• உங்கள் அடையாள அட்டையை எப்போது அல்லது யாரிடம் காட்டுகிறீர்கள் என்பது உங்கள் டிஜிட்டல் அடையாள அட்டை வழங்கும் ஆணையத்திற்கு (Apple, உங்கள் அரசாங்கம் ஆகிய இரண்டுக்குமே) தெரியாது.
• Apple உங்கள் அடையாள அட்டையின் படங்களைச் சேமிக்காது. மோசடியைத் தடுக்கவும் வாலெட்டில் உங்கள் ஐடியைக் காட்டவும் உங்கள் அடையாள அட்டையில் உள்ள குறிப்பிட்ட தகவல்களை மட்டுமே Apple பயன்படுத்துகிறது.
• வாலெட்டில் உள்ள உங்கள் ஐடியைக் காட்டும்போது, கோரப்பட்ட குறிப்பிட்ட தகவல்களை உங்கள் சாதனம் காட்டும். மேலும் உங்கள் உறுதிப்படுத்துதல் இல்லாமல் அந்தத் தகவல்கள் காட்டப்படாது.
• உங்கள் அடையாளத்தைச் சரிபார்க்கவும் மோசடியில் இருந்து பாதுகாக்கவும், வாலெட் மூலம் உங்கள் அடையாள அட்டையைச் சேர்க்கும்போது உங்கள் அடையாளத் தகவல்களையும், Apple கணக்கு, சாதனப் பயன்பாட்டு முறைகள், அமைப்புகள் ஆகியவை குறித்த தகவல்களையும் உங்கள் டிஜிட்டல் அடையாள அட்டையை வழங்கும் ஆணையம் பயன்படுத்தும்.
• ஐடியைச் சேர்க்கும்போது நீங்கள் சமர்ப்பிக்கும் Live Photo, பதிவுசெய்யப்பட்ட முகம் மற்றும் தலை அசைவுகள் போன்ற கூடுதல் சரிபார்ப்புத் தகவல்களை மோசடியைத் தடுப்பதற்காக இந்த அம்சத்திற்கு Apple பயன்படுத்தும். மேலும் வாலெட்டில் அடையாள அட்டையைச் சேர்ப்பதை டிஜிட்டல் அடையாள அட்டை வழங்கும் ஆணையம் அங்கீகரிக்கும் அல்லது நிராகரிக்கும் வரை மட்டுமே இந்தத் தகவல்கள் சேமித்து வைக்கப்பட்டிருக்கும்.

பயனர்கள் தங்கள் அடையாள அட்டையைக் காட்டுவதற்கு எளிதான, விரைவான மற்றும் கூடுதல் பாதுகாப்பான வழியை வாலெட்டில் உள்ள ஐடிகள் வழங்குகின்றன.

உங்கள் அடையாள அட்டையைச் சேர்க்கிறது

வாலெட் மூலமாக உங்கள் மாநில அடையாள அட்டையைச் சேர்த்தல்
அடையாள அட்டையைச் சேர்க்க உங்கள் ஓட்டுநர் உரிமம், மாநில ஐடி போன்ற உங்கள் அரசாங்க அடையாள அட்டையின் முன்பக்கம் மற்றும் பின்பக்கத்தைப் படமெடுக்கும்படி உங்களிடம் கேட்கப்படும். நீங்கள் வழங்கும் படங்கள் உங்கள் அரசாங்க அடையாள அட்டை வழங்கல் ஆணையத்தால் ஏற்றுக்கொள்ளப்படும் என்பதை உறுதிப்படுத்த, உங்கள் சாதனம் அந்தப் படங்களின் தரத்தையும் வகையையும் மதிப்பிடும். உங்கள் அடையாள அட்டையின் படங்களை Apple பார்க்கவோ சேமிக்கவோ செய்யாது. அதற்குப் பதிலாக அவை உங்கள் சாதனத்திலேயே என்கிரிப்ட் செய்யப்பட்டு உங்கள் அரசாங்க அடையாள அட்டை வழங்கல் ஆணையத்திற்கு அனுப்பப்படும். பிறகு அவற்றை அவர்கள் மூன்றாம் தரப்பு அடையாளச் சரிபார்ப்புச் சேவை வழங்குநருடன் பகிரலாம். அடையாளச் சரிபார்ப்புக்காகவும் மோசடியில் இருந்து பாதுகாக்கவும் உங்கள் சாதனம் அடையாள அட்டையில் உள்ள பார்கோடைப் படித்து பெயர், முகவரி, பிறந்த தேதி ஆகியவற்றை Apple உடன் பகிரும். அம்சத்தை ஆதரிக்கவும் அடிப்படையான Apple இயங்குதளங்களில் மோசடியைத் தடுக்கவும் அடையாளத் தகவல்கள் சரிபார்க்கப்பட்டதா என்பது போன்ற சரிபார்ப்பு முடிவுகள் குறித்த தகவல்களை Apple தொடர்ந்து சேமிக்கக்கூடும். இருப்பினும் உங்கள் பார்கோடில் இருந்து பெற்ற பிறந்த தேதி போன்ற அடிப்படையான அடையாளத் தகவல்களைச் சேமிக்காது.

வாலெட்டில் அடையாள அட்டையைச் சேர்ப்பவர், அந்த அடையாள அட்டையை வைத்திருக்கும் அதே நபர்தானா என்பதை உறுதிப்படுத்த, Live Photo எடுக்கும்படி கேட்கப்படும். நீங்கள் வழங்கும் ஸ்டில் ஃபிரேம் புகைப்படம் உங்கள் அரசாங்க அடையாள அட்டை வழங்கல் ஆணையத்தால் ஏற்றுக்கொள்ளபடும் என்பதை உறுதிப்படுத்த உங்கள் சாதனம் Live Photoஇல் இருந்து ஸ்டில் ஃபிரேமின் தரத்தை மதிப்பிடும். உங்கள் Live Photoஇல் இருந்து உருவாக்கப்பட்ட இந்த ஸ்டில் ஃபிரேம் சாதனத்திலேயே என்கிரிப்ட் செய்யப்பட்டு ஐடிக்கான கோப்பில் உள்ள அவர்களின் படத்துடன் ஒப்பிட்டுப் பார்க்க, அரசாங்க அடையாள அட்டை வழங்கல் ஆணையத்திற்கு அனுப்பப்படும். உங்கள் அரசாங்க அடையாள அட்டை வழங்கல் ஆணையம் அதன் தனியுரிமைக் கொள்கைக்கு இணங்க ஸ்டில் ஃபிரேம் புகைப்படத்தைச் செயலாக்கும். இது “முகமறிதல்” தொழில்நுட்பத்தைப் பயன்படுத்த ஆணையத்தை அனுமதிக்கும். மோசடியைத் தடுக்க, Live Photo ஒரு நபருடையதுதான் என்பதையும் அதே நபர்தான் தனது அடையாள அட்டையை வாலெட்டில் சேர்ப்பதன் ஒரு பகுதியாகத் தனது ஸ்டில் ஃபிரேம் புகைப்படத்தைச் சமர்ப்பிக்கிறார் என்பதையும் உறுதிசெய்ய, அரசாங்க அடையாள அட்டை வழங்கல் ஆணையத்திடம் உங்கள் ஸ்டில் ஃபிரேம் புகைப்படத்தைச் சமர்ப்பிப்பதற்கு முன், சாதனம் மற்றும் Apple மூலம் உங்கள் Live Photo மதிப்பிடப்படும். முகம் மற்றும் தலையை அசைக்குமாறும் உங்களிடம் கேட்கப்படலாம். அவை உங்கள் Live Photoஐப் போலவே உங்கள் சாதனம் மற்றும் Appleஆல் மதிப்பிடப்படும். உங்கள் IDஐச் சேர்க்கும் செயல்முறையில் நீங்கள் இருக்கும்போது, உங்கள் Live Photo குறித்த தகவல்கள் அல்லது பொருந்தும்பட்சத்தில் உங்கள் அசைவுகள், Live Photo அல்லது அசைவுகளின் பதிவுகள் இல்லாமல் உங்களுடன் தொடர்புடைய வகையில் சேமிக்கப்படும்.

மோசடியைத் தடுப்பதற்காக, உங்கள் Apple கணக்கு, சாதனப் பயன்பாட்டு முறைகள், அமைப்புகள் போன்றவை பற்றிய தகவல்களும், உங்கள் அரசாங்க அடையாள அட்டையைச் சேர்க்க முயலும்போது உங்கள் சாதனம் இருக்கக்கூடிய இடம் (“இருப்பிடச் சேவைகள்” அம்சம் செயல்படுத்தப்பட்டிருந்தால்), உங்கள் Live Photo, முகம் மற்றும் தலை அசைவுகள் போன்றவை பற்றிய தகவல்களும் Apple உடன் பகிரப்படும். மோசடியைத் தடுப்பதற்காக, இந்தத் தகவல்களின் அடிப்படையில் அரசாங்க அடையாள அட்டை வழங்கல் அதிகாரியுடன் மோசடி இண்டிகேட்டர்களை Apple பகிரும். வாலெட்டில் உங்கள் அடையாள அட்டையைச் சேர்ப்பதை அங்கீகரிக்கும் முடிவு அரசாங்க அடையாள அட்டை வழங்கல் ஆணையத்தால் எடுக்கப்படும், Appleஆல் அல்ல. சில சூழல்களில், கூடுதல் தகவல்களை வழங்கும்படியோ நபர் நேரில் வருமாறோ அரசாங்க அடையாள அட்டை வழங்கல் ஆணையம் கேட்கக்கூடும். அரசாங்க அடையாள அட்டை வழங்கல் ஆணையம் கூடுதல் சரிபார்ப்பு தேவை எனக் கூறினால் அது குறித்த தகவலும், அந்தச் சரிப்பார்ப்பின் வகை (நபர் நேரில் வருவது போன்றவை) குறித்த தகவல்களும் Appleக்குத் தெரிவிக்கப்படலாம்; அம்சத்தை நிர்வகிப்பதற்கும் மேம்படுத்துவதற்கும் வாலெட்டில் உங்கள் ஐடியைச் சேர்ப்பதற்கு அங்கீகரிக்கலாமா என அரசாங்க அடையாள அட்டை வழங்கல் ஆணையம் முடிவெடுக்கும்போது மட்டுமே உங்களுடன் தொடர்புடைய வகையில் Apple இந்தத் தகவல்களை வைத்திருக்கும். சில சமயங்களில், கூடுதல் தகவல்களை மதிப்பாய்வு செய்ததைத் தொடர்ந்து அரசாங்க அடையாள அட்டை வழங்கல் ஆணையம் உங்களுக்குச் சரிபார்ப்புக் குறியீட்டை வழங்கக்கூடும். இந்தச் சரிபார்ப்புக் குறியீடு சாதனத்தில் என்கிரிப்ட் செய்யப்பட்டு அரசாங்க அடையாள அட்டை வழங்கல் ஆணையத்திற்கு அனுப்பப்படும்; சரிபார்ப்புக் குறியீட்டை Apple பார்க்கவோ சேமிக்கவோ முடியாது. உங்கள் அரசாங்க அடையாள அட்டை வழங்கல் ஆணையம் அதன் அங்கீகாரத்தின் நிலை குறித்த தகவல்களை Appleக்கு வழங்கக்கூடும் (உதாரணமாக, மதிப்பாய்வில் இருப்பவை, ஏற்றுக்கொள்ளப்பட்டவை). இதன்மூலம் Apple உங்கள் சாதனத்திற்கு அறிவிப்புகளை அனுப்பவும், உங்கள் வாலெட்டில் உள்ள அடையாள அட்டையை நிர்வகிக்கவும் உதவக்கூடும்.

வாலெட் செயலி மூலம் உங்கள் டிஜிட்டல் அடையாள அட்டையைச் சேர்த்தல்
இந்த அம்சம் அமெரிக்காவில் மட்டுமே கிடைக்கிறது.

உங்கள் டிஜிட்டல் அடையாள அட்டையைச் சேர்ப்பதற்கு உங்கள் பாஸ்போர்ட்டில் உள்ள இ-பாஸ்போர்ட் சிப்பை உங்கள் சாதனம் பயன்படுத்துவதற்காக, உங்கள் பாஸ்போர்ட்டின் புகைப்படப் பக்கத்தில் இயந்திரம் படிக்கக்கூடிய பகுதியில் (MRZ) உள்ள உரையை iPhone கொண்டு ஸ்கேன் செய்யும்படி உங்களிடம் கேட்கப்படும். பிறகு இ-பாஸ்போர்ட்டைப் படிக்க, சாதனத்தின் அறிவுறுத்தலின்படி iPhoneஐ பாஸ்போர்ட்டின் மீது வைக்கவும். இ-பாஸ்போர்ட்டில் உள்ள தகவல்களைச் சரிபார்க்கும் வகையில், MRZ மற்றும் இ-பாஸ்போர்ட் தரவை உங்கள் சாதனம் Appleக்கு அனுப்பும். டிஜிட்டல் அடையாள அட்டையின் தகவல்களை உங்கள் சாதனத்தில் வழங்கவும் அவற்றை நிர்வகிக்கவும், மோசடியைத் தவிர்க்கவும் உங்கள் பாஸ்போர்ட் தகவல்களில் ஒரு பகுதியை Apple என்கோடு செய்து சேமிக்கும். வாலெட்டில் டிஜிட்டல் அடையாள அட்டையைச் சேர்ப்பவர், பாஸ்போர்ட்டை வைத்திருக்கும் அதே நபர்தானா என்பதை உறுதிப்படுத்த, Live Photo எடுக்குமாறு, மேலே அரசாங்க அடையாள அட்டைக்கான செயல்முறையில் விவரிக்கப்பட்டபடி இங்கேயும் கேட்கப்படும். டிஜிட்டல் அடையாள அட்டைக்கு: டிஜிட்டல் அடையாள அட்டையின் வழங்கும் ஆணையம் Apple நிறுவனம் என்பதால் இந்தத் தகவல் இந்த நிறுவனத்திற்கு மட்டுமே அனுப்பப்படும். உங்கள் மாகாண அரசிற்கோ மத்திய அரசிற்கோ அனுப்பப்படாது. உங்கள் டிஜிட்டல் அடையாள அட்டையை வழங்குவதா இல்லையா என்பதைத் தீர்மானிப்பதற்கும் மோசடியைத் தடுப்பதற்கும், உங்கள் Live Photo, Apple கணக்கு, சாதனப் பயன்பாட்டு முறை மற்றும் அமைப்புகள், உங்கள் டிஜிட்டல் அடையாள அட்டையைச் சேர்க்க முயலும்போது உங்கள் சாதனம் இருக்கக்கூடிய இடம் (“இருப்பிடச் சேவைகள்” அம்சம் செயல்படுத்தப்பட்டிருந்தால்) ஆகியவை குறித்த தகவல்களை Apple சேகரித்துப் பயன்படுத்தும். உங்கள் ஐடியைச் சேர்க்க முயலும்போது, உங்களுடன் தொடர்புபடுத்தும் வகையில் உங்கள் Live Photo குறித்த தகவல் (Live Photo இல்லை) சேமிக்கப்படுகிறது. உங்கள் Live Photoஐ Apple நேரடியாக மதிப்பாய்வு செய்வதற்கு நீங்கள் அனுமதி வழங்கத் தேர்வுசெய்திருந்தால், “அடையாள அட்டைகளை மேம்படுத்துதல்” பிரிவில் விவரிக்கப்பட்டுள்ளபடி Live Photoஐ Apple சிறிது காலத்திற்குச் சேமித்து வைத்திருக்கக்கூடும்.

வழங்கல் ஆணையத்தின் செயலி மூலமாக உங்கள் அடையாள அட்டையைச் சேர்த்தல்
இந்த அம்சம் ஜப்பானில் மட்டுமே கிடைக்கிறது.

அரசாங்க வழங்கல் ஆணையத்தின் செயலி மூலம் வாலெட்டில் அடையாள அட்டையைச் சேர்க்க, வழங்கல் ஆணையத்தின் விதிமுறைகளையும் நிபந்தனைகளையும் நீங்கள் ஏற்றுக்கொள்ள வேண்டும். மேலும் அரசாங்க வழங்கல் ஆணையத்திடம் உங்களின் அடையாளத்தை நிரூபிப்பதற்கான செயல்முறைகளை நீங்கள் நிறைவுசெய்வதுடன், உங்கள் அடையாள அட்டைக்கான PIN அல்லது பாஸ்வேர்டையும் அமைக்க வேண்டும். அரசாங்க வழங்கல் ஆணையத்தின் செயலி மூலமாக மட்டுமே உங்கள் PIN அல்லது பாஸ்வேர்டை மாற்ற முடியும். அரசாங்க வழங்கல் ஆணையத்தின் செயலியில் நீங்கள் செய்யும் செயல்பாடுகள் குறித்த எந்தத் தகவலையும் Apple பெறாது. வாலெட்டில் உங்கள் அடையாள அட்டையைச் சேர்ப்பதை அங்கீகரிக்கும் முடிவு அரசாங்க அடையாள அட்டை வழங்கல் ஆணையத்தால் எடுக்கப்படும், Appleஆல் அல்ல.

உங்கள் சாதனத்தில் உங்கள் அடையாள அட்டையைச் சேர்த்தல்

வாலெட்டில் உங்கள் அடையாள அட்டையைச் சேர்ப்பதற்கு டிஜிட்டல் அடையாள அட்டையை வழங்கும் ஆணையம் அங்கீகரித்ததும், அடையாள அட்டையில் உள்ள தகவல்கள் என்கிரிப்ட் செய்யப்பட்ட வடிவத்தில் சேமிக்கப்படும். மேலும் அவற்றை உங்கள் சாதனத்தில் உள்ள Secure Enclaveஐப் பயன்படுத்தி மட்டுமே டீகிரிப்ட் செய்ய முடியும். வாலெட்டிற்குச் சென்று உங்கள் அடையாள அட்டையின் பின்புறத்தைப் பார்த்து, “ஓட்டுநர் உரிமத் தகவல்கள்”, “மாநில ஐடி தகவல்கள்”, “டிஜிட்டல் அடையாளத் தகவல்கள்” அல்லது “கார்டு தகவல்கள்” என்பதைத் தட்டி, விவரங்களைப் பார்க்க அங்கீகரிப்பதன் மூலம் இந்தத் தகவல்களை எப்போது வேண்டுமானாலும் நீங்கள் பார்க்கலாம். Appleஆல் இந்தத் தகவல்களைப் பார்க்க முடியாது. Secure Enclave குறித்து மேலும் தெரிந்துகொள்ள, support.apple.com/guide/security/secure-enclave-sec59b0b31ff/web இணையதளத்தைப் பார்வையிடுங்கள்.

வாலெட்டில் உள்ள உங்கள் ஐடியைப் பாதுகாத்தல்

அங்கீகரிக்கப்படாத அணுகல் அல்லது முன்மொழிவில் இருந்து உங்கள் அடையாள அட்டையைப் பாதுகாக்க, அதை Face ID தோற்றம் அல்லது Touch IDக்குப் பயன்படுத்தப்படும் பயோமெட்ரிக் அடையாளத் தகவலுடன் இணைக்கும்படி கேட்கப்படுவீர்கள். உங்கள் ID அல்லது அதிலுள்ள தகவல்களை வழங்குவதற்கு, அமைவின்போது உங்கள் ID உடன் இணைத்துள்ள குறிப்பிட்ட முறை மற்றும் பயோமெட்ரிக் அடையாளத் தகவலைப் பயன்படுத்தி அங்கீகரிக்க வேண்டியது அவசியம். உங்கள் சாதன அமைப்புகளைப் பொறுத்து, நீங்கள் மாற்று அங்கீகார விருப்பங்களுக்கான அணுகலைப் பெறலாம். உங்கள் அங்கீகரிப்பு முறையை உங்கள் சாதனம் சேமிக்கிறது, Apple அல்ல. அங்கீகரிப்பு முறையை மாற்ற விரும்பினால், உங்கள் அடையாள அட்டையை நீக்கிவிட்டு புதிய அங்கீகரிப்பு முறை மூலம் மீண்டும் அதை வாலெட்டில் சேர்க்க வேண்டும்.

உங்கள் அடையாள அட்டையைக் காட்டுதல்

உங்கள் அடையாள அட்டையை நேரில் காட்ட வேண்டுமெனில், உங்கள் அடையாளத்தை யார் கேட்கிறார்கள் என்ற விவரத்தையும் உங்கள் அடையாள அட்டையில் இருந்து கேட்கப்படும் குறிப்பிட்ட தகவல்களையும் கொண்ட ஒப்புதல் தாளைப் பெற, அடையாள ரீடருக்கு அருகில் iPhone அல்லது Apple Watchஐ வைக்கவும். அங்கீகாரம் பெற்றதும், உங்கள் சாதனம் அடையாள ரீடருடன் நேரடியான, முழுமையாக என்கிரிப்ட் செய்யப்பட்ட சேனலை உருவாக்கி அங்கீகரிக்கப்பட்ட தகவல்களைப் பரிமாற்றும்.

போக்குவரத்துப் பாதுகாப்பு நிர்வாகத்தின் (TSA) சோதனைச் சாவடிகளில் நீங்கள் டிஜிட்டல் ஐடியைச் சமர்ப்பிக்கும்போது, REAL IDக்குப் பதிலாக உங்கள் டிஜிட்டல் ஐடி ஏற்கப்படலாம் என்ற குறிப்பை உங்கள் டிஜிட்டல் ஐடி காட்டும். உங்கள் டிஜிட்டல் ஐடி REAL ID ஆவணம் இல்லை. பிற மூன்றாம் தரப்பு அடையாள அட்டை ரீடர்களும் இந்தக் குறிப்பைக் கோரிப் பெற்றுக்கொள்ளலாம். டிஜிட்டல் ஐடியைக் காட்டும்போது இந்தக் குறிப்பை மூன்றாம் தரப்பு அடையாள அட்டை ரீடர் சேகரித்தால், உங்கள் ஒப்புதல் தாளிலும் இதுவரை காட்டப்பட்ட அனைத்துத் தகவல்களிலும் அது காட்டப்படும். உங்கள் டிஜிட்டல் ஐடி உங்கள் பாஸ்போர்ட்டைக் கொண்டு உருவாக்கப்படுவதால், அதை நீங்கள் சமர்ப்பிக்கும்போது, நீங்கள் அமெரிக்கக் குடியுரிமை பெற்றவர் என்பதை டிஜிட்டல் ஐடியைக் கோரும் தரப்பினரால் தெரிந்துகொள்ள முடியும்.

ஜப்பான் நாட்டின் அடையாள அட்டைகளுக்கு மட்டும், அடையாளச் சரிபார்ப்பு ரீடரில் அதைத் தட்டுவதற்கு முன் வாலெட்டில் உங்கள் அடையாள அட்டையைத் தேர்ந்தெடுத்து அதை அன்லாக் செய்ய வேண்டும். Japanese Key Public Infrastructure (JKPI)ஐப் பயன்படுத்தி உங்கள் அடையாள அட்டையைக் காட்டும்போது, கோரப்படும் குறிப்பிட்ட தகவல்களைப் பற்றிய விவரங்களை வாலெட் காட்டாது.

தங்கள் பொருட்களையோ சேவைகளையோ அணுக, வயது அல்லது அடையாளச் சான்றைப் பெற விரும்பும் செயலி, கோரிக்கையின் குறிப்பிட்ட விவரங்களையும் கோரும் செயலியில் எத்தனை நாட்கள் தகவல்கள் சேமிக்கப்படும் என்பதையும் காட்டும் ஒப்புதல் தாளை உங்களுக்கு வழங்கும். அங்கீகாரம் பெற்றதும், உங்கள் சாதனம் அங்கீகரிக்கப்பட்ட தகவல்களைக் கொண்ட என்கிரிப்ட் செய்யப்பட்ட பேலோடைச் செயலிக்குப் பரிமாற்றும். என்கிரிப்ட் செய்யப்பட்ட பேலோடில், உங்கள் அடையாள அட்டை செல்லுபடியாகும் என்பதைச் சரிபார்ப்பதற்குச் செயலியை அனுமதிக்க, உங்கள் அடையாள அட்டைக்கு டிஜிட்டல் அடையாள அட்டை ஆணையம் வழங்கிய டிஜிட்டல் கையொப்பம் இருக்கும்.

வாலெட்டில் உள்ள உங்கள் அடையாள அட்டையைத் தட்டுவதன் மூலம், அதை எப்போது, எங்கே, யாருக்கு வழங்கினீர்கள் என்பது உட்பட கடந்த காலத்தில் மேற்கொள்ளப்பட்ட முன்மொழிவுத் தகவல்களை நீங்கள் பார்க்கலாம். இந்தத் தகவல்கள் உங்கள் சாதனத்தால் உருவாக்கப்பட்டவை; உங்கள் அடையாள அட்டையை எப்போது, எங்கே அல்லது யாரிடம் காட்டுகிறீர்கள் என்பது Apple அல்லது அடையாள அட்டை வழங்கும் ஆணையத்திற்குத் தெரியாது மற்றும் இந்தத் தகவல்களை அவர்களால் சேமிக்கவும் முடியாது. ஜப்பானில், மருத்துவமனைகளில் உங்கள் அடையாள அட்டையைக் காட்டுவது போன்ற சூழல்களில் உங்களுக்குத் தேவையான சேவைகளை வழங்க தேவைப்படும்போது அந்த நிகழ்வைப் பற்றிய தகவல்களை ஜப்பான் அரசாங்கம் அறிந்துகொள்ளக்கூடும்.

உங்கள் அடையாள அட்டையை நிர்வகித்தல்

வாலெட்டில் உள்ள உங்கள் அடையாள அட்டையைத் தட்டுவதன் மூலம் அதை எப்போது வேண்டுமானாலும் நீங்கள் நிர்வகிக்கலாம். உங்கள் தனியுரிமையைப் பாதுகாக்கவும் அடையாள அட்டைத் தகவல்களைப் பாதுகாப்பாக வைத்திருக்கவும், அடையாள விவரங்களை நீங்கள் பார்ப்பதற்கு முன் அங்கீகரிக்குமாறு கேட்கப்படுவீர்கள். உங்கள் அடையாள அட்டையின் தகவல்களைப் புதுப்பிக்க அல்லது மாற்ற, அரசாங்க அடையாள அட்டை வழங்கல் ஆணையத்தை நீங்கள் தொடர்புகொள்ள வேண்டும். வாலெட்டில் உள்ள அடையாள அட்டையை நிர்வகிக்க உதவ, உங்கள் அடையாள அட்டை தற்போது செல்லுபடியாகும் நிலையில் உள்ளதா என்பதை அரசாங்க அடையாள அட்டை வழங்கல் ஆணையம் தொடர்ந்து Appleக்குத் தெரிவிக்கும். உங்கள் முகவரி மாற்றம், அடையாள அட்டையின் நிலை மாற்றம் (உதாரணமாக, செயலில் இருந்து செயலற்ற நிலைக்கு மாறுவது) போன்ற அடையாள அட்டையில் செய்யப்பட்ட மாற்றங்கள் குறித்த தகவல்களை அரசாங்க அடையாள அட்டை வழங்கல் ஆணையத்திடம் இருந்து Apple பெறும். உங்கள் உண்மையான புதுப்பிக்கப்பட்ட முகவரி உட்பட புதுப்பிப்பு குறித்த விவரங்கள் Appleக்கு அனுப்பப்படாது. நீங்கள் வாலெட்டில் அடையாள அட்டையை வைத்திருக்கும்போது, உங்கள் அடையாள அட்டையின் நிலை மாறியுள்ளதா போன்ற அதன் புதுப்பிப்புகள் குறித்த தகவல்களை Apple தக்கவைத்துக்கொள்ளும். இந்தத் தகவல்கள் மோசடியில் இருந்து தடுப்பதற்காகவும் பாதுகாப்பு நோக்கத்திற்காகவும் மட்டுமே பயன்படுத்தப்படும்.

நீங்கள் புதிய பாஸ்போர்ட்டைப் பெறும்போது டிஜிட்டல் ஐடிகள் புதுப்பிக்கப்படாது. உங்கள் டிஜிட்டல் ஐடியைப் புதுப்பிக்க வேண்டுமெனில், உங்கள் டிஜிட்டல் ஐடியை நீக்கி விட்டு உங்கள் புதிய பாஸ்போர்ட்டைப் பயன்படுத்தி புதிய டிஜிட்டல் ஐடியைச் சேர்க்க வேண்டும்.

வாலெட்டில் உள்ள உங்கள் அடையாள அட்டையின் பின்புறத்திற்குச் சென்று, “ஓட்டுநர் உரிமத்தை அகற்று”, “மாநில ஐடியை அகற்று” “டிஜிட்டல் ஐடியை அகற்று” அல்லது “கார்டை அகற்று” என்பதைத் தட்டுவதன் மூலம் எப்போது வேண்டுமானாலும் உங்கள் அடையாள அட்டையை வாலெட்டில் இருந்து அகற்றலாம். உங்கள் அடையாள அட்டைய அகற்றினால், உங்கள் சாதனத்தில் உள்ள இதுவரையிலான காட்டப்பட்ட அனைத்துத் தகவல்களும் நீக்கப்படும்.

அடையாள அட்டைகளை மேம்படுத்துதல்

இந்தத் தகவல்களை Appleக்கு வழங்க நீங்கள் தேர்வுசெய்திருந்தால், உங்கள் ஓட்டுநர் உரிமம் அல்லது மாநில ஐடியில் உள்ள உங்கள் வயது, பாலினம், இனம்/பூர்வீகம் (பொருந்தினால்), வெளிப்படையான தோல் நிறம் ஆகியவற்றை Apple அடையாளம் நீக்கப்பட்ட வகையில் சேகரிக்கும். மேலும் வாலெட்டுக்கான அடையாள அட்டையை உங்களுக்கு வழங்கலாமா வேண்டாமா என்று அரசாங்க வழங்கல் ஆணையம் எடுத்த முடிவையும் சேமிக்கும். அடையாளச் சரிபார்ப்பு செயலாக்கத்தில் பாகுபாடு உள்ளதா என்பதைக் கண்காணிக்க, இந்தத் தகவல்களை Apple பயன்படுத்தும். அமைப்புகள் > தனியுரிமை & பாதுகாப்பு > பகுப்பாய்வுகள் & மேம்பாடுகள் என்பதற்குச் சென்று உங்கள் iOS சாதனத்தில் இந்தத் தகவல்களை நீங்கள் மதிப்பாய்வு செய்யலாம் அல்லது அதன் மீதான உங்கள் ஒப்புதலை மாற்றலாம். அரசாங்க வழங்கல் ஆணையத்தின் செயலி மூலம் அடையாள அட்டையை நீங்கள் சேர்த்தால், “அடையாள அட்டைகளை மேம்படுத்துதல்” அம்சத்திற்கு உங்களால் ஒப்புதல் வழங்க முடியாது.

வாலெட்டில் உங்கள் டிஜிட்டல் ஐடி அல்லது மாநில அடையாள அட்டையைச் சேர்க்கும்போது, வாலெட் அனுபவத்தில் ஐடியை மேம்படுத்துவதற்காக உங்கள் Live Photoஐப் பார்க்க Appleஇல் ஒரு சிறிய மதிப்பாய்வுக் குழுவில் ஒரு சிலரை அனுமதிக்குமாறு Apple உங்களிடம் கேட்கும். Live Photoஐ மதிப்பாய்வு செய்ய Appleக்கு அனுமதி வழங்கினால், 30 நாட்களுக்குள் உங்கள் Live Photoஐ Apple மறுஆய்வு செய்து நீக்கும்.

வாலெட்டில் உள்ள அடையாள அட்டைகளை மேம்படுத்த, உங்கள் பெயர், பிறந்த தேதி போன்ற உங்கள் அடையாள அட்டையில் காட்டப்படும் வேறு எந்தத் தகவல்களையும் Apple பயன்படுத்தாது. அம்சம் மற்றும் பிற Apple சேவைகளையும் தயாரிப்புகளையும் மேம்படுத்த, உங்களுடன் இணைக்கப்படாத உங்கள் அடையாள அட்டையின் தரவுகள் தக்கவைக்கப்படக்கூடும். உதாரணமாக, அனுபவத்தை மேம்படுத்தும் வகையில், வாலெட்டில் அடையாள அட்டையைச் சேர்க்கும்போது பயனர்கள் எங்கு சிக்கலை எதிர்கொள்கிறார்கள் என்பது குறித்த அடையாளம் நீக்கப்பட்ட மற்றும் ஒருங்கிணைக்கப்பட்ட தகவல்களை Apple தக்கவைக்கக்கூடும். வாலெட்டில் உள்ள அடையாள அட்டைகளை மேம்படுத்த, இந்த அம்சம் தொடர்பாக உங்களிடமிருந்தோ உங்கள் அரசாங்க அடையாள அட்டை வழங்கல் ஆணையத்திடம் இருந்தோ பெறப்படும் தகவல்களை Apple அடையாளம் நீக்கி சேமிக்கக்கூடும். உதாரணமாக, வாலெட்டில் உங்கள் அடையாள அட்டையைச் சேர்க்கும்போது சமர்ப்பிக்கப்பட்ட படங்களின் தரம் மற்றும் அவை அரசாங்க வழங்கல் ஆணையத்தால் ஏற்றுக்கொள்ளப்பட்டதா என்பது குறித்த தகவல்களை Apple பெறும். உதாரணமாக, சமர்ப்பிக்கப்பட வேண்டிய படங்கள் குறித்த உங்கள் சாதனத்தின் மதிப்பீட்டை மேம்படுத்த அல்லது மாநிலத்தின் அடையாள அட்டை வழங்கல் அதிகாரியால் ஏற்றுக்கொள்ளப்படும் படங்களை எப்படி எடுப்பது என்பது குறித்த சிறந்த வழிமுறைகளைப் பயனர்களுக்கு வழங்க Apple இந்தத் தகவல்களை அடையாளம் நீக்கி சேமிக்கக்கூடும்.

மற்றவை

எங்கள் சேவை வழங்குநர்களுடன் தகவல்களை Apple பகிரக்கூடும். இந்த அறிக்கை மற்றும் Apple அறிவுறுத்தல்களின்படி தகவல்களைக் கையாள அவர்கள் கடமைப்பட்டுள்ளனர். பெறப்படும் தனிப்பட்ட தரவுகளைப் பாதுகாக்க நியாயமான பாதுகாப்பு நடவடிக்கைகளை அவர்கள் எடுக்க வேண்டும், சட்டரீதியாகவோ உங்கள் ஒப்புதலோ தேவைப்படாவிட்டால் சேவைகளை வழங்கி முடித்ததும் தனிப்பட்ட தரவுகளை அவர்கள் கண்டிப்பாக நீக்க வேண்டும்.

இந்த அறிக்கையில் விவரிக்கப்பட்டபடி மற்றும் Appleஇன் தனியுரிமைக் கொள்கையின்படி, சேகரிக்கப்பட்ட நோக்கங்களை நிறைவேற்றத் தேவைப்படும் காலம் வரை அல்லது சட்டப்படி தேவைப்படும் காலம் வரை மட்டுமே Apple தனிப்பட்ட தரவைத் தக்கவைக்கும். தக்கவைத்தல் காலத்தை மதிப்பிடும்போது, சேகரிக்கப்பட்ட தனிப்பட்ட தரவைத் தக்கவைப்பது தேவையா என்று முதலில் கவனமாக ஆராய்கிறோம். தக்கவைத்தல் தேவை எனில், சட்டப்படி அனுமதிக்கப்பட்ட குறுகிய காலத்திற்கு மட்டுமே தனிப்பட்ட தரவைத் தக்கவைக்க முயல்கிறோம்.

Apple சேகரிக்கும் தகவல்கள் எல்லா நேரங்களிலும் Appleஇன் தனியுரிமைக் கொள்கையின்படி கையாளப்படும். இதை www.apple.com/in/privacy தளத்தில் பார்வையிடலாம்.

2025-12-12