உங்கள் iOS, iPadOS அல்லது visionOS சாதனங்களில் உள்ள Apple TV செயலியில், கணக்கு > தனியுரிமை & அணுகல் > “இதுவரை பிளே செய்தவற்றை அழி” என்பதற்குச் செல்லவும். Macஇல் உள்ள Apple TV செயலியில், TV > அமைப்புகள் > மேம்பட்டவை > “இதுவரை பிளே செய்தவற்றை அழி” என்பதற்குச் செல்லவும். tvOSஇல், அமைப்புகள் > செயலிகள் > டிவி > “இதுவரை பிளே செய்தவற்றை அழி” என்பதற்குச் செல்லுங்கள். இது உங்கள் விருப்பப் பட்டியலில் இருந்து அனைத்து டிவி நிகழ்ச்சிகளையும் திரைப்படங்களையும் அகற்றும், உங்கள் கணக்கிலிருந்து இதுவரை பிளே செய்தவற்றையும் தொடர்புநீக்கும். ஒரே Apple கணக்கைப் பயன்படுத்தும் சாதனங்களில் Apple சேமித்து வைத்துப் பயன்படுத்தும் உங்கள் பிளே தரவுகளுக்கும் இது பொருந்தும். நீங்கள் Apple அல்லாத சாதனத்தைப் பயன்படுத்தும்போது இதுவரை பார்த்தவற்றைத் தளத்தின் வழங்குநருடன் பகிர்வதைத் தேர்வுசெய்துள்ளீர்கள் எனில், நீங்கள் இதுவரை பிளே செய்தவற்றை அழிப்பதால் தளத்தின் வழங்குநர் சேமித்துள்ள உங்கள் பிளே தரவுகள் நீக்கப்படாது. அந்த வழங்குநர் சேமித்துள்ள தரவை நீக்க முடியுமா என்பதைப் புரிந்துகொள்ள அந்தத் தள வழங்குநரின் விதிமுறைகள், தனியுரிமைக் கொள்கைகள், நடைமுறைகள் ஆகியவற்றை நீங்கள் மதிப்பாய்வு செய்ய வேண்டும்.

விருப்பப் பட்டியலில் எபிசோடை நீண்ட நேரம் அழுத்தி “விருப்பப் பட்டியலில் இருந்து அகற்று” என்பதைத் தேர்ந்தெடுத்து ஒவ்வொரு எபிசோடாகவும் நீக்கலாம். அதே மெனுவில், “சமீபத்தில் பார்த்தவற்றில் இருந்து அகற்று” என்பதைத் தேர்ந்தெடுத்தால், பிரத்தியேகப் பரிந்துரைகளை உருவாக்கப் பயன்படுத்தப்பட்ட எபிசோடும் அகற்றப்படும். இருப்பினும், அறிக்கையளித்தல் மற்றும் ராயல்டி தேவைகளுக்காக Apple TV சேனல்கள் மற்றும் Apple TV சந்தாவில் இதுவரை பிளே செய்தவற்றின் பதிவுகளை Apple தக்கவைக்கலாம்.

மூன்றாம் தரப்பு இணைக்கப்பட்ட செயலிகள்

நீங்கள் மூன்றாம் தரப்புச் செயலிகளில் பார்ப்பவற்றை Apple உடன் பகிரத் தொடங்க அந்தச் செயலிகள் Apple TV செயலியுடன் இணைக்கப்படுவதற்கு நீங்கள் அனுமதி வழங்க வேண்டும். Apple TV செயலியை அமைக்கும்போது, ஒரே நேரத்தில் பல்வேறு செயலிகளுக்கு அனுமதி வழங்க உங்களிடம் கேட்கப்படலாம். சாதனத்தில் இதுவரை நீங்கள் நிறுவாத செயலிகளும் அதில் இருக்கலாம், பின்னர் அவை நிறுவப்பட்டால் உங்கள் முன்னுரிமைகள் பயன்படுத்தப்படும். நீங்கள் அனுமதி வழங்கினாலும் வழங்காவிட்டாலும், அமைப்புகளில் ஒவ்வொரு செயலிக்கான உங்களின் முன்னுரிமைகளையும் நீங்கள் மாற்ற முடியும்.

Apple TV செயலி மற்றும் உங்களின் ஏதேனும் ஒரு மூன்றாம் தரப்புச் செயலி இடையேயான இணைப்பை நீங்கள் நீக்க விரும்பினால், எப்போது வேண்டுமானாலும் அந்தச் செயலியை Apple TV செயலியில் இருந்து துண்டிக்கலாம், Apple அந்த மூன்றாம் தரப்புச் செயலியில் இருந்து உங்கள் பிளே தரவைச் சேகரிப்பதை நிறுத்தும். உங்கள் iOS, iPadOS அல்லது visionOS சாதனங்களில் உள்ள Apple TV செயலியில், கணக்கு > “இணைக்கப்பட்ட செயலிகள்” என்பதற்குச் சென்று மூன்றாம் தரப்புச் செயலியைத் தேர்ந்தெடுத்து அதை ஆஃப் செய்யுங்கள். tvOSஇல், அமைப்புகள் > செயலிகள் > டிவி > “டிவி உடன் இணை” என்பதற்குச் சென்று மூன்றாம் தரப்புச் செயலியைத் தேர்ந்தெடுத்து அதை ஆஃப் செய்யுங்கள். Apple TV செயலியில் இருந்து ஒரு மூன்றாம் தரப்புச் செயலியை அகற்றும்போது, அந்தச் செயலியில் நீங்கள் பார்த்த உள்ளடக்கம் பற்றி Apple சேகரித்துள்ள பிளே தரவுகள் அனைத்தையும் நீக்கலாம், இதற்கு “இதுவரை பிளே செய்தவற்றை அகற்றி அழி” விருப்பத்தை நீங்கள் தேர்வுசெய்ய வேண்டும். மேலே விவரிக்கப்பட்ட வழிமுறைப்படி இதுவரை பிளே செய்தவற்றை அழிப்பதன் மூலம் Apple TV செயலியில் நீங்கள் பார்த்த மூன்றாம் தரப்பு உள்ளடக்கம் அனைத்தையும் பற்றி Apple சேகரித்துள்ள உங்கள் பிளே தரவுகள் அனைத்தையும் எப்போது வேண்டுமானாலும் நீங்கள் நீக்கலாம். இங்கு விவரிக்கப்பட்ட நேர்வுகளில் நீங்கள் இதுவரை பிளே செய்தவற்றை அழிப்பது என்பது, Apple TV செயலிக்காக Apple சேமித்துப் பயன்படுத்தும் உங்கள் மூன்றாம் தரப்புச் செயலியின் பிளே தரவை மட்டுமே அழிக்கும். இது மூன்றாம் தரப்புச் செயலி வழங்குநர் தனியாகச் சேமித்துள்ள பிளே தரவு எதையும் பாதிக்காது (எடுத்துக்காட்டாக, அவர்களின் செயலிகளுக்குள் அல்லது அவர்களின் சர்வர்களில் சேமித்துள்ள தரவு).

இதில் பங்கேற்கும் மூன்றாம் தரப்புச் செயலிகள் உங்கள் பிளே தரவு மற்றும் தொடர்புடைய தகவல்களை எப்படிப் பயன்படுத்துகின்றன மற்றும் பகிர்கின்றன என்பதைப் புரிந்துகொள்ள அவற்றின் விதிமுறைகள், தனியுரிமைக் கொள்கைகள், நடைமுறைகள் ஆகியவற்றை நீங்கள் மதிப்பாய்வு செய்ய வேண்டும்.

குழுப் பரிந்துரைகள்

நீங்கள் Apple TV சாதனத்தில் குழுப் பரிந்துரைகளைச் செயல்படுத்தத் தேர்வுசெய்தால், அதே Apple TVஇல் இந்த விருப்பத்தைத் தேர்வுசெய்த பயனர்களின் எந்தவொரு தொகுப்பிற்கும் குழுப் பரிந்துரைகளை வழங்க நீங்கள் பார்த்தவை பற்றிய தகவல்கள் பயன்படுத்தப்படும். குழுவில் சிறார் கணக்கு இருந்தால் அதில் குழந்தைகளுக்கான பரிந்துரைகளும் சேர்க்கப்படும், ஆனால் அவர்கள் இதுவரை பார்த்த உள்ளடக்கங்கள் பயன்படுத்தப்படாது. நீங்கள் அமைப்புகள் > “பயனர்கள் மற்றும் கணக்குகள்” என்பதற்குச் சென்று உங்கள் சுயவிவரத்தைத் தேர்ந்தெடுத்து “உங்கள் அனைவருக்கும்” என்பதைத் தேர்ந்தெடுப்பதன் மூலம் உங்கள் கணக்கிற்கான குழுப் பரிந்துரைகளை எப்போது வேண்டுமானாலும் ஆஃப் செய்யலாம்.

tvOS மற்றும் மூன்றாம் தரப்பு டிவிகளில் உள்ள Apple TV செயலிச் சுயவிவரங்கள்

tvOS மற்றும் சில மூன்றாம் தரப்பு டிவிகளில் உள்ள Apple TV செயலியில் சிறார் சுயவிவரங்கள் உட்பட உங்கள் Apple கணக்குடன் தொடர்புபடுத்தப்பட்ட சுயவிவரங்களையும் நீங்கள் உருவாக்கலாம். அந்த பிளாட்ஃபார்ம்களில் உள்ள Apple TV செயலியில் இந்தச் சுயவிவரங்களைப் பயன்படுத்தலாம். இதன் மூலம் Apple TV செயலியில் தனிப்பயனாக்கப்பட்ட அனுபவங்களைப் பெறமுடியும். சுயவிவரங்கள் இணைக்கப்பட்டுள்ள Apple கணக்கே நிர்வகிக்கும் சுயவிவரம் ஆகும். உங்கள் Apple கணக்குடன் தொடர்புடைய சுயவிவரத்தை உருவாக்க, நீங்கள் குறைந்தபட்சம் 18 வயது பூர்த்தியடைந்தவராக இருக்க வேண்டும். நீங்கள் சுயவிவரத்திற்கான பெயர் மற்றும் படத்தைத் தேர்ந்தெடுத்து, இந்தச் சுயவிவரம் குழந்தைக்கானதா என்பதையும் தீர்மானிப்பீர்கள். சுயவிவரத்தை அமைக்கும்போதும், அமைப்புகளில் எப்போது வேண்டுமானாலும் உங்கள் Apple கணக்கைப் பயன்படுத்தி வாங்குதல், வாடகைக்கு எடுத்தல் ஆகியவற்றைச் செய்வதற்கான சுயவிவரத்தின் திறனை நீங்கள் கட்டுப்படுத்தலாம். Apple TV செயலிக்கான உள்ளடக்கக் கட்டுப்பாடுகளையும் நீங்கள் அமைக்கலாம். tvOSஇல், அமைப்புகள் > செயலிகள் > டிவி > உள்ளடக்கக் கட்டுப்பாடுகள் என்பதற்குச் சென்று, சுயவிவரத்தைத் தேர்ந்தெடுத்து, அதிலுள்ள வழிமுறைகளைப் பின்பற்றவும்.

நீங்கள் தேர்ந்தெடுக்கும் உள்ளடக்க மதிப்பீடுகளுக்கு ஏற்ப, Appleஇல் இருந்து நீங்கள் வாங்கிய அல்லது வாடகைக்கு எடுத்த உள்ளடக்கத்தையும் Apple TV சந்தா, Apple TV சேனல்கள் ஆகியவற்றையும் சுயவிவரத்தால் அணுகவும் பார்க்கவும் முடியும். நீங்கள் இணைத்த மூன்றாம் தரப்பு வீடியோ செயலிகளையும் சுயவிவரம் அணுக முடியும், ஆனால் உள்ளடக்கக் கட்டுப்பாடுகள் Apple TV செயலிக்கு மட்டுமே பொருந்தும்.

சுயவிவரங்கள் பற்றி Apple சேகரித்துச் சேமிக்கும் தகவல்கள், நிர்வகிக்கும் சுயவிவரத்தின் Apple கணக்குடன் இணைக்கப்பட்டிருக்கும். உதாரணமாக ஒரு சுயவிவரம் எதைப் பார்க்கிறது, எப்போது பார்க்கப்பட்டது, எந்தச் சாதனத்தில் பார்க்கப்பட்டது, உள்ளடக்கத்தில் சுயவிவரத்தின் முன்னேற்றம் என்ன போன்ற விரிவான பிளேபேக் செயல்பாடுத் தகவல்கள் இதில் அடங்கும்.

சிறார் சுயவிவரங்களுக்கு Apple TV செயலியில் அந்தச் சுயவிவரத்தின் பயனருக்கு அவரது வயதுக்கு ஏற்ற அனுபவத்தை வழங்க, சிறார் சுயவிவரத்துடன் தொடர்புடைய நிரந்தரமான அடையாளத் தகவலைச் சேகரிப்போம். அடையாளத் தகவல் மற்றும் சிறார் சுயவிவரத்தின் செயல்பாட்டுத் தரவை (எடுத்துக்காட்டாக இதுவரை தேடியவை மற்றும் பார்த்தவை) அந்தச் சுயவிவரத்தின் பயனருக்கு Apple TV செயலியை வழங்குதல், சுயவிவரங்கள் அம்சம் மற்றும் Apple TV செயலியை மேம்படுத்துதல், மோசடி மற்றும் பாதுகாப்பு நோக்கங்களுக்காகப் பயன்படுத்துவோம். அடையாளத் தகவலும் அதனுடன் தொடர்புடைய தகவல்களும் சம்பந்தமில்லாத நோக்கங்களுக்காகப் பயன்படுத்தப்படவோ வெளியிடப்படவோ இல்லை என்பதை உறுதிசெய்ய Apple தகுந்த நடவடிக்கைகளை எடுக்கும்.

நிர்வகிக்கும் சுயவிவரத்தின் ஒப்புதலுடன், அமைப்புகளில் ஒரு சுயவிவரத்தை Apple கணக்கிற்கு மேம்படுத்த முடியும். tvOSஇல், அமைப்புகள் > சுயவிவரங்கள் மற்றும் கணக்குகள் என்பதற்குச் சென்று, சுயவிவரத்தைத் தேர்ந்தெடுத்து, “Apple கணக்கிற்கு மேம்படுத்து” என்பதைத் தேர்ந்தெடுத்து, அதிலுள்ள வழிமுறைகளைப் பின்பற்றவும். ஒரு சுயவிவரம் மேம்படுத்தப்படும்போது, அந்தச் சுயவிவரம் பார்த்தவை பற்றிய தகவல்களும், இதுவரை பார்த்தவையுடன் தொடர்புடைய விவரங்களும் புதிய Apple கணக்கிற்கு மாற்றப்படும், மேலும் நிர்வகிக்கும் சுயவிவரத்துடன் இனி தொடர்புபடுத்தப்படாது. இருப்பினும், ஒரு சுயவிவரம் மேம்படுத்தப்படும்போது, வாங்கியவை, சந்தாக்கள், வாடகைக்கு எடுத்தவை ஆகிய அனைத்தும் நிர்வகிக்கும் சுயவிவரத்துடனே இணைந்திருக்கும், அவை சுயவிவரத்தின் புதிய Apple கணக்கிற்கு மாற்றப்படாது அல்லது அதனுடன் இணைக்கப்படாது. அமைப்புகளில் எப்போது வேண்டுமானாலும், நிர்வகிக்கும் சுயவிவரம் மூலமும் ஒரு சுயவிவரத்தை நீக்கலாம். tvOSஇல், அமைப்புகள் > சுயவிவரங்கள் மற்றும் கணக்குகள் என்பதற்குச் சென்று, சுயவிவரத்தைத் தேர்ந்தெடுத்து, “சுயவிவரத்தை நீக்கு” என்பதைத் தேர்ந்தெடுக்கவும். நீக்கப்பட்ட பிறகு, நிர்வகிக்கும் சுயவிவரத்தின் Apple கணக்கில் சுயவிவரமும் இதுவரை பார்த்தவையும் கிடைக்காது.

மோசடி மற்றும் பிற தீங்கிழைக்கும் செயல்பாட்டைத் தடுத்தல்

Apple TV செயலியில் மோசடி மற்றும் பிற தீங்கிழைக்கும் செயல்பாட்டைத் தடுப்பதற்காக தனிப்பட்ட தரவையும் சேகரிக்கிறோம். இந்தத் தகவல்களில் சாதன வகை, மென்பொருள் பதிப்பு போன்ற சாதனத் தகவல்கள், இருப்பிடத் தகவல்கள் (உங்கள் இணைய இணைப்பின் IP முகவரியை உங்கள் புவியியல் வட்டாரத்துடன் பொருத்துவதன் மூலம் கிடைக்கும் தோராயமான இருப்பிடம்), இதுவரையான பதிவிறக்கங்களும் வாங்குதல்களும், Apple TV செயலியுடனான உங்களின் பிற செயல்பாடுகள் ஆகியவை அடங்கும். உங்கள் சந்தாத் திட்டம் தானாகப் புதுப்பிக்கப்படும்படி அமைக்கப்பட்டிருந்தால், அந்தக் கோரிக்கையைச் செயலாக்கி, பேமெண்ட் கூட்டாளரிடமிருந்து அங்கீகாரத்தைப் பெறுவதற்கு முன்பாக உங்கள் சந்தாவிற்குத் தொடர்ந்து அணுகல் வழங்குவதா வேண்டாமா என்பதைத் தீர்மானிக்க Apple உடனான உங்கள் வணிகத் தொடர்புகள் பற்றிய இதுவரையான தகவல்களை Apple பயன்படுத்தக்கூடும்.

நீங்கள் வாங்க முயலும்போது உங்கள் சாதனத்தை நீங்கள் பயன்படுத்தும் விதத்தின் அடிப்படையில் சாதனத்தின் நம்பகத்தன்மை மதிப்பெண்ணையும் நாங்கள் கணக்கிடக்கூடும், பயன்படுத்தும் விதம் என்பதில் ஃபோன் அழைப்புகளின் தோராயமான எண்ணிக்கை, நீங்கள் அனுப்பும் அல்லது பெறும் மின்னஞ்சல்களின் தோராயமான எண்ணிக்கை அடங்கும். உங்கள் சாதனத்தில் உள்ள பின்னணி மதிப்புகளை Apple அறிந்துகொள்ளாத வகையில் இந்தக் கணக்கீடு வடிவமைக்கப்பட்டுள்ளது. இந்த மதிப்பெண் குறிப்பிட்ட காலத்திற்கு எங்கள் சர்வரில் சேமிக்கப்பட்டிருக்கும்.

தனிப்பட்ட தரவைச் செயலாக்குவதற்குப் பொருந்தக்கூடிய அடிப்படைச் சட்டங்கள்

பொதுவாக Apple உடனான உங்கள் ஒப்பந்தத்தைச் செயல்படுத்துவதற்காகவும், சேவைகளை வழங்கத் தேவைப்படும் அளவிற்கும், எங்கள் சட்டரீதியான கடமைகளுக்கு இணங்குவதற்காகவும் Apple TV செயலியில் உங்கள் தனிப்பட்ட தரவை நாங்கள் செயலாக்குகிறோம். ஒப்புதல் என்பது சட்டரீதியான அடிப்படையாக அமையும் இடங்களில், பொருந்தும் உள்ளூர் சட்டங்களின் அடிப்படையில் அதைப் பெற முயல்கிறோம்.

பொருந்தும் உள்ளூர் சட்டங்கள் குறிப்பிடும் இடங்களில், பின்வரும் காரணங்களுக்காக எங்களின் அல்லது மூன்றாம் தரப்புகளின் நியாயமான நலன்களின் நோக்கத்திற்காகத் தேவைப்படும் அளவிற்குத் தனிப்பட்ட தரவைச் செயலாக்குகிறோம்:

• மூன்றாம் தரப்புச் சேவைகளின் உள்ளடக்கம் உட்பட உங்களுக்குக் கிடைக்கும் மற்றும் பொருத்தமான உள்ளடக்கத்தைக் காட்டுதல் மற்றும் பிளேபேக் செய்ய அனுமதித்தல்
• சலுகைகளுக்கான தகுதிநிலையைச் சரிபார்த்தல், உங்களுக்கும் பிறருக்கும் சேவையை மேம்படுத்தி உகந்ததாக்க உதவுதல், Apple TV செயலி மற்றும் நீங்கள் விரும்பக்கூடிய பிற Apple தயாரிப்புகள், சேவைகள் மற்றும் சலுகைகள் பற்றிய தகவல்களை உங்களுக்கு அனுப்புதல்
• மோசடி மற்றும் பிற தீங்கிழைக்கும் செயல்பாட்டைத் தடுத்தல்

பயன்படுத்தப்படும் தரவில் இவையும் அடங்கும்:

• Apple TV செயலியை நீங்கள் பயன்படுத்தும் விதம், இதில் நீங்கள் பயன்படுத்தும் அம்சங்கள் (எடுத்துக்காட்டாக, பார்ப்பதைத் தொடர்க அல்லது லைப்ரரி), நீங்கள் தேடுபவை, அறிவிப்புகளை நீங்கள் கையாளும் விதம், நீங்கள் உலாவும் அல்லது பார்வையிடும் உள்ளடக்கப் பக்கங்கள், நீங்கள் பார்ப்பவை, வாங்கியவை, சந்தாச் சேர்ந்தவை, பதிவிறக்கியவை, செயலியினுள் ஏற்படும் பிழைகள் அல்லது சிதைவுகள் பற்றிய தகவல் ஆகியவை அடங்கும்
• உங்கள் சாதனம் மற்றும் கணக்கு பற்றிய விவரங்கள்
• சாதனத்தின் நம்பகத்தன்மை மதிப்பெண்
• உங்கள் இருப்பிடம்

Apple சேகரிக்கும் தகவல்கள் எல்லா நேரங்களிலும் Appleஇன் தனியுரிமைக் கொள்கையின்படி கையாளப்படும். இதை www.apple.com/in/privacy தளத்தில் பார்வையிடலாம்.

2026-05-11