IMPORTANTI: DAWN IT-TERMINI U KUNDIZZJONIJIET GĦAT-TISWIJIET (“FTEHIM”) JIKKOSTITWIXXU L-FTEHIM TIEGĦEK MA’ APPLE (KIF DESKRITT FIS-SEZZJONIJIET TAL-VARJAZZJONI TAL-PAJJIŻ, SPEĊIFIKATI TUL IL-FTEHIM) U SE JAPPLIKAW GĦALL-ORDNI TIEGĦEK JEKK IS-SERVIZZ MA JAQAX TAĦT IT-TERMINI TAL-GARANZIJA LIMITATA TA’ APPLE, KUNTRATT TA’ SERVIZZ ESTIŻ AMMINISTRAT MINN APPLE JEW ID-DRITTIJIET TAL-KONSUMATUR STATUTORJI TIEGĦEK.

LIĠI TAL-KONSUMATUR: GĦAL KONSUMATURI LI HUMA KOPERTI MINN LIĠIJIET JEW REGOLAMENTI TAL-PROTEZZJONI TAL-KONSUMATUR FIL-PAJJIŻ TA’ RESIDENZA TAGĦHOM, IL-BENEFIĊĊJI MOGĦTIJA B’DAN IL-FTEHIM HUMA B’ŻIEDA MAD-DRITTIJIET U R-RIMEDJI KOLLHA MOGĦTIJA MINN DAWK IL-LIĠIJIET U R-REGOLAMENTI DWAR IL-PROTEZZJONI TAL-KONSUMATUR U GĦANDEK TIKKONSULTA LIS-SERVIZZ TAL-PARIRI GĦAĊ-ĊITTADINI FIL-PAJJIŻ TA’ RESIDENZA TIEGĦEK GĦAL AKTAR INFORMAZZJONI DWAR DAWN ID-DRITTIJIET.

1. Servizzi u Prodotti.
   

1.1 Servizzi. Għal ordnijiet ta’ servizzi, Apple tisservisja l-prodott ta’ Apple tiegħek kif deskritt lilek għall-ispejjeż stmati ddikjarati, sakemm tali tariffi ma jiġux riveduti bil-kunsens minn qabel bil-fomm jew bil-miktub tiegħek. Sakemm ma jkunx iddikjarat mod ieħor, Apple se tipprovdi servizzi ta’ tiswija jew sostituzzjoni biex tindirizza difett fil-materjali jew fix-xogħol ta’ prodott. Is-servizz mhuwiex disponibbli għal problemi kkawżati minn insuffiċjenza ta’ jew inkompatibilitajiet ma’ kwalunkwe software jew data li tinsab jew hija rreġistrata fuq il-prodott tiegħek. Apple tista’ tinstalla aġġornamenti tas-software tas-sistema bħala parti mis-servizz, li jwaqqfu l-prodott ta’ Apple tiegħek milli jerġa’ lura għal verżjoni preċedenti tas-software tas-sistema. Applikazzjonijiet ta’ partijiet terzi installati fuq il-prodott ta’ Apple tiegħek jistgħu ma jkunux kompatibbli jew ma jaħdmux mal-prodott ta’ Apple tiegħek bħala riżultat tal-aġġornament tas-software tas-sistema.

1.2 Servizzi ta’ Trasferiment tad-Data. Jekk il-prodott Mac ta’ Apple tiegħek jista’ jaħżen programmi tas-software, data jew informazzjoni oħra (“Data”), Apple tista’ tipprova tittrasferixxi dik id-Data lejn apparat ta’ sostituzzjoni. Waqt is-servizz, huwa possibbli li d-Data tista’ tintilef. F’każ bħal dan, Apple ma tkunx responsabbli għall-ebda telf ta’ Data.

a. Bħala parti minn kwalunkwe servizz ta’ trasferiment tad-Data, kemm jekk Apple tkun tista’ tittrasferixxi b’suċċess id-Data mill-apparat oriġinali għall-apparat ta’ sostituzzjoni kif ukoll jekk le, Apple se tħassar kull Data li jkun hemm fuq l-apparat oriġinali. Għandek iżżomm kopja backup separata tal-kontenut tad-Data tal-apparat, tneħħi l-informazzjoni personali kollha li trid tipproteġi u tiddiżattiva l-passwords tas-sigurtà kollha. Waqt is-servizz, huwa possibbli li d-Data se tintilef, tiġi sostitwita jew riformattjata. F’każ bħal dan, Apple u l-aġenti tagħha mhumiex responsabbli għall-ebda telf ta’ programmi tas-software, Data jew informazzjoni oħra li tinsab fuq l-apparat.

b. Is-servizz tat-trasferiment tad-data se jinvolvi t-trasferiment tad-Data direttament mill-apparat oriġinali għall-apparat ta’ sostituzzjoni jew għal apparat tal-ħażna tad-data estern kompatibbli li tipprovdi int. Apple mhux se tittrasferixxi d-Data lil xi sistema jew apparat tal-ħażna tad-data li hija l-proprjetà ta’ Apple jew ta’ parti terza u mhux se taħżen kopja tad-Data bħala parti minn kwalunkwe servizz ta’ trasferiment tad-Data.

1.3 Partijiet u Xogħol. Apple tista’ tipprovdi kemm partijiet kif ukoll xogħol, iżda tista’ tordna li tissostitwixxi ċerti partijiet li jistgħu jiġu installati faċilment inti stess, kif deskritt hawn taħt. Meta tisservisja l-prodott tiegħek, Apple tista’ tuża partijiet jew prodotti li huma magħmula minn partijiet ġenwini ta’ Apple ġodda u/jew li ntużaw qabel u li jkunu ġew ittestjati għar-rekwiżiti funzjonali ta’ Apple u għaddew sakemm jiġu rrispettati l-liġijiet applikabbli. Apple se żżomm il-parti mibdula jew il-prodott mibdul li waqt is-servizz jiġi skambjat bħala l-proprjetà tagħha, u l-parti jew il-prodott ta’ sostituzzjoni jsiru l-proprjetà tiegħek. Il-partijiet u l-prodotti mibdula ġeneralment ikunu jissewwew u jiġu skambjati jew imsewwija minn Apple għall-valur. Apple tista’ tuża Prodotti ta’ Apple jew partijiet għas-servisjar ta’ sostituzzjoni li jinkisbu minn pajjiż li huwa differenti mill-pajjiż minn fejn inkisbu l-Prodott ta’ Apple jew il-partijiet oriġinali. Jekk il-liġi applikabbli teħtieġ li Apple tirritornalek oġġett mibdul jekk inti titlob dan, taqbel li tħallas lil Apple l-ammont tal-bejgħ bl-imnut tal-oġġett ta’ sostituzzjoni u tal-kunsinna.

1.4 Għażliet ta’ Servizz. Apple se tipprovdi servizz permezz ta’ waħda mill-għażliet li ġejjin u se tagħżel, soġġett għal-liġijiet applikabbli, liema metodu ta’ kif tipprovdi s-servizz se tuża skont iċ-ċirkostanzi, b’mod partikolari skont it-tip ta’ prodott ta’ Apple:

A Servizz ta’ Partijiet Do-It-Yourself (DIY). Is-Servizz ta’ Partijiet DIY jippermettilek tisservisja l-prodott tiegħek stess. Jekk Apple tiddetermina li s-Servizz tal-Partijiet DIY huwa disponibbli għalik, Apple tibgħatlek parti ta’ sostituzzjoni għall-prodott ta’ Apple tiegħek. Il-parti ta’ sostituzzjoni tkun akkumpanjata minn istruzzjonijiet dwar l-installazzjoni u kwalunkwe rekwiżit għar-ritorn tal-parti mibdula. Għal Servizz ta’ Partijiet DIY li jeħtieġ ir-ritorn tal-parti mibdula, trid tipprovdi d-dettalji tal-karta tal-kreditu biex jiġi żgurat ir-ritorn tal-parti mibdula. Il-partijiet kollha mibdula li jeħtieġu li jiġu rritornati jridu jintbagħtu lura lil Apple fi żmien għaxart (10) ijiem mid-data li fiha Apple tibgħatlek il-parti ta’ sostituzzjoni (“Perjodu tar-Ritorn”). Jekk (i) tonqos milli tirritorna l-parti mibdula skont l-istruzzjonijiet fil-Perjodu tar-Ritorn, jew (ii) il-parti mibdula ma tkunx eliġibbli għal servizz minħabba Esklużjoni mis-Servizz, kif deskritt hawn taħt, inti tħallas l-ammont li qbilt miegħu fil-mument li ġie ordnat is-servizz. Jekk Apple ma teħtieġx ir-ritorn ta’ parti mibdula, Apple tibgħatlek parti jew prodott ta’ sostituzzjoni akkumpanjat minn istruzzjonijiet dwar l-installazzjoni u kwalunkwe rekwiżit għar-rimi tal-oġġett mibdul. Apple mhix responsabbli għall-ebda spejjeż tax-xogħol relatati mas-Servizz tal-Partijiet DIY.

B Servizz ta’ Bgħit Dirett bil-Posta. Jekk Apple tiddetermina li l-prodott tiegħek huwa eliġibbli għal Servizz ta’ Bgħit Dirett bil-Posta, inti tibgħat il-prodott tiegħek lill-post tas-servizz tat-tiswija ta’ Apple skont l-istruzzjonijiet ta’ Apple. Apple tista’ tipprovdi poloz tat-tagħbija mħallsa minn qabel (u jekk m’għadx għandek l-ippakkjar oriġinali, Apple tista’ tibgħatlek materjal tal-ippakkjar). Jekk Apple ma tipprovdix poloz tat-tagħbija mħallsa minn qabel jew ippakkjar, trid tagħmel l-arranġamenti għall-kunsinna u l-ippakkjar tal-prodott tiegħek lejn il-post tas-servizz tat-tiswija ta’ Apple, kif deskritt meta tpoġġi l-ordni, u jista’ jkun li tkun trid tikkunsidra tassigura l-pakkett tiegħek f’każ ta’ ħsara jew telf waqt il-kunsinna. Ladarba s-servizz ikun lest, il-post tas-servizz tat-tiswija ta’ Apple jirritorna l-prodott imsewwi jew jipprovdilek prodott ta’ sostituzzjoni.

C Servizz ta’ Sostituzzjoni Express (ERS).

i. Jekk Apple tiddetermina li l-prodott tiegħek huwa eliġibbli għall-ERS, u inti tagħżel li tordna l-ERS billi tagħti lil Apple id-dettalji tal-karta tal-kreditu tiegħek, Apple tibgħatlek prodott ta’ sostituzzjoni fil-post magħżul minnek. Inti tirritorna l-prodott tiegħek b’mod li Apple tirċevih fi żmien għaxart (10) ijiem mid-data li Apple tibgħat il-prodott ta’ sostituzzjoni (il-“Perjodu tar-Ritorn”). Inti trid tirritorna l-prodott oriġinali fil-pakkett li kien fih il-prodott ta’ sostituzzjoni skont l-istruzzjonijiet ta’ Apple. Apple se żżomm il-prodott oriġinali u int iżżomm il-prodott ta’ sostituzzjoni.

ii. Għall-ERS, Apple tiċċarġjalek il-karta ta’ kreditu tiegħek it-Tariffa tal-ERS, deskritta fil-paġna tal-web tal-Mistoqsijiet Komuni dwar is-Servizz murija fit-tabella t’hawn taħt (“Mistoqsijiet Komuni dwar is-Servizz”) fil-mument li l-Prodott ta’ Sostituzzjoni jintbagħat. Fil-mument li l-Prodott ta’ Sostituzzjoni jintbagħat, Apple tgħaddi awtorizzazzjoni fuq il-karta tal-kreditu tiegħek ugwali għall-valur ta’ sostituzzjoni ta’ prodott ġdid (“Valur ta’ Sostituzzjoni”), kif deskritt fil-Mistoqsijiet Komuni dwar is-Servizz. Din l-awtorizzazzjoni tinżamm minn Apple u tiġi applikata kontra kwalunkwe ħsara lill-prodott oriġinali li ma tkunx eliġibbli għal Servizz Barra mill-Garanzija, jew telf tal-prodott oriġinali jew ħlasijiet oħra dovuti lil Apple. It-tiswijiet jitqiesu li huma Barra mill-Garanzija meta:

• Il-prodott tiegħek ma jkunx għadu kopert mill-garanzija ta’ Apple, mill-pjan tas-servizz AppleCare jew skont il-liġi tal-konsumatur.
• Il-kwistjoni li qed tirrapporta kienet ikkawżata minn ħsara aċċidentali jew modifiki mhux awtorizzati jew jekk l-imsemmija ħsara aċċidentali jew modifiki mhux awtorizzati jipprevjenu lil Apple milli tindirizza l-kwistjoni li qed tirrapporta.
  

  Prodott	Mistoqsijiet Komuni dwar is-Servizz
  Prodott iPhone	Mistoqsijiet Komuni dwar is-Servizz support.apple.com/iphone/repair/service
  Prodott iPad	Mistoqsijiet Komuni dwar is-Servizz support.apple.com/ipad/repair/service

  
  

iii. Jekk Apple tirċievi l-prodott oriġinali fil-Perjodu tar-Ritorn f’kundizzjoni li mhijiex eliġibbli għal Servizz Barra mill-Garanzija, il-karta tal-kreditu tiegħek tiġi ċċarġjata ammont addizzjonali li jirrappreżenta d-differenza bejn il-valur ta’ sostituzzjoni ta’ prodott ġdid (“Valur ta’ Sostituzzjoni”) u t-Tariffa tas-Servizz Barra mill-Garanzija, kif deskritt fil-Paġna tal-Web tal-Mistoqsijiet Komuni dwar is-Servizz. Prodott oriġinali li ma jaħdimx minħabba modifiki mhux awtorizzati jew li waqaf jaħdem minħabba ħsara katastrofika, bħal li l-prodott inqasam f’diversi biċċiet, huma eżempji ta’ prodott li huwa ineliġibbli għal Servizz Barra mill-Garanzija.

iv. Jekk il-prodott oriġinali jiġi rritornat lil Apple fil-Perjodu tar-Ritorn, il-bqija tal-Valur ta’ Sostituzzjoni jiġi kkreditat lura lill-karta ta’ kreditu tiegħek wara konferma li l-ħlasijiet applikabbli l-oħra kollha jkunu tħallsu. Jekk Apple ma tirċevix il-prodott oriġinali fil-Perjodu tar-Ritorn, il-karta ta’ kreditu tiegħek tiġi ċċarġjata l-Valur ta’ Sostituzzjoni. It-tariffi u l-ħlasijiet kollha deskritti hawnhekk jeskludu t-taxxi applikabbli kollha.

1.5 Bidliet fl-Għażliet tas-Servizz. Apple tirriżerva d-dritt li tibdel fi kwalunkwe ħin l-għażliet tas-servizz disponibbli għalik. Bidla ma taffettwax servizzi li diġà bdew.

1.6 Utenti Finali Biss. Apple tisservisja, tbigħ u tibgħat prodotti lill-klijenti li huma l-utenti finali biss. Ma tistax tixtri biex terġa’ tbigħ. Apple tirriżerva d-dritt li tirrifjuta jew tikkanċella l-ordni tiegħek jekk Apple tissuspetta li qed tixtri biex terġa’ tbigħ.

1.7 Ebda Bejgħ lil Minorenni. Ix-xiri skont dawn it-termini huwa disponibbli biss għal dawk li laħqu l-età tal-maġġoranza.

1.8 Esklużjonijiet mis-Servizz u Tariffa għad-Dijanjożi. Apple hija intitolata li tiċċarġjak tariffa għad-dijanjożi (inklużi l-ispejjeż tal-kunsinna) kif deskritt fit-tabella tal-Varjazzjoni bejn il-Pajjiżi, hawn taħt (“Tariffa għad-Dijanjożi”), jekk Apple tispezzjona l-prodott tiegħek u tiddetermina li (i) il-prodott tiegħek ma jeħtieġx servizz, (ii) il-prodott tiegħek waqaf jaħdem minħabba, jew huwa inkompatibbli ma’, software jew data li tinsab fuq jew hija rreġistrata fil-prodott tiegħek, (iii) is-servizz huwa meħtieġ minħabba li waqfu jaħdmu partijiet li la huma fornuti minn Apple u lanqas bil-marka Apple, (iv) huma meħtieġa xogħol jew partijiet addizzjonali li ma kinux ġew speċifikati fil-ħlasijiet stmati oriġinali u inti ma taqbilx li tawtorizza servizz skont il-ħlasijiet stmati riveduti ta’ Apple, jew (v) is-servizz ma jistax jitwettaq minħabba li n-numru tas-serje ġie mibdul, imħassar jew imneħħi jew il-prodott ikun waqaf jaħdem minħabba inċident, abbuż, tixrid ta’ likwidu jew immersjoni, negliġenza, użu ħażin (inkluż installazzjoni difettuża, tiswija, jew manutenzjoni minn xi ħadd minbarra Apple jew Fornitur tas-Servizz Awtorizzat minn Apple), modifika mhux awtorizzata, ambjent estrem (inkluż temperatura jew umdità estrema), stress fiżiku jew elettriku jew interferenza estremi, fluttwazzjoni jew żidiet qawwija f’daqqa tal-elettriku, sajjetti, elettriku statiku, nar, atti tan-natura jew kawżi esterni oħra (“Esklużjonijiet mis-Servizz”). Apple tirritornalek il-prodott tiegħek mingħajr ma tisservisjah u tista’ tiċċarġjak it-Tariffa għad-Dijanjożi.

1.9 Eċċezzjonijiet għall-Kopertura. Is-servizz skont dan il-Ftehim huwa offrut u validu biss għar-residenti li jinsabu fl-Awstralja, l-Awstrija, il-Belġju, il-Brażil, il-Kanada, ir-Repubblika Ċeka, id-Danimarka (esklużi Greenland u l-Gżejjer Faeroe), il-Ġermanja, il-Finlandja (minbarra Åland), Franza (minbarra Korsika u d-dipartimenti u t-territorji ekstra-Ewropej), Hong Kong, l-Ungerija, l-Irlanda, l-Italja (minbarra Sardenja), il-Ġappun, il-Lussemburgu, Monaco, in-Netherlands, il-Polonja, Spanja (inklużi l-Gżejjer Baleariċi iżda esklużi l-Gżejjer Kanarji, Ceuta, Melila), Singapore, l-Iżvezja, l-Iżvizzera, Liechtenstein, New Zealand, in-Norveġja (minbarra Svalbard), it-Tajlandja, it-Turkija, ir-Renju Unit (minbarra l-Isle of Man), il-Vjetnam, u għar-residenti li jinsabu fil-ħamsin stat tal-Istati Uniti tal-Amerka u d-Distrett ta’ Columbia. Servizz skont dan il-Ftehim mhuwiex disponibbli fejn huwa pprojbit mil-liġi.

1.10 Kunsinna. Apple tista’ tipprovdi stima ta’ meta prodott ta’ sostituzzjoni jew kaxxa tal-kunsinna biex tiffaċilita s-servizz tkun se tintbagħat lilek. Ladarba l-ordni tiegħek tkun ġiet ippreparata għall-kunsinna jew tkun intbagħtet, Apple ma tkunx tista’ tibdel l-indirizz tal-kunsinna. Jekk jogħġbok innota li għal kunsinni li jeħtieġu firma, jekk inti lest taċċetta r-riskji li l-ordni tiegħek tiġi kkunsinnata meta ma jkun hemm ħadd fl-indirizz tal-kunsinna, tista’ tawtorizza lil Apple biex tagħmel l-arranġamenti għal kunsinna mingħajr il-ħtieġa ta’ firma.

1.11 Responsabbiltà tal-Klijent.

1.11.1 Apple se tagħtik istruzzjonijiet għall-kunsinna u l-ippakkjar. Inti se tkun responsabbli għall-prodotti jew il-partijiet li jintilfu jew li ssirilhom ħsara minħabba nuqqas li jiġu segwiti.

1.11.2 Hija r-responsabbiltà tiegħek li tagħmel backup tad-data, is-software u l-programmi kollha eżistenti, u li tħassar id-data kollha eżistenti qabel ma tirċievi s-servizzi. Apple mhix responsabbli għal telf, irkupru, jew kompromess ta’ data, programmi jew telf ta’ użu ta’ tagħmir li jirriżulta mis-servizzi pprovduti minn Apple. Inti tikkonferma li l-prodott tiegħek ma fihx fajls jew data illegali.

1.11.3 Proprjetà Abbandunata. Sakemm ma tipprovdix istruzzjonijiet alternattivi, Apple se tibgħat il-prodott imsewwi jew ta’ sostituzzjoni tiegħek fl-indirizz postali li tipprovdi meta tawtorizza s-servizz. Jekk il-prodott tiegħek jintbagħat lura lil Apple minħabba li l-kunsinna ma setgħetx issir fl-indirizz mogħti, Apple se tipprova tikkuntattjak għal indirizz postali alternattiv. Jekk ma tipprovdix indirizz li fih Apple jew l-aġent tagħha jistgħu jwasslu l-prodott tiegħek fi żmien sittin (60) jum (ara t-taqsimiet tal-Varjazzjoni bejn il-Pajjiżi, hawn taħt, għal kwalunkwe eċċezzjoni applikabbli) wara t-tentattiv ta’ kunsinna oriġinali, Apple tinnotifikak li tqis il-prodott tiegħek bħala abbandunat. Apple tibgħat avviż fl-indirizz postali li fornejt meta awtorizzajt is-servizz. Fil-każ li l-prodott tiegħek jiġi abbandunat, Apple tista’ tiddisponi mill-prodott tiegħek skont id-dispożizzjonijiet applikabbli tal-liġi, u, speċifikament, tista’ tbigħ il-prodott tiegħek f’bejgħ privat jew pubbliku biex tħallas għal kwalunkwe servizz pendenti mwettaq. Apple tirriżerva r-rahan statutorju tagħha u kwalunkwe rahan legali ieħor għal ħlasijiet mhux imħallsa.

Għall-klijenti fl-Ewropa, barra mill-Awstrija, ir-Repubblika Ċeka, u l-Ġermanja: Jekk inti ma tkunx ħadt il-pussess tal-prodott tiegħek u ħallast il-ħlasijiet kollha dovuti fi żmien sittin (60) jum wara li tkun ġejt innotifikat minn Apple li l-prodott tiegħek ġie msewwi, Apple tagħtik perjodu ta’ żmien biex tieħu l-pussess tal-prodott. Apple tibgħatlek tali notifika fl-indirizz postali li tajt meta awtorizzajt it-tiswijiet. Jekk tibqa’ ma tiġborx il-prodott tiegħek, Apple tista’ titlob il-ħlas għal kwalunkwe dannu mingħandek inkluż kwalunkwe spiża jew għall-ħażna ta’ tali prodott. Apple tirriżerva r-rahan statutorju tagħha u kwalunkwe rahan legali ieħor għal ħlasijiet mhux imħallsa.

Għall-klijenti fl-Awstrija, ir-Repubblika Ċeka, u l-Ġermanja: Apple hija intitolata li żżomm il-prodott tiegħek sakemm jitħallsu bis-sħiħ minnek il-ħlasijiet kollha għat-tiswija. Jekk inti ma tkunx ħadt il-pussess tal-prodott tiegħek u ħallast il-ħlasijiet kollha dovuti fi żmien sittin (60) jum wara li tkun ġejt innotifikat minn Apple li l-prodott tiegħek ġie msewwi, Apple tistiednek tiġbor il-prodott u/jew taċċetta l-kunsinna tal-prodotti, bi ħlas tat-tariffi. Huwa mifhum li, mingħajr preġudizzju għad-drittijiet ta’ Apple li tikseb kumpens għad-danni, inti se tkun responsabbli għall-ħlasijiet kollha mġarrba għall-kustodja tal-prodotti. Apple tirriżerva r-rahan statutorju tagħha u kwalunkwe rahan legali ieħor għal ħlasijiet mhux imħallsa.

1.11.4 Informazzjoni dwar is-Servizz. Matul il-proċess tal-ordni tas-servizz trid tipprovdi deskrizzjoni tal-kwistjoni li qed taffettwa l-prodott tiegħek, sabiex Apple tifhem u tkun tista’ tirreplika l-kwistjoni.

1.11.5 Apple tinkoraġġik tirrevedi l-informazzjoni dwar l-istatus tal-ordni tas-servizz fuq www.apple.com/support/repairstatus/

1.11.6 Divulgazzjoni ta’ Modifiki Mhux Awtorizzati u Servizz mhux Mingħand Apple. Waqt il-proċess tal-ordni tas-servizz, trid tinnotifika lil Apple bi kwalunkwe modifika mhux awtorizzata, jew kwalunkwe tiswija jew sostituzzjoni mhux imwettqa minn Apple jew minn Fornitur tas-Servizz Awtorizzat minn Apple ("AASP"), li tkun saret lill-prodott tiegħek. Apple mhux se tkun responsabbli għall-ebda ħsara lill-prodott li sseħħ matul il-proċess ta’ tiswija li tkun riżultat ta’ kwalunkwe modifika mhux awtorizzata jew tiswija jew sostituzzjoni mhux imwettqa minn Apple jew AASP. Jekk tirriżulta ħsara, Apple tfittex l-awtorizzazzjoni tiegħek għal kwalunkwe spiża addizzjonali biex tlesti s-servizz anki jekk il-prodott ikun kopert mill-garanzija jew minn pjan ta’ servizz ta’ AppleCare. Jekk tirrifjuta l-awtorizzazzjoni, Apple tista’ tirritorna l-prodott tiegħek mhux imsewwi fil-kundizzjoni bil-ħsara mingħajr ebda responsabbiltà.

2. Ordnijiet u Ħlas.

2.1 Ħlas. It-termini ta’ ħlas huma fid-diskrezzjoni unika ta’ Apple, u sakemm ma jkunx miftiehem mod ieħor minn Apple, id-dettalji tal-ħlas iridu jaslu qabel ma Apple taċċetta ordni.

2.2 Metodi ta’ Ħlas. Apple tippermettilek tagħmel xirjiet jew tpoġġi ordnijiet (li jeħtieġu garanzija għar-ritorn tal-parti jew tal-prodott mibdul) permezz ta’ karta tal-kreditu, karta tad-debitu jew karta kurrenti meta applikabbli u aċċettabbli fil-pajjiż fejn jingħata s-servizz (ħlief f’Hong Kong, il-Ġappun u Singapore), jew ta’ xi metodu ieħor ta’ ħlas maqbul minn qabel sakemm Apple ma tkunx qablet ma’ xi termini oħra ta’ kreditu. Meta tipprovdi lil Apple bl-informazzjoni tal-karta tiegħek, Apple tikseb approvazzjoni minn qabel mill-kumpanija li ħarġet il-karta għall-ammont tal-ordni, li jista’ jwassal biex l-ammont korrispondenti jiġi imblokkat mill-kreditu disponibbli tiegħek sakemm l-approvazzjoni minn qabel tibqa’ fis-seħħ. Apple mhux se tiċċarġja lill-karta tal-kreditu tiegħek jew tipproċessa tranżazzjoni fuq il-karta tad-debitu jew kurrenti tiegħek qabel ma l-ordni tiegħek tiġi pproċessata. Apple tista’ ma tkunx tista’ taċċetta karti ta’ kreditu, debitu jew kurrenti assoċjati ma’ indirizz tal-fatturazzjoni barra mill-pajjiż fejn issir ix-xirja jew fejn issir l-ordni. Karti tad-debitu u karti kurrenti jista’ jkollhom limiti ta’ nfiq ta’ kuljum li jistgħu jdewmu l-ipproċessar tal-ordni tiegħek b’mod sostanzjali. Apple teħtieġ il-kodiċi tas-sigurtà tal-karta tal-kreditu, tad-debitu jew kurrenti tiegħek biex tipproteġi kontra l-użu mhux awtorizzat tal-karta tal-kreditu tiegħek minn persuni oħra. Il-kodiċi tas-sigurtà huwa numru individwali ta’ tliet jew erba’ ċifri speċifiku għall-karta tiegħek li jista’ jiġi stampat fuq il-wiċċ tal-karta tiegħek fuq in-numru tal-kont imbuzzat, jew fuq in-naħa ta’ wara tal-karta tiegħek, fuq il-qasam tal-firma.

2.3 Prezzijiet. Apple tagħmel ħilitha biex toffrilek prezzijiet kompetittivi fuq il-prodotti u servizzi attwali ta’ Apple. Il-prezz totali tal-ordni tiegħek se jinkludi l-prezz tal-prodott jew tas-servizz fil-jum tal-ipproċessar tal-ordni. Apple tirriżerva d-dritt li tbiddel il-prezzijiet għal prodotti jew servizzi murija fi kwalunkwe ħin u partikolarment biex tikkoreġi żbalji fil-prezzijiet li jidhru. Bidla fil-prezz ma taffettwax is-servizzi li diġà bdew.

2.4 Konferma. Apple tibgħatlek konferma tal-ordni tiegħek permezz ta’ email ftit wara li tirċeviha. Inti tirċievi konferma bil-posta regolari jew permezz ta’ email meta Apple taċċetta l-ordni tiegħek.

2.5 Rifużjonijiet. Ħlief kif deskritt fit-taqsima tal-Garanzija u l-Limitazzjoni tar-Responsabbiltà hawn taħt, Apple ma tipprovdix rifużjonijiet għal ordnijiet ta’ servizzi.

3. Garanzija u Limitazzjoni tar-Responsabbiltà

3.1 Garanzija tas-Servizz. Għall-ordnijiet kollha ta’ servizzi, Apple tiggarantixxi li (1) is-servizzi mwettqa se jikkonformaw mad-deskrizzjoni tagħhom għal disgħin (90) jum mid-data tas-servizz, (2) ħlief għall-batteriji deskritti fis-subtaqsima hawn taħt, il-partijiet jew il-prodotti kollha użati fis-servizz se jkunu ħielsa minn difetti fil-materjali u x-xogħol għal disgħin (90) jum mid-data tas-servizz, u (3) il-batteriji installati bħala parti mis-servizz ta’ sostituzzjoni tal-batterija ta’ Apple għall-kompjuters portabbli Mac ta’ apple se jkunu ħielsa minn difetti fil-materjali u x-xogħol għal sena mid-data tas-servizz. Din il-garanzija hija garanzija limitata espressa. Jekk jiġi pprovdut servizz mhux konformi jew jinqala’ difett f’parti jew prodott ta’ sostituzzjoni matul il-perjodu ta’ garanzija applikabbli, Apple, skont l-għażla tagħha, jew kif meħtieġ mil-liġi, jew (a) terġa’ twettaq is-servizzi biex tikkonforma mad-deskrizzjoni tagħhom, (b) isewwi jew tibdel il-parti jew il-prodott, bl-użu ta’ partijiet jew prodotti li huma magħmula minn partijiet ġenwini ta’ Apple ġodda u/jew użati qabel u li jkunu ġew ittestjati u għaddew mir-rekwiżiti funzjonali ta’ Apple, jew (c) tirrifondi l-ammonti mħallsa lil Apple għas-servizz.

L-Awstralja: Id-drittijiet deskritti f’din il-politika fir-rigward ta’ ritorni, rifużjonijiet u garanziji huma b’żieda mad-drittijiet statutorji li inti tista’ tkun intitolat għalihom skont l-Att dwar il-Konsumaturi u l-Kompetizzjoni tal-2010 u liġijiet u regolamenti oħra applikabbli dwar il-protezzjoni tal-konsumaturi fl-Awstralja. L-oġġetti u s-servizzi tagħna jiġu b’garanziji li ma jistgħux jiġu esklużi taħt il-Liġi tal-Konsumatur Awstraljana.

Għal nuqqasijiet kbar fis-servizz tagħna, inti intitolat: (1) li tikkanċella l-ordni tas-servizz tiegħek magħna; jew (2) għal rifużjoni għall-porzjon mhux użat, jew għal kumpens għall-valur imnaqqas tiegħu. Jekk nuqqas fis-servizz ma jammontax għal nuqqas kbir, inti intitolat li jkollok in-nuqqas ikkoreġut fi żmien raġonevoli. Jekk dan ma jsirx inti intitolat li tikkanċella l-ordni ta’ servizz u tikseb rifużjoni ta’ kwalunkwe porzjon mhux użat. Inti wkoll intitolat li tiġi kkumpensat għal kwalunkwe telf jew ħsara oħra raġonevolment prevedibbli minn nuqqas fis-servizz.

Int intitolat ukoll għal tiswija, sostituzzjoni jew rifużjoni għal nuqqas kbir fil-prodotti tagħna u għal kumpens għal kwalunkwe telf jew ħsara oħra raġonevolment prevedibbli. Inti intitolat ukoll li l-prodotti jissewwew jew jiġu sostitwiti jekk il-prodotti jonqsu milli jkunu ta’ kwalità aċċettabbli u l-ħsara ma tammontax għal ħsara kbira. Jekk dan ma jsirx inti intitolat għal rifużjoni għall-prodotti jew għal sostituzzjoni tal-prodotti. Apple tista’ tuża partijiet jew prodotti li huma magħmula minn partijiet ġenwini ta’ Apple ġodda u/jew li ntużaw qabel u li jkunu ġew ittestjati għar-rekwiżiti funzjonali ta’ Apple u għaddew sakemm jiġu rrispettati l-liġijiet applikabbli. Inti tirrikonoxxi li t-tiswija tal-prodotti tista’ tirriżulta f’telf tad-data. Dan ma jaffettwax id-drittijiet tiegħek skont il-liġi tal-konsumatur fir-rigward ta’ aspetti oħra tas-servizzi ta’ tiswija mwettqa fuq l-apparat tiegħek taħt din il-garanzija. Ċerta leġiżlazzjoni, inkluż l-Att dwar il-Kompetizzjoni u l-Konsumaturi tal-2010, tista’ timplika garanziji jew kundizzjonijiet jew timponi obbligi fuq Apple li ma jistgħux jiġu esklużi, ristretti jew modifikati, jew ma jistgħux jiġu esklużi, ristretti jew modifikati ħlief sa ċertu punt. Dawn it-Termini u Kundizzjonijiet iridu jinqraw bħala soġġetti għal dawn id-dispożizzjonijiet statutorji. Jekk japplikaw dawn id-dispożizzjonijiet statutorji, sa fejn Apple hija intitolata li tagħmel dan, Apple tillimita r-responsabbiltà tagħha fir-rigward ta’ kwalunkwe talba skont dawk id-dispożizzjonijiet għal, skont l-għażla ta’ Apple, (1) il-forniment mill-ġdid tas-servizzi jew (2) il-ħlas tal-ispiża biex is-servizzi jerġgħu jiġu fornuti.

Il-Brażil: Apple ma tużax prodotti jew partijiet rikondizzjonati jew użati qabel meta tisservisja prodotti ta’ Apple.

Il-Kanada: Ir-residenti tal-Quebec huma rregolati mil-leġiżlazzjoni tal-protezzjoni tal-konsumaturi ta’ dik il-provinċja flimkien mad-drittijiet f’dan il-Ftehim.

Ir-Repubblika Ċeka: Għall-konsumaturi Ċeki d-drittijiet f’dan il-Ftehim jiġu b’żieda ma’ u ma jaffettwawx id-drittijiet obbligatorji tiegħek bħala konsumatur. Għal aktar informazzjoni dwar id-drittijiet tal-konsumatur tiegħek, jekk jogħġbok irreferi għat-Taqsima 6(B) ta’ dan il-Ftehim.

Id-Danimarka: Għall-konsumaturi Daniżi, id-drittijiet f’din il-garanzija jiġu b’żieda ma’ u ma jaffettwawx id-drittijiet obbligatorji tiegħek bħala konsumatur, inklużi dawk li jinsabu fl-Att dwar il-Bejgħ ta’ Prodotti, fost oħrajn l-istabbiliment tad-dritt li wieħed jilmenta dwar nuqqasijiet ta’ konformità sal-iskadenza tal-perjodu ta’ talbiet ta’ sentejn stipulat fih, jiġifieri sentejn mid-data tax-xiri. Barra minn hekk, jekk il-prodott isservisjat jieqaf jaħdem wara l-iskadenza tal-garanzija ta’ 90 jum, iżda fi żmien sentejn mid-data tat-twettiq tas-servizzi, il-konsumaturi għandhom, skont id-diskrezzjoni ta’ Apple, ikunu intitolati jew għal twettiq mill-ġdid tas-servizzi, jew għal rifużjoni tat-tariffa mħallsa għas-servizzi, jekk ikun jista’ jiġi stabbilit li dan in-nuqqas huwa dovut għal nuqqas ta’ konformità fis-servizz imwettaq.

New Zealand: Id-drittijiet deskritti f’din il-politika fir-rigward ta’ ritorni, rifużjonijiet u garanziji huma b’żieda mad-drittijiet statutorji li inti tista’ tkun intitolat għalihom skont l-Att dwar il-Garanziji għall-Konsumatur tal-1993 u liġijiet u regolamenti oħra applikabbli dwar il-protezzjoni tal-konsumaturi fi New Zealand.

Fir-rigward tal-prodotti tagħna, inti intitolat għal sostituzzjoni jew rifużjoni għal nuqqas ta’ karattru sostanzjali u għal kumpens għal kwalunkwe telf jew ħsara raġonevolment prevedibbli li tirriżulta minn tali nuqqas. Tista’ tkun intitolat ukoll li l-prodotti jissewwew jew jiġu sostitwiti jekk il-prodotti jonqsu milli jkunu ta’ kwalità aċċettabbli u l-ħsara ma tammontax għal nuqqas ta’ karattru sostanzjali.

Għal nuqqasijiet ta’ karattru sostanzjali bis-servizz tagħna, inti intitolat: (1) li tikkanċella l-ordni tas-servizz tiegħek magħna; u (2) għal rifużjoni għall-porzjon mhux użat, jew għal kumpens għall-valur imnaqqas tiegħu. Inti wkoll intitolat li tiġi kkumpensat għal kwalunkwe telf jew ħsara oħra raġonevolment prevedibbli. Jekk in-nuqqas ma jkunx ta’ karattru sostanzjali inti intitolat li l-problemi bis-servizz jitranġawlek fi żmien raġonevoli u, jekk dan ma jsirx, li tikkanċella l-ordni ta’ servizz tiegħek u tikseb rifużjoni għall-porzjon mhux użat.

Apple tista’ tuża partijiet jew prodotti li huma magħmula minn partijiet ġenwini ta’ Apple ġodda u/jew li ntużaw qabel u li jkunu ġew ittestjati għar-rekwiżiti funzjonali ta’ Apple u għaddew sakemm jiġu rrispettati l-liġijiet applikabbli. Inti tirrikonoxxi li t-tiswija tal-prodotti tista’ tirriżulta f’telf tad-data. Dan ma jaffettwax id-drittijiet tiegħek skont il-liġi tal-konsumatur fir-rigward ta’ aspetti oħra tas-servizzi ta’ tiswija mwettqa fuq l-apparat tiegħek taħt din il-garanzija.

Il-Finlandja: Għall-konsumaturi Finlandiżi, id-drittijiet skont dan il-Ftehim huma b’żieda mad-drittijiet statutorji tal-konsumatur skont id-dispożizzjonijiet stabbiliti fl-Att Finlandiż dwar il-Protezzjoni tal-Konsumatur (38/1978, kif emendat).

In-Norveġja: Għall-konsumaturi Norveġiżi d-drittijiet skont dan il-Ftehim huma b’żieda mad-drittijiet statutorji tiegħek skont l-Att Norveġiż dwar is-Servizzi tas-Snajja’ għall-Konsumaturi (håndverkertjenesteloven) u/jew l-Att Norveġiż dwar ix-Xiri mill-Konsumatur (forbrukerkjøpsloven), inkluż id-dritt tiegħek li tuża l-itwal perjodu ta’ pretensjoni, jiġifieri fi żmien sentejn mit-tiswija jew ix-xiri.

3.2 Ċaħda tal-Garanzija. SA FEJN PERMESS MIL-LIĠI, IL-GARANZIJI ESPRESSI, IL-KUNDIZZJONIJIET U R-RIMEDJI STABBILITI F’DAN IL-FTEHIM HUMA ESKLUSSIVI U JIEĦDU POST IL-GARANZIJI, KUNDIZZJONIJIET, TERMINI, IMPENJI, OBBLIGI RAPPREŻENTAZZJONIJIET OĦRA KOLLHA, KEMM BIL-FOMM KIF UKOLL BIL-MIKTUB, STATUTORJI, ESPRESSI JEW IMPLIĊITI. SA FEJN PERMESS MIL-LIĠI, APPLE SPEĊIFIKAMENT TIĊĦAD U TESKLUDI KULL GARANZIJA, KUNDIZZJONI, TERMINU, IMPENN, OBBLIGU U RAPPREŻENTAZZJONI STATUTORJA U IMPLIĊITA RELATATA MA’ JEW LI TIRRIŻULTA B’XI MOD MINN DAN IL-FTEHIM, INKLUŻA KWALUNKWE GARANZIJA JEW KUNDIZZJONI TA’ MERKANTIBBILTÀ, KWALITÀ SODISFAĊENTI, ĦSIEB, ĦILA JEW IDONEITÀ GĦAL GĦAN PARTIKOLARI.

3.3 Limitazzjoni tar-Responsabbiltà.JEKK INTI KONSUMATUR, JISTA’ JKOLLOK ĊERTI DRITTIJIET ADDIZZJONALI FIR-RIGWARD TA’ SERVIZZI U PRODOTTI PPROVDUTI SKONT DAN IL-FTEHIM. JEKK JOGĦĠBOK IRREFERI GĦALL-AWTORITÀ TAL-KONSUMATUR LOKALI TIEGĦEK GĦAL AKTAR INFORMAZZJONI DWAR ID-DRITTIJIET TIEGĦEK. JEKK M'INTIX KOPERT MINN DAWN ID-DRITTIJIET, APPLE MA TAĊĊETTAX RESPONSABBILTÀ LIL HINN MIR-RIMEDJI STABBILITI HAWN, INKLUŻA IMMA MHUX LIMITATA GĦAL KWALUNKWE RESPONSABBILTÀ GĦAL PRODOTT MHUX DISPONIBBLI GĦALL-UŻU, PROFITTI MITLUFA, TELF TA’ NEGOZJU JEW DATA JEW SOFTWARE MITLUFA, KORROTTI JEW KOMPROMESSI, JEW IL-PROVVISTA TA’ SERVIZZI. ĦLIEF KIF PREVIST ESPRESSAMENT HAWNHWEKK, APPLE MHIX SE TKUN RESPONSABBLI GĦALL-EBDA DANNU KONSEGWENZJALI, SPEĊJALI, INDIRETT, JEW PUNITTIV, ANKE JEKK TIĠI AVŻATA BIL-POSSIBILITÀ TA’ TALI DANNI, JEW GĦAL KULL TALBA MINN PARTIJIET TERZI. INTI TAQBEL LI GĦAL KWALUNKWE RESPONSABBILTÀ RELATATA MAX-XIRI TA’ PRODOTT, APPLE MHIX SE TKUN RESPONSABBLI JEW TWIEĠEB GĦAL KWALUNKWE AMMONT TA’ DANNI ’L FUQ MILL-AMMONT TAL-ORDNI TIEGĦEK. KAWŻI TAL-KONSUMATUR, IR-RESPONSABBILTÀ GĦAL (1) MEWT U KORRIMENT PERSONALI U (2) FRODI TISTA’ TKUN USA’ MINN TELF IKKAWŻAT MIN-NEGLIĠENZA U F’TALI KAŻIJIET APPLE MA TFITTIXX LI TESKLUDI DIN IR-RESPONSABBILTÀ.

3.4 Xi stati, provinċji u ġuriżdizzjonijiet ma jippermettux l-esklużjoni jew il-limitazzjoni ta’ danni inċidentali jew konsegwenzjali jew esklużjonijiet jew limitazzjonijiet fuq it-tul ta’ garanziji jew kundizzjonijiet impliċiti, għalhekk dawn il-limitazzjonijiet jew esklużjonijiet jistgħu ma japplikawx għalik. Il-garanzija espressa limitata tagħtik drittijiet legali speċifiċi, u jista’ jkollok ukoll drittijiet oħra li jvarjaw skont l-istat, il-provinċja jew il-ġuriżdizzjoni.

Il-Ġappun: Minkejja kwalunkwe terminu ieħor f’dan il-Ftehim, jekk japplika l-Att dwar il-Kuntratti tal-Konsumatur tal-Ġappun, termini li jillimitaw ir-responsabbiltà ta’ Apple għal danni li jirriżultaw minn ksur tal-kuntratt jew delitt imwettaq minn Apple m’għandhomx japplikaw jekk tali dannu jkun dovut għal kondotta ħażina intenzjonata jew negliġenza serja minn Apple.

4. Kontroll tal-Esportazzjoni. Inti ma tistax tuża jew b’xi mod ieħor tesporta jew tesporta mill-ġdid il-prodotti sservisjati ħlief kif awtorizzat mil-liġijiet tal-ġuriżdizzjoni li fiha nkisbu l-prodotti. B’mod partikolari, iżda mingħajr limitazzjoni, il-prodotti ma jistgħux jiġu esportati jew esportati mill-ġdid bi ksur tal-liġijiet tal-esportazzjoni, inkluż jekk applikabbli l-esportazzjoni jew l-esportazzjoni mill-ġdid lejn kwalunkwe pajjiż soġġett għal embargo mill-Istati Uniti jew lil xi ħadd fuq il-lista ta’ Ċittadini b’Deżinjazzjoni Speċjali tad-Dipartiment tat-Teżor tal-Istati Uniti. jew il-Lista ta’ Persuni Miċħuda jew il-Lista ta’ Entitajiet Miċħuda tad-Dipartiment tal-Kummerċ tal-Istati Uniti. Inti tiddikjara li ma tinsabx f’xi pajjiż jew fuq xi lista fejn il-provvista ta’ prodott lilek tikser il-liġi applikabbli. Taqbel ukoll li mhux se tuża prodotti għal xi skop ipprojbit mil-liġi applikabbli.

5. Ġenerali.

5.1 Żbalji Tipografiċi. Apple mhix responsabbli għal żbalji tat-tipa. Apple tirriżerva d-dritt li tikkanċella kwalunkwe ordni li tkun għamilt jekk kien hemm żball tat-tipa dwar il-prezz jew id-disponibbiltà ta’ kwalunkwe oġġett li ordnajt meta għamilt l-ordni.

5.2 Bdil fit-Termini. Apple tirriżerva d-dritt li tibdel dan il-Ftehim fi kwalunkwe ħin, soġġett għal-liġi. Bidla ma taffettwax servizzi li diġà bdew.

5.3 Kanċellazzjoni. Billi taċċetta l-ordni tas-servizz, inti tagħti kunsens espliċitu li Apple tibda s-servizz u tirrikonoxxi li ma tistax tikkanċella l-ordni tas-servizz u ma tistax teżerċita d-dritt tal-irtirar mill-kuntratt ladarba s-servizz ikun twettaq.

5.4 Bidliet fil-Prodott/Servizz. Apple tista’ tagħmel bidliet fi kwalunkwe prodott jew servizz offrut online, jew fil-prezzijiet applikabbli għal kwalunkwe prodott jew servizz bħal dan, fi kwalunkwe ħin, mingħajr avviż. L-informazzjoni pprovduta online fir-rigward ta’ prodotti u servizzi tista’ tkun skaduta, u Apple ma timpenjax ruħha li taġġorna l-informazzjoni pprovduta online fir-rigward ta’ tali prodotti u servizzi.

Għar-residenti tal-Ewropa: Qabel il-konklużjoni tal-kuntratt tiegħek ma’ Apple, se tingħata l-informazzjoni korretta dwar il-karatteristiċi ewlenin tal-prodotti jew is-servizzi, kif ukoll il-prezz u l-ispejjeż tal-kunsinna tal-prodotti jew is-servizzi inklużi t-taxxi kollha.

5.5 Aċċess online. Apple tirriżerva d-dritt li tagħmel xi ħaġa minn dawn li ġejjin, fi kwalunkwe ħin, mingħajr avviż: (1) li timmodifika, tissospendi jew ittemm l-operat ta’ jew l-aċċess għall-paġni online tagħha, jew għal kwalunkwe porzjon tas-sit online tagħha, għal kwalunkwe raġuni; (2) li timmodifika jew tibdel il-paġni online tagħha, jew kwalunkwe porzjon minnhom, u kwalunkwe politika jew terminu applikabbli; u (3) li tinterrompi l-operat tas-sit online tagħha, jew kwalunkwe porzjon minnu, kif meħtieġ biex twettaq manutenzjoni ta’ rutina jew mhux ta’ rutina, korrezzjoni ta’ żbalji, jew bidliet oħra.

5.6 Liġi Regolatorja. Il-liġijiet tal-pajjiż fejn ordnajt servizz jew prodott jirregolaw dan il-Ftehim, ħlief kif deskritt b’mod ieħor fit-tabella tal-Varjazzjoni bejn il-Pajjiżi, hawn taħt.

5.7 Ebda Bidliet fil-Ftehim. L-ebda impjegat jew aġent ta’ Apple ma għandu l-awtorità li jvarja kwalunkwe wieħed mit-termini u l-kundizzjonijiet li jirregolaw kwalunkwe tranżazzjoni.

5.8 Termini Mhux Infurzabbli. Jekk xi wieħed mit-termini msemmija hawn fuq jinstab minn qorti jew tribunal ieħor ta’ ġuriżdizzjoni kompetenti li huwa null jew mhux infurzabbli, dan ma jaffettwax id-dispożizzjonijiet li jifdal ta’ dan il-Ftehim. Tali terminu għandu jkun limitat jew eliminat sal-limitu minimu meħtieġ u sostitwit b’dispożizzjoni valida li tinkorpora bl-aħjar mod l-intenzjoni tat-terminu, sabiex it-termini jibqgħu fis-seħħ u jkollhom effett sħiħ.

5.9 Rinunzji. In-nuqqas ta’ Apple li tinsisti fuq jew tinforza t-twettiq strett ta’ dan il-Ftehim m’għandux jiġi interpretat bħala rinunzja minn Apple ta’ kwalunkwe dispożizzjoni jew kwalunkwe dritt li għandha biex tinforza dawn il-politiki, u lanqas m’għandu kwalunkwe kors ta’ kondotta bejn Apple u int jew xi parti oħra jitqies li jimmodifika kwalunkwe dispożizzjoni ta’ dawn it-termini.

5.10 Ebda Benefiċjarju Terz. Dawn it-termini m’għandhomx jiġu interpretati jew mifhuma li jagħtu xi drittijiet jew rimedji lil xi partijiet terzi.

5.11 Prodotti/Servizzi Internazzjonali. Apple tipprovdi aċċess għad-data internazzjonali ta’ Apple u, għalhekk, jista’ jkun fiha referenzi jew referenzi inkroċjati għal prodotti, programmi u servizzi ta’ Apple li mhumiex imħabbra f’pajjiżek. Tali referenza ma timplikax li Apple f’pajjiżek għandha l-intenzjoni li tħabbar tali prodotti, programmi jew servizzi.

5.12 Protezzjoni tad-Data. Inti taqbel u tifhem li huwa neċessarju li Apple tiġbor, tipproċessa u tuża d-data tiegħek sabiex tipproċessa l-bejgħ, twettaq is-servizz u tikkonferma l-konformità mal-liġijiet applikabbli. Apple se żżomm u tuża d-data personali tiegħek sabiex tippermettilek teżerċita d-drittijiet tiegħek li jirriżultaw mis-servisjar tal-prodott ta’ Apple tiegħek u għal skopijiet ta’ kwalità u relatati mas-servizz. Biex teżerċita d-drittijiet u l-għażliet tal-privatezza tiegħek, żur il-Portal tal-Privatezza ta’ Apple fuq privacy.apple.com jew żur apple.com/legal/privacy/contact jekk il-Portal tal-Privatezza ma jkunx disponibbli fir-reġjun tiegħek. Għal aktar dettalji dwar il-prattiki tal-privatezza ta’ Apple, jekk jogħġbok ara l-Portal tal-Privatezza tagħna fuq apple.com/legal/privacy.

5.13 Sottokuntratturi. Apple tista’ tqabbad b’sottokuntrattar lil fornituri oħra tas-servizz għas-servisjar tal-prodott tiegħek.

5.14 Kunflitt ta’ Termini; Servizzi bl-Ingliż. F’każ ta’ kunflitt bejn traduzzjonijiet differenti ta’ dawn it-termini, it-traduzzjoni bl-Ingliż tipprevali. Ċerti servizzi ta’ appoġġ u dokumenti relatati jistgħu jkunu disponibbli bl-Ingliż biss.

5.15 Ftehim Sħiħ; Forza Maġġuri. Dan il-Ftehim jirregola t-tranżazzjonijiet tas-servizzi aċċettati minn Apple. L-ebda terminu jew kundizzjoni oħra bil-fomm jew bil-miktub ma tapplika. Apple ma tawtorizza l-ebda varjazzjoni jew modifika ta’ dan il-Ftehim. Apple mhix responsabbli għall-ebda nuqqas jew dewmien fit-twettiq ta’ servizz jew fil-kunsinna tal-prodott tiegħek jew tal-prodott ta’ sostituzzjoni li jkun dovut għal ġrajjiet barra mill-kontroll raġonevoli ta’ Apple.

5.16 Entitajiet ta’ Apple

Għall-finijiet ta’ dan il-ftehim, l-entità ta’ Apple hija elenkata fit-tabella hawn taħt u tiddependi minn fejn tkun residenti:

6. Varjazzjoni bejn il-Pajjiżi

A)Pajjiżi tal-UE/ŻEE

Informazzjoni għall-Konsumatur dwar is-Soluzzjoni Online tat-Tilwim (skont ir-Regolament (UE) Nru 524/2013): Jekk inti konsumatur u dħalt f’dan il-ftehim ma’ Apple online, għas-soluzzjoni tat-tilwim għandek il-possibbiltà ta’ proċedura ta’ soluzzjoni online tat-tilwim barra l-qorti. Il-Kummissjoni Ewropea stabbiliet pjattaforma għas-soluzzjoni online tat-tilwim, li tista’ tiġi aċċessata fuq http://ec.europa.eu/consumers/odr/. Apple mhix meħtieġa u m’għandhiex l-intenzjoni li tipparteċipa fis-soluzzjoni online tat-tilwim.

Informazzjoni għall-Konsumatur dwar Soluzzjoni Alternattiva tat-Tilwim għall-Klijenti: Apple mhix meħtieġa u m’għandhiex l-intenzjoni li tipparteċipa fis-soluzzjoni alternattiva tat-tilwim.

B) L-Istati Uniti tal-Amerika

i) Interpretazzjoni. Id-dispożizzjonijiet ta’ din it-taqsima se jikkontrollaw jekk ikunu inkonsistenti ma’ kwalunkwe dispożizzjoni ta’ dan il-Ftehim.

ii) AVVIŻI LILL-KONSUMATURI F’CALIFORNIA BISS

a) Stima għat-tiswijiet, kif meħtieġa (taqsima 9844 tal-Kodiċi tan-Negozju u l-Professjonijiet ta’ California), għandha tingħata lill-klijent min-negozjant tas-servizz bil-miktub. In-negozjant tas-servizz ma jistax jitlob xogħol għal xogħol magħmul jew partijiet fornuti li jaqbżu l-istima mingħajr il-kunsens minn qabel tal-klijent. Fejn ipprovdut bil-miktub, in-negozjant tas-servizz jista’ jitlob ħlas raġonevoli għas-servizzi pprovduti fid-determinazzjoni tan-natura tal-ħsara bi tħejjija ta’ stima bil-miktub għat-tiswija. Għal informazzjoni, ikkuntattja lill-Uffiċċju tat-Tiswijiet Elettroniċi u tal-Apparati, id-Dipartiment tal-Affarijiet tal-Konsumatur, Sacramento, CA 95814, l-Istati Uniti.


b) Ix-xerrej ta’ dan il-prodott f’California għandu d-dritt li dan il-prodott jiġi sservisjat u msewwi matul il-perjodu tal-garanzija. Il-perjodu ta’ garanzija se jiġi estiż għan-numru ta’ ġranet sħaħ li l-prodott ma jkunx f’idejn ix-xerrej għat-tiswijiet taħt il-garanzija. Jekk ikun hemm difett matul il-perjodu tal-garanzija, il-garanzija ma tiskadix qabel ma d-difett jiġi rranġat. Il-perjodu tal-garanzija jiġi estiż ukoll jekk it-tiswijiet taħt il-garanzija ma jkunux saru minħabba dewmien ikkawżat minn ċirkostanzi lil hinn mill-kontroll tax-xerrej, jew jekk it-tiswijiet taħt il-garanzija ma rrimedjawx id-difett u x-xerrej jinnotifika lill-manifattur jew lill-bejjiegħ bil-fatt li t-tiswijiet ma ħadmux fi żmien 60 jum wara li jkunu tlestew. Jekk, wara numru raġonevoli ta’ tentattivi, id-difett ma jkunx ġie rranġat, ix-xerrej jista’ jirritorna dan il-prodott għal sostituzzjoni jew rifużjoni soġġetta, f’kull każ, għal tnaqqis ta’ ħlas raġonevoli għall-użu. L-estensjoni taż-żmien ma taffettwax il-protezzjoni jew ir-rimedji li x-xerrej għandu skont liġijiet oħra.

c) Taxxa fuq il-Bejgħ. Minbarra l-prezz tax-xiri tiegħek, Apple tiċċarġjalek it-taxxa fuq il-bejgħ fuq it-tranżazzjonijiet applikabbli skont l-indirizz tal-kunsinna tiegħek u r-rata tat-taxxa fuq il-bejgħ fis-seħħ fiż-żmien meta l-ordni tiegħek tiġi ffatturata. Jekk ir-rata tat-taxxa fuq il-bejgħ għall-istat li lejh tiġi kkunsinnata l-ordni tiegħek tinbidel qabel ma jintbagħat il-prodott, tapplika r-rata fis-seħħ fiż-żmien meta tiġi ffatturata l-ordni tiegħek. Il-prova tax-xiri li Apple tibgħatlek tinkludi kwalunkwe taxxa fuq il-bejgħ applikabbli.

110923 Service Terms Maltese v12.3